Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Mati 2015

‵Lago Atu mo te Fakamaoni ki Taina o Keliso

‵Lago Atu mo te Fakamaoni ki Taina o Keliso

“Ona ko te mea ne fai ne koutou te mea tenā ki te ‵toe tino fatauvā i oku taina konei, ne fai eiloa ne koutou a mea konā ki a au.”—MATA. 25:40.

1, 2. (a) Ne a tala fakatusa ne fakamatala atu ne Iesu ki ana taugasoa ‵pili? (Ke onoono ki te ata i te kamataga.) (e) Se a te mea e ‵tau o iloa ne tatou e uiga ki te tala fakatusa o mamoe mo kouti?

NE FAIPATI eiloa a Iesu ki a Petelu, Anitelea, Iakopo, mo Ioane, ko ana taugasoa ‵pili. Ne fatoa oti ne fakamatala atu ne ia ki a latou a tala fakatusa e uiga ki te tavini fakamaoni kae poto, tamafine e tokosefulu, mo taleni. Ne fakaoti ne Iesu tena fakamatalaga ki te suā tala fakatusa. Ne faipati a ia ki te vaitaimi telā ka fakamasino ei ne te “Tama a te tagata” a “atufenua katoa.” Ko oko eiloa i te gali o te tala fakatusa tenei ki ana soko! Ne fakasino tonu atu loa a Iesu ki potukau e lua, ko mamoe mo kouti. Kae ne fakamatala mai ne ia se potukau tāua i te tolu telā ne taku ne ia e pelā me ne “taina” o te “Tupu.”Faitau te Mataio 25:31-46.

2 Ko leva eiloa ne fia‵fia kae fia iloa ne tino o Ieova a te tala fakatusa tenei, me ne faipati eiloa a Iesu ki te olaga o tino i aso mai mua. E fakaasi mai ne ia a te pogai ka maua ei ne nisi tino a te ola se-gata-mai a ko nisi ka fakaseai katoatoa atu. E faka‵na eiloa ‵tou ola ki te ‵tou malamalama mo te auala e fakagalue ei ne tatou a muna‵tonu ne fai mai ne Iesu. Ona ko te mea e mafai o ‵tu atu ‵tou ola i se tulaga fakamataku, e ‵tau o ‵sili ifo tatou,  penei: I te auala fea e fakalauefa malielie mai ne Ieova ‵tou mainaga e uiga ki te tala fakatusa tenei? Kaia e mafai o fai atu tatou me e faka‵mafa mai i te tala fakatusa a te tāua o te galuega talai? Ko oi a tino e maua ne latou te fakatonuga ke talai? Kae kaia e tāua ei i te taimi nei ke fakamaoni a tino ki te “Tupu” mo latou kolā e fai pelā me ko ana “taina”?

I TE AUALA FEA NE FAKALAUEFA EI ‵TOU MAINAGA?

3, 4. (a) Ne a kī tāua e ‵tau o malama‵lama tatou i ei i te tala fakatusa e uiga ki mamoe mo kouti? (e) I te 1881, ne fakamatala mai pefea ne te Zion’s Watch Tower a te tala fakatusa tenei?

3 Ke malama‵lama tonu i te tala fakatusa e uiga ki mamoe mo kouti, e ‵tau o masaua ne tatou a kī tāua e tolu i te tala fakatusa: ko oi a tino e fakasino ki ei, te vaitaimi o te fakamasinoga, mo te pogai e taku ei pelā me se mamoe io me se kouti.

4 I te 1881, ne fakamatala mai ne te Zion’s Watch Tower me i te “Tama a te tagata,” telā e taku foki ko te “Tupu,” e fakasino atu ki a Iesu. Ne malama‵lama a Tino A‵koga ki te Tusi Tapu me i te tugapati “oku taina” i te ‵fuliga i te King James, e fakasino atu ki a latou kolā ka pule fakatasi mo Keliso e pelā foki mo tino katoa kolā ko ‵lei katoatoa kae ‵nofo i te lalolagi. Ne mafau‵fau latou me i te ‵vaega o mamoe mai kouti ka fai eiloa i te Afe Tausaga i te taimi o te Pulega a Keliso. Kae ne tali‵tonu latou me i tino konā ka fai pelā me ne mamoe me ne ola latou e ‵tusa mo tulafono a te Atua ki te alofa.

