1. Ne pefea a lagonaga o Paulo ki a latou kolā ne tavini mo te fakamaoni ki a Ieova?

NE MASAUA ne te apositolo ko Paulo a latou kolā ne ga‵lue malosi mō te tala ‵lei. Ne tusi mai a Paulo: “Me ne seki puli lele i a matou a te otou ga‵lue mo te fakamaoni mo otou galuega a‵lofa mo te otou kufaki ona ko te otou fakamoemoega i te ‵tou Aliki ko Iesu Keliso i mua o te ‵tou Atua te Tamana.” (1 Tesa. 1:3) E tonu, e masaua ne Ieova a galuega a‵lofa kolā ne fai ne tino katoa kolā ne tavini atu ki a ia mo te fakamaoni, faitalia te uke mo te mu‵tana o mea e fai ne latou e ‵tusa mo olotou fakanofonofoga.​—Epe. 6:10.

2. Ne a mea ka mafau‵fau tatou ki ei i te mataupu tenei?

² E tokouke ‵tou taina mo tuagane i aso nei mo taimi ko ‵teka, ne ga‵lue malosi mo te fakamaoni i te taviniga tumau ki a Ieova. Ke onoono tatou ki te auala ne tavini atu ei a nisi tino i te senitenali muamua. Ka suke‵suke foki tatou ki nisi vaega o te taviniga tumau i aso nei mo te auala e mafai ei o masaua ne tatou a tino pele kolā e ofo atu a latou eiloa o tavini atu i auala fakapito.

3, 4. (a) Ne tavini atu pefea a nisi tino i te senitenali muamua? (e) Ne tausi atu pefea latou ki olotou manakoga faka-te-foitino?

³ Mai tua eiloa o tena papatisoga, ne kamata ne Iesu se galuega telā  e ‵tau o oko atu ki kogā koga o te lalolagi. (Luka 3:21-23; 4:14, 15, 43) Mai tua o tena mate, ne takitaki ne ana apositolo a te fakasalalauga o te galuega tenei. (Galu. 5:42; 6:7) A nisi Kelisiano pelā mo Filipo, ne tavini pelā me ne tino talai mo misionale i Palesitina. (Galu. 8:5, 40; 21:8) A Paulo mo nisi tino ne faima‵laga loa ki koga e ‵mao atu o talai i ei. (Galu. 13:2-4; 14:26; 2 Koli. 1:19) Ne tavini atu foki a nisi tino pelā mo Suliano (Sila), Maleko, mo Luka e pelā me ne tino tusitala io me laga tusi. (1 Pe. 5:12) Ne ga‵lue fakatasi a tuagane Kelisiano mo taina fakamaoni konei. (Galu. 18:26; Loma 16:1, 2) Ne fesoasoani mai olotou tala gali konei ke gali te faitau ki te Tusi Tapu i te ‵Gana Eleni kae fakaasi mai i ei me e masaua faka‵lei eiloa ne Ieova ana tavini.

⁴ Ne tausi atu pefea ki a latou kolā ne ga‵lue muamua i te taviniga tumau i te feitu faka-te-foitino? I nisi taimi, ne talimālō ‵lei latou kae maua a nisi fesoasoani mai i taina mo tuagane Kelisiano, kae ne seki fakatagi atu latou ki se fesoasoani penā. (1 Koli. 9:11-15) E loto fia‵fia eiloa a nisi tino taki tokotasi mo fakapotopotoga o fesoasoani. (Faitau te Galuega 16:14, 15; Filipi 4:15-18.) Ne ga‵lue foki a Paulo mo ana taugasoa faima‵laga i galuega ‵togi sē tumau ke tausi atu ki olotou manakoga totino.

