Fanatu ki te fakasologa

Fanatu ki te fakasologa o mataupu

“Tenā Loa te Faiga ne Talia ne Koe”

“Tenā Loa te Faiga ne Talia ne Koe”

“Ko oti ne ‵funa faka‵lei ne koe a mea konei mai i tino ‵poto mo tino ne akoakogina, kae fakaasi atu ne koe ki [tamā tamaliki, NWT].”—LUKA 10:21.

1. Se a te mea ne fai ei ko Iesu ke “fiafia ona ko te agaga tapu”? (Ke onoono ki te ata i te kamataga.)

E MAFAI o fakaataata ne koe a Iesu Keliso e “fiafia ona ko te agaga tapu”? Kāti e lavea ne koe i tena fakamisikata mo tena matafiafia. Se a i ei te mea ne otia ei tena loto? Ne fatoa uga atu ne ia ana soko e toko 70 ke olo o talai atu te tala ‵lei o te Malo o te Atua. Ne fiafia malosi a ia ki te auala e fai ei ne latou te galuega. E tokouke ‵ki a tino ma‵luga e ‵teke ki te tala ‵lei, pelā mo faiakoga ma‵luga o te Tulafono mo te kau Falesaio. Ne fakamalosi ne latou te tokoukega ke ‵kilo fatauvā ki a Iesu pelā fua me se kamuta a ko ana soko e pelā me “seki a‵koga faka‵lei kae ne tino fatauvā foki.” (Galu. 4:13; Male. 6:3) Kae e ui i ei, ne ‵foki mai eiloa te kau soko mai te lotou galuega mo te matafia‵fia. Ne talai atu eiloa latou faitalia a ‵tekemaiga mai tino pelā foki mai temoni! Se a te pogai ne fia‵fia kae loto ‵toa ei latou?—Faitau te Luka 10:1, 17-21.

2. (a) Ne fai pefea a soko o Iesu pelā me ne tama‵liki? (e) Ne mafai pefea o malamalama a soko o Keliso i muna‵tonu ‵loto faka-te-agaga?

2 Mafaufau la ki pati a Iesu ki a Ieova: “E tavae ne au a koe i mua o tino katoa, e toku Tamana, te Aliki o te lagi mo te lalolagi, me ko oti ne ‵funa ne koe a mea konei mai i tino ‵poto mo tino ne akoakogina kae fakaasi atu ne koe ki pepe [io me ki tamā tamaliki]. E tonu, e toku Tamana, me tenā eiloa te mea e loto koe ki ei.”  (Mata. 11:25, 26) E tonu, ne seki fakauiga loa a pati a Iesu me i ana soko ne tamaliki. Kae ne iloa ne ia me e fai latou pelā me ne tama‵liki māfai e fakatusa ki tino ‵poto kae e a‵koga faka‵lei, kolā e ‵poto loa i olotou kilokiloga. A ko te ‵toe mea tāua, me ne akoako ne Iesu ana soko ke fai pelā me ne tama‵liki, kolā e tumau i te loto maulalo kae faigofie ke akoakogina. (Mata. 18:1-4) E aoga pefea a te loto maulalo o latou? E auala i te agaga tapu, ne fesoasoani atu a Ieova ke malamalama latou i muna‵tonu ‵loto faka-te-agaga, a ko tino ‵poto kae ma‵luga kolā ne fakatauemu ki a latou, ne tumau i te faka‵kivi ne Satani pelā foki mo olotou uiga fakamata‵mata.

3. Ne a mea ka sau‵tala tatou ki ei i te mataupu tenei?

3 E se tioa eiloa o fiafia malosi a Iesu! Ne fiafia eiloa a ia ke lavea atu te auala ne fakaasi mai ne Ieova a muna‵tonu ‵loto faka-te-agaga ki tino loto maulalo katoa, faitalia olotou tulaga i mea tau akoakoga io me ko te poto. Ko oko loa i tena fiafia me ne talia ne tena Tamana te vaegā akoakoga tenei. E mata, ko oti ne ‵fuli te fakaikuga a Ieova ki te mea tenei, kae i te auala fea e fakaasi mai ei me koi talia ne ia te vaegā akoakoga tenei? I te taimi e suke‵suke ei tatou ki te mataupu tenei, ka mafai o lavea ne tatou me e maua i ei te fiafia, e pelā mo Iesu.

