Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Apelila 2015

Te Pogai e Fai ei a te Fakatokaga ki te Tino Fakatea e Pelā me se Faiga Alofa

Te Pogai e Fai ei a te Fakatokaga ki te Tino Fakatea e Pelā me se Faiga Alofa

“I TE taimi ne lagona ei ne au te faka‵pulaga i taku tamaliki tagata ko fakatea, ne foliga mai me ko seai se aoga o te olaga ki a au,” ko pati a Julian. “A ia ko taku tamaliki matua, e fealofani kae ‵pili ‵ki māua; kae ne uke foki a mea ne masani o fai fakatasi ne māua. Se tamaliki e ‵gali ana uiga, kae se mea fakapoi me ne kamata o fai ne ia a uiga kolā ne seki fia‵fia māua ki ei. Ne tagi faeloa taku avaga kae seiloa ne au me se a te auala ke fakamafanafana atu ki tou fafine. Ne fakafesili faeloa ne māua a māua eiloa māfai e isi ne mea ne fakatamala māua o fai pelā me ne mātua.”

Kae mafai pefea o fai atu i te fakatea o se Kelisiano se fakatokaga alofa, māfai e fai ne ia ke logomae malosi tatou? Ne a pogai e tuku mai ne te Tusi Tapu ke mafai ei ne tatou o tauave se vaegā logo‵mae pena? Kae se a te pogai tonu ne iku atu ei ki te fakatea o se tino?

MEA E LUA KOLĀ E IKU ATU KI TE FAKATEA

Mea e lua—kolā e ‵tau o ‵sae aka—kae iku atu ki te fakatea o se tokotasi o Molimau a Ieova. Te mea muamua, ko te fai ne se Molimau papatiso se agasala matagā. A ko te lua, e se salamō a ia i tena agasala.

E tiga eiloa e se fakamoemoegina ne Ieova tatou ke ola e pelā me ne tino ‵lei katoatoa, kae isi eiloa ne ana tulaga ‵malu kola e manako a ia ke fakafetaui ki ei a olaga o ana tavini. E pelā me se fakaakoakoga, e fakatonu mai a Ieova ke ‵kalo keatea tatou mai i amioga fakatauavaga sē ‵tau, ifo ki tupua, kai‵soa, ‵faomea, tatino, mo te faivailakau.—1 Koli. 6:9, 10; Faka. 21:8.

E mata, e se lotomalie koe me i tulaga ‵ma o Ieova e aoga kae puipui ei tatou? Ko oi e se manako ke ola a ia mo tino kolā e filemu, e gali olotou uiga kae fakatuagagina? E maua eiloa ne tatou se vaegā olagā penā i ‵tou taina mo tuagane faka-te-agaga, telā e loto fakafetai tatou ki te tautoga telā ne fai ne tatou i te taimi o ‵tou tukuatuga ki te Atua ke ola e ‵tusa mo ana fakatakitakiga i tena Muna.

Kae pefea la mafai ko fai ne se Kelisano papatiso se agasala matagā ona ko tulaga vāivāi faka-te-tagata? Ne fai ne tavini fakamaoni a Ieova a vaegā agasala penā i taimi ko ‵teka, kae ne seki fulitua katoatoa atu a ia ki a latou. Te tupu ko Tavita se tasi o fakaakoakoga telā e iloa ‵lei ne tatou. Ne agasala Tavita i te mulilua mo te tatino; kae ne fai atu te pelofeta ko Natano penei: “A koe ko fakamagalo ne . . . te Aliki [Ieova].” —2 Samu. 12:13.

Ne fakamagalo ne te Atua a te agasala a Tavita ona ko tena salamō tonu. (Sala. 32:1-5) Kae penā foki loa i aso nei, e fakatea se tavini a Ieova mafai e se salamō io me tumau loa a ia i te fai o te mea ma‵sei. (Galu. 3:19; 26:20) Kafai e se lavea atu ne toeaina kolā e ‵kau i te komiti fakamasino a te salamō tonu i te tino, e ‵tau mo latou o fakatea te tino tena.

