Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Me 2015

Ke Matapula‵pula Koutou—E Manako Satani ke Folo Koe!

Ke Matapula‵pula Koutou—E Manako Satani ke Folo Koe!

“Ke . . . matapula‵pula koutou! A te otou fili ko te Tiapolo e livaliva sāle e pelā me se leona fekai, o salasala ke folo ne ia se tino.”—1 PE. 5:8.

1. Fakamatala mai me ne fai pefea se tino faka-te-agaga mo fai a Satani.

I SE taimi e tasi, ne maua ne ia se tulaga ‵lei i mua o Ieova. E ui i ei, ne kamata o manako a te tino faka-te-agaga tenei ke tapuaki atu a tino ki a ia. I lō te tapale keatea ne ia te manakoga sē ‵lei tenā, ne tausi ne ia i tena loto ke oko loa ki te taimi ko fanau mai ei te agasala. (Iako. 1:14, 15) E iloa ne tatou me i te tino faka-te-agaga tenā ko Satani, telā ne “seki tumau i te munatonu.” Ne ‵teke atu a ia ki a Ieova kae ne taku a ia ko te “tamana foki o te loi.”—Ioane 8:44.

2, 3. Se a te mea e fakaasi mai i pati konei, “Satani,” “Tiapolo,” “gata,” mo te “talako” e uiga ki te ‵toe fili sili o Ieova?

2 Talu mai tena ‵tekeatuga, ne fakatalitonu atu ei i a Satani ko te ‵toe fili sili o Ieova, kae e mautinoa me ko se fai a ia mo taugasoa o tino. E fakaasi mai i igoa kolā ne tuku atu ki a Satani a te lasi o tena fakamaseiga ne fai. A Satani e fakauiga ki se “Tino ‵Teke,” e fakaasi mai i ei me i te tino faka-te-agaga tenā e se ‵lago atu ki te pulega sili a te Atua; i lō te fai penā, e takalialia a ia ki te pulega tenā kae ‵teke atu ki ei. Mai mea katoa, e manako eiloa a Satani ke lavea ne ia te fakagataatuga o te pulega sili a Ieova.

3 E pelā mo te fakamatalaga i te Fakaasiga 12:9, a Satani ne taku foki ki te Tiapolo, e fakauiga ki te “Tino Fatufatu.” E fakamasaua mai i te mea tenei me ne fakamasei ne Satani a Ieova me ne taku ne ia a Ieova e pelā me se tino loi. A te pati ko te “gata muamua” e  fakamasaua mai ki a tatou e uiga ki te aso fakafanoanoa i Etena i te taimi ne fakaaoga ei ne Satani se gata ke fakaloiloi ne ia a Eva. A te tugapati ko te “talako lasi” e fakamasaua mai ki a tatou e uiga ki mafaufauga o se manu fekai kae fetaui ‵lei mo te manakoga matagā o Satani ke taofi aka te fuafuaga a Ieova kae fakaseai Ana tino.

4. Se a te mea ka fakamatala mai i te mataupu tenei?

4 E manino ‵lei, me ne fakasae aka ne Satani se mea fakamataku ki te ‵tou fakamaoni. Mō se pogai ‵lei, e fakamalosi mai te Tusi Tapu, penei: “Ke ‵poto kae matapula‵pula koutou. A te otou fili ko te Tiapolo e livaliva sāle e pelā me se leona fekai, o salasala ke folo ne ia se tino.” (1 Pe. 5:8) Ona ko te fakamatalaga tenā, ka fakamatala mai ne te mataupu tenei a uiga e tolu o Satani kolā e faka‵mafa mai i ei a te manakoga ke fakaeteete i te fili sē fakamaoni tenei o Ieova mo Ana tino.

E MALOSI ‵KI A SATANI

5, 6. (a) Taku mai ne fakaakoakoga e fakaasi mai ei me i tino faka-te-agaga e “ma‵losi.” (e) I te auala fea e fai ei a Satani mo fai te “māfuaga o te mate”?

5 A tino faka-te-agaga kolā e taku ki agelu e “ma‵losi” kae “‵mana.” (Sala. 103:20) E ma‵luga atu fakafia i tino kae sili fakafia atu foki te lotou ma‵losi. Kae e fakaaoga faka‵lei eiloa ne agelu fakamaoni a te ‵mana o te Atua. E pelā me se fakaakoakoga, ne tamate katoa ne se agelu e tokotasi a Ieova a sotia Asulia e toko 185,000—se mea faigata ke fai fua ne se tino e tokotasi io me se kautau. (2 Tupu 19:35) I te suā taimi, ne fakaaoga ne se agelu tena malosi mo tena atamai ke faka‵sao ei a apositolo a Iesu mai te falepuipui. Ne ‵tala ne te agelu tenei e aunoa mo se mea ne tupu a mataloa o te falepuipui, faka‵sao a te kau apositolo, kae toe ‵loka a mataloa i tafa o latou—kae ko leoleo ne ‵nofo atu katoa loa i konā!—Galu. 5:18-23.

