Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Ianuali 2015

Ke fakamalosi kae puipui ne Ieova tau fakaipoipoga

Ke fakamalosi kae puipui ne Ieova tau fakaipoipoga

“Kafai e se tausi ne te Aliki a te fa‵kai, e seai se aoga e sōna ‵tu ei a leoleo o tausi te fa‵kai.”—SALA. 127:1b.

1, 2. (a) Kaia ne ‵galo atu i ei a fakamanuiaga ‵gali mai tino Isalaelu e toko 24,000? (e) Kaia e tāua ei ki a tatou a mea ne ‵tupu i aso mua?

MAI mua malie fua o ulu atu te fenua o Isalaelu ki loto i te Fenua o te Folafolaga, e lau i sefulu afe o tagata ne “‵moe sāle . . . mo fāfine Moapi.” A ko te ikuga, ne fakaseai atu ei te toko 24,000 tino ne Ieova. Mafaufau la, ko pilipili atu eiloa te kau Isalaelu ki te taimi e fakataunu ei te fakamanuiaga telā ko leva ne fakatali‵tali latou ki ei, kae oti aka me ko galo atu i a latou a fakamanuiaga ‵gali ona ko te tosina atu ki fakaosoosoga.—Nume. 25:1-5, 9.

2 Ne fakamau eiloa a te fakaakoakoga matagā tenā ke fai “mo fai se fakailoga ke fakaeteete tatou kolā ko ‵nofo i te taimi o te gataga o te olaga tenei.” (1 Koli. 10:6-11) I te vaega fakaoti o “aso fakaoti” konei, ko ‵tu atu loa a tavini a te Atua i te kaugutu o te lalolagi fou kae amiotonu. (2 Timo. 3:1; 2 Pe. 3:13) Se mea fakafanoanoa me i nisi tino tapuaki o Ieova ko kamata o se matapula‵pula. Ko oti ne maleigina latou ne amioga ma‵sei kae tau ne latou a ikuga o olotou amioga matagā. Ko ‵tu atu a vaegā tino penā i se tulaga fakamataku me e mafai o ‵galo atu i a latou a fakamanuiaga se-gata-mai.

3. Kaia e manakogina ei ne tino a‵vaga a te takitakiga mo te puipuiga a Ieova? (Ke onoono ki te ata i te kamataga.)

3 Ona ko te matagā o amioga ma‵sei i aso nei, e manakogina ne taki tauavaga a te takitakiga mo te puipuiga a Ieova ko te mea ke  aoga a olotou taumafaiga ke puipui ei olotou fakaipoipoga. (Faitau te Salamo 127:1.) Ka sau‵tala nei tatou ki te auala e mafai ei ne se tauavaga o fakamalosi aka te lā fakaipoipoga mai te puipui a lā loto, fakapili‵pili atu ki te Atua, fakapei ki uiga ‵fou, fakatumau a fesokotakiga aoga kae ke fakama‵lie aka a lagonaga o te suā tino ki te suā tino.

PUIPUI TOU LOTO

4. Ne a mea ne fai ei ke tosina atu a nisi Kelisiano ki te faiga o amioga ma‵sei?

4 I te auala fea e mafai ei o tofotofogina se Kelisiano ke fai ne ia a amioga ma‵sei? A te auala matagā e kamata faeloa ki mea e lavea ne tatou. Ne fakamatala mai a Iesu: “So se tino e onoono ki se fafine kae e fiafai ki ei ko mulilua a ia i tena loto.” (Mata. 5:27, 28; 2 Pe. 2:14) E tokouke a Kelisiano ne tosina atu ki te faiga o amioga ma‵sei ona ko te vāivāi o olotou tulaga i mea tau amioga ko se mafai ei o ‵teke atu mai te onoono ki ata ma‵sei, faitau ki tusi e fakamāfua aka ei a lagonaga ma‵sei, io me onoono ki ata o amioga fakatauavaga sē ‵tau i te itaneti. Ne talia ne nisi tino ke onoono latou ki ata, koniseti io me ko polokalame i te TV kolā e aofia i ei a ata o amioga fakatauavaga fakatakalia‵lia. A ko nisi tino ne olo atu ki fale tuisi mo fale e ‵saka i ei a fāfine kae seai ne olotou gatu io me olo atu ki fale e ‵fo ei a tino kae fakaalaala aka ei a lagonaga ma‵sei.

