Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Se Meaalofa Fakaofoofogia mō Tino Tiapani

Se Meaalofa Fakaofoofogia mō Tino Tiapani

I SE fakatasiga fakapito ne fai i Nagoya i Tiapani, i a Apelila po 28, 2013, ne fai atu ne te sui o te Potukau Pule ko Anthony Morris se faka‵pulaga fakafiafia—ko te ‵talamaiga o se tusi fou i te ‵gana Tiapani telā e fakaulutala penei, The Bible—The Gospel According to Matthew. Ne fakaasi atu ne te toko 210,000 tupu kolā ne ‵nofo atu i konā io me onoono kae faka‵logo ki ei i te itaneti a te lotou fia‵fia mai te patipatiga olotou lima mō se taimi leva.

A te lōmiga tu ‵kese tenei o te Evagelia a Mataio telā e 128 ana itulau, ne ‵toe ‵lomi mai te New World Translation i te ‵gana Tiapani. Ne fakamatala atu ne te taina ko Morris me ne fakatoka eiloa te lōmiga tenā “ke fesoasoani atu ki tino Tiapani.” Ne a fakamatalaga i loto i te tusi tenei o te Tusi Tapu? Kaia ne fakatoka i ei? Kae ne ‵saga atu pefea a tino ki ei?

I TE AUALA FEA NE TUSI EI?

E fakaofoofogia eiloa te auala ne tusi ei te tusi ko Mataio ki te kautaina. A mataimanu i te ‵gana Tiapani e mafai o fakasolo mai luga ki lalo io me fakasolo faka-feitu, kae ne nāi tusi fua e aofia ei a ‵tou mekesini mo tusi e fakasolo faka-feitu. E ui i ei, a tusitusiga i te tusi fou tenei e fakasolo mai luga ki lalo, e fakaaoga i ei te vaegā tusitusiga telā e lauiloa i nusipepa Tiapani mo tusi fai‵tau. E faigofie ki te tokoukega o tino fai‵tau i Tiapani a te vaegā tusitusiga tenei. E se gata i ei, ko oti ne faka‵tu a ulutala toe‵toe kolā e masani o ‵tu i feitu ki luga o te Tusi Tapu pelā me ne ulutala fo‵liki ko te mea ke faigofie o lavea ne tino fai‵tau a manatu tāua.

Ne kamata eiloa o fai‵tau a taina mo tuagane i Tiapani ki fakamatalaga o te Mataio. “Ne faitau fakafia ne au te tusi o Mataio muamua,” ne fai mai se tuagane ko 80 tupu ana tausaga, “kae ne fesoasoani mai a te vaegā tusitusiga telā e fakasolo mai luga ki lalo e pelā foki mo ulutala fo‵liki i ei ke malamalama faka‵lei au i te Lāuga i luga i te mauga.” Ne tusi mai se tuagane e tokotasi, penei: “Ne faitau ne au te tusi ko Mataio i se taimi eiloa e tasi. Ne masani ‵lei au ki te vaegā tusitusiga telā e fakasolo faka-feitu, kae ko tokouke a tino Tiapani ko gali ki a latou te tusitusiga telā e fakasolo mai luga ki lalo.”

NE FAKATOKA MŌ TINO TIAPANI

Kaia e aoga malosi ei a te tusi e tasi tenei o te Tusi Tapu ki tino Tiapani? E tiga eiloa e se tokouke a tino Tiapani e masani ‵lei ki te Tusi Tapu, e fia‵fia eiloa latou o fai‵tau ki ei. A te vaega tenei o tusi evagelia a Mataio ka ‵tala atu eiloa ki a latou kolā e seki lavea ne latou te Tusi Tapu ke maua ne latou se vaega o te tusi tenei kae ke fai‵tau ki ei.

Kaia ne fiifili ei te tusi tenei ko Mataio? Ki te tokoukega o Tiapani, kafai e lagona ne latou te pati “Tusi Tapu,” e mafaufau latou ki a Iesu Keliso. Tela la, ne filifili te tusi ko Mataio me e aofia i ei a fakamatalaga e uiga ki te gafa mo te fanaumaiga o Iesu, tena Lāuga takutakua i te mauga, mo te valoaga tāua e uiga ki aso fakaoti—ko mataupu kolā ka fia‵fia malosi ki ei a tino Tiapani e tokouke.

Ne kamata eiloa o tufatufa atu ne tino talai o te Malo loto finafinau a te tusi fou tenei mai fale ki fale mo toe āsiga. “Ko uke atu nei avanoaga e maua ne au ke  tufatufa atu te Muna a te Atua ki tino i te koga talai,” ko pati a se tuagane tokotasi. “E tonu, ne mafai o ofo atu ne au se ‵kopi o Mataio i te fakaafiafi eiloa o te fakatasiga fakapito tenā.”

NE ‵SAGA ATU PEFEA A TINO KI EI?

E ofo atu pefea ne tino talai a te tusi fou tenei ko Mataio? E tokouke a tino Tiapani e iloa ne latou a tugapati e pelā mo te “mataloa mataliki,” “sa ‵pei a penina a koutou ki mua o puaka,” mo te “ke mo a e manava‵se koutou ki te aso ma taeao.” (Mata. 6:34; 7:6, 13) Se mea fakapoi ke tauloto ne latou me i pati konei i a Iesu Keliso. I te taimi ne lavea ne latou a pati konei i te tusi evagelia a Mataio, ne tali atu a tino e tokouke, penei: “Ne ma‵nako sale matou ke maua aka fua se taimi ke fai‵tau ki te Tusi Tapu.”

I te taimi e āsi atu ei a tino talai ki tino kolā ne talia ne latou se ‵kopi o Mataio, e fai mai faeloa a tino me ne fai‵tau fakavave latou ki nisi fakamatalaga io me ko te tusi kātoa. Ne fai mai se tagata ko 60 ana tausaga ki se tino talai: “Ne faitau faeloa ne au fakafia taimi kae ne fakamafanafana mai ki a au. Fakamolemole akoako aka au ki mea e uke e uiga ki te Tusi Tapu.”

Ko oti ne ofo faeloa te tusi ko Mataio i te galuega talai mai fale ki fale. I te taimi ne talai ei a ia, ne tuku atu ne se Molimau tena fakatuatusi ki se tamafine telā ne talia ne ia te tusi ko Mataio. I se itula mai tua, ne meli atu te fafine ki te tuagane, kae fai atu me ko oti ne faitau ne ia te vaega o te tusi tenei o te Tusi Tapu kae manako o tauloto ki mea e uke. I se vaiaso mai tua, ne fai tena akoga faka-te-Tusi Tapu muamua, kae fakamuli loa ne kamata o kau atu a ia ki fakatasiga.

E silia atu mo te 1,600,000 ‵kopi o te tusi ko The Bible—The Gospel According to Matthew ko oti ne avatu ki fakapotopotoga i Tiapani, kae i masina takitasi, e lau i afe o tusi e tufatufa atu ki te fia sefulu afe o tino. A pati fakatomua i te lōmiga tenei e fakaasi mai i ei a lagonaga o tino ne ‵lomi ne latou te tusi: “E fakamoe‵moe matou me i te faitauga o te tusi tenei ka ati aka ei te ‵poko o tou fiafia ki te Tusi Tapu.”