Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Apelila 2015

Auala e Akoako ne Toeaina a Nisi Taina ke Fetaui ‵Lei mō Tauliaga

Auala e Akoako ne Toeaina a Nisi Taina ke Fetaui ‵Lei mō Tauliaga

“Mea kola ne lagona ne koe mai i a au . . . ke tuku atu ki tāgata fakamaoni.”—2 TIMO. 2:2.

1. (a) Se a te mea ko leva ne iloa ne tavini a te Atua e uiga ki te faiga o akoakoga, kae e fakagalue aka pefea i aso nei? (e) Se a te mea ka sau‵tala tatou ki ei i te mataupu tenei?

KO LEVA ne iloa ne tavini a te Atua me i akoakoga e maua mai i ei te manuia. Ne fakamaopoopo ne Apelaamo “a tino tau katoa” ke fakasao a Lota—kae ne manuia eiloa a tāgata konā. (Kene. 14:14-16) I taimi o te tupu ko Tavita, a tino usu pese mō te fale o te Atua ne “fakaakoako faka‵lei” i te usuga o pese ki a Ieova kae ‵viki atu ki te Atua (1 Nofo. 25: 7) I aso nei, e aofia eiloa tatou i se taua faka-te-agaga ki a Satani mo ana temoni. (Efe. 6:11-13) E se gata i ei, e taumafai malosi eiloa tatou o avatu a vikiga ki a Ieova. (Epe. 13:15, 16) Tela la, e pelā mo tavini a te Atua i aso mua, e ‵tau o akoakogina tatou ko te mea ke manuia tatou. I loto i te fakapotopotoga, ne tuku atu ne Ieova ki toeaina a te tiute ke akoako atu a nisi tino. (2 Timo. 2:2) Ne a auala e fakaaoga ne toeaina atamai ke akoako atu a taina ke fetaui ‵lei mō te tausiga o te lafu?

FAKAMALOSI AKA A TE TINO AKOGA I TE FEITU FAKA-TE-AGAGA

2. A koi tuai o akoako atu se taina, se a te mea e manakogina ke fai ne toeaina, kae kaia?

2 E pelā me se toeaina, e mafai o fakatusa koe ki se tino fai fatoaga. A koi tuai o ‵toki a fuaga, e ‵tau o lavea ne te tino fai fatoaga  te tāua ke fakaopoopo a niutilisini ko te mea ke maumea te one. I se auala tai ‵pau, a koi tuai o akoako atu se taina telā e se na loa ko atamai, e manakogina ke iloa ne te toeaina te tāua ke fakaasi atu a nisi manatu fakamalosi loto i te Tusi Tapu ki te taina ko te mea ke saga tonu atu ki akoakoga kolā ka maua ne ia.—1 Timo. 4:6.

3. (a) E mafai pefea o fakaaoga ne koe a pati a Iesu i te Maleko 12:29, 30 i se sau‵talaga mo se tino akoga? (e) E aoga pefea a te ‵talo a se toeaina ki te tino akoga?

3 Ko te mea ke iloa aka a te lasi o te aoga o te munatonu e uiga ki te Malo ki mafaufauga mo faifaiga o se tino akoga, e mafai e ‵sili atu koe penei, ‘Ne fai pefea ne tau tukuatuga ki a Ieova ke ‵fuli te auala e fakaaoga ei tou olaga?’ E mafai o iku atu te fesili tenā ki se sau‵talaga aoga e uiga ki te fai o ‵tou taviniga tapu mo te loto kātoa. (Faitau te Maleko 12:29, 30.) Kāti i te fakaotiga o se sau‵talaga, e mafai ne koe o fai se ‵talo, o akai atu ki a Ieova ke tuku atu ki te tino akoga a te agaga tapu ke mafai o fakaoti tena akoakoga. Ko oko loa te fakamalosi loto ke lagona ne te taina me e aofia ne koe a ia i tau ‵talo telā e fai atu mo te loto kātoa!

4. (a) Taku mai ne fakaakoakoga i tala i te Tusi Tapu kolā e fakamalosi ei te gasolo ki mua o se tino akoga i te feitu faka-te-agaga. (e) Se a te fakamoemoega o toeaina māfai ko akoako ne latou a nisi tino?