5. Kaia e ‵tau ei mo tatou o puipui ‵tou loto?

5 A nisi tino e tosina atu ki fakaosoosoga me ko sē ‵saga atu latou ki olotou avaga kae ko ‵saga atu ki nisi tino. I se lalolagi e seai ei se loto pulea kae fakamalosi ei a amioga fakatauavaga sē ‵tau, se mea faigofie ke ati aka i se loto telā ko oti ne fakaloiloigina a lagonaga fakafamau ki te suā tino i lō tau avaga. (Faitau te Ielemia 17:9, 10.) Ne fai mai Iesu: “E māfua mai i te loto a mea ma‵sei katoa, ko te tatino, te mulilua, amioga fakatauavaga sē ‵tau.”—Mata. 15:19.

6, 7. (a) E mafai pefea ne te loto telā ne fakaloiloigina o ‵taki ne ia se tino ki te tulaga agasala? (e) E mafai pefea o ‵kalo keatea mai te agasala ki a Ieova?

6 I te taimi e ‵toki ei ne se tokolua a manakoga ma‵sei ki lā loto, e mafai eiloa o sau‵tala lāua ki mea kolā e ‵tau fua o fakaasi atu ki lā avaga. E se gata i ei, ka ‵sala eiloa lāua ki avanoaga e uke ke fetaui faeloa, kae fakafoliga atu e pelā me seai se mea e tupu i te vā o lāua. Kafai ko gasolo o vāivāi lā tulaga i mea tau amioga, ko faigata ei ke ‵teke atu ki lā lagonaga ma‵sei. Kafai ko oti ne oko atu lāua ki se tulaga agasala, ko nā gasolo aka foki o faigata ke fakagata te lā famau faitalia loa me e iloa ne lāua me e ‵se te mea tenā e fai ne lāua.—Faata. 7:21, 22.

7 E mafai eiloa fakamasei a te puipuiga faka-te-agaga o lāua i mea tau amioga, māfai ko takitaki lāua ne manakoga ma‵sei mo pati sē ‵tau ke fai ne lāua a faifaiga e pelā mo te pikilima, sogi, fakatau ‵sai, kae fakapatele atu o te suā tino ki te suā tino i se auala se ‵lei, mo nisi faifaiga kolā e ‵tau fua o fai ki olotou avaga. Fakamuli loa, ko ‵saga atu ei latou “ki takolekolega o [olotou] manakoga totino.” Kafai ko faitama te manakoga, ko “fanau mai i ei te agasala”—ko amioga fakatauavaga sē ‵tau. (Iako. 1:14, 15) Mafaga o mea fakafanoanoa! Moi ne talia ne lāua ke fakamalosi aka ne Ieova lāua ke fakaasi atu te āva ki te tulaga ‵malu o te fakaipoipoga, penei e mafai eiloa o ‵kalo keatea mai te agasala i mua o Ieova. Kae e mafai la pefea o ati aka ne se tino a te uiga āva i te feitu tenā?

KE TUMAU I TE FAKAPILIPILI ATU KI TE ATUA

8. E mafai pefea o fai a te fai taugasoa mo Ieova mo fai se puipuiga i mea tau amioga?

8 Faitau te Salamo 97:10. A te fai taugasoa mo Ieova ko te kī tāua ki te puipuiga i mea tau amioga. I te taimi e tauloto ei tatou ki uiga ‵gali o te Atua kae taumafai malosi tatou ke “fakaakoako . . . ki te Atua, e pelā me ne tama‵liki fagasele, kae ke tumau i te sa‵sale  i te alofa,” ka fakamalosigina eiloa tatou ke ‵teke atu ki “amioga fakatauavaga sē ‵tau mo so se vaega o amioga lai‵lai katoa.” (Efe. 5:1-4) Mai te iloa me “ka fakamasino ne te Atua a tino e fina ki amioga fakatauavaga sē ‵tau penā foki loa mo tino mulilua,” e ga‵lue malosi a taki tauavaga ke faka‵malu olotou fakaipoipoga kae ke se lailai te moega o te fakaipoipoga.—Epe. 13:4.

9. (a) Ne mafai pefea ne Iosefa o ‵teke atu ki te tofotofoga ke fai a amioga fakatauavaga sē ‵tau? (e) Ne a akoakoga e mafai o tauloto ne tatou mai i a Iosefa?

