Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Setema 2014

E Mata, e Talitonu Koe me ko Maua ne Koe te Munatonu? Kaia?

E Mata, e Talitonu Koe me ko Maua ne Koe te Munatonu? Kaia?

“Fakatalitonu aka ne koutou me se a te loto o te Atua telā e gali, e logomalie, kae e ‵lei katoatoa.”LOMA 12:2.

1. Ne a mea ne fai ne faifeau o Fenua Lotu Kelisiano i taimi o te taua?

E MATA, ko te loto o te Atua ke olo a Kelisiano ‵tonu ki te taua o tamate a tino o te suā fenua? Tenā eiloa te mea ne fai ne tino e tokouke kolā ne fai mai i a latou ne Kelisiano i te 100 tausaga ko ‵teka. Ne fakamanuia ne faifeau Katolika a te kautau mo olotou meatau kolā ne taua atu ki nisi tino Katolika i te suā fenua. E penā foki a faifeau Poletesano. A te Taua i te Lua a te Lalolagi ko te ‵toe fakaakoakoga masei i te tamatega o tino e tokouke.

2, 3. Se a te tulaga ne ‵tu i ei a Molimau a Ieova i te Taua i te Lua a te Lalolagi mo taimi mai tua ifo, kae kaia?

2 Ne a mea ne fai ne Molimau a Ieova i te taimi tenā o te taua? E fakaasi mai i tala fakasolopito me ne tumau eiloa latou i te lotou tulaga ko te sē ‵kau ki se feitu e pelā me ne Kelisiano ‵tonu. Se a te mea ne fakavae ki ei te lotou tulaga? Ne fakavae eiloa ki fakaakoakoga mo akoakoga a Iesu. Ana muna: “Ona ko te mea tenei ka iloa ei ne tino katoa i a koutou ko oku soko, manafai e fakatau a‵lofa koutou.” (Ioa. 13:35) Ne masaua ne latou a pati a te apositolo ko Paulo ki Kelisiano i Kolinito kae fakagalue ne latou ki te tulaga ko ‵tu latou i ei.—Faitau te 2 Kolinito 10:3, 4.

3 Tela la, a Kelisiano tonu kolā ko oti ne akoako olotou loto lagona ne te Tusi Tapu, e se tauloto io me ‵kau ki taua. Mai te taofi  ‵mau ki te tulaga faka-Kelisiano tenei, ne fakasauāgina ei a te fia afe o Molimau, talavou mo tino ma‵tua, penā foki tāgata mo fāfine. E tokouke ne logo‵mae malosi i falepuipui mo falepuipui fakasauā. I taimi o te kau Nazi i Siamani, ne tamate foki a nisi tino i ei. Faitalia te matagā o fakasauāga ne fe‵paki mo latou i Eulopa, ne seki puli lele i Molimau a te lotou galuega ko te talaiga o te tala ‵lei o te Malo o Ieova. Ne fakamaoni eiloa latou o talai—i loto i falepuipui, i falepuipui fakasauā, mo koga ne ave fakapagota latou ki ei. * Fakamuli ifo, ne seki aofia foki a Molimau i te taua o itukāiga o tino telā ne fai i Rwanda i te 1994. Ne seki ‵kau foki latou ki se feitu i te taua fakamaligi toto telā ne fai i te Balkans i te taimi ne vaelua ei te atufenua mua o Yugoslavia.

4. Ne pokotia pefea a tino kolā ne matea ne latou a te sē ‵kau o Molimau a Ieova ki se feitu?

4 Ne tali‵tonu a te fia afe o tino i te lalolagi me i te tumau o Molimau a Ieova i te sē ‵kau ki se feitu e pogai mai i te fakagaluegaga ne latou a te alofa tonu ki te Atua mo tuakoi. I nisi fakamunaga, e fakagalue ne latou a te tulaga o te Kelisiano tonu. E ui i ei, e isi aka foki ne nisi vaega o ‵tou tapuakiga telā e tali‵tonu a te tokoukega o tino me kafai e ‵kilo latou ki Molimau a Ieova, ko ‵kilo atu eiloa latou ki Kelisiano ‵tonu.