4 I te kamataga o te akoakoga, mafaufau ki nisi tala i te Tusi Tapu kolā e mafai o fesoasoani atu ki te tino akoga ke lavea ne ia te tāua ke loto fiafia, fakatuagagina, kae loto maulalo. (1 Tupu 19:19-21; Nee. 7:2; 13:13; Galu. 18:24-26) A vaegā uiga penā e tāua ‵ki ki te tino akoga, e pelā eiloa mo te tāua o kaiao ki te one. E fai ei ke gasolo vave a ia ki mua i te feitu faka-te-agaga. E fai mai se toeaina mai Falani, ko Jean-Claude, penei: “A toku fakamoemoega tāua ko te fesoasoani atu ki se tino akoga ke mafaufau faka-te-agaga. E ‵sala ne au a taimi ke mafai ei o faitau fakatasi ne māua se tusi siki ke ‘lavea ‵lei’ ne te tino akoga a ‘mea fakaofoofogina’ e maua i te Muna a te Atua.” (Sala. 119:18) Ne a nisi auala ke fakamalosi aka ei se tino akoga?

TAKU ATU A FAKAMOEMOEGA FAKATASI MO POGAI AOGA

5. (a) Kaia e tāua ei a te sau‵tala mo se taina e uiga ki fakamoemoega faka-te-agaga? (e) Kaia e ‵tau ei o akoako ne toeaina a taina kolā koi talavou? (Ke onoono ki te fakamatalaga fakaopoopo.)

5 Ke fesili atu ki se tino akoga, ‘Ne a ou fakamoemoega faka-te-agaga?’ Kafai e seai ne ana fakamoemoega mautinoa, fesoasoani atu ki ei ke fakatoka se fakamoemoega e tasi telā e aoga kae mafai o kausaki atu ki ei. Taku atu ki ei se fakamoemoega tonu telā ne fakatoka ne koe, kae fakamatala atu mo te loto finafinau a te lasi o te fiafia ne maua ne koe i te taimi ne kausaki atu koe ki ei. Faitalia loa e mafai o foliga atu te mea tenei e pelā me se auala faigofie, kae e magoi ‵ki eiloa. Ne toe fakamasaua mai ne Victor, se toeaina kae se paenia foki i Afelika: “I te taimi koi talavou ei au, ne fai mai ne se toeaina se fesili tāua e uiga ki oku fakamoemoega. Ne fesoasoani mai a fesili konā ke kamata o mafaufau faka‵lei au e uiga ki taku galuega talai.” E faka‵mafa mai foki ne toeaina ata‵mai a te tāua ke kamata o akoako a taina i te taimi koi talavou—mai te tuku atu ki a latou a galuega i te fakapotopotoga kolā e fetaui ‵lei mo olotou tulaga talavou. Ka fesoasoani atu a akoakoga kamata penā ke fakamuamua ne latou a fakamoemoega faka-te-agaga māfai e ga‵solo aka latou i se tulaga talavou ma‵tua kae fakafesagai atu ki fakalavelave e uke.—Faitau te Salamo 71:5, 17. *

Fakamatala atu te pogai e manakogina ei ke fai se galuega, kae fakamālō atu ki taumafaiga e fai ke fakataunu ei (Ke onoono ki te palakalafa e 5-8)

6. Se a te vaega tāua e uiga ki te auala ne akoako ei ne Iesu a nisi tino?

6 Ka fakamalosi aka foki ne koe te manakoga  o se tino akoga ke tavini atu, mai te fakamatala atu ki a ia a mea e ‵tau o fai mo te pogai ke fai ei penā. Mai te tuku atu o pogai, ko fakaakoako atu eiloa tatou ki te Faiakoga Sili, ko Iesu. E pelā me se fakaakoakoga, a koi tuai o tuku atu ne ia te fakatonuga ki ana apositolo ke olo o fai a soko, ne fai atu ne Iesu te pogai e ‵tau ei mo latou o faka‵logo. Ne fai atu a ia: “Ko oti ne tuku mai ki a au a te pule i mea katoa i te lagi mo te lalolagi.” Kae ne toe fai atu a ia: “Olo atu koutou ki fenua katoa o fai a tino i ei mo fai a soko.” (Mata. 28:18, 19) E mafai pefea o fakaakoako koe ki te auala e fai ei ne Iesu a akoakoga?

7, 8. (a) E fakaakoako atu pefea a toeaina i aso nei ki te auala e fai ei ne Iesu a akoakoga? (e) Kaia e tāua ei ke fakamālō atu ki se tino akoga? (i) Ne a manatu tāua e mafai o fesoasoani ki toeaina ke akoako atu a nisi tino? (Ke onoono ki te pokisi “Te Auala ke Akoako ei a Nisi Tino.”)

