Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Ianuali 2015

Ke Fakafetai Atu ki a Ieova Kae ke Maua a Fakamanuiaga

Ke Fakafetai Atu ki a Ieova Kae ke Maua a Fakamanuiaga

‘Fakafetai atu ki a Ieova me i a ia e ‵lei.’SALA. 106:1.

1. Kaia e ‵tau ei o fakaasi atu ki a Ieova a te ‵tou loto fakafetai?

A IEOVA, ko te Tino telā e tuku mai ne ia “a meaalofa ‵lei katoatoa,” kae ‵tau o loto fakafetai tatou ki ei. (Iako. 1:17) E pelā me ko te ‵tou Tausi Mamoe alofa, e atafai mai eiloa a ia ki ‵tou manakoga faka-te-foitino mo manakoga faka-te-agaga. (Sala. 23:1-3) A ia ko te “lafiga mo te malosi” o tatou i taimi o puapuaga! (Sala. 46:1) E manino ‵lei me e uke eiloa a pogai ke tali‵tonu katoatoa tatou ki te faisalamo telā ne tusi mai, penei: ‘Fakafetai atu ki a Ieova me i a ia e ‵lei; a tena alofa fakamaoni e se gata mai.’—Sala. 106:1.

Te ‵tou tusi siki fakavae mō te tausaga 2015:‘Fakafetai atu ki a Ieova me i a ia e ‵lei.’Salamo 106:1

2, 3. (a) Kaia e fakamataku ei a te manatu mā‵ma ki ‵tou fakamanuiaga? (e) Ne a fesili ka mafau‵fau tatou ki ei i te mataupu tenei?

2 Kaia e tāua ei ke mafau‵fau tatou ki te auala e fakaasi atu ei te loto fakafetai? E pelā mo te mea ne ‵valo mai, a tino i aso fakaoti konei ka sē loto fakafetai. (2 Timo. 3:2) E manatu mā‵ma a nisi tino ki fakamanuiaga e maua ne latou. Ona ko fakamalosiga a pisinisi o te lalolagi mo olotou mea fakasalalau, e lau i miliona o tino e taumafai ke maua ne latou a mea e uke i lō te lotoma‵lie ki mea ko maua ne latou. E mafai foki o pokotia tatou i te agaga sē loto fakafetai tenei. E pelā mo tino Isalaelu i aso mua, e mafai o sē loto fakafetai tatou kae galo atu te loto fiafia ki te ‵tou fesokotakiga  tāua mo Ieova e pelā foki mo fakamanuiaga kolā ne maua ne tatou mai i a ia.—Sala. 106:7, 11-13.

3 Mafaufau ki te mea e mafai o tupu māfai e fe‵paki tatou mo fakalavelave faiga‵ta. I vaegā taimi penā, e mafai o faigofie eiloa o manava‵se tatou kae galo atu ei i a tatou a ‵tou fakamanuiaga. (Sala. 116:3) Tela la, e mafai pefea o ati aka ne tatou se loto fakafetai kae tumau i te fakaasi atu? Kae se a te mea ka fesoasoani mai ki a tatou ke tumau i se kilokiloga ‵lei faitalia me e fe‵paki tatou mo fakalavelave faiga‵ta? Ke onoono nei tatou ki ei.

‘IEOVA KO OTI NE FAI NE KOE A MEA E UKE MŌ MATOU’

4. E mafai pefea o tumau i te fakaasi atu ne tatou te loto fakafetai?

4 Kafai e ati aka ne tatou te loto fakafetai kae tumau i te fakaasi atu, e ‵tau o talia kae mafaufau ‵loto tatou ki ‵tou fakamanuiaga mai i a Ieova kae mafaufau faka‵lei ki faifaiga o tena alofa fakamaoni. I te taimi ne fai ei penā te faisalamo, ne ofo a ia i mea fakaofoofogia kolā ne fai ne Ieova.Faitau te Salamo 40:5; 107:43.