FAKAMATALA ATU A MUNA‵TONU ‵LOTO KI TINO KATOA

4. I auala fea e fai ei te lōmiga faigofie o Te Faleleoleo Maluga e pelā me se meaalofa tāua?

4 I tausaga fakamuli nei, a akoakoga faka-te-agaga ne tuku mai ne te fakapotopotoga a Ieova ko gasolo o fakatāua mai ei a akoakoga faigofie kae ma‵nino. Mafaufau la ki ne fakaakoakoga e tolu. Muamua la, e isi se lōmiga faigofie o Te Faleleoleo Maluga. * Se mea tonu me i te lōmiga tenei se meaalofa tāua ki tino kolā e faigata ki a latou te ‵gana io me ko te faitau. E lavea ne ulu o kāiga me ko aofia malosi olotou tama‵liki i te sukesukega ki te lōmiga tenei, ko te fakavae tāua o ‵tou polokalame faka-te-agaga. Ne tusi mai ne tino e tokouke a olotou lagonaga fia‵fia e uiga ki te fakatokaga tenei. Ne tusi mai se tuagane tokotasi me ko se tī fai sale ana tali i te Sukesukega ki te Faleleoleo Maluga: “Au ne mata mā kae nofo sale fua pelā me se tino maimoa,” ne fai mai a ia. Kae nei la, ko se fai eiloa a ia penā! I te taimi ne fakaaoga ei ne ia te lōmiga faigofie tenei, ne tusi mai a ia: “Ko uke ‵ki nei aku tali e fai, kae ko galo foki te manavase! Ke fakafetai ki a Ieova pelā foki mo koutou.”

5. Ne a nisi mea aoga e maua i te lōmiga o te New World Translation of the Holy Scriptures telā ko oti ne toe fakafou?

5 A ko te lua, ko oti ne ‵tala mai a te lōmiga o te New World Translation of the Holy Scriptures telā ne toe fakafou i te ‵gana Peletania i te fono tausaga i a Oketopa 5, 2013. * Ko mu‵tana fua a pati e fakaaoga i nisi tusi siki, a ko olotou uiga e katoatoa kae ma‵nino. E pelā me se fakaakoakoga, a pati i te Iopu 10:1 ko oti ne mumea ifo mai te 27 ki te 19 pati; a ko pati i te Faataoto 8:6, ne mumea ifo mai te 20 ki te 13 pati. A fuaiupu konā e ma‵nino eiloa i te lōmiga telā ko oti ne toe fakafou. E tonu, ne fai mai se taina fakaekegina telā ne tavini fakamaoni mō se fia sefulu tausaga: “Ne fatoā faitau ne au te tusi o Iopu i te lōmiga telā ne toe fakafou, kae tenei loa te taimi muamua ne fatoā malamalama i ei au.” Ne fai mai foki ne nisi tino a manatu tai ‵pau penā.

6. Ne a ou lagonaga e uiga ki te mainaga fou telā e fakaasi mai i te Mataio 24:45-47?

6 A ko te tolu, mafaufau ki nisi mainaga ‵fou fakamuli nei. E pelā me se fakaakoakoga, a te ‵tou mainaga fou e uiga ki te “tavini  fakamaoni kae poto,” telā ne ‵lomi i te Faleleoleo Maluga i a Iulai 15, 2013 ne fakafiafia mai ki a tatou. (Mata. 24:45-47) Ne fakamatala mai i ei me i te tavini fakamaoni ko te Potukau Pule, a ko “nisi tavini” ko latou katoa kolā e fagai i te feitu faka-te-agaga, faitalia me se tino fakaekegina io me ko “nisi mamoe.” (Ioa. 10:16) Ko oko loa i te fakafiafia ke tauloto ki muna‵tonu konei kae akoako ne latou a tino ‵fou! Ne a nisi auala ne fakaasi mai ei me talia ne Ieova a akoakoga faigofie kae ma‵nino?

FAKAMATALAGA FAIGOFIE KAE MANINO KI TALA I TE TUSI TAPU

7, 8. Ne a nisi fakaakoakoga ‵gali e tuku mai ne ata fakavaloaga i te Tusi Tapu?