7 Fakamatala atu ki te tino akoga e uiga ki te pogai i te Tusi Tapu e tāua ei ke fai ne ia te galuega ne tuku atu ki a ia. I te auala tenā, e akoako ne koe a ia ke mafau‵fau ki fakatakitakiga i te Tusi Tapu. E pelā me se fakaakoakoga, kāti e fakamolemole koe ki se taina ke ‵teu te auala o fano ki loto i te Kingdom Hall ke ‵ma kae ke ‵lei te sasale. E mafai o onoono koe ki te Tito 2:10 kae fakamatala atu te auala ka fai ne tena galuega i te Kingdom Hall o “fakagaligali ne latou a akoakoga a te ‵tou Fakaola, ko te Atua.” E se gata i ei, fesili atu ki te tino akoga ke mafaufau ki tino ma‵tua i te fakapotopotoga mo te auala ka aoga ei ki a latou a te galuega telā e fai ne ia. A te faiga o sau‵talaga penā mo latou se vaega o tena akoakoga telā ka fesoasoani ki a ia ke ‵saga malosi atu ki te auala e fesoasoani atu ei tena galuega ki tino i lō te mafaufau me ‵tau o fai ne ia me se tulafono. Ka maua eiloa ne ia te fiafia mai te lavea ne ia te auala e aoga ei te galuega telā e fai ne ia ki te fakapotopotoga.

8 E se gata i ei, masaua o fakamālō atu ki te tino akoga mō te taumafaiga ke fakagalue ne ia ou manatu fesoasoani. E pefea te tāua ke fai penā? E pela mo te vai telā e fakaola ne ia te lakau, a pati fakamālō tonu mai te loto e fakamalosi aka ei te tino akoga.—Fakatusa ki te Mataio 3:17.

SE TIUTE FAKAOPOOPO

9. (a) I te faiga o akoakoga, ne a tiute fakaopoopo e fakafesagai mo toeaina i fenua mau‵mea? (e) Kaia e se fakamuamua ei ne nisi taina talavou a te munatonu i olotou olaga?

9 E mafai o fakafesagai atu a toeaina i fenua mau‵mea se tiute fakaopoopo: ko te auala ke fakamalosi aka a taina papatiso kolā koi taki 20 io me 30 tupu tausaga ke aofia i galuega a te fakapotopotoga. Ne fesili atu matou ki toeaina atamai i nisi fenua e 20 ke fai mai te pogai e ‵kalo kea‵tea  ei a nisi taina talavou mai te talia ne latou a tauliaga i te fakapotopotoga. E fai mai te tokouke o latou, penei: I te taimi koi ‵tupu aka ei latou, e seai se fakamalosiga ki a latou ke kausaki atu ki fakamoemoega faka-te-agaga. A te tonuga loa, i nisi tulaga, talavou kolā e ma‵nako ki vaegā fakamoemoega faka-te-agaga penā ne fakamalosigina ne olotou mātua ke kausaki atu ki akoakoga ma‵luga! Tela la, e se mafai o fakamuamua ne vaegā talavou penā a te munatonu i olotou olaga.—Mata. 10:24.

10, 11. (a) E mafai pefea o fesoasoani malielie atu se toeaina ki se taina telā e foliga mai e se manako ki tauliaga ke ‵fuli tena mafaufau? (e) Ne a manatu i te Tusi Tapu e mafai o sau‵tala ki ei se toeaina mo se taina, kae kaia? (Ke onoono ki te fakamatalaga fakaopoopo.)

10 Kafai e foliga se fiafia se taina ki tauliaga, ka manakogina i ei a taumafaiga e uke mo te kufaki ke ‵fuli te auala e mafaufau ei a ia, kae e mafai eiloa o fai penā. E pelā mo te tino fai fatoaga telā e mafai o fakatonu malielie ne ia te foitino o te lakau ke mafai o olaola ‵lei, e mafai foki o fesoasoani malielie atu a toeaina ki nisi taina ke lavea ne latou te tāua ke ‵fuli olotou kilokiloga ki tauliaga. Kae i te auala fea la?

11 ‵Sala se taimi ke ati aka ei se fesokotakiga fakataugasoa mo te taina. Fai ke iloa ne ia me e manakogina a ia i te fakapotopotoga. E se gata i ei, ke ‵sala se taimi ke saga‵saga fakatasi koulua ke sau‵tala ki ne tusi siki kae fesoasoani atu ki a ia ke mafaufau ki tena tukuatuga ki a Ieova. (Fai. 5:4; Isa. 6:8; Mata. 6:24, 33; Luka 9:57-62; 1 Koli. 15:58; 2 Koli. 5:15; 13:5) E mafai o ‵sili atu koe ki a ia, ‘Se a te tautoga ne fai ne koe ki a Ieova i te taimi o tau tukuatuga ki a ia?’ Taumafai o fakamalosi tena loto mai te ‵sili atu, ‘Se a tau mafaufau, e pefea a lagonaga o Ieova i te aso telā ne papatiso i ei koe?’ (Faata. 27:11) ‘Ne pefea a lagonaga o Satani?’ (1 Pe. 5:8) Ke mo e manatu māmā ki te auala e pokotia malosi ei se taina mai te faitau faka‵lei ki fuaiupu kolā ko oti ne filifili aka i te Tusi Tapu.—Faitau te Epelu 4:12. *