I te taimi muamua, e mafai o foliga mai ki a tatou i te fakaikuga ke fakatea se tino ko tō mafa io me se faifaiga sē alofa, maise eiloa mafai e isi se sokoga ‵pili o tatou ki te tino tena. Kae ui ei, e tuku mai ne te Muna a Ieova a pogai ‵tau ke tali‵tonu tatou me i te fakaikuga tena se faifaiga alofa.

 E MAUA NE TATOU AKOAKOGA AOGA MAI I TE FAKATEA

Ne fai mai a Iesu me “e fakatalitonugina te poto o te tagata e auala i ana galuega amio‵tonu.”(Mata. 11:19) A te fakaikuga poto ke fakatea se tino fai mea ‵se kae sē salamō e maua mai ei a ikuga amio‵tonu. Mafaufau ki mea konei e tolu:

A te fakatea o te tino fai mea ‵se e faka‵malu ei te igoa o Ieova. Ona ko tatou e tauave te igoa o Ieova, e ‵tau o fakaata mai i ‵tou amioga a tena igoa. (Isa. 43:10) E pelā loa mo faifaiga a se tamaliki e mafai o faka‵malu io me fakamasiasi atu ki ana matua, e penā foki loa mo lagonaga o tino ki a Ieova e faka‵na loa ki te ‵lei io me ko te masei o faifaiga kolā e lavea ne latou i ana tino. E fakamalugagina te igoa o Ieova māfai a tino kolā e tauave ne latou tena igoa e ola e ‵tusa mo tulaga amiotonu a Ieova. E ‵tai pau loa te fakanofonofoga tenā mo taimi o Esekielu, i te taimi ne ‵kilo atu sāle a tino o te fenua ki tino Iutaia e pelā me ko tino kolā e tauave te igoa o Ieova.—Eseki. 36:19-23.

E fakamasiasi ne tatou te igoa ‵malu o Ieova mafai e fai ne tatou a amioga fakatauavaga sē ‵tau. Ne polopoloki mai penei te apositolo ko Petelu: “E pelā me ne tama‵liki faka‵logo, sa toe fai ke takitaki koutou ne otou manakoga mua i te taimi koi va‵lea ei koutou, kae e ‵tusa mo te Tino Tapu telā ne kalaga ne ia koutou, ke tapu foki koutou i otou amioga katoa. Me e penei a muna i te tusi: ‘E ‵tau mo koutou o tapu, me i a au e tapu.’” (1 Pe. 1:14-16) A faifaiga ‵ma kae ‵malu e faka‵malu atu ei ki te igoa o te Atua.

Kafai e fai ne se Molimau a Ieova se mea masei, e laveagofie fua te mea tenā ne ana taugasoa mo nisi tino kolā e iloa ne latou a ia. A te faifaiga ke fakatea se tino, e fakaasi atu ei i tino o Ieova e ‵ma kae ‵piki mautakitaki ki fakatakitakiga kolā e tuku mai i te Tusi Tapu ko te mea ke mafai o fakatumau te tulaga ‵malu i ei. E tokotasi te tino ne fanatu ki se fakatasiga i te Kingdom Hall i Switzerland kae fai atu me ne manako a ia ke fai pelā me se tino i te fakapotopotoga. Ko oti ne fakatea tena tuagane ona ko faifaiga fakatauavaga sē ‵tau. Ne fai mai tou tagata me manako a ia o kau ki se fakapotopotoga telā e sē talia ne latou a faifaiga ma‵sei.

E puipui ne te fakatea te fakapotopotoga ‵ma Kelisiano. Ne fakailoa atu ne te apositolo ko Paulo ki te kau Kolinito a te fakamataku o te talia ne latou a tino kolā e agasala mo te iloa tonu ke ‵nofo faka‵tasi mo latou. Ne faka‵pau ne ia a faifaiga ma‵sei a tino penā ki se mea faka‵fete tela e fai ne ia ke ‵fete te pāluga falaoa. Ne tusi mai a ia, “me i mu mea faka‵fete e faka‵fete ne ia te paluga falaoa kātoa.” Ne toe fakatonu mai a ia: “Ke tapale keatea mai i a koutou a te tagata masei tenā.”—1 Koli. 5:6, 11-13.