7 Kafai koe ko oti ne tavini ki a Ieova mo ne tausaga e uke, e mafai o lavea ne koe a tamā mafuli‵fuliga i te auala e fakamatala mai i ‵tou tusi a tala i te Tusi Tapu. E pefea la? I taimi ko ‵teka, ne masani sale o fakamatala mai i ‵tou tusi a te mea telā e taku ko te ata fakavaloaga mo te ata tonu i tala i te Tusi Tapu. A te tala i te Tusi Tapu e fai pelā me ko te ata fakavaloaga, a ko so se fakataunuga fakapelofeta o te tala tenā e fai pelā me ko te ata tonu. Kae e mata, e isi se fakavae mai te Tusi Tapu e uiga ki ata faka-pelofeta? Ao e isi. E pelā me se fakaakoakoga, ne faipati a Iesu ki te “fakailoga e uiga ki a Iona te pelofeta.” (Faitau te Mataio 12:39, 40.) Ne fakamatala mai ne Iesu me i te nofo o Iona i loto i te tinae o te ika—telā ne mafai o fai pelā me ko tena tanuga moi fai ne seki fakasao ne Ieova a ia—se ata fakapelofeta e uiga ki te taimi ne nofo ei a Iesu i loto i te tanuga.

8 E aofia i te Tusi Tapu a nisi ata fakavaloaga ‵gali. Ne fakamatala mai ne te apositolo ko Paulo a mea konā. E pelā me se fakaakoakoga, ne fakaasi mai i te fesokotakiga o Apelaamo mo Hakala mo Sala se ata fakavaloaga o te fesokotakiga o Ieova mo te fenua o Isalaelu mo te vaega faka-te-lagi o te fakapotopotoga a te Atua. (Kala. 4:22-26) I se auala tai ‵pau, a te faleie tapu mo te faletapu, te Aso o te Faka‵maga, te faitaulaga sili, mo nisi vaega o te Tulafono a Mose ne “ata fakatusa fua o mea ‵lei kolā ka oko mai.” (Epe. 9:23-25; 10:1) A te suke‵suke ki vaegā ata fakavaloaga penā e fakafiafia kae fakamalosi aka i ei te fakatuanaki. Kae e mata, e mafai o fakaiku aka ne tatou me i tino katoa kolā e aofia i tala, mea kolā ne ‵tupu, mo se mea telā ne fakamatala mai i te Tusi Tapu, e fakaata mai ne ia se tino io me se mea?

9. Se a te fakamatalaga muamua ki te tala i te Tusi Tapu e uiga ki a Napota?

9 I taimi ko ‵teka, e fakaaoga sale a vaegā fakamatalaga konā. Mafaufau la ki te tala e uiga ki a Napota, telā ne fakatogafiti kae tamate ne te tupu fafine masei ko Iesepela, ko te mea ke mafai o puke ne tena avaga ko Aapo a te togavine o Napota. (1 Tupu 21:1-16) I te 1932, ne fakamatala eiloa te tala tenā e pelā me se valoaga tāua. Ne fakaata mai eiloa a Aapo mo Iesepela e pelā me ko Satani mo tena fakapotopotoga; a ko Napota ne fakaata mai ne ia a Iesu; a ko te mate o Napota e fakasino atu ki te tamatega o Iesu. Kae i se fia sefulu tausaga mai tua ifo, i te tusi ko te “Let Your Name Be Sanctified,” telā ne ‵lomi i te 1961, ne fai mai i ei me i a Napota e fakaata mai ne ia te kau fakaekegina, a ko Iesepela ne fakaata mai ne ia a Fenua Lotu Kelisiano. Tela la, a te fakasauaga o Napota ne Iesepela e fakaata mai i ei te fakasauaga o te kau fakaekegina i aso fakaoti konei. Ne maua ne tino o te Atua i tausaga e uke a te manatu tenei i tala i te Tusi Tapu pelā me se mea e fakamalosi aka ei te fakatuanaki. Kae kaia ko mafuli‵fuli i ei a fakamatalaga fakamuli nei?

10. (a) Ne fesoasoani atu pefea te poto ke fakaeteete te tavini fakamaoni māfai e fakamatala atu a nisi tala i te Tusi Tapu? (e) Se a te mea e faka‵mafa malosi mai i ‵tou tusi i aso nei?