6 E tiga eiloa e fakaaoga ne tino faka-te-agaga fakamaoni konei olotou ‵mana mō mea ‵lei, e fakaaoga eiloa ne Satani tena malosi mō mea ma‵sei. Kae e malosi ‵ki eiloa a ia! E fakasino atu te Tusi Tapu ki a ia e pelā me ko “te pule o te lalolag tenei” mo te “atua o te olaga masani tenei.” (Ioa. 12:31; 2 Koli. 4:4) A Satani te Tiapolo ko te “māfuaga o te mate.” (Epe. 2:14) E se fakauiga te mea tenei me e tamate ‵tonu eiloa ne ia a tino. Kae ko te agaga tatino o Satani ne pokotia i ei a te lalolagi kātoa tenei. E se gata i ei, ona ko te mea ne talitonu a Eva ki te loi o Satani kae ko Atamu ne seki fakalogo ki te Atua, ne faka‵solo atu ei te agasala mo te mate ki luga i tino katoa. (Loma 5:12) I te auala tenā, ne fai ei a te Tiapolo mo fai te “māfuaga o te mate.” Tenā te pogai ne taku ne Iesu a ia ki se “tino tatino.” (Ioa. 8:44) Mā‵faga o fili malosi ko Satani!

7. Ne fakaasi mai pefea ne temoni a te lotou ma‵losi?

7 Kafai e ‵teke ne tatou a Satani, e se ‵lago atu tatou ki a ia e pelā foki mo tino katoa kolā e ‵kau ki a ia i te mataupu e uiga ki te pulega sili i te lagi mo te lalolagi kātoa. E aofia i tino konā, ko tino faka-te-agaga ‵teke io me ko temoni kolā e se mafai o lau. (Faka. 12:3, 4) I taimi katoa, ne fakaasi atu ne temoni a te lotou malosi, ke fakalogo‵mae atu ki a latou kolā e fakasaua ne latou. (Mata. 8:28-32; Male. 5:1-5) Ke mo a ma manatu mā‵ma ki te malosi o vaegā agelu ma‵sei penā io me ko te “pule o temoni.” (Mata. 9:34) E aunoa mo te fesoasoani o Ieova, e se mafai eiloa o manumalo tatou i te ‵tou taua mo Satani.

E UIGA SAUA A SATANI

8. (a) Se a te fakamoemoega o Satani? (Ke onoono ki te ata i te kamataga.) (e) Mai tau kilokiloga, e fakaata mai pefea ne te lalolagi tenei a te uiga sauā o Satani?

8 Ne faka‵pau ne te apositolo ko Petelu a Satani e pelā me se “leona fekai.” E ‵tusa mo se fakamatalaga e tasi, a te pati Eleni telā ne ‵fuli ki te “fekai” e fakasino atu ki te “‵tagi o  se manu fekai telā ko tai mate i te fiakai.” Ko oko eiloa i te fetaui ‵lei o te fakamatalaga tenā mo te uiga saua o Satani! Faitalia eiloa a te nofo atu o te lalolagi kātoa mai lalo i tena malosi, e manako faeloa a Satani ke folo ne ia a tino e tokouke. (1 Ioa. 5:19) E kilo atu a ia ki te lalolagi e pelā me se mea e “kamata ki ei tena fiakaiga.” Kae ko te ‵tonuga loa, ko saga tonu atu nei a Satani ki te “‵kaiga tonu” io me ko te mea e manako malosi a ia ki ei—ko te ‵toega o te kau fakaekegina, kolā e ‵kau fakatasi atu mo olotou taugasoa, ko “nisi mamoe.” (Ioa. 10:16; Faka. 12:17) Ko te fakamoemoega eiloa o Satani ke folo ne ia a tino o Ieova. A te gasolo aka ki luga o fakasauaga kolā ne fakaoko atu ne ia ki soko o Iesu mai te senitenali muamua ke oko mai ki aso nei se fakamaoniga e tasi o tena uiga saua.

