Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Fepuali 2015

Ke Fakaakoako ki te Loto Maulalo mo te Alofa Atafai o Iesu

Ke Fakaakoako ki te Loto Maulalo mo te Alofa Atafai o Iesu

“Ne puapuaga a Keliso mō koutou, kae tuku mai ne ia se fakaakoakoga mō koutou ke tau‵tali faka‵lei atu i ana kalafaga.”1 PE. 2:21.

1. Kaia e mafai ei o fakapili‵pili atu tatou ki a Ieova e auala i te fakaakoako atu ki a Iesu?

E MA‵NAKO eiloa tatou o fakaakoako atu ki a latou kolā e ‵gali olotou uiga mo faifaiga. Mai tino katoa kolā ne ola i te lalolagi, e seai eiloa se tino e mafai o ‵pau tena fakaakoakoga mo Iesu Keliso. Kaia? Ne fai mai Iesu: “A te tino telā ko kilo mai ki a au ko kilo foki ki te Tamana.” (Ioa. 14:9) E fakaata mai ne Iesu a uiga o tena Tamana i se auala ‵lei katoatoa, me i mea kolā e fai ne te Tama e pelā eiloa me ko kilo atu koe ki te Tamana. Tela la, kafai e fakaakoako atu tatou ki a Iesu, ko fakapili‵pili atu tatou ki a Ieova, te ‵toe Tino tāua i te iunivesi. Ka manuia eiloa tatou māfai e fakaakoako ki uiga mo faifaiga a tena Tama!

2, 3. (a) Kaia ne tuku mai ei ne Ieova a fakamatalaga e uiga ki tena Tama, kae se a te mea e fakamoemoe a Ieova ke fai ne tatou? (e) Ne a mea ka sau‵tala tatou ki ei i te mataupu tenei mo te suā mataupu?

2 E mafai pefea o iloa ne tatou me ko Iesu se vaegā tino pefea? E fakafetai eiloa tatou me maua ne tatou a fakamatalaga fakamalosi loto e uiga ki a Iesu. Ne fakatoka mai ne Ieova a tusitusiga konā, kolā e maua i te Tusi Tapu i te ‵gana Eleni, me e manako a ia ke iloa ne tatou tena Tama kae fakaakoako ki a ia. (Faitau te  1 Petelu 2:21.) I te Tusi Tapu, ne fakatusa ne Iesu te fakaakoakoga ne tuku mai ne ia ki “kalafaga.” E manako a Ieova ke tau‵tali tatou ki kalafaga o Iesu. E tonu, ne tuku mai ne Iesu se fakaakoakoga ‵lei mō tatou, e ui ei e ‵mao ‵ki tatou mai te tulaga ‵lei katoatoa. E se fakamoemoe a Ieova ke tau‵tali tatou i kalafaga o Iesu i se tulaga ‵lei katoatoa. E tiga eiloa tatou ne tino sē ‵lei katoatoa, e fakamoemoe te Tamana ke fai ne tatou te ‵toe mea e mafai o fai ke fakaakoako atu ki tena Tama.

3 Ke na onoono nei tatou ki nisi uiga ‵gali o Iesu. I te mataupu tenei, ka sau‵tala tatou ki tena uiga loto maulalo mo te uiga alofa; i te suā mataupu, ka suke‵suke tatou ki tena uiga ko te loto malosi mo te poto. Ka tali aka ne tatou a fesili e tolu ki uiga takitasi konei: Se a te mea e fakauiga ki ei? Ne fakaasi mai pefea ne Iesu? E mafai pefea o fakaakoako atu tatou ki a ia?