9 A nisi tavini fakamaoni a te Atua ko gasolo o vāi‵vai olotou tulaga i mea tau amioga ona ko te ‵kau fakatasi mo tino ga‵lue kolā e se ne Molimau mai tua o taimi ga‵lue. E mafai foki o ‵sae aka a fakaosoosoga i taimi ga‵lue. Ne tupu eiloa te mea tenā ki se tamataene taulekaleka ko Iosefa, telā ne fiafai ki ei te avaga a tena pule. Ne taumafai eiloa tou fafine i aso katoa o takolekole tou tagata. Fakamuli loa, ne “puke atu a te avaga a Potiafala ki te gatu loa o Iosefa, ‵futi mai ne ia ki a ia kae fai atu penei, ‘Vau ke ‵moe tāua.!’” Kae ne mafai ne Iosefa o tele keatea mai tou fafine. Se a te mea ne fesoasoani atu ki a Iosefa ke tumau i te malosi faka-te-agaga ke ‵teke atu ki vaegā tulaga penā? Ko tena fakaikuga ‵mautakitaki ke mo a ma fakamasei tena fesokotakiga mo te Atua ne puipui ne ia tena tulaga ‵ma mo tena fakamaoni. Ona ko tena fakaikuga, ne galo atu ei i a ia tena galuega kae ne sōna ‵pei atu a ia ki te falepuipui, kae ne fakamanuia eiloa ne Ieova a ia. (Kene. 39:1-12; 41:38-43) Faitalia me nofo tokotasi koe io me i te koga galue, e ‵tau mo Kelisiano o ‵kalo keatea mai te faiga ke tosina atu latou ki fakaosoosoga mo se tino telā e se ko tena avaga.

KE FAKA‵PEI KI UIGA ‵FOU

10. I te auala fea e mafai o fesoasoani atu a uiga ‵fou ki te puipuiga o se fakaipoipoga?

10 Ona me i uiga ‵fou ne “faite e ‵tusa mo te loto o te Atua i te amiotonu mo te alofa fakamaoni,” a te mea tenei se vaega tāua ke fakamalosi aka te feitu faka-te-agaga o se tauavaga. (Efe. 4:24) A latou kolā e ‵pei ki luga i uiga ‵fou e “tamate” katoa ne latou a vaega o olotou foitino mai “amioga fakatauvaga sē ‵tau, amioga lai‵lai, manakoga ma‵sei, manakoga faka‵mae loto mo te kaimanako.” (Faitau te Kolose 3:5, 6.) A te pati “tamate” e fakaasi mai i ei me e ‵tau mo tatou o taumafai malosi o taua atu ki manakoga ma‵sei o te foitino. Ka ‵kalo keatea eiloa tatou mai so se mea telā e mafai o fakamalosi aka ne ia i loto i a tatou a manakoga ma‵sei ki se tino fakaa‵tea i lō ‵tou avaga. (Iopu 31:1) Kafai e ola tatou e ‵tusa mo te loto o te Atua, ka iloa ei ne tatou o “takalia‵lia ki mea ma‵sei” kae “puke ‵mau ki mea ‵lei.”—Loma 12:2, 9.

11. E mafai pefea o fakamalosi aka ne uiga ‵fou a te fakaipoipoga?

11 E fakaata mai ne uiga ‵fou a “foliga o te Tino telā ne faite ne ia,” ko Ieova. (Ko. 3:10) Ka maua eiloa ne taki tauavaga a fakamanuiaga māfai e fakamalosi aka te tulaga o olotou amioga mai te faka‵pei ki luga i a latou a “te alofa atafai, te alofa kaimalie, te loto maulalo, te agamalu mo te kufaki”! (Ko. 3:12) Ka maua ne latou se fesokotakiga ‵pili fakatauavaga māfai e talia ne latou “ke pule atu te filemu o Keliso ki [olotou] loto.” (Ko. 3:15) Se mea fakafiafia ke fakaasi atu ne taki tauavaga a te “fakatau a‵lofa . . . te suā tino ki te suā tino”! E maua ne latou te fiafia ke gasue‵sue muamua o “fakaasi atu te āva o te suā tino ki te suā tino.”—Loma 12:10.