9, 10. (a) Ne a taumafaiga ne fai ne Satani ke taofi aka ei te fuafuaga a te Atua ki te fenua o Isalaelu? (Taku mai ne fakaakoakoga.) (e) Se a te pogai fakapito ne saga tonu atu ei a Satani ki Isalaelu mua? (i) Ne a ou mafaufauga e uiga ki lagonaga o te Tiapolo māfai ko fai ne se tavini a Ieova se agasala matagā i aso nei?

9 I ana taumafaiga ke taofi te fuafuaga a te Atua, ne fakaasi mai ne Satani tena saua i se isi auala aka. A te leona fiakai e seai sena lagonaga alofa ki manu kolā e tamate ne ia. E seai se lagonaga alofa e fakaasi ne ia mai mua o tamate ne ia io me e loto salamo māfai ko oti ne tamate ne ia se manu. I se auala tai ‵pau, e seai eiloa se loto alofa o Satani ki tino kolā e taumafai ke folo ne ia. E pelā me se fakaakoakoga, mafaufau ki te uke o taimi ne nofo atu faeloa a Satani te Tiapolo i se koga sē lavea i te taimi ne tosina atu ei a tino Isalaelu ki faifaiga fakatauavaga sē ‵tau mo te kaimanako. I te taimi e faitau ei koe ki ikuga fakafanoanoa ne oko ki a Semeli te tagata finalalolagi mo Keasi te tagata kaimanako, e mata, e “lavea” ne koe a te iku manuia o taumafaiga a te leona fekai?—Nume. 25:6-8, 14, 15; 2 Tupu 5:20-27.

E fiafia a Satani māfai e fai ne se tavini a Ieova a te agasala (Ke onoono ki te palakalafa e 10)

10 E isi se pogai fakapito ne saga atu ei a Satani ki te kau Isalaelu mua. Me ne ‵tau o sae mai i te fenua o Isalaelu a te Mesia—ko te tino eiloa telā ka tuki pala ne ia Satani kae fakamaluga aka ne ia te pulega sili a Ieova. (Kene. 3:15) Ne seki manako a Satani ke manuia te kau Isalaelu, kae ne saua malosi a ia i ana taumafaiga ke fakalai‵lai latou ki te faiga o agasala. Sa mafaufau me ne fanoanoa eiloa a Satani i te taimi ne mulilua ei a  Tavita io me ne alofa a ia ki a Mose i te taimi ne seki toe fetaui ‵lei ei a te pelofeta tenā ke ulu atu ki loto i te Fenua o te Folafolaga. E ‵kese mai i ei, e mautinoa ‵lei me e fiafia malosi atu a Satani māfai e aofia a tavini a te Atua i se agasala matagā. E tonu, e fakaaoga eiloa ne Satani a taimi kolā e manumalo ei a ia ke fakaitaita atu ki a Ieova.—Faata. 27:11.

11. Se a te manakoga tonu o Satani i ana taumafaiga ne fai ki a Sala?

11 Ne kaitaua malosi eiloa a Satani ki te gafa telā e sae mai ei te Mesia. E pelā me se fakaakoakoga, mafaufau ki mea ne ‵tupu mai tua malie o te faiatuga ki a Apelaamo me ka fai tena gafa pelā me se “malo lasi.” (Kene. 12:1-3) I te taimi ne nofo ei a Apelaamo mo Sala i Aikupito, ne manako a Falao ke avatu a Sala ki tena palesi—mo te loto talitonu me e mafai o fai tou fafine mo fai tena avaga. E ui i ei, ne saga atu a Ieova kae fakasao ne ia a Sala mai te tulaga fakafanoanoa tenei. (Faitau te Kenese 12:14-20.) Mai tua malie fua o te fanauga a Isaako, ne tupu foki se mea tai ‵pau penā i Kela. (Kene. 20:1-7) E mata, ne aofia a Satani i mea konei ne ‵tupu? E mata, ne fakamoemoe a ia me i a Sala, telā ne tiaki ne ia te fa‵kai maumea o Ulo ke nofo i faleie, ka mafai o fakaloiloigofie ne te ‵gali o palesi o Falao mo Apimeleko? E mata, ne mafaufau a Satani me ka fakatogafiti ne Sala tena avaga—mo Ieova—kae mulilua? E seai ne pati a te Tusi Tapu penā, kae e isi ne pogai ‵lei ke tali‵tonu tatou me ne mafai eiloa o fiafia te Tiapolo ke se fetaui ‵lei a Sala ke fanau mai ne ia se tamaliki telā ko oti ne folafola mai. Ko seai lele eiloa se loto fanoanoa i a Satani māfai e fakamasei a te fakaipoipoga gali a te fafine, te igoa, mo te tulaga i mua o Ieova. Ko oko eiloa i te saua o Satani!

