Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Fepuali 2015

Fakatumau Tou Loto Finafinau mō te Galuega Talai

Fakatumau Tou Loto Finafinau mō te Galuega Talai

A TE talaiga o te tala ‵lei ko te ‵toe galuega tāua telā e fai i te lalolagi i aso nei. E pelā me se tokotasi o tavini a Ieova i aso nei, e kilo atu koe ki ei pelā me se tauliaga ke aofia i te galuega ko te faiga o soko. Kae e seai se fakalotolotolua me e fe‵paki sale a paenia mo tino talai mo mea faiga‵ta ona ko te fakatumauga o te lotou loto finafinau mō te galuega talai.

Se a te mea e mafai o fesoasoani atu ke fakatumau tou loto finafinau mō te galuega talai?

E faigata o maua ne nisi tino talai so se tino ke kamata aka i ei se sau‵talaga i te taimi o te galuega talai mai fale ki fale. E se gata i ei, e se mafai o maua ne koe a te tokoukega o tino i fale. Kafai e ‵nofo atu a tino i olotou fale, e mafai eiloa fakatauemu io me ‵teke tonu mai ki te fekau o te Malo. A nisi tino talai e manava‵se ona ko te lasi mo te tokouke o tino fia‵fia kae ma‵taku me ka se mafai o fakaoti ne latou te lotou galuega. A ko nisi tino o te fakapotopotoga kolā ne talai atu i se fia o tausaga ko gasolo o loto vāi‵vai ona ko te fui oko mai o te gataga.

E mata, e ‵tau o ‵poi tatou me i tino katoa o Ieova e fe‵paki mo mea faiga‵ta kolā e mafai o fakavāivāi i ei te lotou loto finafinau mō te galuega talai? Ikai. I te fakaotiga loa, e mata e fakamoe‵moe tatou me ka faigofie ki a tatou ke folafola atu te fekau fakaola tino mai te Atua i se lalolagi telā e pulegina ne te “tino masei,” ko Satani te Tiapolo?—1 Ioa. 5:19.

Faitalia a mea faiga‵ta e fe‵paki mo tatou taki tokotasi i te folafolaatuga o te tala ‵lei, ke na talitonu me e mafai o fesoasoani atu a Ieova ke manumalo koe i ei. Tela la, ne a mea e mafai ne koe o fai ke fakamalosi aka tou loto finafinau mō te galuega talai faka-Kelisiano? Ke onoono aka tatou ki nisi manatu.

FESOASOANI ATU KI TINO TALAI ‵FOU

I tausaga katoa, e lau i afe o tino e papatiso ke fai pelā me ne Molimau a Ieova. Kafai ko oti ne fatoā fakamailoga tau tukuatuga ki te Atua e auala i te papatisoga, ka mautinoa eiloa me ka maua ne koe a mea aoga mai tala fakamalosi loto a latou kolā ko leva ne fai pelā me ne tino talai. Kae kafai koe ko  leva ne fai mo tino talai o te Malo i tausaga e uke, e mata, e sē se mea gali kae fakafiafia ke fesoasoani atu i te akoako atu o tino talai ‵fou?

Ne iloa ne Iesu me ne manakogina ne soko a fakatakitakiga ko te mea ke fai latou mo tino talai ma‵goi, kae ne fakaasi atu eiloa ne ia te auala e ‵tau o fai i ei te galuega. (Luka 8:1) I aso nei, e manakogina eiloa ke akoako a nisi tino ke fai pelā me ne tino talai ma‵goi.

E se ‵tau o fakamoe‵moe tatou me ka maua ne se tino talai fou a te atamai i te akoako atu mai te kau atu fua ki te galuega talai. E manakogina ne ia a pati fakatonutonu mai se faiakoga atafai kae alofa. E aofia i te vaegā akoakoga tenā a te fakaasi atu ki te tino talai fou a te auala ke (1) fakatoka kae fakaakoako se fakamatalaga, (2) fai a sau‵talaga mo tino, (3) ofo atu a tusi, (4) āsi atu ki te tino fiafia, mo te (5) ke kamata se akoga faka-te-Tusi Tapu. E tonu, ka maua eiloa a ikuga ‵lei māfai e onoono kae tautali faka‵lei a te tino akoga ki auala kolā e fakaaoga ne te faiakoga i te galuega talai. (Luka 6:40) E mautinoa eiloa me ka fiafia te tino talai fou ke ga‵lue mo se tino telā e mafai o fakalogologo kae fesoasoani māfai ko sae aka se fakalavelave. Ka maua foki ne tino talai ‵fou a mea aoga māfai e maua ne latou a pati fakamālō mo manatu fesoasoani.—Fai. 4:9, 10.

