Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Ianuali 2015

Te Pogai e Fakamanatu ei ne Tatou te ‵Kaiga a te Aliki i te Afiafi

Te Pogai e Fakamanatu ei ne Tatou te ‵Kaiga a te Aliki i te Afiafi

“Ke fai faeloa te mea tenei mo fai se fakamasauaga ki a au.”—1 KOLI. 11:24.

1, 2. Ne a mea ne fai ne Iesu i te afiafi i a Nisani po 14 i te 33 T.A.? (Ke onoono ki te ata i te kamataga.)

KO OKO atu nei ki te afiafi po, kae ko sulu te masina i Ielusalema. A te mea tenei ko te afiafi po o Nisani 14, 33 T.A. Ne fakamanatu ne Iesu mo ana apositolo a te Paseka, e fakamasaua ei te faka‵saoga o Isalaelu mai te ‵nofo pologa i Aikupito i se 15 senitenali ko ‵teka. Kae i te taimi eiloa tenei a koi fakatasi ei a ia mo ana apositolo fakamaoni e toko 11, ka fakatoka ei ne Iesu se ‵kaiga fakapito telā ka fakamanatu faeloa i ei tena mate a koi tuai o oti te aso tenā. *Mata. 26:1, 2.

2 Ne fai ne Iesu se ‵talo kae tufatufa atu te falaoa sē faka‵fete ki apositolo, kae fai atu: “Puke, ‵kai.” Ne puke ne ia te ipu uaina, toe fai te fakafetai, kae fai atu: “Inu katoa koutou ki ei.” (Mata. 26:26, 27) Ka se toe tuku atu ne Iesu a nisi mea‵kai ki a latou, kae koi uke ‵ki a mea e fia fai atu ne ia ki ana soko fakamaoni i te po tāua tenei.

3. Ne a fesili ka sau‵tala tatou ki ei i te mataupu tenei?

3 Ko Iesu eiloa ne fakatoka ne ia te Fakamanatuga o tena mate, telā e taku foki ko te “‵Kaiga a te Aliki i te Afiafi.” (1 Koli. 11:20) E  mafai o ‵sili mai a nisi tino e uiga ki te mea tenei: Kaia e fakamanatu ei te mate o Iesu? Se a te uiga o te falaoa mo te uaina? E mafai pefea o fakatoka tatou mō te Fakamanatuga? Ko oi e ‵tau o fakaaoga ne latou? Kae e ‵saga atu pefea a Kelisiano ki pati i te Tusi Tapu e uiga ki te lotou fakamoemoega?

TE POGAI E FAKAMANATU EI NE TATOU TE MATE O IESU

4. Se a te mea ne mafai ne te mate o Iesu o fai mō tatou?

4 E pelā me ne fanau a Atamu, ne fa‵nau mai tatou i te agasala mo te mate. (Loma 5:12) E seai se tino sē ‵lei katoatoa e mafai o tuku atu ne ia ki te Atua se ‵togi mō tena ola io me ko te ola o nisi tino. (Sala. 49:6-9) E ui i ei, mai tena mate, ne ‵togi mai ei ne Iesu te togiola telā e fetaui ‵lei—tena foitino ‵lei katoatoa mo tena toto maligi. Mai te tuku atu ki te Atua te tāua o tena togiola, ne mafai ei ne Iesu o faka‵sao tatou mai te agasala mo te mate kae ke maua te meaalofa ko te ola se-gata-mai.—Loma 6:23; 1 Koli. 15:21, 22.

5. (a) E iloa pefea ne tatou me i te Atua mo Keliso e a‵lofa ki tino katoa? (e) Kaia e ‵tau ei mo tatou o ‵kau atu ki te fakamanatuga o te mate o Iesu?

5 A te fakatokaga o te togiola e fakamaoni mai ei me i te Atua e alofa ki tino katoa i te lalolagi. (Ioa. 3:16) A te taulaga a Iesu se fakamaoniga me i a ia e alofa mai foki ki a tatou. A koi nofo atu Iesu i te lagi e pelā me se “tagata poto i te fakatūtū,” ne ‘fiafia a ia ki tino’! (Faata. 8:30, 31) E fakaosofia ne te ‵tou loto fakafetai ki te Atua mo tena Tama ke ‵kau atu tatou ki te fakamanatuga o te mate o Iesu, mai te faka‵logo ki te fakatonuga tenei: “Ke fai faeloa te mea tenei mo fai se fakamasauaga ki a au.”—1 Koli. 11:23-25.