E LOTO MAULALO A IESU

4. Ka fakamatala mai pefea ne koe te uiga ko te loto maulalo?

4 Se a te loto maulalo? I te lalolagi fia sili tenei, kāti e mafau‵fau a nisi tino me i te loto maulalo se fakaasiga o te vāivāi io me ko te sē lava o te loto talitonu. Kae e ‵se te manatu tenā. A te fakaasi atu o te loto maulalo e manakogina i ei te malosi mo te loto toa. Ne ‵fuli sāle te loto maulalo ki “te uiga telā e ‵kese mai te fakamatamata mo te fia sili.” Ke fakaasi atu te loto maulalo, e ‵tau muamua o maua ne tatou te kilokiloga ‵lei e uiga ki a tatou eiloa. “A te loto maulalo ko te iloa ne tatou te ‵tou tulaga malalo i mua o Atua, ko pati i se tikisionale i te Tusi Tapu. Kafai e fakaasi ‵tonu ne tatou te loto maulalo i mua o te Atua, ka ‵kalo keatea foki tatou mai te mafaufau me ‵lei fakafia atu tatou i nisi tino. (Loma 12:3; Fili. 2:3) E se faigofie ke ati aka ne tino sē ‵lei katoatoa a te uiga loto maulalo. Kae e mafai o maua ne tatou te loto maulalo māfai e mafau‵fau tatou ki ‵tou tulaga i mua o te Atua kae tau‵tali atu i kalafaga o tena Tama.

5, 6. (a) Ko oi a Mikaele te agelu pule? (e) Ne fakaasi mai pefea ne Mikaele a tena kilokiloga loto maulalo?

5 Ne fakaasi mai pefea ne Iesu te loto maulalo? Ne fakaasi mai faeloa ne te Tama a te Atua a te loto maulalo e pelā me se agelu malosi i te lagi mo se tagata ‵lei katoatoa i te lalolagi. Ke mafau‵fau ki nāi fakaakoakoga.

6 Tena Kilokiloga. Ne tusi ne te tino tusitala ko Iuta se fakaakoakoga e uiga ki te olaga o Iesu a koi tuai o vau ki te lalolagi. (Faitau te Iuta 9.) E pelā mo Mikaele te agelu pule, ne “kinau” a Iesu mo te Tiapolo e uiga ki te “foitino o Mose.” Masaua la me i te taimi ne mate ei a Mose, ne tanu ne Ieova tena foitino i se koga telā e seai se tino e iloa ne ia. (Teu. 34:5, 6) Kāti ne manako te Tiapolo ke fakaaoga ne ia a te foitino o Mose ke fakamalosi aka ei a te tapuakiga ‵se. Faitalia te fuafuaga masei telā ne mafaufau ki ei te Tiapolo, ne loto malosi eiloa a Mikaele o taofi a ia mai te faiga o te mea tenā. E fai mai se fakamatalaga e tasi me i te pati Eleni telā ne ‵fuli ki te “kinau,” e fakaaoga sale foki ke fakamatala atu i ei se “kinauga faka-te-tulafono” e fakaasi atu ei me ne ‘fakafesili fua ne Mikaele te saolotoga o te Tiapolo ke puke te foitino o Mose.’ Ne iloa ‵lei ne te Agelu Pule me e se maua ne ia te tulaga pule ke fai ne ia te fakamasinoga. I lō te fai penā, ne tuku atu ne ia te fakamasinoga ki te Famasino Sili, ko Ieova. Tela la, ne ‵kalo keatea a Mikaele mai te fakaaoga ‵se ne ia tena tulaga pule, faitalia me ne fakafesagai atu a ia ki fakamalosiga sē ‵lei. Ko tafaga la te lasi o tena loto maulalo!