5. I te tausaga 1920 o vau malie ki tua, ne fakalauefa aka pefea te ‵tou mainaga?

5 I te tausaga e 1920 o vau malie ki tua, ne fesoasoani eiloa a Ieova ki ana tino ke fakafou te lotou mainaga ki te tala fakatusa tenei. I The Watch Tower o Oketopa 15, 1923, ne fakamautinoa mai ei me i te “Tama a te tagata” ko Iesu. Kae ko lava kae ‵toe a fakamaoniga mai te Tusi Tapu me e fakasino atu a taina o Keliso ki a latou kolā ka pule fakatasi mo ia i te lagi, kae ne taku ne ia a mamoe ki tino kolā e fakamoe‵moe ke ola i te lalolagi nei mai lalo i te pulega a Keliso. Kae e pefea la te vaitaimi o te ‵vaega o mamoe mai kouti? Ne fai mai te mataupu me i taina o Keliso ka pule fakatasi mo ia mai te lagi i te Afe Tausaga, tela la e se mafai ne tino kolā e maua ne latou te fakamoemoega i te lalolagi o ‵saga atu io me fesoasoani ki a latou. Tela la, a te ‵vaega o mamoe mai kouti ka fai eiloa mai mua o kamata te Pulega i te Afe Tausaga. Ne fai mai i te mataupu me i te pogai e taku ei se tino e pelā me se mamoe, me ne fai ne latou a Iesu pelā me ko te lotou Aliki kae ‵kilo atu ki te Malo telā ka aumai ne ia se olaga tai ‵lei atu.

6. I te kogāloto o te tausaga 1990 o vau malie ki tua, ne mafuli pefea te ‵tou mainaga?

6 Ona ko te mainaga fou tenā, ne mafau‵fau ei a tino o Ieova me e faka‵na eiloa te fakamasinoga o tino kolā e fai pelā me ne mamoe io me ne kouti i te taimi o te gataga, ki te auala e ‵saga mai ei latou ki te fekau o te Malo. Kae i te kogāloto o te tausaga e 1990 o vau malie ki tua, ne kamata o mafuli te ‵tou mainaga. Ne fakaasi mai i mataupu e lua o Te Faleleoleo Maluga i a Oketopa 15, 1995, a mea kolā e tai ‵pau i pati a Iesu kolā ne fakamau i te Mataio 24:29-31 (faitau) mo pati i te Mataio 25:31, 32. (Faitau.) * Kae e pefea te fakaotiga? Ne fai mai penei i te mataupu muamua: “Ka fai eiloa te fakamasinoga o mamoe mo kouti i aso mai mua.” E fai la māfea? “Ka fai eiloa mai tua malie o te kamataga o te ‘fakalavelave lasi’ telā ne fakaasi mai i te Mataio 24:29, 30 mo te taimi e ‘vau ei te  Tama a te tagata i tena ‵malu sili.’ . . . Tenā te taimi ka fai ei ne Iesu te fakamasinoga ki te olaga masei tenei.”

7. Se a te mainaga fou ko iloa nei ne tatou?

7 I aso nei, ko malamalama ‵lei tatou i te tala fakatusa e uiga ki mamoe mo kouti. E pelā mo tino kolā e aofia i ei, e fakasino atu a te “Tama a te tagata,” telā ko te Tupu ki a Iesu. A latou kolā ne fakasino atu ki ei pelā me ko “oku taina,” ko tāgata mo fafine fakaekegina kolā ka pule fakatasi mo Keliso mai te lagi. (Loma 8:16, 17) A “mamoe” mo “kouti” e fakauiga ki tino mai atufenua katoa. A latou konei ne seki fakaekegina ki te agaga tapu. Kae e a te taimi o te fakamasinoga? Ka fai te fakamasinoga tenei i te fakaotiotiga o te fakalavelave lasi. Kae se a te pogai ka fakamasino ei a tino e pelā me ne mamoe io me ne kouti? E faka‵na eiloa te ikuga ki te auala e fai faka‵lei ei ne latou a te ‵toega o taina fakaekegina o Keliso i te lalolagi nei. Ona ko te pili mai o te gataga o te olaga tenei, e fakafetai eiloa tatou me e fakamaina malielie mai ne Ieova a te tala fakatusa tenei e pelā foki mo nisi tala fakatusa kolā ne fakamau i te Mataio mataupu e 24 mo te 25!