SAU‵TALA MO TOU SOA I TE GALUEGA TALAI

Faitalia au taumafaiga katoa e fai ke sau‵tala mo tino, a te sau‵tala mo tou soa i te galuega talai ko te ‵toe auala gali tenā. Masaua me ne uga atu ne Iesu ana soko “taki tokolua” ke olo o talai. (Luka 10:1) I te taimi ne ga‵lue fakatasi ei latou, ne mafai ne latou o fakamalosi te suā tino ki te suā tino. A te ga‵lue fakatasi mo se taina io me se tuagane talitonu se avanoaga gali ke “fakatau fakama‵losi” te suā tino ki te suā tino. —Loma 1:12.

Ne a nisi mea e mafai o faipati koe ki ei? E mata, e isi se tala fakamalosi loto a se tokotasi i a koulua fakamuli nei? E mata, e isi se manatu tāua ne maua ne koe mai i au sukesukega totino io me i te sukesukega a te kāiga? E mata, e isi se mea fakamalosi loto ne lagona ne koe i se fakatasiga? I nisi taimi, e se galue faeloa koe mo te tino talai tenā. E iloa ne koe te auala ne maua ei ne ia te munatonu? Se a te mea ne fakatalitonu atu ki a ia me i te fakapotopotoga tenei i a Ieova? Ne a tauliaga io me ne tala gali e uiga ki a ia? Kāti e mafai o fakaasi atu ne koe a nisi tala ‵gali e uiga ki a koe. Faitalia me ne a ikuga e maua ne koe mai te galuega talai, a ko te ga‵lue mo se tino talai se avanoaga gali ke “tumau i te fakamalosi atu te suā tino ki te suā tino.”—1 Tesa. 5:11.

 FAKATUMAU TE AUALA E FAI EI AU SUKESUKEGA

A te mea tāua ke fakatumau ei te loto finafinau mō te galuega talai ko te atiakaga mo te fakatumauga o te auala e fai ei au sukesukega. E ‵lomi ne te “tavini fakamaoni kae poto” a fakamatalaga mai mataupu kese‵kese e uke. (Mata. 24:45) Tela la, a mataupu kolā e mafai o sukesuke koe ki ei ko te mea ke maua ne koe a mea‵kai faka-te-agaga e kese‵kese eiloa. Ke onoono nei tatou ki se fakaakoakoga e uiga ki se mataupu ‵lei mō fai au sukesukega totino: Kaia e tāua ‵ki eiloa a te galuega ke talai atu te Malo? Ka fakaasi mai i te pokisi a nisi pogai.

A te mafaufau ki manatu kolā e fakasolo mai i te pokisi e mafai o fakamalosi aka ei koe ke talai atu mo te loto finafinau. Kaia e se fai ei ne koe se sukesukega ke iloa aka ne koe a nisi pogai ke aofia i te fakasologa tenā? Ka oti ko mafaufau ‵loto ei koe ki pogai konā mo tusi siki kolā e ‵lago atu ki ei. E mautinoa eiloa me ka fakamalosi aka ne te faiga tenā a tou loto finafinau mō te galuega talai.

KE TALIA A MANATU FESOASOANI

E tuku mai faeloa ne te fakapotopotoga saukātoa a Ieova a manatu fesoasoani kolā e fai ei ke momea aka te ‵lei o te ‵tou galuega talai. I tafa o ‵tou galuega talai mai fale ki fale, kāti e mafai o talai atu tatou e auala i se tusi, telefoni, talai i auala io me i koga e oloolo ei a tino, io me talai atu te tala ‵lei ki tino i taimi seki fuafuagina e pelā foki mo koga fai pisinisi. E mafai foki o fai ne tatou a fakatokaga ke talai atu i koga talai kolā e se tī talai sale i ei.

E mata, e talia ne koe a manatu fesoasoani konei? E mata, kai fakagalue aka eiloa ne koe? Ne maua eiloa ne tino a ikuga fakafia‵fia mai te fakaogaga o manatu konei. Mafaufau la ki ne fakaakoakoga e tolu.