Kāti a te “tagata masei” tenei ne fakasae aka ne Paulo ne fai ne ia ne amioga fakatauavaga sē ‵tau. Kae ko nisi tino i te fakapotopotoga ne talia ne latou ana faifaiga masei konā. (1 Koli. 5:1, 2) A te talia ne latou o vaegā agasala matagā penā, e mafai ei o fai a nisi Kelisiano ke tau‵tali atu i faifaiga a fakai kolā e fai ne latou a amioga fakatauavaga sē ‵tau penā. A te sē ‵saga atu ki faifaiga agasala penā e fai ei ke manatu mā‵ma ki fakatakitakiga mai i te Atua. (Fai. 8:11) E se gata i ei, ka mafai foki o fai ei a tino faka‵tea kolā sē salamō ke fai pelā me ne “akau ‵masa” kolā e galo i lalo i te “pisipisitai” kae fai ei ke ‵kasa a fakatuanaki o nisi i loto i te fakapotoptoga.—Iuta 4, 12.

A te fakatea e fakaala ne ia te mafaufau o te tino fai mea ‵se. Ne faipati a Iesu ki se tamataene telā ne tiakina ne ia te fale o tena tamana kae fakamaumau ne ia tena vaega ki se olaga konā kae finalalolagi. Ne tauloto ne te tamaliki fakamaumau mea i te olaga telā ne ola ei a ia i te taimi ne tiakina ei ne ia te fale o tena tamana se olaga masei kae sē aoga. Ne foki mai te mafaufau o te tamaliki tagata tenei, ne salamō a ia, kae foki ki tena kāiga. (Luka 15:11-24) A te fakamatalaga a Iesu i te tamana alofa telā ne fiafia i te ‵fuliga te loto o tena tama e fesoasoani mai ki a tatou ke malamalama i lagonaga o Ieova. Ne fakatalitonu mai ne ia ki a tatou i ana pati “e se fiafia ke lavea ne au se tino agasala ke mate. E sili atu toku fiafia ke lavea ne au me ko se toe agasala kae ke ola.”—Eseki. 33:11.

I se auala tai ‵pau, a tino fakatea kolā ko sē fai nei pelā me ne vaega o te fakapotopotoga Kelisiano—telā ko te olotou kāiga faka-te-agaga—ko ‵foki mai olotou mafaufau ki mea kolā ko ‵galo i a latou. A ikuga ma‵sei o olotou olaga agasala, fakatasi mo te mafaufau ki te olaga fiafia i te taimi koi maua ei se fesokotakiga ‵lei o latou mo Ieova penā foki mo ana tino, e mafai ei o fai ke toe ‵foki mai olotou mafaufau.

A te alofa mo te tumau takitaki e manakogina ke mafai o ‵fua mai ei a ikuga kola e manakogina. “A te tino lei e mafai o fakasala kae fakatonu malosi ki a au  mo te alofa,” muna te faisalamo ko Tavita, kae “kāfai e fakatonu ne ia au, e pelā me ne sinu e ‵mili i luga i toku ulu.” (Sala. 141:5NW) Ke fai se fakatusaga: Ke mafaufau ki se tino sasale i te taimi o te‵tau moko kae ko oko loa i te fi‵ta. Ko kamata a ia o masaki ona ko te mokotia kae takamiomio tena ulu. Kafai e taumafai o moe i luga i te kiona, e mafai eiloa o mate a ia. Kae koi fakatali a ia ke oko mai ne tino fesoasoani, ne ‵pa sāle ana mata ne ana taugasoa ko te mea ke ala faeloa. E mafai o logomae ‵ki a ia te ‵pa tenā, kae ka mafai o fakasao i ei tena ola. Kae penā foki loa Tavita, ne iloa ne ia me ‵tau mo se tino amiotonu o tuku atu ne pati fakatonutonu kolā e logomae kae aoga ki a ia.