10 I te fia o tausaga, ne fakamoe‵moe eiloa tatou me e fesoasoani mai a Ieova ki te  “tavini fakamaoni kae poto” ke gasolo aka te lotou iloa. Ko te poto e fai ei ke fakaeteete latou i te taku ne latou se tala i te Tusi Tapu e pelā me se valoaga tāua vaganā ke isi se fakavae mautinoa faka-te-Tusi Tapu ke fai penā. E se gata i ei, a nisi fakamatalaga mua e uiga ki ata fakavaloaga mo te fakataunuga o ata fakavaloaga ne faigata ke malama‵lama i ei a tino e tokouke. A fakamatalaga ki vaegā akoakoga penā—me ko oi te tino e fakaata mai ne ia kae kaia e fakaata mai ei ne ia—e mafai o faigata ke malamalama, ke masaua, kae fakagalue aka. A ko te ‵toe mea tāua, e mafai o faka‵numi io me ‵galo atu a akoakoga ‵tonu kae aoga mai tala i te Tusi Tapu ona ko fakamatalaga liki‵liki e uiga ki se ata fakavaloaga. Tela la i aso nei, ko faka‵mafa mai i ‵tou tusi a akoakoga faigofie kae aoga e uiga ki te fakatuanaki, te kufaki, tapuaki katoatoa atu ki te Atua, mo nisi uiga tāua aka foki kolā e tauloto ne tatou mai i tala i te Tusi Tapu. *

E tuku mai ne te fakaakoakoga o Napota se akoakoga tāua ki a tatou(Ke onoono ki te palakalafa e 11)

11. (a) Ko pefea nei te ‵tou malamalama i te tala o Napota, kae se a te fakaakoakoga ne tuku mai ne ia ki a tatou katoa? (e) Kaia ko faigata ei o fakamatala mai i ‵tou tusi fakamuli nei a ata fakavaloaga mo fakataunuga o ata fakavaloaga? (Ke onoono ki te “Fesili Mai Tino Fai‵tau” i te lōmiga tenei.)

11 Ko pefea la nei te ‵tou malamalama i te tala e uiga ki a Napota? Ko silia atu i te faigofie kae ma‵nino a fakamatalaga e uiga ki ei. Ne seki mate a te tagata amiotonu tenei ona fua ke fakaata mai ne ia a Iesu mo te kau fakaekegina, kae ne mate a ia ona ko te fakamaoni. Ne ‵piki ‵mau a ia ki Tulafono a Ieova faitalia fakasauaga matagā mai tino ‵pule. (Nume. 36:7; 1 Tupu 21:3) E tuku mai ne ia se fakaakoakoga gali ki a tatou kolā e fe‵paki mo vaegā fakasauaga penā. (Faitau te 2 Timoteo 3:12.) E mafai ne so se tino Kelisiano o malama‵lama, o masaua kae fakagalue ne latou se vaegā fakatuanaki penā.

12. (a) Se a te mea e se ‵tau o fakaiku aka ne tatou e uiga ki tala mai te Tusi Tapu? (e) Kaia e mafai ei o maua ne tatou ne fakamatalaga ma‵nino e uiga ki akoakoga ‵loto? (Ke onoono ki te fakamatalaga fakaopoopo.)

12 E mata, e ‵tau o fakaiku aka ne tatou me i tala i te Tusi Tapu e tuku mai fua ne ia se akoakoga aoga kae seai se suā uiga o ia? Ikai. I ‵tou aso nei, ko lasi eiloa i te akoako  mai ne ‵tou tusi se mea e tasi e pelā me se fakamasauaga, io me se fakatusa o te suā mea. E se lasi te fakamatala mai i tala e uke i te Tusi Tapu a ata fakavaloaga io me ko te fakataunuga fakavaloaga. E pelā me se fakaakoakoga, a te fakamaoni o Napota o fakafesagai atu ki fakasauaga ke oko ki te mate e fakamasaua mai ei ki a tatou a te fakamaoni o Keliso mo te kau fakaekegina. Kae e fakamasaua mai foki ki a tatou a te fakamaoni o “nisi mamoe” e tokouke a te Aliki. A te vaegā fakatusaga manino kae faigofie tenei se fakailoga tāua o akoakoga a te Atua. *

FAKAMATALAGA FAIGOFIE KI TALA FAKATUSA A IESU

13. Ne a fakaakoakoga e fakaasi mai ei me ko fakamatala atu nei ne tatou a tala fakatusa a Iesu i se auala faigofie kae manino?

13 A Iesu Keliso ko te ‵toe Faiakoga sili telā ne ola i te lalolagi nei. E tasi te auala ne fiafia a ia ki ei i te faiga o ana akoakoga ko te fakaaogaga o tala fakatusa. (Mata. 13:34) E tuku mai ne tala fakatusa se ata telā e fakagalue ei te mafaufau kae fai ei ke oko tonu ki loto o tino. E mata, e fakamatala mai foki i ‵tou tusi a tala fakatusa a Iesu i se auala faigofie kae manino i se fia tausaga? Ao! E a, e se ‵tau o fia‵fia tatou ke maua te malamalama i tala fakatusa a Iesu e uiga ki te mea faka‵fete, te fuaga o te sinapi, mo te tili telā e fakamatala mai i Te Faleleoleo Maluga i a Iulai 1, 2008? Ko lavea faka‵lei nei ne tatou me i tala fakatusa konei e fakasino atu ki te Malo o te Atua mo ana fakatokaga tāua i te fakamaopoopoga o soko ‵tonu o Keliso i te lalolagi masei tenei.