5. Ne a mea e mafai o tauloto ne tatou mai te apositolo ko Paulo e uiga ki te atiakaga o te loto fakafetai?

5 E mafai o uke a mea e tauloto ne tatou mai te apositolo ko Paulo e uiga ki te atiakaga o te loto fakafetai. A te tonuga loa, ne mafaufau ‵loto a ia ki ana fakamanuiaga me ne fakaasi faeloa ne ia te loto fakafetai. Ne iloa ‵lei ne Paulo me ne fai a ia pelā me se “tino ne muna masei, ne uiga fakasaua kae fia sili i aso mua.” E ui i ei, ne fakaasi atu ne ia te loto fakafetai, me faitalia ana uiga ma‵sei ne fai i aso mua, ne fakaasi atu eiloa ne te Atua mo Keliso a te loto fakamagalo kae ne tuku atu ke fai ne ia te galuega talai. (Faitau te 1 Timoteo 1:12-14.) Ne fakaasi atu foki ne Paulo a te ‵poko o tena loto fakafetai ki ana taina Kelisiano kae fakafetai faeloa ki a Ieova ona ko uiga ‵gali mo te lotou tavini atu mo te fakamaoni. (Fili. 1:3-5, 7; 1 Tesa. 1:2, 3) Kae i te taimi ne fepaki ei a Paulo mo tulaga faiga‵ta, ne gasue fakavave a ia o fakafetai ki a Ieova mo te fesoasoani telā ne maua ne ia i te taimi tonu mai ana taina faka-te-agaga. (Galu. 28:15; 2 Koli. 7:5-7) Tela la, e sē se mea fakapoi me ne fakamalosi atu a tusitusiga a Paulo ki Kelisiano: “Ke fakaasi atu te otou loto fakafetai . . . , fakamalosi atu te suā tino ki te suā tino i te usuga o salamo, vikiga ki te Atua, ko pese faka-te-agaga kolā e usu atu mo te loto alofa.”—Ko. 3:15-17.

A TE MAFAUFAU ‵LOTO MO ‵TALO KO KĪ TĀUA KE FAKAASI ATU TE LOTO FAKAFETAI

6. Ne a fakamanuiaga mai i a Ieova e loto fakafetai koe ki ei?

6 Ne a mea e tauloto ne tatou mai te fakaakoakoga ‵lei a Paulo e uiga ki te atiakaga mo te fakaasi atu te loto fakafetai? E pelā mo Paulo, e ‵tau o mafaufau ‵loto tatou ki mea ne fai ne Ieova mō tatou. (Sala. 116:12) Kafai e ‵sili atu ki a koe, ‘Ne a fakamanuiaga mai i a Ieova e loto fakafetai koe ki ei?’ ka tali atu koe pefea? E mata, ka aofia ne koe i ei a tou fesokotakiga tāua mo Ieova? Io me ko te fakamagaloga telā e maua ne koe ona ko tou fakatuanaki ki te taulaga togiola a Keliso? E mafai o taku atu ne koe a igoa o taina mo tuagane kolā ne fesoasoani atu ki a koe i taimi faiga‵ta? E mautinoa eiloa me ka aofia ne koe i ei a tau avaga io me ko au tamaliki. E tonu, e uke a mea e mafai o aofia i ei. A te fakaavanoa o taimi ke mafaufau ‵loto ki vaegā fakamanuiaga penā mai tou Tamana alofa ko Ieova, ka faka‵fonu kae fakaosofia ne ia ‵tou loto ke fakaasi atu faeloa te loto fakafetai i aso katoa.—Faitau te Salamo 92:1, 2.

7. (a) Kaia e ‵tau ei o avatu ne tatou a ‵talo fakafetai? (e) Ka maua pefea ne koe a mea aoga mai te fakaasi atu o te loto fakafetai i au ‵talo?