12. Ne a uiga kolā e mafaufau koe me e tāua ‵ki mō se fakaipoipoga fiafia?

12 I te taimi ne ‵sili atu ei ki a lāua me ne a uiga ne fesoasoani atu ke maua ne laūa se kāiga fiafia, ne fai mai a Sid: A te alofa ko te ‵toe uiga tāua telā ne ga‵lue faeloa māua ki ei. Kae ne lavea foki ne māua te tāua o te agamalu.Ne ‵lago atu tena avaga ko Sonja, kae toe fai atu: “E mautinoa eiloa me i te atafai se uiga tāua. Kae ne taumafai foki māua  o fakaasi atu te loto maulalo, faitalia me se faigofie faeloa ke fai penā.”

FAKATUMAU A FESOKOTAKIGA AOGA

13. Se a te kī tāua ke fakatumau ei se fakaipoipoga, kae kaia?

13 E mautinoa eiloa me i pati kolā e fai atu mo te atafai se tasi o auala ‵lei ke fakatumau ei se fakaipoipoga. Se mea fakafanoanoa māfai e fai‵pati atu a tauavaga mo te sē āva i a lāua eiloa kae e mafai o fai‵pati atu lāua mo te āva ki nisi tino! Kafai e fai‵pati atu a tauavaga mo te “loto ita, te kaitaua, te pa‵kalaga valevale mo pati faka‵mae loto,” ko fakavāivāi ne lāua a te lā fesokotakiga fakatauavaga. (Efe. 4:31) I lō te fakamasei a olotou fakaipoipoga mai te fai atu o pati fakatauemu io me ko pati fakamavale, e ‵tau eiloa o fakamalosi aka ne taki tauavaga a te lotou fesokotakiga e auala i pati atafai, te fakatau a‵lofa mo te fakatau fakamagalo.—Efe. 4:32.

14. Ne a faifaiga kolā e ‵tau o ‵kalo keatea tatou mai i ei?

14 E fai mai te Tusi Tapu me isi se “taimi o te ‵nofo ‵mu.” (Fai. 3:7) E se fakauiga te mea tenei me e mafai o se fai‵pati atu tatou ki ‵tou avaga, me e tāua ‵ki eiloa a fesokotakiga mō se fakaipoipoga ‵lei. “I vaegā fakanofonofoga penā, a te nofo ‵mu e mafai o fakalogo‵mae atu ki tou soa,” ko pati a se fafine avaga i Siamani. Ne toe fai mai a ia: “Faitalia me e se faigofie faeloa ke kufaki tou kaitaua i taimi o fakalavelave, a te fakaasi atu foki o tou kaitaua e sē se mea ‵lei foki. Ka ‵tao atu mai tua, ko koe ka faipati valelave io me fai ne koe se mea ke logo‵mae ei tau avaga kae ka fai fua i ei ke gasolo o masei atu a te fakalavelave.” E se mafai ne te tauavaga o faka‵lei aka lā fakalavelave mai te paka‵laga io me se faipati te suā tino ki te suā tino. I lō te fai penā, e fakamalosi aka ne lāua te lā fakaipoipoga mai te taumafai ke faka‵lei fakavave a kinauga kae ke mo a ma tuku ke leva.

15. E mafai pefea ne fesokotakiga ‵lei o fakamalosi aka te fakaipoipoga?

15 E mafai o malosi a fesokotakiga fakatauavaga māfai e fakaavanoa ne taki tauavaga a te taimi ke fakaasi atu ei a lagonaga mo kilokiloga. A te auala e fai ei ‵tou pati e ‵pau tena tāua mo pati kolā e fai ne tatou. Tela la, i tulaga faiga‵ta, taumafai ke fakaasi atu a te atafai i au pati mo te auala e faipati  ei koe. Ka faigofie ei ke fakalogo mai tau avaga ki a koe. (Faitau te Kolose 4:6.) E mafai o fakamalosi aka ne te tauavaga a te lā olaga avaga e auala i fesokotakiga ‵lei mai te fakaaogaga o “pati ‵lei fua kolā e ati aka ei a tino e ‵tusa mo te mea e manakogina, ko te mea ke mafai o tuku atu a mea aoga” ki olotou avaga.Efe. 4:29.

E mafai o fakamalosi aka ne te tauavaga a te lā fakaipoipoga e auala i fesokotakiga ‵lei (Ke onoono ki te palakalafa e 15)

TUKU ATU KI TAU AVAGA TE MEA E ‵TAU O TUKU KI EI

16, 17. Kaia e tāua ei ke fakaasi atu ne tino a‵vaga te loto malamalama ki lagonaga mo manakoga fakatauavaga o olotou avaga?