TE ‵TOE GALUEGA LASI I TALA FAKASOLOPITO

5. Se a te ‵fuliga ne fe‵paki mo soko muamua o Keliso?

5 Mai te kamataga o tena galuega talai, ne faka‵mafa mai ne Iesu a te tāua o te talaiga o te tala ‵lei o te Malo o te Atua. Ne filifili ne ia a soko e toko 12 ke ‵kau ki te fakatakatoga o te fakavae mō te galuega talai i te lalolagi kātoa; kae fakamuli ifo, akoako ei ne ia se toko 70 soko. (Luka 6:13; 10:1) Ne fakatoka a latou konei ke fakaoko atu te tala ‵lei ki nisi tino, kae mua loa ki tino Iutaia. Kae se mea fakapoi, fakamuli ifo, me ne olo atu a soko o Iesu mo te tala ‵lei ki tino mai fenua fakaa‵tea kolā seki pilitome. Se ‵fuliga lasi eiloa tenā ki soko Iutaia loto finafinau!—Galu. 1:8.

6. Ne iloa pefea ne Petelu i a Ieova e se fakailoga tino?

6 Ne uga atu te apositolo ko Petelu ke fano ki te fale o Konelio, se tino mai fenua fakaa‵tea telā seki pilitome. Ne iloa aka ne Petelu i konā i te Atua e se fakailoga tino. Ne papatiso eiloa a Konelio mo tena kāiga. Ko oko atu nei a te lotu Kelisiano ki koga ‵fou; ko mafai o lagona ne tino i atufenua katoa a te munatonu kae talia ne latou. (Galu. 10:9-48) Kae nei la, a te koga talai ko te lalolagi kātoa.

7, 8. Se a te galuega ne fai ne te fakapotopotoga saukātoa a Ieova? (Ke onoono ki te ata i te kamataga.)

7 I te tala fakasolopito o Molimau a Ieova i aso nei, a latou kolā e fai ne latou te takitakiga e loto finafinau eiloa o talai kae akoako atu a te tala ‵lei i te lalolagi kātoa. Ko tai kātoa te valu miliona Molimau loto finafinau i aso nei e fai ne latou a te ‵toe mea e mafai ne latou o fakasalalau te fekau a Keliso i ‵gana e silia atu i te 600, kae koi tokouke eiloa e ua‵lolo mai! E lavea ‵lei a Molimau a Ieova i te lotou galuega talai mai fale ki fale mo te talai i auala, kae i nisi taimi ko fakaaoga a taipola mo kā e aveave ei a tusi.

8 E silia atu i te 2,900 tino ‵fuli tusi ne maua ne latou se akoakoga fakapito i te ‵fuliga o te Tusi Tapu mo tusi faka-te-Tusi Tapu. E mautinoa me e se fakatapulā fua olotou galuega ki te ‵fuli o tusi ki ‵gana kolā e fai pelā me e tāua. E aofia i olotou galuega a te ‵fuliga o tusi ki te fia selau o ‵gana kolā e se lauiloa, kae e faipatigina ne te fia miliona o tino. Pelā me se fakaakoakoga, e lau i miliona tino Catalonia i Sepania e fai‵pati ki te lotou ‵gana eiloa, ko te Catalan, i aso katoa.  I taimi fakamuli nei, ne toe fakaaoga a te Catalan mo kese‵kesega fo‵liki i ei i Andorra, Alicante, Balearic Islands, mo Valencia. Ko ‵lomi nei ne Molimau a Ieova a tusi faka-te-Tusi Tapu i te ‵gana ko te Catalan, kae ko fai a fakatasiga faka-Kelisiano i te ‵gana tenā e fakafiafia atu ei ki loto o tino Catalonia.

9, 10. Se a te mea e fakaasi mai i ei i te fakapotopotoga saukātoa a te Atua e ‵saga tonu ki manakoga faka-te-agaga o tino katoa?

