Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Aokuso 2014

E Mata, e Maua ne Koe a “Meakai i te Taimi Tonu”?

E Mata, e Maua ne Koe a “Meakai i te Taimi Tonu”?

E OLA nei tatou i toe taimi faiga‵ta i tala fakasolopito katoa o tino. (2 Timo. 3:1-5) E tofotofogina a ‵tou a‵lofa ki a Ieova mo ‵tou fakaikuga ke ola e ‵tusa mo ana tulaga amio‵tonu i aso takitasi. Ne lavea ‵mao ne Iesu a te vaitaimi o fakalavelave tenei, kae ne fakatalitonu atu a ia ki ana soko me ka maua ne latou a fakamalosiga kolā e manakogina ke loto ‵mau latou ke oko ki te gataga. (Mata. 24:3, 13; 28:20) Ko te mea ke fakamalosi atu ki a latou, ne filifili ne ia se tavini fakamaoni ke tuku atu a mea‵kai faka-te-agaga “i te taimi tonu.”—Mata. 24:45, 46.

Talu mai te taimi ne filifili ei te tavini fakamaoni i te 1919, e lau i miliona a “nisi tavini” mai ‵gana katoa ko oti ne fakamaopoopo mai ki loto i te fakapotopotoga saukātoa a te Atua kae fagai faka‵lei i te feitu faka-te-agaga. (Mata. 24:14; Faka. 22:17) E ui i ei, e se ‵pau a te uke o mea e mafai o maua i ‵gana katoa, kae e se ko tino katoa e mafai o maua a ‵tou lōmiga i te itaneti. Pelā me se fakaakoakoga, e tokouke a tino e se maua ne latou a vitio mo mataupu kolā e maua fua i te jw.org. E mata, e fakauiga i ei me e se maua ne nisi tino a mea‵kai kolā e manakogina ne latou ke tumau i te ma‵losi i te feitu faka-te-agaga? Ke fai se fakaikuga tonu, mafau‵fau ki tali o fesili tāua e fa.

 1. Se a te ‵toe vaega tāua o te meakai telā e tuku mai ne Ieova?

I te taimi ne fakaosooso ei ne Satani a Iesu ke ‵fuli a fatu mo fai a falaoa, ne tali atu a Iesu: “E se ko meakai fua e ola ei te tino, kae ko pati katoa kolā e ‵to mai i te gutu o Ieova.” (Mata. 4:3, 4) E tusi i te Tusi Tapu a pati a Ieova. (2 Pe. 1:20, 21) Tela la, a te toe vaega tāua i ‵tou mea‵kai faka-te-agaga ko te Tusi Tapu.—2 Timo. 3:16, 17.

Ko oti ne ‵lomi ne te fakapotopotoga saukātoa a Ieova a te New World Translation of the Holy Scriptures kātoa io me se vaega i ei i ‵gana e silia atu i te 120, kae koi uke eiloa a ‵gana e fakaopoopo i tausaga takitasi. I tafa o te ‵fuliga tenā, e lau i piliona a ‵kopi o nisi ‵fuliga o te Tusi Tapu e mafai o maua kātoa io me se vaega i ei i ‵gana e lau i afe. E fetaui ‵lei a te galuega fakaofoofogia tenā mo te loto o Ieova “ke faka‵sao a tino katoa kae ke iloa tonu ne latou a te munatonu.” (1 Timo. 2:3, 4) Ona ko te “seai se mea e mafai o ‵funa mai i [a Ieova],” e tali‵tonu tatou me ka ‵futi mai ne ia latou kolā “e iloa ‵lei ne latou olotou manakoga faka-te-agaga” ki tena fakapotopotoga saukātoa kae tuku atu a meakai faka-te-agaga ki a latou.—Epe. 4:13; Mata. 5:3, 6; Ioa. 6:44; 10:14.