UIGA O MEA FAKATUSA

6. E ‵tau o pefea ‵tou kilokiloga e uiga ki te falaoa mo te uaina o te Fakamanatuga?

6 I te taimi ne fakatoka ei te Fakamanatuga, ne seki ‵fuli fakavavega ne Iesu a te falaoa mo te uaina ki tena foitino mo tena toto. I lō te fai penā, ne fai atu a ia e uiga ki te falaoa: “E fakauiga te mea tenei ki toku foitino.” E uiga ki te uaina, ne fai atu a ia: “Ko tena uiga ko toku ‘toto o te feagaiga,’ telā ka ‵ligi ki tua mō tino e tokouke.” (Male. 14:22-24) Tela la, e manino ‵lei me i te falaoa mo te uaina ne mea fakatusa fua.

7. Se a te mea e fakauiga ki ei te falaoa telā e fakaaoga i te Fakamanatuga?

7 I te vaitaimi tāua tenā i te 33 T.A., ne fakaaoga ne Iesu a falaoa sē faka‵fete kolā ne ‵toe mai te ‵kaiga o te Paseka. (Eso. 12:8) I te Tusi Tapu, ne fakasino atu a te mea faka‵fete i nisi taimi ki te agasala. (Mata. 16:6, 11, 12; Luka 12:1) E ui i ei, a te fakaaogaga ne Iesu te falaoa sē faka‵fete ne tāua ‵ki ona me e fetaui ‵lei mo tena foitino sē agasala. (Epe. 7:26) Tela la, e fakaaoga eiloa te vaegā falaoa tenā i te Fakamanatuga.

8. Se a te mea e fakauiga ki ei a te uaina telā e fakaaoga i te Fakamanatuga?

8 A te uaina telā ne fakaaoga ne Iesu i a Nisani po 14 i te 33 T.A., ne fakauiga ki te toto o Iesu, e pelā foki mo te uaina telā e fakaaoga i te Fakamanatuga i aso nei. I se koga mai tua o Ielusalema telā e taku ko Kolokota, ne ‵ligi i ei tena toto “ke fakamagalo ei a agasala.” (Mata. 26:28; 27:33) Ona me fakatusa a te falaoa mo te uaina i te Fakamanatuga ki te taulaga tāua telā ne ofo atu ne Iesu mō tino faka‵logo katoa kae loto fakafetai foki tatou ki te fakatokaga alofa tenā, se mea ‵lei ke fakatoka faka‵lei tatou ki te fakamanatuga o te ‵Kaiga a te Aliki i te Afiafi telā e fai faka-tasi i te tausaga.

NISI AUALA KE FAKATOKA EI

9. (a) Kaia e tāua ei ke tumau i te tau‵tali i te faitauga o tusi fai‵tau mō te Fakamanatuga? (e) E pefea ou lagonaga e uiga ki te togiola?

9 Mai te tumau i te tautali ki te faitauga ki tusi fai‵tau mō te Fakamanatuga telā e maua i te tusi Ke Sukesuke ki te Tusi Tapu i Aso Katoa,  e mafai ei ne tatou o mafaufau ‵loto ki mea ne fai ne Iesu mai mua malie fua o tena mate. I te suā feitu, e mafai o fesoasoani mai te mea tenei ke fakatoka ‵tou loto mō te ‵Kaiga a te Aliki i te Afiafi. * “E olioli tatou ki te Fakamanatuga,” ko pati a se tuagane e tokotasi. “Ko gasolo eiloa o ‵kese i tausaga katoa. E masaua ne au te taimi ne tu ei au i te fale mate . . , o kilo atu ki toku tamana pele kae kamata o loto fakafetai au ki te togiola. . . . E iloa ne au a tusi siki katoa mo te auala ke fakamatala atu ei! Kae i te taimi ne lagona tonu ei ne au te logo‵mae ona ko te mate, ne fiafia toku loto ona ko mea kolā ka fakataunu e auala i te tāua o te togiola.” E tonu, kafai e fakatoka mō te Fakamanatuga, e ‵tau eiloa mo tatou o mafaufau ‵loto ki te auala ne fakasaoloto ei ne te taulaga a Iesu a tatou mai te logo‵mae o te agasala mo te mate.