5. Ne a lagonaga ne fakaasi mai ne se tauavaga e uiga ki te lā olaga i te taviniga tumau?

⁵ E tokouke foki i aso nei e ga‵lue i vaega kese‵kese o te taviniga tumau. (Ke onoono ki te pokisi “ Vaega Kese‵kese o te Taviniga Tumau.”) E pefea olotou lagonaga ki te galuega ne filifili ne latou? Tenā te fesili e mafai o ‵sili atu ne koe ki a latou, kae kāti ka maua eiloa ne koe se taui mai te faiga penā. Ke mafaufau ki se fakaakoakoga: E fai mai se taina telā ne tavini pelā me se paenia tumau, se paenia fakapito, se misionale, mo se tino ne galue i te Peteli i se fenua fakaa‵tea: “Ne manatu aka au me i te galue i te taviniga tumau ko te ‵toe filifiliga ‵lei ne fai ne au. I te taimi ko 18 ei oku tausaga, ne taumafai au o fai se fakaikuga i te va o akoakoga i te iunivesiti, se galuega ‵togi tumau, mo te galuega fakapaenia. Ne fakaasi mai ki a au i tala me e se puli i a Ieova a galuega katoa e fai ne koe ke tavini atu ki a ia i te taviniga tumau. Ko mafai ne au o fakaaoga so se taleni io me ko atamai kolā ne tuku mai ne Ieova ki a au i auala kolā ne sē mafai lele ne au o fai moifai ne filifili ne au se galuega i te lalolagi.” E fai mai a tena avaga: “Ne fesoasoani mai ki a au a tofiga katoa ke gasolo au mua. Ne lagona ne māua te puipuiga mo te fakatakitakiga a Ieova i auala kolā ne seki mafai lele o maua moifai ne nofo loa māua o fai a mea kolā e fia‵fia māua ki ei. E fakafetai au ki a Ieova i aso katoa mō te mā olaga i te taviniga tumau.” E mata, e manako koe o kilo ki tou olaga i te auala tenā?

6. Se a te loto talitonu e ‵tau o maua ne tino katoa e uiga ki lagonaga o Ieova?

⁶ E tonu, e se mafai ne nisi tino o ‵kau ki te taviniga tumau ona ko olotou fakanofonofoga. Kae tali‵tonu tatou me e fakatāua foki ne Ieova olotou taumafaiga kolā e fai mo te loto kātoa. Ke mafau‵fau ki tino kolā ne taku mai ne Paulo i te Filemoni 1-3, e aofia i ei a latou katoa kolā e ‵kau ki te fakapotopotoga i Kolose. (Faitau.) Ne amanaia a Paulo ki a latou kae penā foki a Ieova. E penā foki te amanaia atu o ‵tou Tamana faka-te-lagi ki tau taviniga. Se a la te auala ka ‵lago atu ei koe ki a latou kolā e ga‵lue nei i te taviniga tumau?

7, 8. Ne a mea e aofia i te galuega fakapaenia, kae e mafai pefea ne nisi tino i te fakapotopotoga o fesoasoani atu ki paenia?

⁷ E pelā mo tino talai i te senitenali muamua, e fai a paenia loto finafinau mo fakamalosiga tonu ki fakapotopotoga. E tokouke a tino ne fakamāumāu ne latou se 70 itula i masina takitasi i te galuega talai. E mafai pefea ne koe o fesoasoani atu ki a latou?

⁸ Ne fai mai a te tuagane paenia e tokotasi ko Shari: “E mata ma‵losi a paenia i te olo o talai i aso katoa. Kae koi ma‵nako eiloa latou ki fakamalosiga.” (Loma 1:11, 12) Ne fai mai te suā tuagane  telā ne paenia i tausaga e uke e uiga ki paenia i tena fakapotopotoga: “Ne tumau eiloa latou i te ga‵lue malosi. Kafai e fesoasoani atu a nisi tino o ave latou i te galuega talai, ‵kami latou i se ‵kaiga, tuku atu a tupe mo ‵togi te penitini io me ko nisi mea kolā e manakogina ke ‵togi, e loto fakafetai latou. E fakaasi atu i ei me atafai tonu atu koe ki a latou.”

9, 10. Ne a mea ne fai ne nisi tino ke fesoasoani atu ki paenia i te lotou fakapotopotoga?