E FAKA‵MAFA MAI PEFEA I TE TALA FAKATUSA A TE GALUEGA TALAI?

8, 9. Kaia ne taku ei a mamoe e pelā me e “amio‵tonu”?

8 I te tala fakatusa e uiga ki mamoe mo kouti, ne seki fakaasi ‵tonu mai ne Iesu me ko te galuega talai. Kae kaia e mafai o fai atu tatou me e faka‵mafa mai i ei te tāua o te galuega talai?

9 Muamua la, ke masaua me ne akoako atu a Iesu e auala i se tala fakatusa. E manino ‵lei me e seki faipati a ia e uiga ki te ‵vaega o mamoe mo kouti ‵tonu. I se auala tai ‵pau, ne seki fai atu a ia me i tino taki tokotasi kolā ne fakamasino e pelā me ne mamoe, e ‵tau o fagai, fakapei ki gatu, tausi, io me āsi atu ki se tokotasi o ana taina i te falepuipui. Ne fakatusa ne ia a faifaiga a mamoe fakatusa konei ki luga i ana taina. Ne taku ne ia a mamoe e pelā me e “amio‵tonu” me e iloa ne latou me isi se potukau o taina fakaekegina o Keliso koi ‵nofo i te lalolagi nei, kae e ‵lago fakamaoni atu a mamoe ki te kau fakaekegina i taimi faiga‵ta konei o aso fakaoti.—Mata. 10:40-42; 25:40, 46; 2 Timo. 3:1-5.

10. E mafai pefea o fakaasi atu ne tino kolā e taku pelā me ne mamoe a te atafai ki taina o Keliso?

10 A te lua o mea, ke mafau‵fau ki pati a Iesu. Ne fakamatala mai ne ia a fakailoga o tena fakatasi mai mo te gataga o te olaga tenei. (Mata. 24:3) Mai mua o fai tena lāuga, ne fakaasi mai ne Iesu me e aofia i te fakailoga se vaega tāua—ko te tala ‵lei o te Malo telā ka “talai atu ki te lalolagi nofoaki kātoa.” (Mata. 24:14) Kae mai mua malie o faipati a Iesu ki te tala fakatusa e uiga ki mamoe mo kouti, ne fai atu ne ia te tala fakatusa e uiga ki taleni. E pelā mo te mea ne fakamatala mai i te mataupu mai mua, ne fai atu ne Iesu te tala fakatusa tenā ke faka‵mafa atu ei ki ana soko fakaekegina, kolā ko ana “taina,” me e ‵tau o ga‵lue malosi latou i te galuega talai. Kae ne fai ne se aofaki foliki o te kau fakaekegina kolā e ‵toe i te lalolagi nei i te taimi o te fakatasi mai o Iesu se galuega lasi ‵ki—ko te talai atu ki “atufenua katoa” a koi tuai o oko mai te gataga. E fakaasi mai i te tala fakatusa o mamoe mo kouti me ka isi ne tino e fesoasoani ki te kau fakaekegina. Tela la, e tasi o auala e fakaasi atu ei ne tino kolā e taku pelā me ne mamoe a te atafai ki taina o Keliso, ko te ‵lago atu ki a latou i te galuega talai. Kae se a la te mea e aofia i te fesoasoani tenā? E mata, e aofia fua i ei te ‵lago atu i te feitu faka-te-foitino mo mea tau lagonaga io me isi aka foki?

KO OI E ‵TAU O OLO ATU O TALAI?