2. Se a te tusaga o ‵tou lōmiga i te tukumaiga o mea‵kai faka-te-agaga?

Ko te mea ke ati aka ne se tino a tena fakatuanaki ke malosi, e manakogina ke fai ne ia a mea e uke atu i lō te faitau fua ki te Tusi Tapu. E ‵tau o malamalama a ia i ana mea e faitau kae fakagalue a mea e tauloto ne ia. (Iako. 1:22-25) Ne loto fakafetai a te eunuka Aitiope i te senitenali muamua ki te manatu tonu tenā. Ne onoono a ia ki te Muna a te Atua i te taimi ne fesili atu ei a Filipo ki a ia: “E malamalama koe i au mea e faitau?” Ne tali atu te eunuka: “E mafai pefea o malamalama au, māfai e seai se tino e fesoasoani mai ki a au?” (Galu. 8:26-31) Ne fesoasoani atu a Filipo ki te eunuka ke maua ne ia te iloaga tonu e uiga ki te Muna a te Atua. Ona ko te fiafia malosi o te eunuka ki ana mea ne tauloto, papatiso ei a ia. (Galu. 8:32-38) I se auala e tai ‵pau, ko oti ne fesoasoani mai a ‵tou lōmiga kolā e fakavae ki te Tusi Tapu ke maua ne tatou a te iloaga tonu e uiga ki te munatonu. Ne otia ‵tou lagonaga i ei kae fakamalosi aka i ei tatou ke fakagalue a mea kolā ne tauloto ne tatou.—Ko. 1:9, 10.

E auala i ‵tou lōmiga, e maua ne tavini a Ieova a mea faka-te-agaga e uke ke ‵kai kae inu ki ei. (Isa. 65:13) Pelā me se fakaakoakoga, a te Faleleoleo Maluga, telā e mafai o maua i ‵gana e silia atu i te 210, e fakamatala mai i ei a valoaga i te Tusi Tapu, e momea aka i ei a ‵tou malamalama i muna‵tonu ‵loto faka-te-agaga, kae fakamalosi aka i ei tatou ke ola e ‵tusa mo fakatakitakiga fakavae mai te Tusi Tapu. A te mekesini ko te Awake!, telā e ‵lomi ki se 100 o ‵gana, e fakalauefa aka i ei a ‵tou iloa i galuega a Ieova ne fai kae fakaasi mai i ei ki a tatou a te auala e fakagalue aka ei a pati fakatonutonu aoga mai te Tusi Tapu. (Faata. 3:21-23; Loma 1:20) E fakatoka ne te tavini fakamaoni a mataupu faka-te-Tusi Tapu i ‵gana e silia atu i te 680! E mata, e fakaavanoa ne koe se taimi i aso takitasi ke faitau ki te Tusi Tapu? E mata, e faitau koe ki mekesini fou takitasi mo lōmiga ‵fou katoa kolā e mafai o maua i tau ‵gana i tausaga takitasi?

I tafa o te faitega o tusi, e fakatoka foki ne te fakapotopotoga saukātoa a Ieova a lāuga faka-te-Tusi Tapu kolā e fai i ‵tou fakatasiga, fono o fenua, mo fono o atufenua. E mata, e fiafia koe ki lāuga, koniseti, fakaasiga, mo fakasautalaga kolā e fakaasi mai i fakatasiga konā? E fakatoka eiloa ne Ieova se ‵kaiga faka-te-agaga mō tatou!—Isa. 25:6.

 3. Kafai e se maua ne koe a lōmiga katoa kolā ne fakatoka i tau ‵gana, e mata, ka vāivāi koe i te fiakai i te feitu faka-te-agaga?

A te tali ki ei ko te ikai. Kae e se ‵tau foki o ‵poi tatou, me i nisi taimi, e uke atu a mea‵kai faka-te-agaga e maua ne nisi tavini a Ieova i lō nisi tino. Kaia e se ‵tau ei o ‵poi tatou? Ke mafau‵fau ki te kau apositolo. E uke atu akoakoga ne maua ne latou i te senitenali muamua i lō nisi soko e tokouke. (Male. 4:10; 9:35-37) Tela la, a nisi soko ne seki ‵tau o fia‵kai i te feitu faka-te-agaga me ne maua ne latou a mea kolā ne manakogina ne latou.—Efe. 4:20-24; 1 Pe. 1:8.

E tāua foki ke iloa ne tatou me i te ukega o pati a Iesu mo mea ne fai ne ia i tena nofoga i te lalolagi e se tusi i loto i tusi Evagelia. Ne tusi mai te apositolo ko Ioane: “E tonu, e uke ‵ki eiloa a mea kolā ne fai ne Iesu, kae i taku faka‵tau moi ne tusi fakalikiliki katoa ki lalo ka se ofi a peluga tusi katoa konā i te lalolagi.” (Ioa. 21:25) Faitalia me e uke atu a fakamatalaga e iloa ne soko o Iesu i te senitenali muamua e uiga ki te tagata ‵lei katoatoa ko Iesu i lō tatou, e seki tuku tiaki tatou. Ne fakamautinoa eiloa ne Ieova ke lava ‵tou mea e iloa e uiga ki a Iesu ko te mea ke fai tatou mo ana soko.—1 Pe. 2:21.