Fakaaoga a mea faigaluega ke fakatoka ei tou loto mō te Fakamanatuga (Ke onoono ki te palakalafa e 9)

10. E mafai pefea o aoga a fakatokaga mō te Fakamanatuga ki te ‵tou galuega talai?

10 A te fakatokaga mō te Fakamanatuga e mafai o aofia i ei a palani ke momea aka te uke o mea e fai i te ‵tou galuega talai i nisi auala, e pelā me ne paenia lagolago i te vaitau o te Fakamanatuga. I te taimi e ‵kami ei ne tatou a tino a‵koga ki te Tusi Tapu mo nisi tino ki te ‵Kaiga a te Aliki i te Afiafi, ka maua eiloa ne tatou te fiafia mai te faipati atu e uiga ki te Atua, tena Tama, mo fakamanuiaga kolā e tausi mō latou kolā e fiafia ki a Ieova kae tavae atu ki a ia.—Sala. 148:12, 13.

11. I te auala fea e fakaaoga ei ne nisi tino Kolinito a mea fakatusa o te Fakamanatuga i se auala sē āva?

11 I te taimi e fakatoka ei koe mō te ‵Kaiga a te Aliki i te Afiafi, mafaufau ki pati a te apositolo ko Paulo ki te fakapotopotoga Kelisiano i Kolinito. (Faitau te 1 Kolinito 11:27-34.) Ne faka‵mafa mai ne Paulo me i so se tino telā e sōna kai ki te falaoa kae inu “ko agasala eiloa a ia ki te foitino mo te toto o te Aliki,” ko Iesu Keliso. Tela la, e ‵tau mo se tino fakaekegina “o iloilo muamua . . . a ia eiloa” ko mafai ei o fakaaoga ne ia a mea fakatusa. Kafai e se fai penā, e “fakamasino a ia ona ko tena kai kae inu.” Ona ko uiga sē ‵tau o te kau Kolinito, ne “vāi‵vai kae ma‵saki ei a tino e tokouke i a koutou, kae e tokouke foki ko oti ne ‵moe i te mate [i te feitu faka-te-agaga].” Kāti a nisi tino ne ‵kai kae inu malosi mai mua io me i te taimi o te Fakamanatuga ko ala ei o ‵moe olotou mafaufau i te feitu faka-te-agaga. A te fakaaogaga o mea fakatusa i se auala sē āva e se maua i ei te taliaga te Atua.

12. (a) Se a te mea ne fakatusa ki ei ne Paulo a te Fakamanatuga, kae se a te polopolokiga ne tuku atu ne ia ki tino kolā e fakaaoga ne latou a mea fakatusa? (e) Se a te mea e ‵tau o fai ne se tino telā e fakaaoga ne ia mea fakatusa kae ne fai ne ia se agasala matagā?

 12 Ne fakatusa ne Paulo a te Fakamanatuga ki se ‵kaiga telā ne aofia ei a nisi tino, kae ne polopoloki ne ia a tino kolā ne fakaaoga ne latou a mea fakatusa: “E se mafai o inu koutou ki te ipu a Ieova e pelā foki mo te ipu a temoni; e se mafai o ‵kai koutou i ‘te taipola a Ieova’ e pelā foki mo te taipola a temoni.” (1 Koli. 10:16-21) Kafai a te tino telā ne fakaaoga ne ia mea fakatusa i te ‵Kaiga a te Aliki i te Afiafi ne fai ne ia se agasala matagā, e ‵tau mo ia o ‵sala atu ki se fesoasoani i te feitu faka-te-agaga. (Faitau te Iakopo 5:14-16.) Kafai e fakaasi mai ne se tino fakaekegina i te taimi tenā “a faiga ke iloa ei i a [ia] ko salamo,” e fakaasi atu ei a tena āva ki te taulaga a Iesu mai te fakaaogaga ne ia a mea fakatusa i te Fakamanatuga.—Luka 3:8.

13. Kaia e ‵tāua ei ke mafau‵fau loto ki ‵tou ‵talo e uiga ki te ‵tou fakamoemoega telā e tuku mai ne te Atua?

13 I te taimi e fakatoka ei tatou mō te Fakamanatuga, e tāua eiloa ke mafaufau ‵loto ki ‵tou ‵talo e uiga ki te ‵tou fakamoeoega telā e tuku mai ne te Atua. E seai eiloa se tavini tukugina atu a Ieova io me se soko fakamaoni o tena Tama e manako ke fakaasi atu te sē āva ki te taulaga a Iesu, mai te fakaaoga a mea fakatusa o te Fakamanatuga māfai e seai ne fakamaoniga me i a ia se tino fakaekegina. Tela la, e mafai o iloa pefea ne se tino me e mafai o fakaaoga ne ia a mea fakatusa io me ikai?

KO OI E ‵TAU O ‵KAI KAE INU?