7. Ne fakaasi mai pefea ne Iesu te loto maulalo i ana pati mo ana faifaiga?

7 I te faiga o tena galuega talai i te lalolagi nei, ne fakaasi atu ne Iesu i ana pati mo faifaiga a te loto maulalo tonu. Ana pati e fai. Ne seki manako a Iesu ki tavaega mai tino. Kae ne manako a ia ke maua ne tena Tamana a vikiga katoa. (Male. 10:17, 18; Ioa. 7: 16) Ne seki faipati atu a ia ki ana soko i se auala e fai ei ke mafau‵fau ana soko i a latou e se aoga. E ui i ei, ne āva a ia ki a latou, me ne tavae ne ia latou ona ko mea ‵lei ne fai ne latou kae fakaasi atu foki tena loto talitonu ki a latou. (Luka 22:31, 32; Ioa. 1:47;) Ana faifaiga. Ne filifili ne Iesu te olaga faigofie e aunoa mo koloa faka-te-foitino e uke. (Mata. 8:20) Ne loto fiafia a ia o fai te ‵toe galuega fatauvā. (Ioa. 13:3-15) Ne fakaasi atu ne ia te loto maulalo tu ‵kese mai te fakalogo. (Faitau te Filipi 2:5-8.) I lō te fai pelā mo tino fakamata‵mata kolā e se fia faka‵logo, ne fai eiloa ne Iesu mo te loto maulalo a mea ne fakatonu atu ne te Atua ke fai ne ia, ke oko “ki te mate.” E a, e se fakamaoni mai i konei me i a Iesu te Tama a te tagata, ne “loto maulalo”?—Mata. 11:29.

KE FAKAAKOAKO KI TE UIGA LOTO MAULALO O IESU

8, 9. E mafai pefea o fakaasi atu ne tatou te uiga loto maulalo?

8 E mafai pefea o fakaakoako tatou ki a Iesu i te fakaasiatuga o te loto maulalo? ‵Tou Kilokiloga. A te loto maulalo ka fai ei ke ‵kalo keatea tatou mai te fai ne tatou a mea kolā e seai se aiā a tatou i ei. Kafai e iloa ne tatou me e se ‵tau o fakamasino ne tatou se tino, e fai ei ke se vave tatou o fakamasino a vai‵vaiga a tino io me ko olotou faifaiga. (Luka 6:37; Iako. 4:12) Te loto maulalo e fesoasoani mai ke mo a e mafau‵fau tatou ia tatou ko “tō lei,” kae ‵kilo fatauvā ne tatou a nisi tino me se maua ne latou a tauliaga kolā e maua ne tatou. (Fai. 7:16) A toeaina loto maulalo e se ‵kilo atu ki a latou e pelā me ma‵luga atu ki nisi o olotou taina tali‵tonu. I lō te fai penā, e ‵kilo atu a tausi mamoe me “tāua atu a nisi tino” i a latou, kae fakaasi mai ne latou a faifaiga e pelā me ne tino sē taulia.—Fili. 2:3; Luka 9:48.

9 Ke mafaufau la ki a W.  J.Thorn, tela se ovasia faimalaga, talu mai i te 1894. Mai tua o se fia tausaga ne galue i ei, ne ‘kami a ia ke galue i te koga tausi manu i se fakai foliki o Niu Ioki, kae ne galue a ia i te pāmoa. Ne fai mai a ia: “So se taimi e oko mai ki a au te manatu fia maluga, e iloa ne au me ka tu au i se tulaga fakamataku, tela ne faipati ifo au ki a au eiloa : ‘A koe pelā me se ‘pefu fua. Se a te mea e fakamatamata koe ki ei?’” (Faitau Isaia 40:12-15.) A te mea tenei se kilokiloga loto maulalo!