7 Kafai ko ‵mau a ‵tou fakamanuiaga i te mafaufau mo te loto, ko toka eiloa tatou o  ‵talo atu ki a Ieova kae fakafetai atu ki a ia. (Sala. 95:2; 100:4, 5) E ‵kilo atu a te tokoukega ki te ‵talo pelā me se auala ke fakamolemole atu fua ki te Atua mō mea e uke. E ui i ei, e iloa ne tatou me i a Ieova e fiafia māfai e fakafetai atu tatou mō mea ko maua ne tatou. E aofia i te Tusi Tapu a ‵talo fakafiafia e uiga ki te loto fakafetai, e aofia ei a ‵talo a Hana mo Hesekia. (1 Samu. 2:1-10; Isa. 38:9-20) Tela la, ke fakaakoako ki tavini fakamaoni kolā ne fakaasi atu ne latou te agaga o te loto fakafetai. Ao, fakafetai atu ki a Ieova i se ‵talo mō fakamanuiaga ko maua ne koe. (1 Tesa. 5:17, 18) E uke a mea aoga e maua ne koe mai te faiga tenā. Ka fakafou ei tou malosi, ka momea aka ei tou alofa ki a Ieova, kae ka fakapilipili atu koe ki a ia.—Iako. 4:8.

Ne a fakamanuiaga mai i a Ieova e loto fakafetai koe ki ei? (Ke onoono ki te palakalafa e 6, 7)

8. Ne a mea e fai ei ke galo atu i a tatou te loto fakafetai mō mea katoa ne fai ne Ieova mō tatou?

8 Kaia e ‵tau ei o fakaeteete tatou i te fakamataku o te galo atu o ‵tou loto fakafetai mō te aga‵lei o Ieova? Ona me ne fa‵nau mai tatou e aunoa mo te manakoga ke fakaasi atu te loto fakafetai. Mafaufau la ki te mea tenei: A ‵tou matua muamua ko Atamu mo Eva, ne tuku atu ke ‵nofo i loto i te fatoaga palataiso. Ne fakataunu lā manakoga katoa, kae ne maua ne lāua te fakamoemoega ke ola ki te se-gata-mai i te filemu. (Kene. 1:28) Kae ne seki loto fakafetai lāua ki fakamanuiaga ne maua ne lāua. Ne kaima‵nako lāua. A ko te ikuga, ne ‵galo atu i a lāua a mea katoa. (Kene. 3:6, 7, 17-19) I se lalolagi telā e seai se loto fakafetai i ei, ka mafai foki o matafitafi atu i a tatou a mea katoa ne tuku mai ne Ieova ki a tatou. E mafai o manatu mā‵ma tatou ki te ‵tou vā fakataugasoa mo ia. Kāti e mafai o galo i a tatou te loto fakafetai mō te tauliaga ko maua ne tatou ke fai pelā me se vaega o te ‵tou kautaina i te lalolagi kātoa. E mafai o tosina atu tatou ki fiafiaga o te lalolagi tenei telā ko pili o palele atu. (1 Ioa. 2:15-17) Ke ‵kalo keatea mai te tulaga fakanoanoa tenā, e ma‵nako tatou o mafaufau ‵loto ki ‵tou fakamanuiaga kae fakafetai atu faeloa ki a Ieova mō te tauliaga ke fai tatou mo ana tino.—Faitau te Salamo 27:4.

I TE TAIMI E FAKAFESAGAI ATU KI TULAGA FAIGA‵TA

9. Kafai e fakafesagai atu ki tulaga faiga‵ta, kaia e ‵tau ei o mafaufau ‵loto tatou ki ‵tou fakamanuiaga?

9 A te mauaga o te loto fakafetai e mafai o fesoasoani mai ke fakafesagai atu tatou ki tulaga faiga‵ta. E mafai o manava‵se tatou māfai e pokotia tatou i fakalavelave o te olaga e pelā mo te sē fakamaoni o se tino  avaga, se masaki fakamataku, te mate atu o se tino pele, io me ko fakamaseiga ne iku mai i se fakalavelave o te natula. I vaegā taimi penā, a te mafaufau ‵loto ki ‵tou fakamanuiaga ka mafai o fakamafanafana kae fakamalosi mai ki a tatou. Ke sau‵tala nei tatou ki ne tala ‵tonu o mea ne ‵tupu.