14. Se a te sokoga o te feagaiga fou ki tino kolā e fakaaoga ne latou a mea fakatusa i te Fakamanatuga?

14 A tino kolā e fakaaoga ne latou a mea fakatusa o te Fakamanatuga e mautinoa eiloa me e aofia i te feagaiga fou. E uiga ki te uaina, ne fai mai a Iesu: “E fakauiga a te ipu tenei ki te feagaiga fou e auala i toku toto.” (1 Koli. 11:25) E auala i te pelofeta ko Ielemia, ne ‵valo mai te Atua me ka fai ne Ia se feagaiga fou telā e ‵kese mai te feagaiga o te Tulafono telā ne fai ne ia mo te kau Isalaelu. (Faitau te Ielemia 31:31-34.) Ne fai ne te Atua se feagaiga fou mo te Isalaelu faka-te-agaga. (Kala. 6:15, 16) Ne fakataunu a te feagaiga tenei ki te taulaga a Keliso kae ne fakamau‵tu ki tena toto maligi. (Luka 22:20) A Iesu ko te sokoga o te feagaiga fou, a ko te kau fakaekegina fakamaoni kolā e aofia i ei e maua ne latou te tofi faka-te-lagi.—Epe. 8:6; 9:15.

15. Ko oi e aofia i te feagaiga o te Malo, kae se a te tauliaga e maua ne latou māfai e fakamaoni latou?

15 E iloa ne tino kolā e fakaaoga ne latou a mea fakatusa i te Fakamanatuga me e aofia latou i te feagaiga o te Malo. (Faitau te Luka 12:32.) A latou kolā ne fai mo soko fakaekegina o Iesu kae ne fakamaoni o olo tasi mo ia kae aofia i ana logo‵maega, ka aofia fakatasi mo ia i te pulega faka-te-lagi. (Fili. 3:10) Ona me e aofia latou i te feagaiga o te Malo, ka pule fakatasi a tino fakaekegina fakamaoni konei mo Keliso e pelā me ne tupu lagolago ki te se-gata-mai. (Faka. 22:5) Ko latou eiloa ka fakaaoga tonu ne latou a mea fakatusa i te taimi o te ‵Kaiga a te Aliki i te Afiafi.

16. Fakamatala fakatoetoe mai a te uiga o te Loma 8:15-17.

16 Ko latou fua kolā e molimau ki ei te agaga me i a latou ko fanau a te Atua e ‵tau o fakaaoga ne latou a mea fakatusa i te Fakamanatuga. (Faitau te Loma 8:15-17.) Mafaufau la me ne fakaaoga ne Paulo a te pati Alamaika “Apa,” telā e fakauiga ki te “Tamana!” E mafai o fakaaoga ne se tamaliki a te pati tenei māfai ko kalaga atu ki tena tamana, se tugāpati alofa telā e tuku fakatasi ei a uiga o pati konei “papa,” te fesokotakiga ‵pili o te tamana mo tena tama, mo te “tamana,” se pati fakaaloalo e fakaaoga ne te tamaliki ki tena tamana. A latou kolā ne maua ne latou “te agaga ke fai . . . mo tama puke” ko tama  puke faka-te-agaga a te Atua. Ko tena agaga eiloa e molimau ki olotou agaga, mai te fakailoa atu me i a latou ko tama fakaekegina a Ieova. E se fakauiga i ei i a latou e se fia ‵nofo i te lalolagi. E mautinoa i a latou me ka fai latou mo pule lagolago i te Malo faka-te-lagi māfai e tumau latou i te fakamaoni ke oko ki te mate. I aso nei, se ‵toega fua o te toko 144,000 o soko fakamaoni o Keliso koi ‵toe mai, kolā “ne fakaekegina . . . ne te tino telā e tapu,” ko Ieova. (1 Ioa. 2:20; Faka. 14:1) E auala i tena agaga e ka‵laga atu ei latou, “Apa, te motou Tamana!” Mafaga o fesokotakiga gali e maua ne latou mo te Atua!