16 E mafai ne taki tauavaga o fakamalosi aka olotou olaga avaga māfai e ‵sala atu ki te ‵lei o olotou avaga, mai te fakamuamua a manakoga o olotou avaga i lō olotou manakoga totino. (Fili. 2:3, 4) E ‵tau o loto malamalama a tāgata mo fāfine a‵vaga ki lagonaga mo manakoga fakatauavaga a olotou avaga.—Faitau te 1 Kolinito 7:3, 4.

17 Se mea fakafanoanoa, me e ‵mā a nisi tino a‵vaga o fakaasi atu te alofa io me ko te solopū ki olotou avaga, a ko nisi tāgata e mafau‵fau me kafai e amanaia ne latou a lagonaga o olotou avaga, a latou ne tāgata ‵seva fua. E fai mai te Tusi Tapu: “A koutou e tāgata, ke tumau koutou i te ‵nofo fakatasi penā mo otou avaga i te loto malamalama.” (1 Pe. 3:7) E ‵tau o malamalama a te tagata avaga me i te tuku atu ki tena avaga a te mea e ‵tau o tuku atu ki ei, e aofia i ei te fakama‵liega o manakoga o tena avaga i lō fua te ‵moe fakatasi. Ka fiafia malosi a te fafine avaga ki te lā fesokotakiga fakatauavaga māfai a tena avaga e alofa kae atafai ki a ia i taimi katoa kae e se ko taimi fua kolā e ‵moe fakatasi ei lāua. Kafai e fakaasi atu ne lāua a te alofa atafai, ka faigofie ei ke fakama‵lie aka ne lāua a lā lagonaga mo lā manakoga i te feitu faka-te-foitino.

18. E mafai pefea o fakamalosi aka ne taki tauavaga a olotou fesokotakiga fakatauavaga?

18 E tiga eiloa e se ‵tau o isi se fakamasakoga ke sē fakamaoni tatou ki ‵tou avaga, kae e mafai o ‵sala atu te tino avaga ki se vā fakataugasoa mai se tino fakaa‵tea māfai e se lava te alofa atafai. (Faata. 5:18; Fai. 9:9) Tela la, e fakamalosi mai te Tusi Tapu ki tauavaga, penei: “Ke mo a ma se amanaia te suā tino ki te suā tino [manakoga fakatauavaga], seiloga ko lotoma‵lie koulua ke se fai penā i se vaitaimi.” Kaia? “Ke mo a ma tofotofo faeloa koulua ne Satani ona ko te sē lava o te loto pulea.” (1 Koli. 7:5) Se mea fakafanoanoa māfai e talia ne se tauavaga ke fakaaoga ‵se ne Satani a te sē “lava o te loto pulea” o lāua kae fai ei ke tosina atu lāua ki tofotofoga kae mulilua. I te suā feitu, kafai e se ‵sala atu a tino taki tokotasi “ki tena ‵lei, kae mō te ‵lei o te suā tino” mai te fakama‵lie aka ei lā manakoga fakatauvaga, se fakaasiga tenā o te alofa i lō te fai fua pelā me se tiute, e mafai i ei o fakamalosi aka a te fesokotakiga o te tauvaga.—1 Koli. 10:24.

KE TUMAU I TE PUIPUI O TAU FAKAIPOIPOGA

19. Se a te mea e ‵tau o fakaiku aka ke fai ne tatou, kae kaia?

19 Ko pilipili atu nei tatou ki te lalolagi fou kae amiotonu. Tenā te pogai e fai ei a te tosina atu ki manakoga o te foitino me se mea matagā mō tatou e pelā mo te mea ne oko atu ki tino Isalaelu e toko 24,000 i te koga laugatasi o Moapi. Mai tua o te mea fakamasiasi kae fakafanoano tenā ne tupu, ne fakailoa mai te Muna a te Atua, penei: “Ko te tino telā e mafaufau i a ia e tu, ke fakaeteete i a ia ma siga.” (1 Koli. 10:12) Tela la, se mea tāua ke fakamalosi aka ne tatou a ‵tou fakaipoipoga mai te tumau i te fakamaoni ki te ‵tou Tamana faka-te-lagi penā foki ki ‵tou avaga. (Mata. 19:5, 6) I te taimi nei, e ‵tau mo tatou o “fai te ‵toe mea e mafai o fai ke maua atu [tatou] ne ia e seai ne o‵tou pona io me ne lailaiga kae ko te filemu fua.”2 Pe. 3:13, 14.