10. Ne aoga pefea ki a Irina a te mafaufau ‵loto ki ana fakamanuiaga?

10 A Irina, * se paenia tumau i Amelika ki mātū, ne avaga ki se toeaina telā ne seki fakamaoni kae tiakina ne ia tou fafine mo lā tama‵liki. Se a te mea ne fesoasoani atu ki a Irina ke tumau i te tavini fakamaoni atu ki a Ieova? E fai mai tou fafine: “E loto fakafetai au mō te tausiga atafai a Ieova ki au. Mai te mafaufau ki fakamanuiaga i aso takitasi, e mafai o lavea ne au te tauliaga ke iloa kae ke alofagina ne te ‵tou Tamana faka-te-lagi. E iloa ne au me ka se mafai o tiaki ne ia au.” Faitalia a tulaga faiga‵ta e uke ne fakafesagai mo Irina i tena olaga, ne fesoasoani atu tena loto fiafia ke mafai ne ia o kufaki kae fai pelā me se fakamalosiga ki nisi tino.

11. Se a te mea ne fesoasoani atu ki a Kyung-sook ke fakafesagai atu ki se masaki fakamataku?

11 A Kyung-sook, telā e nofo i Asia ne paenia mo tena avaga mō se 20 tupu tausaga. Se mea fakapoi me ne pokotia a ia ne te kenisa o te māmā kae ne iloa ne ia me nofo fua ki se tolu ki te ono masina te leva e mafai ne ia o ola. E tiga eiloa ne fe‵paki lāua mo mea faiga‵ta e uke, ne loto tali‵tonu faeloa lāua me e seai eiloa ne ma‵saki e pokotia ei lāua. Ne fai mai tou fafine: “Ne pokotia malosi au i te tala e uiga ki toku masaki—Ne mafaufau au me ko seai soku fakamoemoega, kae ne mataku ‵ki eiloa au.” Se a te mea ne fesoasoani atu ki a Kyung-sook ke kufaki? E fai mai a ia: “I po katoa a koi tuai au o moe, e fanatu eiloa au ki te tuafale o te mā fale kae ‵talo atu i se leo maluga e uiga ki mea e lima kolā e loto fakafetai au ki ei i te aso tenā. Ne kamata au o sē manavase kae ne fakamalosi aka ei toku alofa mō Ieova.” Ne aoga pefea ki a Kyung-sook ana ‵talo kolā e fai sāle i po? E fai mai a ia: “Ne kamata o iloa ne au me i a Ieova e fesoasoani mai ki a māua i taimi faiga‵ta kae ko sili atu te uke o fakamanuiaga e maua ne māua i lō a mea faiga‵ta.”

Fakatasi mo tena tuagane ko John (Ke onoono ki te palakalafa e 13)

12. Ne maua pefea ne Jason a fakamafanafanaga mai tua o te mate o tena avaga?

12 A Jason, telā e galue i se ofisa lagolago i Afelika, ne aofia i te taviniga tumau mō se 30 tupu tausaga. E fai mai a ia: “I tausaga e fitu ko ‵teka, ne galo atu taku avaga, kae ne logo‵mae ‵ki eiloa au i ei. A te mafaufau ki te auala ne logo‵mae ei a ia i tena masaki ko te kenisa, e mafai o fakavāivāi mai ki a au.” Se a te mea ne fesoasoani atu ki a Jason ke kufaki? E fai mai a ia: “E tasi o mea ne masaua ne au, ko te taimi gali telā ne ‵nofo fakatasi ei māua mo taku avaga, kae ne fakafetai au ki a Ieova i se ‵talo e uiga ki ei. Ne maua ne au se fakatapūga kae ne kamata o fakafetai faeloa au ki a Ieova mō vaegā taimi fakafiafia kolā e se mafai o puli i au. Ne fai ne te loto fakafetai ke ‵fuli taku kilokiloga. Koi logo‵mae eiloa au ona ko te galo atu o taku avaga, kae fakafetai ki a Ieova me ne maua ne au se avaga ‵lei e pelā foki mo te tauliaga ke tavini atu ki a ia, fakatasi mo se fafine telā ne alofa malosi ki a Ieova.”