9 A te fakatokaga tenei ki te ‵fuliga o tusi mo te faiga o akoakoga ne fai faeloa i atufenua e uke. A Mexico se atufenua telā e fai‵pati ki te ‵gana Sepania kae tokouke foki a nisi tino i ei e fai‵pati ki nisi ‵gana. A te potukau e tasi i ei ko te kau Maya. Ne ‵tofi ne te ofisa lagolago i Mexico a te potukau ‵fuli tusi i te ‵gana Maya ke olo o ‵nofo i se kogā koga o te fenua telā e mafai o fai‵pati kae lagona ne latou a te ‵gana i ei i aso katoa. A te suā fakaakoakoga ko te Nepali, se ‵gana e tasi telā e faipatigina i Nepal, telā e silia atu i te 29 miliona tino i ei. E nofo ki te 120 ‵gana e faipatigina i luga i te fenua, kae silia atu i te sefulu miliona tino e fai‵pati ki te ‵gana Nepali kae e fakaaoga ne te tokoukega o tino e pelā me ko te lua o ‵gana a latou. Ko ‵lomi foki ‵tou tusi faka-te-Tusi Tapu i te ‵gana tenā.

10 A te ‵lago malosi mai o potukau ‵fuli tusi e uke i te lalolagi kātoa e fakaasi mai i ei a te ‵saga tonu atu o te fakapotopotoga saukātoa a Ieova ki te fakatonuga ke talai a te tala ‵lei o te Malo ki te lalolagi kātoa. E lau i miliona a tamā pepa, polosiua, mo mekesini ko oti ne tufatufa atu i galuega fakapito ne fai i te lalolagi kātoa, kae seai se ‵togi. Ne ‵togi a galuega konā ki meaalofa a Molimau a Ieova kolā e tau‵tali i te fakatonuga a Iesu: “Ne maua ne koutou a mea konei e aunoa mo se ‵togi, tuku atu foki e aunoa mo se ‵togi.”—Mata. 10:8.

Potukau ‵fuli tusi e fakatoka a tusi i te ‵gana ko te Low German (Ke onoono ki te palakalafa e 10)

A tusi i te ‵gana ko te Low German e aoga i Paraguay (Ke onoono foki ki te ata i te kamataga)

11, 12. Ne aoga pefea ki nisi tino a te galuega talai telā ne fai ne Molimau a Ieova i te lalolagi kātoa?

11 E pelā me ne faiakoga Kelisiano mo tino talai kolā ne tukugina atu, e tali‵tonu katoatoa a Molimau a Ieova me ko oti ne maua ne latou te munatonu kae e ‵tau o fai ne latou a te ‵toe mea e mafai ke fakailoa atu te fekau ki tino o nisi atufenua mo potukau kese‵kese o tino. Ko oti ne fakafaigofie ne tino e tokouke olotou olaga, tauloto ki nisi ‵gana, kae fakamasani ki se tuu mo aganuu fakaa‵tea ko te mea ke ga‵lue fakatasi i te galuega faka-Kelisiano tāua tenei. A te galuega talai mo te faiga o akoakoga tenei e fai i te lalolagi kātoa ko te suā pogai e tali‵tonu ei a tino e tokouke i Molimau a Ieova ko soko ‵tonu eiloa o Keliso Iesu.

 12 E fai ne Molimau katoa a te mea tenei me e tali‵tonu latou me ko oti ne maua ne latou a te munatonu. Ne a foki a nisi mea ne fakatalitonu atu ki te fia miliona o tino me ko oti ne maua ne Molimau a Ieova a te munatonu?—Faitau te Loma 14:17, 18.

TE POGAI E TALI‵TONU EI LATOU

13. Ne tausi pefea ne Molimau a te fakapotopotoga saukātoa ke ‵ma?

13 E mafai o maua ne tatou a mea aoga mai i tali a Kelisiano tukugina atu i aso nei, kolā e tali‵tonu me ko oti ne maua ne latou te munatonu. Ne fakaasi mai ne se tokotasi o tino telā ko leva ne tavini ki a Ieova ana lagonaga, penei: “Ne fai a taumafaiga katoa ke tausi te fakapotopotoga saukātoa a Ieova ke ‵ma kae sē lailai i mea tau amioga, faitalia me ko oi e ‵tau o polopoloki io me fakatonutonu.” E fakagalue aka pefea a te tulaga maluga tenei i mea tau amioga? Mai te tau‵tali i tulaga kolā e fakaasi mai i te Muna a te Atua mo te fakaakoakoga telā ne tuku mai ne Iesu mo ana soko. Tela la, i te tala fakasolopito o Molimau a Ieova, ne faka‵tea a nāi tino mai te fakapotopotoga Kelisiano me ne seki tau‵tali latou i tulaga o te Atua. Kae ko te tokoukega—e aofia i ei a nisi tino kolā ne ola mua i se olaga telā ne seki talia ne te Atua kae ko oti ne ‵fuli—ne tumau eiloa i te ola i se olaga ‵ma kae fakamaoni.—Faitau te 1 Kolinito 6:9-11.