11. Se a te fesili e mafai o sae aka, kae kaia?

11 I aso nei, toeitiiti ko kātoa te valu  miliona o soko o Iesu kolā e se ne tino fakaekegina. E seki maua ne latou a taleni kolā ne tuku ne Iesu ki ana tavini fakaekegina. (Mata. 25:14-18) Tela la, e mafai o fesili atu, penei, ‘E mata, a te fakatonuga ke olo o talai, e aofia foki ei a tino kolā e seki fakaekegina ki te agaga tapu? Mafau‵fau la ki nisi pogai me kaia te tali ko te ao.

12. Ne a mea e tauloto ne tatou mai pati a Iesu kolā ne fakamau i te Mataio 28:19, 20?

12 Ne fakatonu ne Iesu ana soko katoa ke olo atu o talai. Mai tua o tena toetuga, ne fai atu a Iesu ki ana soko ke olo atu o fai a soko, kae akoako latou ke faka‵logo ki “mea katoa” ne fakatonu atu ne ia. E aofia i ei te fakatonuga ke olo o talai. (Faitau te Mataio 28:19, 20.) Tela la, e ‵tau mo soko katoa o Keliso o talai, faitalia me e maua ne latou te fakamoemoega ke pule i te lagi io me ke ola i te lalolagi nei.—Galu. 10:42.

13. Se a te mea fakaasi mai i te fakaasiga ne lavea ne Ioane, kae kaia?

13 E fakaasi mai i te tusi o Fakaasiga me ka fai ne tino fakaekegina mo nisi mamoe a te galuega talai. Ne tuku atu ne Iesu ki te apositolo ko Ioane se fakaasiga e uiga ki te “tamafine fatoa fakaipoipo,” te toko 144,000 tino fakaekegina kolā ka pule fakatasi mo Keliso i te lagi, e ‵kami ne latou a tino ke mai o inu i “te vai ola . . . me seai se ‵togi.” (Faka. 14:1, 3; 22:17) A te vai fakatusa tenā e fakaata mai i ei a fakatokaga a Ieova ke fakamagalo a tino mai te agasala mo te mate mai lalo o te taulaga togiola a Keliso. (Mata. 20:28; Ioa. 3:16; 1 Ioa. 4:9, 10) A te togiola ko te pogai tāua o te fekau telā e talai atu ne tatou, kae e fai ne te kau fakaekegina te takitakiga i te fesoasoani atu ki nisi tino ke tauloto kae ke maua a mea aoga mai i ei. (1 Koli. 1:23) Kae ne lavea foki ne Ioane i te fakaasiga tenā a nisi tino kolā e se aofia i te potukau a te tamafine fakaipoipo. Ne fakatonu atu foki ki a latou ke fai penei, “Vau!” E faka‵logo kae ‵kami ne latou a nisi tino ke inu ki te vai o te ola. A te potukau tenei i te lua e  fakamoe‵moe ke ola i te lalolagi nei. Tela la, e fakaasi manino mai i te fakaasiga tenei me i tino katoa kolā e talia ne latou te ‵kamiga ke “vau,” e maua ne latou te tiute ke talai atu ki nisi tino.

14. Se a te mea e aofia i te fakalogo ki te “tulafono a Keliso”?

14 A latou katoa kolā e faka‵logo ki te “tulafono a Keliso” e ‵tau o talai. (Kala. 6:2) E fakamoemoe a Ieova ko tino katoa ke tapuaki atu ki a ia kae faka‵logo ki ana tulafono. E pelā me se fakaakoakoga, ne fai atu a ia ki te kau Isalaelu: “A te tulafono tenei e fakasino ki a koutou katoa, tino Isalaelu pelā foki mo tino fakaa‵lofa e ‵nofo tasi koutou.” (Eso. 12:49; Levi. 24:22) E se ‵nofo a Kelisiano mai lalo i tulafono a Mose. A ko tatou katoa ko ‵nofo mai lalo i te “tulafono a Keliso,” faitalia me ne tino fakaekegina io me ikai. E aofia i te tulafono tenā a akoakoga katoa a Iesu. E tasi o mea e sili i te tāua ne akoako atu ne Iesu ki ana soko, ko te fakaasiatuga o te alofa. (Ioa. 13:35; Iako. 2:8) Kae ko te auala tāua e tasi e fakaasi atu ei ne tatou a te alofa ki te Atua, ki a Keliso, mo ‵tou tuakoi, ko te talaiatuga o te tala ‵lei o te Malo.—Ioa. 15:10; Galu. 1:8.