“E loto fakafetai eiloa au me i a Ieova ko toku Atua.”—Sheryl

13. Se a te mea ne fesoasoani atu ki a Sheryl ke fakafesagai atu ki te ‵galo atu o tena kāiga?

13 I te taimi ne poko ei te matagi malosi ko Haiyan i te feitu ki te kogāloto o Filipaina, a Sheryl telā ko 13 ana tausaga i te taimi tenā, ne ‵galo atu ei ana mea katoa. Ne fai mai a ia: “Ne galo atu toku fale mo toku kāiga.” Ne ‵mate atu tena tamana mo tena mātua, pelā foki mo tena tuagane mo ana taina i se lofiaga ona ko te matagi malosi. Se a te mea ne fesoasoani atu ki a Sheryl ke loto malosi a ia i lō te kaitaua? Ne maua ne ia te loto fafetai kae mafaufau faeloa ki fakamanuiaga e maua ne ia. “Ne lavea ne  au a mea katoa ne fai ne taina mo tuagane ke fakamafanafana kae fakamalosi atu ki a latou kolā e ma‵nako ki se fesoasoani. Ne iloa ne au me i taina i te lalolagi kātoa ne ‵talo mō au.” Ne toe fai mai a ia: “E loto fakafetai eiloa au i a Ieova ko toku Atua. E tuku mai faeloa ne ia a mea e ma‵nako tatou ki ei.” Ao, a te mafaufau ‵loto ki ‵tou fakamanuiaga se fakamalosiga ke ave keatea ei te fanoanoa. A te loto fakafetai e fesoasoani mai ke kufaki tatou faitalia so se puapuaga e mafai o fakafesagai mo tatou.Efe. 5:20; faitau te Filipi 4:6, 7.

‘E FIAFIA FAELOA AU I TE ALIKI [KO IEOVA]’

14. Ne a fakamoemoega fakafiafia e olioli tatou ki ei? (Ke onoono ki te ata i te kamataga.)

14 I tala fakasolopito, e fia‵fia eiloa a tino o Ieova ki olotou fakamanuiaga. E pelā me se fakaakoakoga, mai tua o te ‵saoga mai i a Falao mo tena kautau i te Tai Kula, ne fakaasi atu ne tino Isalaelu a te lotou fia‵fia mai te usu atu a pese o vikiga mo pese fakafetai. (Eso. 15:1-21) I aso nei, a te ‵toe fakamanuiaga telā ko maua ne tatou ko te fakamoemoega ke ‵sao atu mai mea katoa kolā e logo‵mae kae puapuaga i ei tatou. (Sala. 37:9-11; Isa. 25:8; 33:24) E pefea la ‵tou lagonaga māfai ko fakatakavale ne Ieova a ana fili katoa kae ulu atu tatou ki loto i se lalolagi fou telā e filemu kae amiotonu. Tenei eiloa te aso ka avatu ei ne tatou a te fakafetai ki a Ieova!—Faka. 20:1-3; 21:3, 4.

15. Se a te mea e fakaiku aka ne koe ke fai i te tausaga 2015?

15 E olioli eiloa tatou ke maua a fakamanuiaga faka-te-agaga ‵gali mai i a Ieova i te tausaga 2015. E tonu, e mafai o fe‵paki tatou mo nisi mea faiga‵ta. Faitalia me se a te mea e tupu, e iloa ne tatou me ka se tiaki lele ne Ieova tatou. (Teu. 31:8; Sala. 9:9, 10) Ka tumau eiloa a ia i te tuku mai a mea katoa e manakogina ke tavini fakamaoni tatou ki a ia. Tela la, ke na fakaiku aka ne tatou ke fakatumau se agaga tai ‵pau e pelā mo te pelofeta ko Sapakuka, telā ne fai mai, penei: “E ui eiloa e seai ne fua i luga o mati kae seai foki ne fuataga i luga o vine, e ui eiloa e se fua ‵lei a olive ka ko seai foki ne fuaga e maua mai saito, e ui eiloa e ‵mate katoa a mamoe ka ko ‵ma kalekale a sai pulumakau, kae seai eiloa se pulumakau i ei; E fiafia faeloa au i te Aliki te Atua ko toku fakaola.” (Sapa. 3:17, 18) Ao, i te tausaga kātoa, ke na mafaufau ‵loto tatou ki ‵tou fakamanuiaga kae ke na tau‵tali tatou i te ‵tou tusi siki fakavae mo te tausaga 2015: ‘Fakafetai atu ki a Ieova me i a ia e ‵lei.’Sala. 106:1.

^ pala. 10 Ko oti ne ‵fuli a nisi igoa i te mataupu tenei.