⁹ E mata, e fia fesoasoani atu koe ki paenia i te galuega talai? Ne fakamolemole mai se paenia e igoa ki a Bobbi: “E ma‵nako matou ke tokouke a tino e ‵lago mai i loto i te vaiaso.” Ne toe fai mai te suā paenia i te fakapotopotoga foki eiloa tenā: “A te mauaga o taugasoa ke ga‵lue fakatasi i te galuega talai i te fakaafiafi se fakalavelave lasi.” E fiafia se tuagane telā ko galue nei i te Peteli i Brooklyn o fai mai e uiga ki tena galuega fakapaenia: “Ne fai mai se tuagane e tokotasi e isi sena motoka, ‘So se taimi e seai ei sou soa, telefoni mai ki a au, ka fanatu au ke olo tāua i te galuega talai.’ Ne fesoasoani tonu mai eiloa a ia ke tumau taku galuega fakapaenia.” Kae fai mai te manatu gali o Shari tenei: “Mai tua o te galuega talai, e masani o ‵nofo a paenia kolā seki a‵vaga i a latou eiloa. Kāti e ‵kami ne koe a taina io me ko tuagane seki a‵vaga ki te tapuakiga a tou kāiga i nisi taimi. A te aofia o latou i nisi fakatokaga penā e fesoasoani atu foki ke tumau latou i te ma‵losi.”

¹⁰ Kafai e toe mafaufau a ia ki tena galuega fakapaenia fakatasi mo nisi tuagane seki a‵vaga, ne fai mai se tuagane e tokotasi telā ne toeitiiti ko kātoa te 50 tausaga ne galue ei a ia i te taviniga tumau: “A motou toeaina e āsi mai ki paenia i taki fia masina. E fesili mai latou e uiga ki te ola ‵lei mo galuega ‵togi a matou kae onoono foki māfai e isi ne mea e manava‵se matou ki ei. Ne aoga tonu eiloa te lotou āsi mai. E āsi latou ki motou koga ‵nofo ke lavea ne latou, māfai e ma‵nako matou ki se fesoasoani.” Kāti e fai ne te mea tenei ke masaua ne koe a te loto fakafetai o Paulo i te fesoasoani telā ne fai atu ki a ia ne se tagata nofo kāiga i Efeso.​—2 Timo. 1:18.

11. Se a te mea e aofia i te galue pelā me se paenia fakapito?

¹¹ E manuia eiloa a nisi fakapotopotoga me e isi ne paenia fakapito e ga‵lue i ei. E fakamāumāu ne taina mo tuagane e tokouke konei a te 130 itula i masina takitasi i te galuega talai. Ona ko te taimi e fakamāumāu ne latou i te galuega talai kae fesoasoani ki tino i nisi auala, e seai eiloa io  me mu‵tana fua te taimi e fakamāumāu i te galuega ‵togi. E tuku atu ne te ofisa lagolago se meaalofa foliki ko te mea ke ‵saga tonu eiloa latou ki te galuega talai.

12. Se a te auala e fesoasoani atu ei a toeaina mo nisi tino ki paenia fakapito?

¹² E mafai pefea o fesoasoani atu tatou ki paenia fakapito? E fakamatala mai se toeaina i se ofisa lagolago telā e fesokotaki mo te tokoukega o latou, penei: “E manakogina ke fai‵pati atu a toeaina ki a latou ke iloa ne latou olotou fakanofonofoga, ko fakaiku ei me se a te auala e mafai ei o fesoasoani atu ki a latou. E mafaufau a nisi Molimau me e ‵lei eiloa te tausiga o paenia fakapito me e isi ne olotou meaalofa e maua, kae mafai eiloa ne taina i fakapotopotoga o fesoasoani atu ki a latou i auala e uke.” E pelā mo paenia tumau, e loto fakafetai eiloa a paenia fakapito māfai e isi ne tino e ga‵lue fakatasi mo latou i te galuega talai. E a, e mafai ne koe o fesoasoani atu i te auala tenā?

13, 14. (a) Se a te mea e ‵tau o masaua ne tatou e uiga ki ovasia o fenua? (e) Se a tau mea e mafai o fai ke fesoasoani atu ki te galuega a ovasia o fenua?