14. Ne a mea ne fai ne te tokoukega o tino faka‵tea, kae se a te ikuga ne maua mai i ei?

14 Kae e a latou kolā ne faka‵tea mai te fakapotopotoga ona ko fakatonuga mai te Tusi Tapu? E lau i afe ko oti ne sala‵mo ki olotou faifaiga sē kelisiano kae ko oti ne talia mo te fiafia ke toe ‵foki mai ki te fakapotopotoga. (Faitau te 2 Kolinito 2:6-8.) A te taofi ‵mau ki tulaga ma‵luga o te Tusi Tapu ne iku atu ki se fakapotopotoga Kelisiano telā e ‵ma pakipaki kae maua i ei a te loto talitonu mo te fakatuagagina. Ona ko Molimau a Ieova e taofi ‵mau ki tulaga o te Atua, ne fakatalitonu atu ei ki tino e tokouke me konei eiloa a tino kolā e fai ne latou a te mea tonu. E ‵kese ‵ki eiloa a te mea tenei mo mea masani kolā e talia i te ukega o lotu.

15. Se a te mea ne fakatalitonu atu ki te taina e tokotasi me ko maua eiloa ne ia a te munatonu?

15 Kaia e tali‵tonu ei a nisi Molimau ata‵mai me ko oti ne maua ne latou a te munatonu? Ne fakamatala mai se taina e tokotasi telā ko 54 ana tausaga te matua: “Ne talitonu au talu mai te taimi koi talavou ei au me e fakalagolago eiloa toku fakatuanaki ki akoakoga tāua e tolu: (1) me e isi se Atua; (2) me ne aumai i a ia a te Tusi Tapu; kae ko te (3) me e fakaaoga kae fakamanuia ne ia te fakapotopotoga Kelisiano o Molimau a Ieova i aso nei. I tausaga e uke ne fai ei aku sukesukega, ne taumafai faeloa au o tofotofo aka a te ‵tonu o akoakoga tāua konā. Ne gasolo aka eiloa o mautinoa mai a te fakamaoniga o akoakoga takitasi i tausaga katoa, e fakamalosi aka ei a toku fakatuanaki kae faka‵poko a toku loto talitonu me ko maua eiloa ne tatou a te munatonu.”

16. Se a te mea e uiga ki te munatonu telā ne fakamalosi atu ki te tuagane e tokotasi?

 16 Ne fai mai se tuagane avaga telā e galue i te laumua i Niu Ioki e uiga ki te fakapotopotoga saukātoa a Ieova: “Ko te fakapotopotoga fua e tasi telā e tumau i te folafola atu a te igoa o Ieova. Ko oko eiloa i te ‵tonu o te mea tenā māfai e masaua ne tatou me e 7,000 taimi e sae mai ei te igoa o te Atua i te Tusi Tapu! E loto fakafetai au ki te fakamalosiga telā e maua i te 2 Nofoaiga Tupu 16:9: ‘A mata o te Aliki ko Ieova e kilokilo sale eiloa ki tino katoa i te lalolagi, e ave ne ia te malosi ki a latou kolā e loto fakamaoni ki a ia.’” Ne toe fai mai tou fafine: “Ko oti ne fakaasi mai ne te munatonu ki a au a te auala e maua ei se loto fakamaoni ko te mea ke fakaasi mai ne Ieova a tena malosi ki a au. A te ‵toe mea tāua ki a au ko toku fesokotakiga mo Ieova. Kae loto fakafetai au ki te tusaga o Iesu i te tukumaiga o te iloaga e uiga ki te Atua telā e fesoasoani mai ki a au.”