KE ‵SAGA ATU KI ‵TOU FAKAMOEMOEGA MAI TE TUSI TAPU

17. Se a te fakamoemoega o tino fakaekegina, kae se a te lotou kilokiloga e uiga ki ei?

17 Kafai koe se Kelisiano fakaekegina, a te fakamoemoega faka-te-lagi se mataupu tāua e ‵tau o aofia i au ‵talo. Kafai e faipati a te Tusi Tapu ki te ‘tautoga ki se avaga’ i te vā o te tamataene faka-te-lagi ko Iesu Keliso ki te tamafine, e iloa ne koe me e fakasino atu ki a koe, kae e olioli eiloa koe ki te taimi ka fai ei koe mo fai te “avaga” a Keliso. (2 Koli. 11:2; Ioa. 3:27-29; Faka. 21:2, 9-14) Kafai e fakaasi mai ne te Atua a tena alofa e auala i tena Muna ki ana tama‵liki faka-te-agaga, ka fai atu koe, “E fakauiga mai ki a au.” Kae kafai e tuku mai i te Muna a Ieova a pati fakatonutonu ki ana tama fakaekegina, ka fakaosofia eiloa koe ne te agaga ke fakalogo kae fai atu, “A pati konā e fakasino mai ki a au.” Ka molimau fakatasi atu tou agaga mo te agaga o te Atua me ko maua ne koe te fakamoemoega faka-te-lagi.

18. Se a te fakamoemoega o “nisi mamoe,” kae pefea ou lagonaga e uiga ki ei?

18 I te suā feitu, kafai koe se vaega o te “vaitino tokouke” o “nisi mamoe,” e tuku atu eiloa ne te Atua ki a koe a te fakamoemoega ke ola i te lalolagi. (Faka. 7:9; Ioa. 10:16) E manako koe o ola ki te se-gata-mai i te Palataiso, kae fiafia koe o mafaufau ‵loto ki pati a te Tusi Tapu e uiga ki te olaga i te lalolagi i aso mai mua. Ka fiafia koe ke maua te filemu i te taimi e ‵kau fakatasi ei koe mo tou kāiga mo nisi tino amio‵tonu. Ka manako malosi eiloa koe ki te taimi telā ka se toe fai ei a te oge mea‵kai, te mativa, logo‵maega, masaki mo te mate e pelā me ne mala ki luga i tino katoa. (Sala. 37:10, 11, 29; 67:6; 72:7, 16; Isa. 33:24) E olioli eiloa koe ke fetaui mo tino kolā e faka‵tu aka mai te mate mo te fakamoemoega ke ola ki te se-gata-mai i te lalolagi. (Ioa. 5:28, 29) Ko oko eiloa i tou loto fakafetai me e fakamanuia ne Ieova koe mai te tukuatuga o te fakamoemoega ke ola i te lalolagi! E tiga eiloa e se fakaaoga ne koe a mea fakatusa, a tou kau atu ki te Fakamanatuga se fakaasiga o tou loto fakafetai ki te taulaga togiola a Iesu Keliso.

E MATA, KA KAU ATU KOE KI EI?

19, 20. (a) E mafai pefea o fai a tou fakamoemoega telā ne tuku mai ne te Atua e pelā me se mea tonu? (e) Kaia ka kau atu ei koe ki te ‵Kaiga a te Aliki i te Afiafi?

19 Faitalia me e fakamoemoe koe ke ola i te lagi io me ko te lalolagi, ka fai eiloa pelā me se mea tonu māfai fua e fakatuanaki koe ki a Ieova te Atua, Iesu Keliso, mo te togiola. Mai te kau atu ki te Fakamanatuga, ka maua ne koe te avanoaga ke mafaufau ‵loto ki tou fakamoemoega mo te tāua o te mate o Iesu. Tela la, ke fai ne koe pelā me se fakamoemoega ke aofia i te fia miliona kolā ka ‵kau atu ki te ‵Kaiga a te Aliki i te Afiafi māfai ko tō te mata o te la i te Aso Lima, i a Apelila po 3, 2015, i Kingdom Halls mo nisi koga aka i te lalolagi kātoa.

20 A te ‵kau atu ki te Fakamanatuga e mafai o fakamalosi ne ia tou loto fakafetai mō te taulaga togiola a Iesu. A te fakalogologo faka‵lei ki te lāuga e mafai o fakaosofia ne ia koe ke fakaasi atu te alofa mō tuakoi mai te fakaasi atu ki a latou a mea ne tauloto ne koe e uiga ki te alofa o Ieova mo ana fuafuaga e uiga ki tino katoa. (Mata. 22:34-40) Tela la, ke na fakaiku aka ke kau atu koe ki te ‵Kaiga a te Aliki i te Afiafi.

^ pala. 1 Ki te kau Epelu, a te aso i a latou e kamata i te tōga o te mata o te la kae oti i te tōga o te mata o te la i te suā aso.

^ pala. 9 Ke onoono ki te Appendix B12 i te New World Translation.