10. E mafai pefea o fakaasi tonu atu ne tatou te loto maulalo i ‵tou pati mo ‵tou faifaiga?

10 ‵Tou pati e fai. Kafai e loto maulalo tatou, ka mafai o fakaasi atu ne tatou i ‵tou pati e fai. (Luka 6:45) Kafai foki e sau‵tala tatou mo nisi tino, e ‵tau o ‵kalo keatea tatou mai te fakamatamata ki tauliaga mo mea e maua ne tatou. (Faata. 27:2) I lō te fai penā, ke na ‵saga atu ki mea e ‵lei ei ‵tou taina mo tuagane kae fakamālō atu ki olotou uiga ‵lei, atamai, mo olotou taumafaiga e fai. (Faata. 15:23) ‵Tou faifaiga. A Kelisiano loto maulalo e se ma‵nako ke takutakua latou i te lalolagi tenei. I lō te fai penā, e ola latou i se olaga faigofie, mai i te ‵sala atu ki se galuega telā e fatauvā i te kilokiloga a te lalolagi, ko te mea ke tavini atu latou ki a Ieova ki te ‵toe mea e mafai ne latou o fai. (1 Timo. 6:6, 8) Kae sili i mea katoa, e mafai ne tatou o fakaasi atu a te loto maulalo mai i te ‵tou faka‵logo. A te loto maulalo e fai ei “ke faka‵logo [tatou] ki a latou kolā e fai ne latou te takitakiga” i te fakapotopotoga, kae ‵tau foki mo tatou o talia kae tau‵tali ki fakatakitakiga kolā e maua ne tatou mai i te fakapotopotoga saukātoa a Ieova.—Epe. 13:17.

IESU E ALOFA ATAFAI

11. Fakamatala mai te uiga o te alofa atafai.

11 A te alofa atafai se vaega o te alofa kae e tai ‵pau mo “lagonaga alofa” mo te alofa fakamagalo. (Luka 1:78; 2 Koli. 1:3) E pela mo te tusi siki e uiga ki te alofa atafai, e fakaasi mai se fakamatalaga e tasi i te Tusi Tapu: “A te uiga o te alofa atafai e ‵loto atu tena  uiga i lō te fakaasi atu fua i au pati. Ko te aofia tonu tatou i faifaiga kolā e fesoasoani atu ki nisi tino ke mafai o maua ne latou se olaga tai ‵lei atu.” Te alofa atafai se lagonaga telā e galue i loto i a tatou. A te tino telā e fakaasi atu ne ia te alofa atafai e mafai o fai ne ia ke otia a loto o tino kae fai ne ‵fuliga ki olotou olaga.

12. Se a te mea e fakaasi mai me ne alofa atafai a Iesu ki nisi tino, kae ne a mea ne fakaosofia ne tena alofa atafai ke fai?

12 Ne fakaasi mai pefea ne Iesu a te alofa atafai? Tena alofa atafai mo ana faiafaiga. Ne fakaasi atu ne Iesu te alofa atafai ki nisi tino. I te taimi ne lavea i ei ne Iesu a tena taugasoa ko Malia mo nisi tino e ‵tagi ki tena tuagane, ko Lasalo, i konā foki loa, “tagi ei a Iesu.” (Faitau te Ioane 11:32-35.) Ko te alofa atafai telā ne fakaosofia ne ia Iesu ke fakatu aka a te tama tagata a te fafine ko mate tena avaga, penā foki loa mo Lasalo. (Luka 7:11-15; Ioa. 11:38-44) E auala i ana faifaiga atafai, ne mafai o tuku atu ei ne Iesu se fakamoemoega ki a Lasalo a te ola i te lagi. Mai mua malie atu i ei, ne au‵mai te vaitino ki a Iesu kae ne fakaasi atu ne ia te “alofa atafai” ki a latou. Ne fakaosofia a ia ne tena uiga atafai kae “ne kamata ei o akoako atu ne ia a mea e uke ki a latou.” (Male. 6:34, Kingdom Interlinear) Se fakaakoakoga lasi ‵ki telā e mafai o ‵fuli ne ia a olaga o so se tino telā e saga tonu ki ana akoakoga! E lavea ne tatou i konei me i te fakaasiga o te alofa atafai o Iesu ne seki gata fua i ana lagonaga, kae ne fakaosofia foki a ia ke gasue fakavave o fesoasoani atu ki nisi tino.—Mata. 15:32-38; 20:29-34; Male. 1:40-42.