TINO AKOGA, FAKATALITONU ATU TE OTOU FAKATUANAKI

12, 13. (a) Se a te uiga ne fakaasi mai ne Elisaia e pelā me se tino akoga? (e) Ne taui pefea ne Ieova a te fakamaoni o Elisaia?

12 Kae pefea la koutou e talavou kolā e manakogina te otou fesoasoani? Ne a uiga ka fesoasoani atu ke manuia koutou? Ke maua a tali ki ei, ke onoono nei tatou ki nisi mea ne ‵tupu i te olaga o se tino akoga i aso mua telā ne akoakogina.

13 I se 3,000 tausaga ko ‵teka, ne ‵kami ne te pelofeta ko Elia a te talavou ko Elisaia ke fesoasoani atu ki a ia. Ne talia fakavave ne Elisaia te ‵kamiga kae ne tavini fakamaoni atu a ia ki te toeaina mai faiga o galuega fatauvā. (2 Tupu 3:11) Kae mai tua o se ono tausaga ne akoakogina ei tou tagata, ne iloa aka ne Elisaia me ko pili o oti te galuega a Elia i Isalaelu. I te taimi tenā, ne fakamalosi atu a Elia ki te taugasoa telā ne akoako ne ia ke se toe tautali atu i a ia, kae ne fai atu a Elisaia ki a Elia fakatolu taimi, penei: “E se mafai ne au o tiaki a koe.” Ne fakaiku aka ne ia ke ‵nofo lāua mo tena faiakoga faitalia me pefea te leva. Ona ko te mea tenā, ne fakamanuia ne Ieova a Elisaia ona ko tena alofa tumau mo tena fakamaoni mai te faiga ke molimau ne ia te vavega o Elia ne se vaeosio.—2 Tupu 2:1-12.

14. (a) E mafai pefea o fakaakoako a taina i aso nei ki a Elisaia? (e) Kaia e tāua ei ke fakamaoni se tino akoga?

14 E mafai pefea o fakaakoako atu koe ki a Elisaia i aso nei? Mai te talia fakavave ne koe a tofiga, e aofia i ei a galuega fatauvā. Kilo atu ki tou faiakoga e pelā me se taugasoa, kae fakaasi atu tou loto fakafetai ona ko taumafaiga ne fai ne ia mō koe. A te auala e saga atu koe ki ei e pelā me ko fai atu koe ki a ia: “Ka se tiaki ne au a koe.”  Mai mea katoa, ke fakamaoni i te faiga o so se galuega e tuku atu ki a koe. Kaia e tāua ei te mea tenei? Me mai te fakaasi atu fua ne koe me i a koe e fakamaoni kae fakatuagagina, ka fakatalitonu atu ei ki toeaina me e manako a Ieova ke tuku atu ki a koe a tiute fakaopoopo i te fakapotopotoga.—Sala. 101:6; faitau te 2 Timoteo 2:2.

KE FAKAASI ATU TE ĀVA

15, 16. (a) I auala fea ne fakaasi atu ne Elisaia a te āva ki tena faiakoga? (Ke onoono ki te ata i te kamataga.) (e) Se a te mea e uiga ki a Elisaia telā ne fakatalitonu atu ei ki nisi pelofeta?

15 E fakaasi mai foki i te tala o te sui o Elia ko Elisaia, a te auala e mafai o fakaasi atu foki ne taina i aso nei a te āva ki toeaina. I te otiga ne āsi atu a Elia mo Elisaia ki se potukau o pelofeta i Ieliko, ne sa‵sale atu a tāgata konei ki te vaitafe ko te Iolitana. I konā, “ne puke aka Elia ki tena gatu ‵loa, pelu aka ne ia, kae kini ne ia ki ei a te vai; ne mavae lua a te vai.” I te taimi ne sa‵sale atu ei lāua ki te suā feitu o te vaitafe, ne “sau‵tala atu eiloa lāua i te lā auala.” E manino ‵lei, me ne seki mafaufau a Elisaia me ko iloa ne ia a mea katoa. Ne puke‵mau ne Elisaia a akoakoga katoa ne fai atu ne tena faiakoga, ke oko loa ki te taimi ne tiaki ei ne Elia a ia. Ka ave a Elia ne se vaeosio. Fakamuli ifo, i te Iolitana, ne kini ne Elisaia te vai ki te gatu ‵loa o Elia, kae kalaga atu: “Tefea [ Ieova] te Atua o Elia?” I konā foki loa, mavae lua ei a te vaitafe.—2 Tupu 2:8-14.