15. Kaia e mafai o fai atu me i te fakatonuga a Iesu ke talai e fakasino atu ki ana soko katoa?

15 A pati a Iesu ki se potukau foliki e mafai o fakasino atu ki se potukau lasi. E pelā me se fakaakoakoga, ne fai ne Iesu se feagaiga mō te Malo ki soko fua e toko 11, kae e fakasino atu loa te feagaiga tenā ki te toko 144,000. (Luka 22:29, 30; Faka. 5:10; 7:4-8) I se auala tai ‵pau, ne fakatonu atu fua a Iesu ki se aofaki foliki o ana soko—ko latou kolā ne fakasae atu ki ei a ia mai tua o tena toetuga—ke olo o talai. (Galu. 10:40-42; 1 Koli. 15:6) Kae ne iloa ne ana soko fakamaoni i te senitenali muamua me ne fakasino atu te fakatonuga tenei ki a latou, faitalia me ne seki lagona ‵tonu eiloa ne latou a pati a Iesu. (Galu. 8:4; 1 Pe. 1:8) I se auala tai ‵pau i aso nei, e seki lagona tonu foki ne te toko valu miliona tino talai loto finafinau o te Malo a pati konā a Iesu. Kae e iloa ne tino katoa me se tiute o latou ke fakatuanaki ki a Keliso kae fakaasi atu te fakatuanaki e auala i te faiga o te galuega talai.—Iako. 2:18.

TENEI TE TAIMI KE FAKAASI TE ALOFA FAKAMAONI

16-18. E ‵lago atu pefea a mamoe ki taina o Keliso, kae kaia e ‵tau ei o fai latou penā i te taimi nei?

16 E taua mai faeloa a Satani ki te ‵toega o taina fakaekegina o Keliso i te lalolagi nei, kae ka gasolo aka loa o uke a auala e oso mai ei a ia ona me ko iloa ne ia i “tena taimi ko toetoe.” (Faka. 12:9, 12, 17) Faitalia a kinauga a Satani, e tumau eiloa i te takitaki ne te kau fakaekegina te ‵toe galuega lasi i tala fakasolopito ko te galuega talai. E mautinoa eiloa me e fakatasi atu a Iesu o takitaki latou.—Mata. 28:20.

17 E maua ne mamoe e tokouke a te tauliaga sili ke ‵lago atu ki taina o Keliso i te galuega talai pelā foki mo nisi galuega aoga. E pelā me se fakaakoakoga, e tuku atu ne latou a meaalofa tupe kae fesoasoani atu i te faitega o Kingdom Halls, Assembly Halls, mo Ofisa lagolago, kae e faka‵logo fakamaoni latou ki tino kolā ne filifili aka ne “te tavini fakamaoni kae poto” ke fai ne latou te takitakiga.—Mata. 24:45-47; Epe. 13:17.

E ‵lago atu eiloa a latou kolā e fai pelā me ne mamoe ki taina o Keliso i auala e uke (Ke onoono ki te palakalafa e 17)

18 Ko pili nei o ‵tala mai ne agelu a matagi e fa i te fakalavelave lasi. Ka tupu eiloa te mea tenei māfai ko oti ne maua ne te ‵toega o taina o Keliso i te lalolagi nei a te lotou fakamailogaga fakaoti. (Faka. 7:1-3) Mai mua malie o te taua i a Amaketo, ka puke katoa te kau fakaekegina ki te lagi. (Mata. 13:41-43) Tela la, tenei eiloa te taimi ke na ‵lago atu mo te fakamaoni a latou kolā e fai pelā me ne mamoe ki taina o Keliso.

^ pala. 6 Ke maua a nisi fakamatalaga e uiga ki te tala fakatusa tenei, ke onoono ki mataupu “How Will You Stand Before the Judgment Seat?” mo te “What Future for the Sheep and the Goats?” i te lōmiga o The Watchtower i a Oketopa 15, 1995.