A te fakaakoakoga muamua e aofia i ei a mea kolā ne iku mai i te fakaaogaga o se manatu mai i se  mataupu i te ‵Tou Galuega Talai ki te auala ke kamata ei se akoga faka-te-Tusi Tapu. Ne fai ne te mea tenei ke ofo atu ne te tuagane ko April se akoga faka-te-Tusi Tapu ki tino ga‵lue e toko tolu kolā ne ga‵lue mo ia. Ne ofo kae fiafia tou fafine i te taimi ne talia ei ne latou ke fai olotou akoga faka-te-Tusi Tapu kae kamata o ‵kau atu ki fakatasiga a te fakapotopotoga.

A te lua o fakaakoakoga e fakasino atu loa ki te ofoatuga ne tatou a ‵tou mekesini. Ko oti ne fakamalosi mai ke ‵sala atu tatou ki tino kolā e fia‵fia ki nisi mataupu i ‵tou mekesini. Ne lipoti mai se ovasia o te fenua i Amelika me ne ofo atu ne ia se Awake e aofia i ei se mataupu e uiga ki teka o mea fakatele‵tele ki menetia katoa o sitoa ‵togi teka i koga kese‵kese. Ne tufatufa atu foki ne ia mo tena avaga te mekesini e aofia i ei se mataupu “Understanding Your Doctor” ki ofisa o tokita e silia atu mo te 100. Ne fai mai tou tagata: “E fesoasoani mai eiloa a vaegā āsiga penei ke mafai o fakailoa atu ne tatou a tatou eiloa pelā foki mo ‵tou mekesini. Mai te fakamasani atu ki tino i koga konei, ne mafai eiloa o tokouke a tino ne fesokotaki mo māua.”

A te fakaakoakoga i te tolu e aofia ei te talai e auala i telefoni. Ne tusi atu eiloa se tuagane e igoa ki a Judy ki te laumua o fakaasi atu tena loto fakafetai mō te fakamalosiga ke talai atu i luga i telefoni. Ne fai mai tou fafine me i tena matua telā ko 86 ana tausaga kae masaki, ne fakaaoga faeloa ne ia te vaega tenei o te taviniga tapu kae ne maua ne ia te fiafia lasi i te taimi ne fai i ei ne ia se akoga a se tino matua ko 92 ana tausaga i luga i te telefoni!

A fakatakitakiga kolā e tuku mai i ‵tou tusi ko oko loa i te aoga ki te ‵tou galuega talai. Ke na fakaaoga ne tatou! E fesoasoani mai ki a koe ke fakatumau tou fiafia mo tou loto finafinau i te galuega talai.

KE FAI NE FAKAMOEMOEGA AOGA

A te manuia o te ‵tou galuega talai e se fua ki luga i te uke o ‵tou tusi e tufa, te fia o au akoga faka-te-Tusi Tapu e fai, io me ko te aofaki o tino kolā ne fesoasoani atu tatou ke mafai o fai pelā me ne tavini a Ieova. E tiga i ei, e mata e tokofia a tino mai i tafa o te kāiga o Noa ne fai pelā me ne tino tapuaki o Ieova? Kae ko ia ne fai mo fai se tino talai manuia. A te mea telā e tāua ko te tavini fakamaoni o tatou ki a Ieova.—1 Koli. 4:2.

Ko te mea ke mafai o fakamalosi aka te lotou loto finafinau ki te galuega talai, ne iloa aka ne tino talai o te Malo me e ‵tau o fai ne latou ne fakamoemoega aoga. Ne a lā i ei a nisi fakamoemoega konei? E fakaasi mai i te pokisi a nāi manatu e uiga ki ei.

Fakatasi mo te fesoasoani o Ieova, ‵sala atu ki auala kolā e fai ei ke manuia kae magoi tau galuega. Kafai e kausaki atu koe ki ou fakamoemoega, ka maua eiloa ne koe te fiafia mo te lotomalie me ne mafai ne koe o fai a mea katoa ke talai atu te tala ‵lei.

E tonu, e uke mea fai‵gata e fe‵paki mo tatou i te talaiatuga o te tala ‵lei. Kae e isi ne mea e mafai ne koe o fai ke fai pelā me se tino talai loto finafinau o te Malo. Ke fiafia ki sau‵talaga fakamalosi loto fakatasi mo tou soa, fakagalue kae fakatumau te auala e fai ei au sukesukega, fakaaoga a manatu fesoasoani mai te tavini fakamaoni, kae fai a fakamoemoega aoga. A ko te ‵toe mea tāua, ke masaua me ne tuku atu ne te Atua ki a koe a te tauliaga sili ke folafola atu te tala ‵lei e pelā me ne ana Molimau. (Isa. 43:10) Ka maua eiloa ne koe te fiafia māfai e fakatumau ne koe tou loto finafinau mō te galue talai!