12, 13. (a) Ne fakaasi atu pefea ne Satani tena uiga saua mai tua o te fanauga a Iesu? (e) Ne a ou mafaufauga e uiga ki lagonaga o Satani ki tama‵liki kolā e a‵lofa ki a Ieova kae taumafai o tavini atu ki a Ia i aso nei?

12 Ne fanau a Iesu i se fia senitenali mai tua o Apelaamo. Ke mo a ma mafaufau me i te mafaufauga o Satani i te tamaliki tenei e tinogali, e fia ‵sai atu ki ei, io me tāua ‵ki. Ikai, ne iloa ‵lei ne Satani me i te tamaliki tenei ne fanau mai ko te Mesia telā ne folafola mai. E tonu, a Iesu ko te vaega muamua o te fanau a Apelaamo, ko te tino telā ka “lepe ne ia a galuega a te Tiapolo” fakamuli. (1 Ioa. 3:8) E mata, ka fai ne Satani se fakamasakoga me se mea matagā māfai e tamate te tamaliki? E seai lele eiloa se uiga alofa i a Satani. Ne gasuesue fakavave eiloa a Satani e aunoa mo te fakatalave o fai se mea ki te tamaliki ko Iesu. I se auala fea?

13 Ne fanoanoa ‵ki eiloa te tupu ko Helota i te taimi ne fesili atu ei a tino iloilo fetu e uiga “ki te Tupu o Iutaia telā ko oti ne fanau,” kae ne manako eiloa a ia o tamate tou tagata. (Mata. 2:1-3, 13) Ke fakataunu te mea tenā, ne fai tena fakatonuga ke tamate a tamaliki tāgata katoa kolā ko taki lua tausaga o fanaifo ki lalo kolā e ‵nofo i Petelema mo fa‵kai ‵pili mai. (Faitau te Mataio 2:13-18.) Ne sao eiloa a Iesu mai te tamatega tenā, kae se a te mea e fakaasi mai i te mea tenei e uiga ki te ‵tou fili ko Satani? E fakamaoni mai ei me e se fakatāua ne te Tiapolo a ola o tino. E mautinoa eiloa me e seai sena alofa ki tama‵liki. Se mea tonu loa i a Satani se “leona fekai.” Ke mo a ma manatu mā‵ma ki tena uiga saua!

A SATANI SE TINO FAITOGAFITI

14, 15. Ne “fakapouli” pefea ne Satani a mafaufau o tino sē tali‵tonu?

14 Ona ko tena faitogafiti, e mafai loa ne Satani o ‵fuli keatea ne ia a tino mai te Atua alofa, ko Ieova. (1 Ioa. 4:8) E auala i ana uiga faitogafiti, e taofi eiloa ne Satani a tino ke mo a ma “iloa ‵lei ne latou olotou manakoga faka-te-agaga.” (Mata. 5:3) “Ko oti ne fakapouli olotou mafaufau ne te atua o te olaga masani tenei, ko te mea ke se maina atu a te ‵malu o te tala ‵lei e uiga ki a Keliso, telā ko te fakatusa o te Atua.”—2 Koli. 4:4.

 15 A te auala faitogafiti e tasi e fakaaoga ne Satani ko lotu ‵se. Ko oko loa i ana fiafia ke lavea ne ia a tino e tapuaki atu ki olotou tupuga, mea o te natula, io me ki manu—so se tino io me ko mea i tafa o Ieova, ‘telā e manako ke tapuaki atu fua ki ei’! (Eso. 20:5) E tokouke foki a tino kolā e mafau‵fau me i a latou e tapuaki faka‵lei atu ki te Atua koi taofi ‵mau loa ki talitonuga ‵se mo faifaiga fakalotu kolā e seai se aoga. E ‵tu atu eiloa latou i se tulaga fakaalofa, e pelā loa mo tino kolā ne faipati a Ieova e uiga ki ei penei: “Kaia e fakamāumāu i ei a otou tupe ki mea kolā e se fakamaliegina ki ei koutou? Kaia e fakamāumāu ei a otou peofuga kae koi fia‵kai eiloa a koutou? Faka‵logo mai ki a au, kae fai a te mea e fai atu ne au, kae ka fia‵fia a koutou ki mea‵kai tafasili i te ‵gali.”—Isa. 55:2.