13. I te auala fea ne faipati atu ei a Iesu mo te atafai ki nisi tino? (Ke onoono ki te ata i te kamataga.)

13 Ana pati atafai. Ne fai ne te loto alofa o Iesu ke faipati atu a ia mo te atafai ki nisi tino, maise loa ki tino loto mafatia. Ne fakasino atu a te apositolo ko Mataio ki a Iesu mai i te fakaogaga ne ia a pati a Isaia: “Ka se ‵fati ne ia se mouku piko, kae se tamate foki ne ia se moli telā e kākā malie.” (Isa. 42:3; Mata. 12:20) Ne faipati a Iesu i se auala telā e fakamalosi aka i ei latou kolā e fakatusa ki se mouku ko magemage io me se ‵vae o te moli telā ko pili o mate. Ne akoako atu ne ia se fakamoemoega “ke faka‵lei a loto o tino fanoa‵noa.” (Isa. 61:1) Ne ‵kami atu ne ia a latou kolā “e fi‵ta kae ‵mafa olotou amoga” ke au‵mai ki a ia, kae tuku atu ne ia se fakatapūga ki a latou me ka maua ne latou se “malosi fou.” (Mata. 11:28-30) Ne fakapa‵tonu atu foki ne ia ki ana soko me i te Atua e saga tonu atu mo te alofa ki ana tino tapuaki taki tokotasi, e aofia i ei a “tino fatauvā” kolā e foliga mai me sē tāua i mafaufauga o tino o te lalolagi.—Mata. 18:12-14; Luka 12:6, 7.

FAKAAKOAKO KI TE ALOFA ATAFAI O IESU

14. E mafai pefea o ati aka ne tatou a lagonaga atafai mō nisi tino?

14 E mafai pefea o fakaakoako atu tatou ki a Iesu mai i te fakaasiatuga o te alofa atafai? ‵Tou lagonaga atafai. A vaegā lagonaga penā e se ne mea ne māfua mai mo tatou, kae e fakamalosi mai te Tusi Tapu ke ga‵lue tatou o ati aka a lagonaga penā i loto i a tatou. A “te alofa atafai” se vaega o uiga fou kolā e ‵tau mo Kelisiano katoa o ‵pei ki ei. (Faitau te Kolose 3:9, 10, 12.) E mafai pefea o fakagalue ne tatou te lagonaga atafai ki nisi tino? Mai i te ‵tala otou loto ke ma‵tala ‵lei. (2 Koli. 6:11-13) E ‵tau o fakalogologo faka‵lei māfai ko fakaasi atu ne se tino ana lagonaga mo mea e manavase a ia ki ei. (Iako. 1:19) Ke fakaataata ne koe i tou mafaufau kae fesili ifo ki a koe eiloa: ‘Ka pefea nei oku lagonaga, moi fai ko au tenā? Ne a mea ka manako au ki ei?’—1 Pe. 3:8.

15. Ne a ‵tou mea e mafai o fai ke fesoasoani atu ki a latou kolā ko fai pelā me se mouku ko magemage io me se ‵vae telā ko pili o mate?

 15 ‵Tou faifaiga atafai. A te alofa atafai e fai ne ia tatou ke ma‵nako o fai ne ‵fuliga ki olaga o nisi tino, maise eiloa ki a latou kolā ko fai pelā me se mouku magemage io me se ‵vae telā ko pili o mate. E mafai pefea o fesoasoani atu tatou ki a latou? E fai mai te Loma 12:15 ke “‵tagi fakatasi mo latou kolā e ‵tagi.” A tino loto mafatia e ma‵nako ke fakaasi atu ne tatou a faifaiga a‵lofa i lō te tali atu fua ki olotou manakoga. Ne fai mai ne se tuagane telā ne mate tena tama fafine kae ne maua ne ia fakamafanafanaga mai i taina tali‵tonu: “Ko oko eiloa i toku loto fakafetai i te taimi ne au‵mai ei a taugasoa kae ‵tagi fakatasi mo au.” E mafai foki ne tatou o fakaasi atu te alofa atafai mai i te fakaasiatuga o faifaiga a‵lofa. E mata, e iloa ne koe se fafine ko mate tena avaga kae manako ki se fesoasoani ke toe faite faka‵lei aka tena fale? E mata, e isi se Kelisiano matua e manakogina ne ia se fesoasoani ke ave sale a ia ki fakatasiga, ki te galuega talai, io me ke ave a ia ki te tokitā? A te fakaasiatuga o se tamā faifaiga alofa penā e mafai o fai ne ia se ‵fuliga lasi ‵ki i se olaga o se taina talitonu telā ne manako malosi ki se fesoasoani. (1 Ioa. 3:17, 18) Kae maluga i mea katoa, e ‵tau o fakaasi atu ne tatou te alofa tonu mō nisi tino mai te ‵kau katoatoa atu ki te faiga o te galuega talai. E seai aka foki loa se suā auala e maluga atu ke ‵fuli ne ia a olaga o tino loto fakamaoni konei!