17. Se a te mea ne fakatalitonu atu ki se tino telā ne seki talitonu muamua ki te Atua, kae kaia?

17 Ne taku tonu mai ne se tino telā ne seki talitonu muamua ki te Atua: “E fakatalitonu mai ki a au a mea ne faite me e manako te Atua ke fia‵fia a tino ki te olaga, telā la, ka sē talia ne ia ke tumau a logo‵maega ki te se-gata-mai. I te gasolo aka foki o sē amio atua a te lalolagi, e gasolo eiloa ki mua a tino o Ieova i te fakatuanaki, loto finafinau, mo te alofa. Ko te agaga fua o Ieova e mafai o fai ne ia te vavega tenei i aso nei.”—Faitau te 1 Petelu 4:1-4.

18. E pefea ou lagonaga ki mau kolā ne fakaasi mai ne nisi taina e tokolua?

18 Ne tuku mai ne te suā tino telā ko leva ne Molimau a pogai ne talitonu ei a ia ki te munatonu telā e talai ne tatou: “Ne fakatalitonu mai ki a au aku sukesukega i tausaga e uke me ne taumafai malosi a Molimau o fakaakoako ki te lotu Kelisiano i te senitenali muamua. Ne lavea eiloa ne au ki oku mata a te ‵kau fakatasi o Molimau a Ieova i te lalolagi i te taimi ne faimalaga ei au i te lalolagi. Ne tuku mai ne te munatonu mai te Tusi Tapu a te lotomalie mo te fiafia ki a au.” I te taimi ne fesili atu ei ki se taina telā ko 60 tupu ana tausaga me kaia e talitonu ei a ia me ko maua ne ia te munatonu, ne fakasino atu tou tagata ki a Iesu Keliso kae fakamatala mai: “Ko oti ne tauloto faka‵lei tatou ki te olaga mo te galuega talai a Iesu kae amanaia ki tena fakaakoakoga. Ko oti ne fai ne tatou a ‵fuliga ki ‵tou olaga kae fakapili‵pili malosi atu ki te Atua e auala i a Keliso Iesu. Ko oti ne iloa ne tatou i te taulaga togiola a Keliso ko te fakavae o te faka‵saoga. Kae e iloa ne tatou me ko oti ne toe fakatu mai a ia mai te mate. Ko maua ne tatou a molimau fakatuagagina ki te mea tonu tenā.”—Faitau te 1 Kolinito 15:3-8.

NE A MEA E ‵TAU O FAI NE TATOU KI TE MUNATONU?

19, 20. (a) Se a te tiute ne faka‵mafa atu ne Paulo ki te fakapotopotoga i Loma? (e) Se a te ‵tou tauliaga e pelā me ne Kelisiano tukugina atu?

19 E pelā me ne Kelisiano kolā e a‵lofa ki ‵tou tuakoi, e se ‵tau o taofi aka ne tatou a te iloaga tāua e uiga ki te munatonu. Ne fakasako‵sako fakatasi a Paulo mo ana taina i te fakapotopotoga i Loma: “Kafai e folafola atu ne koe ki tino katoa a te ‘muna i tou gutu,’ i a Iesu ko te Aliki, kae e fakatuanaki i tou loto me ne toe fakatu aka ne te Atua a ia mai te mate, ka sao eiloa koe. Me i te loto e fakagalue ei ne te tino a tena fakatuanaki ke maua ne ia te amiotonu, kae ko te gutu telā e folafola atu ne ia i mua o tino katoa ke maua ei te fakaolataga.”—Loma 10:9, 10.

20 E pelā me ne Molimau tukugina atu a Ieova, e tali‵tonu tatou me ko maua ne tatou a te munatonu kae e iloa ne tatou a ‵tou tauliaga ke akoako atu ki nisi tino a te tala ‵lei e uiga ki te pulega a te Malo o te Atua. I te faiga o ‵tou galuega talai, ke sē fai fua ke fia‵fia mai a tino ki mea kolā e akoako atu ne tatou mai te Tusi Tapu kae ki te loto talitonu foki telā e lavea mai ne latou i a tatou.

^ pala. 3 Ke onoono ki te tusi ko te Jehovah’s Witnesses—Proclaimers of God’s Kingdom, itulau e 191-198, 448-454.