¹³ E masani o ‵kilo atu ki ovasia o fenua mo olotou avaga e pelā me ne tino ma‵losi i te feitu faka-te-agaga. E tonu te mea tenei, kae e ma‵nako foki latou ki fakamalosiga, taugasoa ke ga‵lue fakatasi mo latou i te galuega talai, kae aofia i fakafiafiaga kolā e paleni ‵lei. E a māfai e ma‵saki lāua kae faulu ki te fa‵kaimasaki, kāti e manakogina ke ‵tipi io me se togafiti fakatokitā? Ko oko eiloa i te fakamalosi loto māfai e fesoasoani atu a taina mo tuagane o te fakapotopotoga ki lā manakoga kae fia‵fia tonu ki a lāua. E mafai o fakaataata i ‵tou mafaufau a te manavase telā ne fakaasi atu ne “te tokita fagasele” ko Luka telā ne tusi ne ia te tusi ko Galuega, ki a Paulo mo nisi taugasoa faima‵laga.—Ko. 4:14; Galu. 20:5–21:18.

¹⁴ E ma‵nako kae fakatāua ne ovasia o fenua mo olotou avaga a taugasoa ‵pili. Ne tusi mai se ovasia o fenua e tokotasi: “E foliga mai me e iloa ne oku taugasoa a te taimi e manako ei au ki se fakamalosiga. E ‵sili mai ne latou a fesili ona ko te loto malamalama, kae ne fesoasoani mai a te mea tenei ke fakaasi atu ne au a mea kolā e manavase au ki ei. Ona fua ko latou e fakalogo‵logo faka‵lei mai, ne fai ei latou mo fesoasoani lasi ki a au.” E loto fakafetai malosi a ovasia o fenua mo olotou avaga ki te fiafia tonu telā e fakaasi mai ne olotou taina mo tuagane.

15, 16. Ne a fesoasoani e tuku mai ne tino ga‵lue i te Peteli mo Assembly Halls, kae e mafai pefea o ‵lago atu tatou ki ei?

¹⁵ E ‵lago malosi atu a tino kolā e ga‵lue i Peteli mo Assembly Halls ki te galuega o te Malo i fenua kolā e tausi ne te lotou ofisa lagolago. Kafai e isi ne tino ga‵lue i te Peteli i tau fakapotopotoga io me ko te koga telā e āsi koe ki ei, e mafai pefea o fakaasi atu ne koe me e masaua ne koe latou?

¹⁶ I te taimi muamua e ‵mai ei latou ki te Peteli, kāti e se sologa latou, me ko tiakina ne latou olotou kāiga mo taugasoa pele. E loto fia‵fia latou māfai olotou taina ga‵lue i te Peteli mo olotou fakapotopotoga ‵fou e fakataugasoa atu ki a latou! (Male. 10:29, 30) E ‵tusa mo fakasologa o olotou galuega masani, e mafai eiloa latou o ‵kau ki fakatasiga a te fakapotopotoga mo te galuega talai i vaiaso takitasi. I nisi taimi, kāti e isi ne galuega fakaopoopo e fai ne tino ga‵lue i te Peteli. Kafai e malama‵lama a fakapotopotoga i te mea tenei kae fakaasi atu te loto fakafetai ki tino ga‵lue i te Peteli mo olotou galuega e fai, ka maua ne tino katoa a mea aoga.—Faitau te 1 Tesalonia 2:9.

17, 18. Ne a galuega e aofia i te taviniga i nisi fenua?

¹⁷ Kāti e ‵kese ‵ki a mea‵kai, ‵gana, tuu mo aganuu, mo fakanofonofoga e fe‵paki mo latou kolā ne talia ke tavini i nisi atufenua mo mea kolā ne  masani latou ki ei. Kaia ne filifili aka ne latou ke talia a ‵fuliga faiga‵ta penā?

¹⁸ A nisi tino ne misionale, kolā e ga‵lue fakapitoa i te galuega talai kae maua ne tino e tokouke a mea aoga mai i olotou akoakoga fakapito. E fakatoka ne te ofisa lagolago se koga ‵lei mo ‵nofo a misionale mo se meaalofa ke ‵togi ki ei a mea e manakogina ne latou. A nisi tino kolā e tavini atu i nisi fenua, e ‵tofi ke ga‵lue i se ofisa lagolago io me fesoasoani ki te faka‵tuga o ofisa lagolago, ofisa ‵fuli tusi i koga kolā e ‵mao, Assembly Halls, io me ko Kingdom Halls. E isi foki ne mea‵kai, fale ‵lei, mo nisi mea kolā e manakogina e fakatoka mō latou. Pelā mo tino ga‵lue i te Peteli, e ‵kau faeloa latou ki fakatasiga mo te galuega talai i koga kolā e ‵nofo latou i ei, tela la, e fai latou pelā me se fakamanuiaga i auala e uke.