E mata, e saga tonu atu koe ki ou taina tali‵tonu? (Ke onoono ki te palakalafa e 15)

16. Ne a ‵tou pati e mafai o fai atu ke fakamalosi aka latou kolā e loto mafatia?

16 ‵Tou pati atafai. A ‵tou pati atafai e fai ei ne ia tatou ke “fakamafanafana atu ki tino loto mafatia.” (1 Tesa. 5:14) Ne a ‵tou pati e mafai o fai ke fakamalosi aka i ei a vaegā tino penā? E mafai o fakamalosi aka ne tatou a tino mai i te fakaasiatuga o te atafai tonu mo te ‵saga tonu atu ki a latou. E mafai o tuku atu ne tatou ne pati tavae kolā e fesoasoani atu ke lavea ne latou olotou uiga ‵lei penā foki loa mo olotou mea ‵lei ne fai. E mafai o fakamasaua atu ne tatou ki a latou me ko Ieova ne fesoasoani atuke fakapilipili latou ki tena tama, tela la e tāua ‵ki latou i tena kilokiloga. (Ioa. 6:44) E mafai foki o fakatalitonu atu ne tatou ki a latou i a Ieova e ‵poko ‵ki tena alofa atafai mō ana tavini kolā e “loto vāi‵vai” io me kolā ko “seai ne olotou fakamoemoega.” (Sala. 34:18) A ‵tou pati a‵lofa e mafai eiloa o fai pelā me se vailakau ki a latou kolā e ma‵nako ki se fakamafanafanaga.—Faata. 16:24.

17, 18. (a) I te auala fea e manako ei a Ieova ki toeaina ke tausi atu ki ana mamoe? (e) Ne a mea ka sau‵tala tatou ki ei i te suā mataupu?

17 Toeaina, e manako a Ieova ke fai faka‵lei ne koutou ana mamoe mai i te fakaasiatuga o te alofa atafai. (Galu. 20:28, 29) Masaua, me i o koutou te tiute ke tausi faka‵lei kae ke faka‵fou te malosi o ana mamoe. (Isa. 32:1, 2; 1 Pe. 5:2-4) Tela la, a te toeaina telā e alofa atafai e se ‵tau mo ia o pule mālō atu ki mamoe, fai ana fakatonuga io me fai ne ia ke sē ‵lei olotou lagonaga ko mafai ei o faimālō latou ke fai a mea kolā e se mafai o fai ne latou. I lō te fai penā, e taumafai malosi a toeaina o tuku atu a te fiafia ki loto o mamoe, mo te loto talitonu me i te olotou a‵lofa mō Ieova ka fai ei ke tavini katoatoa atu latou ki a Ia.—Mata. 22:37.

18 Kafai e mafaufau faka‵lei tatou ki te loto maulalo mo te alofa atafai o Iesu, e mautinoa eiloa me ka fakaosofia i ei tatou ke sa‵sale i ana kalafaga. I te suā mataupu, ka sau‵tala tatou ki nisi uiga ‵gali e lua o Iesu, ko te loto toa mo te poto.