16 E mata, e lavea ne koe me ‵pau eiloa te vavega muamua telā ne fai ne Elisaia mo te vavega ne fai ne Elia? Kaia e fakaofoofogia ei te mea tenei? E foliga mai me e seki mafaufau a Elisaia me i a ia nei ko takitaki, ko fai ei ke ‵kese te auala e fai ei ne ia ana galuega. I lō te fai penā, mai te tautali ki te auala ne fai ne Elia tena galuega,ne fakaasi atu ei ne Elisaia tenā āva ki te na faiakoga kae se fakatalitonuga ki nisi pelofeta a ia. (2 Tupu 2:15) Kae fakamuli ifo, i te 60 tausaga o te galuega fakapelofeta a Elisaia, ne fakaosofia ne Ieova a ia ke fai a nisi vavega e uke atu i lō mea ne fai ne Elia. Se a te akoakoga e maua ne se tino akoga i aso nei?

17. (a) E mafai pefea o tau‵tali a tino a‵koga i aso nei ki uiga o Elisaia? (e) E mafai pefea o fakaaoga ne Ieova a tino a‵koga fakamaoni?

17 Ke mo a ma mafaufau me i te taimi e maua ne koe nisi tiute i te fakapotopotoga, e ‵tau o fai ne koe ne ‵fuliga ki ei i se auala telā e ‵kese katoatoa mo te faiga muamua. E se ‵tau o fai se ‵fuliga ona fua ko tou manakoga, kae ona ko te manakoga o te fakapotopotoga mo fakatakitakiga ei kolā e maua mai i te fakapotopotoga saukātoa a Ieova. E pelā mo te fakatalitonuga ne tuku atu ne Elisaia ki nisi pelofeta e auala i ana faifaiga mo tena āva ki tena faiakoga, mai te tumau i te tautali ki auala o Elia, e mafai o fakatalitonu atu ne koe nisi tino tali‵tonu kae fakaasi atu te āva ki toeaina atamai mai te tumau o fakaaoga a auala kolā e fakavae ki te Tusi Tapu. (Faitau te 1 Kolinito 4:17.) Kae kāfai ko apo koe, ka mautinoa eiloa me ka fakagalue ne koe a ‵fuliga kolā ka fesoasoani atu ki te fakapotopotoga ke tau‵tali i te fakapotopotoga saukātoa a Ieova. E tonu, e pelā mo Elisaia, e mafai o fesoasoani atu a Ieova ke fai ne tino a‵koga fakamaoni a galuega tai uke atu i lō galuega ne tuku atu ki tou faiakoga.—Ioa. 14:12.

18. Kaia e tāua ‵ki ei a te akoakoga o taina i fakapotopotoga i aso nei?

18 E fakamoemoegina me ka fai ne manatu fesoasoani i te mataupu mai mua atu mo te mataupu tenei ko te mea ke fakaavanoa ne toeaina a olotou taimi ke akoako atu a nisi tino. Ke na talia ne taina atamai mo te loto fia‵fia a vaegā akoakoga penā kae ke fakaaoga i se auala poto ke tausi atu ei ki mamoe a Ieova. A te faiga tenā ka fakamalosi aka ei a fakapotopotoga i te lalolagi kātoa ke tumau i te fakamaoni i vaitaimi tāua konei ko pili mai.

^ pala. 5 Kafai e matua ‵lei se tamataene i te feitu faka-te-agaga, e loto maulalo, kae fetaui ‵lei a ia mo fakatakitaki faka-te-Tusi Tapu, e mafai o filifili ne toeaina a ia ke fai pelā me se tavini fesoasoani faitalia me seki kātoa tena 20 tausaga.—1 Timo. 3:8-10, 12; ke onoono ki te lōmiga o The Watchtower i a Iulai 1, 1989, itulau e 29.

^ pala. 11 E mafai o fakaaoga ne koe i te sau‵talaga tenā a manatu i Te Faleleoleo Maluga, Apelila 1, 2012, itulau e 20-22, palakalafa e 8-13; mo te tusi ko te Ke Tumau “i te Alofa o te Atua,” mataupu e 16, palakalafa e 1-3.