16, 17. (a) Kaia ne fai atu ei a Iesu ki a Petelu penei: “Fano keatea, e Satani”? (e)  E mafai pefea o fakatogafiti tatou ne Satani ke mo a ma matapula‵pula?

16 E mafai foki o fakavalea ne Satani a tavini loto finafinau a Ieova. E pelā me se fakaakoakoga, mafaufau ki te mea ne tupu i te taimi ne fai atu ei a Iesu ki ana soko me i a ia ko pili o tamate. E seai se fakalotolotolua me ne fakatafa ne te apositolo ko Petelu a ia mo te loto ‵lei kae fai atu: “Te Aliki, ke alofa atu a te Atua ki a koe, ke mo a e oko ki a koe a mea konā.” Ne fapati ‵tonu atu a Iesu ki a Petelu penei: “Fano keatea, e Satani!” (Mata. 16:22, 23) Kaia ne fakaigoa ei ne Iesu a Petelu ki a “Satani”? Me ne iloa ne Iesu a mea ko pili o ‵tupu ki a ia. Ne oko mai te itula ka mate ei a ia pelā me se taulaga togiola kae fakamaoni atu ei i te Tiapolo se tino loi. I te ‵toe taimi tāua tenā i tala fakasolopito, e se tenā eiloa te taimi “ke alofa” a Iesu ki a ia eiloa. A te sē fakaeteete o Iesu, ko te mea telā ne manako a Satani ke fai ne ia.

17 I te taimi ko pili atu ei tatou ki te gataga o te olaga masei tenei, ko ‵nofo atu eiloa tatou i taimi faiga‵ta. E manako a Satani ke manatu ma‵mā tatou, ke “a‵lofa” tatou ki a tatou eiloa mai te fakagaligali aka ne tatou a ‵tou tulaga i te lalolagi nei, ko se matapula‵pula ei tatou. Ke mo a ma talia ke tupu se mea penā ki a koe! I lō te fai penā, “ke tumau i te matapula‵pula.” (Mata. 24:42) Ke mo a ma talitonu ki auala faitogafiti a Satani mai te mafaufau me koi ‵mao te gataga—io me ka se oko mai eiloa.

18, 19. (a) E taumafai pefea a Satani ke fakatogafiti ne ia tatou e uiga ki te auala e mafau‵fau ei tatou ki a tatou eiloa? (e) E mafai pefea o fesoasoani mai a Ieova ki a tatou ke tumau i te mataala kae matapula‵pula?

18 E taumafai a Satani o fakatogafiti tatou i te suā auala. E fai ne ia ke tali‵tonu tatou me i a tatou e se alofagina kae se mafai o fakamagalo ‵tou agasala i te kilokiloga a te Atua. A mea konā ne vaega katoa o auala faitogafiti a Satani. Tela la, ko oi e se alofa i te kilokiloga a Ieova? Ko Satani. Ko oi e se mafai o toe fakamagalogina? Ko Satani foki. Kae e fakatalitonu mai te Tusi Tapu, penei: “Me i te Atua e sē se tino sē amiotonu ko te mea ke puli i a ia otou galuega mo te alofa ne fakaasi atu ne koutou mō tena igoa.” (Epe. 6:10) E fiafia a Ieova ki ‵tou taumafaiga ke fakafiafia a ia, kae e se mafai o māumāu ‵tou taviniga ki a ia. (Faitau te 1 Kolinito 15:58.) Tela la, ke mo a ma fakavaleagina tatou ne auala faitogafiti o Satani.

19 E pelā mo te mea ne lavea ne tatou, a Satani e malosi, e uiga saua, kae faitogafiti. E mafai pefea o manumalo tatou i te ‵tou taua ki se fili telā e fakaitaita mai ki a tatou? E se mafai o tiaki lele tatou ne Ieova e aunoa mo te ‵lago mai. E akoako tatou ne tena Muna e uiga ki auala o Satani, kae e “maina ‵lei tatou i ana togafiti.” (2 Koli. 2:11) Kafai e malama‵lama tatou i auala o Satani, ka fai ei ke mataala kae matapula‵pula tatou. Kae e se lava fua i te iloa ne tatou a auala o Satani. E fai mai te Tusi Tapu: “‵Teke atu te Tiapolo, kae ka tele a ia keatea mai i a koutou.” (Iako. 4:7) Ka fakaasi mai i te suā mataupu a auala e tolu kolā e mafai o taua atu tatou ki a Satani kae ke manumalo i ei.