I te ukega o mea ‵tupu, e maua ne tino faka‵tea a fakasalaga kolā e ‵tau o maua ne te tino fai mea ‵se. Mai tua o se sefulu tausaga, a te tamaliki tagata a Julian telā ne sae mai tena tala i te kamataga ne salamō kae toe foki mai ki te fakapotopotoga, kae nei la ko fai pelā me se toeaina. Ne fai mai penei tou tagata, “I te taimi ne fakatea ei au, ne fai ei ke fakafesagai atu au ki ikuga masei i toku olaga. Ne ‵tau eiloa o maua ne au te vaegā fakasalaga tenā.”—Epe. 12:7-11.

TE AUALA ALOFA KE FAKAFESAGAI ATU KI TINO FAKATEA

E tonu, a te fakatea se tulaga fakafanoanoa i te feitu faka-te agaga, kae e se ‵tau o fai te tulaga fakafanoanoa tenā ke iku atu ki se mea masei ‵ki. E ‵tau o iloa ‵lei ne tatou katoa a te tulaga mo fakatakitakiga e uiga ki se tino fakatea telā e tau o tautali tatou ki ei.

A te fai ne tatou o taumafaiga e uke e fesoasoani atu ei ki tino salamō ke toe ‵foki mai ki a Ieova

A Toeaina kolā e fai ne latou te tiute fakafanoanoa ke fai ne latou se fakaikuga ke mafai o fakatea se tino, e taumafai malosi o fakaataata ki te alofa o Ieova. Kafai ko fakailoa atu ne latou ki te tino agasala e uiga ki te olotou fakaikuga, e fakamatala fakamaea atu ne latou mo te alofa ki te tino tenā a auala kolā e manakogina ke fai ne ia ko te mea ke mafai ei o toe foki mai a ia ki te fakapotopotoga. Ko te mea ke toe fakamasaua atu ki tino fakatea a auala kolā e mafai ei o toe ‵foki mai latou ki a Ieova, e mafai o āsi atu a toeaina ki tino fakatea kolā e lavea atu me isi ne ma‵fuliga ki olotou olaga. *

A kāiga e mafai o fakaasi atu ne latou te alofa ki te fakapotopotoga mo te tino agasala mai te fakaasiatuga o te āva ki te fakaikuga ne fai ke fakatea te tino. Ne fai mai a Julian: “a ia ko taku tama, kae ko te vaegā olaga fua telā e ola i ei, ne fai pelā me se mea telā e pono i te vā o māua.”

A tino katoa i loto i te fakapotopotoga e mafai o fakaasi atu ne latou te alofa mai te sē faipati io me sau‵tala ki te tino fakatea. (1 Koli. 5:11; 2 Ioa. 10, 11) Mai te faiga tenā, e fakaasi atu ei ne latou te olotou ‵lago malosi ki te fakasalaga telā ne aumai ne Ieova e auala i toeaina. E se gata i ei, e fakaasi atu foki ne latou te alofa mo te ‵lago malosi atu ki kāiga o te tino fakatea kolā e logomae ‵ki, kae fai foki ei ke mo ā e mafaufau latou i a latou e se ‵tau o ‵kaufakatasi mo taina talitonu.—Loma 12:13, 15.

Ne fakaoti mai ne Julian ki ana pati konei: “A te fakatea se fakatokaga telā e manakogina ne tatou, se mea telā e fesoasoani mai ke ola tatou e tusa mo tulaga o Ieova. Faitalia te logo‵mae, kae aumai eiloa ne ia a ikuga ‵lei i se taimi leva. Moi fai ne talia ne au a uiga masei a taku tama, penei e se toe maua ne ia te tulaga ‵lei.”

^ pala. 24 Ke onoono ki Te Faleleoleo Maluga i a Setema 1, 1991, itulau 14-16.