19. Se a te mea e ‵tau o masaua ne tatou e uiga ki a latou kolā e ga‵lue i nisi fenua?

¹⁹ E mafai pefea o masaua ne koe a tino kolā e ga‵lue i te taviniga tumau? Te mea muamua, ke masaua ne koe me e se masani latou ki nisi mea‵kai. E ‵tau o masaua ne koe te mea tenā māfai e ‵kami ne koe latou ke ‵kai fakatasi koutou; e mafai ne koe o fesili muamua ki ei me se a te meakai e fia ‵kai latou ki ei io me fia tami ki ei. E ‵tau foki o lava te kufaki me koi tauloto latou ki te ‵gana mo tuu mo aganuu. Kāti e tai leva loa te taimi kae fatoa malamalama latou i mea katoa e taumafai koe o fai atu ki a latou, kae e mafai ne koe o fesoasoani atu ki a latou mo te atafai i te faka‵leoga o olotou pati. E ma‵nako latou o tauloto!

20. Se a te auala ‵lei e mafai ei o masaua ne tatou a latou kolā i te taviniga tumau mo olotou mātua?

²⁰ A latou kolā e ga‵lue i te taviniga tumau e olo o ma‵tua, kae penā foki olotou mātua. Kafai a mātua ne Molimau, e se taumate a te lotou fakamoemoega tonu, ko olotou tamaliki ke tumau i olotou tofiga. (3 Ioa. 4) E tonu, ka fai e ma‵nako olotou mātua ki se tausiga, ka fai ne tino kolā e ga‵lue i te taviniga tumau a mea katoa e mafai ne latou o fai ke fesoasoani atu faeloa ki a lāua. Kae e mafai ne kāiga kolā e fakamuli mai i te fale o fesoasoani ki a latou kolā i te taviniga tumau mai te toka o tausi atu ki mātua kolā ko ma‵tua māfai e ma‵nako ki se fesoasoani. Ke masaua me e fai ne latou kolā i te taviniga tumau a tiute tāua i te ‵toe galuega tāua telā e fai i te lalolagi. (Mata. 28:19, 20) E a, e mafai ne koe io me ko tau fakapotopotoga o fesoasoani māfai e ma‵nako a mātua o latou kolā i te taviniga tumau ki se fesoasoani?

21. E pefea a lagonaga o latou kolā i te taviniga tumau e uiga ki te fesoasoani mo fakamalosiga kolā e tuku mai ne nisi tino?

²¹ E fai penā a latou kolā i te taviniga tumau me e ma‵nako latou o tavini ki a Ieova mo nisi tino, kae sē ko te mauaga o tupe. E loto fakafetai malosi latou ki so se fesoasoani e mafai ne koe o tuku atu. E fai mai se tuagane telā ne tavini i nisi fenua e uiga ki lagonaga o tino e tokouke: “Ke oko foki ki se tusi telā e fakaasi mai i ei te loto fakafetai, e fakaasi mai i ei me e mafau‵fau a nisi tino ki a koe kae fia‵fia ki mea e fai ne koe.”

22. E pefea ou lagonaga e uiga ki te taviniga tumau?

²² A te tavini atu ki a Ieova i te taviniga tumau ko te ‵toe auala manuia i te olaga. Se galuega e fakamalosi loto, e aoga, kae fakamalie loto. Kae se fakatokaga ‵lei mō te taviniga fakafiafia kae tumau telā e faka‵tali ki ei a tavini fakamaoni katoa a Ieova mai lalo i te Malo o te Atua. Ke mo a e ‘puli i a tatou katoa a te ga‵lue fakamaoni mo galuega a‵lofa’ a latou kolā e ga‵lue i te taviniga tumau.—1 Tesa. 1:3.