Ke mafau‵fau foki ki tusi kolā ne avatu ne te kau apositolo ki fakapotopotoga i te senitenali muamua. Kāti e tasi te tusi ne tusi ne Paulo ne seki tausi faka‵lei i loto i te Tusi Tapu. (Ko. 4:16) E mata, e se lava ‵tou mea‵kai faka-te-agaga me e se maua ne tatou a te tusi tenā? Ikai. E iloa ne Ieova a mea e manakogina ne tatou kae ko oti ne tuku mai ne ia a mea e lava ke tumau tatou i te ma‵losi i te feitu faka-te-agaga.—Mata. 6:8.

E iloa ne Ieova a mea e manakogina ne tatou kae tuku mai ne ia a mea e lava ke tumau tatou i te ma‵losi i te feitu faka-te-agaga

I aso nei, e uke atu a mea‵kai faka-te-agaga e maua ne nisi potukau o tavini a Ieova i lō nisi tino. E mata, e faipati koe ki se ‵gana telā e mu‵tana fua a tusi e mafai o maua i ei? Kafai e penā, ke iloa ne koe i a Ieova e tausi atu ki a koe. Sukesuke ki tusi kolā e maua ne koe kae kau ki fakatasiga i se ‵gana telā e malamalama koe i ei, māfai e mafai. Kae ke loto talitonu me ka fakamalosi faeloa koe ne Ieova i te feitu faka-te-agaga.—Sala. 1:2; Epe. 10:24, 25.

4. Kafai e se maua ne koe a mataupu kolā e maua fua i te jw.org, e mata, ka vāivāi koe i te feitu faka-te-agaga?

I te Web site a tatou, e ‵lomi ne tatou a ‵kopi o ‵tou mekesini mo nisi lōmiga faka-te-Tusi Tapu. E tuku mai foki i ‵tou Web site mataupu kolā e fesoasoani ki tauavaga, talavou, mo latou kolā e isi ne olotou tamaliki fo‵liki. E maua ne kāiga a mea aoga mai te mafau‵fau ki te mataupu tenei i olotou Tapuakiga a Kāiga. I tafa i ei, e lipoti mai i ‵tou Web site a polokalame fakapito, e pelā mo fakaotiga o vasega a‵koga i Kiliata mo te fono faka-te-tausaga, kae fakailoa atu faeloa i ei ki ‵tou kautaina i te lalolagi e uiga ki fakalavelave o te natula mo mea tau tulafono kolā e pokotia i ei a tino o Ieova. (1 Pe. 5:8, 9) A ‵tou Web site foki se mea faigaluega tāua i te galuega talai, me e mafai o maua i ei te tala ‵lei i atufenua kolā e fakatapu i ei ‵tou galuega.

E ui i ei, e mafai eiloa koe o tumau i te malosi i te feitu faka-te-agaga faitalia me mafai o fano koe ki ‵tou Web site io me ikai. Ko oti ne galue malosi a te tavini o ‵lomi a mataupu e lava ke ‵kai faka‵lei ki ei a nisi tavini taki tokotasi i te feitu faka-te-agaga. Tela la, e se ‵tau o manatu aka koe me e ‵tau o ‵togi se mea faigaluega ko te mea fua ke mafai o fano koe ki te jw.org. Kāti e fai ne nisi tino a fakatokaga totino ke ‵kopi se fia o mataupu i ‵tou Web site kae tuku atu ki a latou kolā e se mafai o olo ki loto i te itaneti, kae e se manakogina ke fai ne fakapotopotoga a te mea tenei.

E fakafetai tatou ki a Iesu mō te tausi ki tena tautoga ke tausi mai ki ‵tou manakoga faka-te-agaga. Ona ko te pili mai o te gataga o aso fakaoti kae faiga‵ta konei, e ‵tau mo tatou o tali‵tonu me ka tumau eiloa a Ieova o tuku mai a mea‵kai faka-te-agaga “i te taimi tonu.”