14. (a) Ne fakamatala pefea ne tatou te tala fakatusa o te tuakoi Samalia? (e) Se a ‵tou mainaga fakamuli nei ki te tala fakatusa tenā?

14 E mafai pefea o malamalama tatou i tala, io me ko fakatusa kolā ne faipati ki ei a Iesu? E tonu, a nisi tala ne mea fakatusa io me ne valoaga; a ko nisi tala e faka‵mafa mai i ei ne akoakoga tāua. Kae e mafai pefea o iloa ne tatou me ne tala fakatusa io me sē ne tala fakatusa? I te fia tausaga, ne kamata o manino malielie mai te tali e uiga ki ei. E pelā me se fakaakoakoga, mafaufau ki te auala ne fakamatala ei ne tatou te tala fakatusa a Iesu e uiga ki te tuakoi Samalia. (Luka 10:30-37) I te 1924, ne fai mai The Watch Tower me ne fakaata mai ne te Samalia a Iesu; a ko te auala telā e fanaifo mai Ielusalema ki Ieliko ne fakaata mai i ei te tulaga masei o tino talu mai te ‵tekeatuga i Etena; a tino ‵faomea i te auala ne fakaata mai ne latou a fakapotopotoga ‵lasi mo tino faipisinisi kaima‵nako; a ko te faitaulaga mo te tino Levi e fakasino atu ki Fenua Lotu Kelisiano. Kae i aso nei, e fakamatala mai ne ‵tou tusi a te tala fakatusa tenā pelā me se fakamasauaga ki Kelisiano katoa, me e se ‵tau mo tatou o fakailoga tino māfai e tuku atu ne tatou te fesoasoani ki tino e ma‵nako ki ei, maise loa i te feitu faka-te-agaga. E mata, e se fia‵fia ke lavea atu te auala e fakamaina mai ei ne Ieova ana akoakoga ki a tatou?

15. Se a te mea ka sau‵tala tatou ki ei i te suā mataupu?

15 I te suā mataupu, ka suke‵suke eiloa tatou ki te suā tala fakatusa a Iesu e uiga ki tamafine e tokosefulu. (Mata. 25:1-13) I te auala fea e manako ei a Iesu ke maina ana soko i te tāua o te tala fakatusa tenā i aso fakaoti konei? E mata, a te tala fakatusa tenā mo tena uiga e fakasino atu ki tino katoa e aofia i te tala, ki se mea, mo te mea ne tupu? Io me e manako a ia ke maua ne tatou a akoakoga aoga kolā e mafai o fesoasoani mai ki a tatou i te vaitaimi tenei o aso fakaoti? Ke na onoono nei tatou ki ei.

^ pala. 4 Ne kamata o avanoa atu a te lōmiga faigofie tenei i te ‵gana Peletania i a Iulai 2011. Fakamuli ifo, ne mafai ei o toe avanoa atu a te lōmiga faigofie tenei ki nisi ‵gana aka.

^ pala. 5 Ko avanoa nei a te lōmiga telā ko oti ne toe fakafou ki nisi ‵gana aka foki.

^ pala. 10 E pelā me se fakaakoakoga, e fakamatala mai i te tusi ko te Imitate Their Faith a olaga o tino kese‵kese e toko 14 i te Tusi Tapu. E fakasino tonu a fakamatalaga i ei ki akoakoga tāua, kae e se ki ata fakatusa io me ko uiga o pati fakapelofeta.

^ pala. 12 E tonu, e maua i te Muna a te Atua a mea kolā e foliga mai me e faigata o “malamalama i ei,” e aofia i ei a nisi vaega o tusitusiga a Paulo. Kae ui ei, a tino katoa kolā ne tusi ne latou te Tusi Tapu ne fakaosofia ne te agaga tapu. Ko te malosi galue foki loa tenā ne fesoasoani atu ki Kelisiano ‵tonu i aso nei ke maina i muna‵tonu mai i te Atua, penā foki loa mo te faiga ke malama‵lama tatou i “fuafuaga ‵loto mai i te Atua.”—2 Pe. 3:16, 17; 1 Koli. 2:10.