Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Aokuso 2014

‘Foki Mai o Fakamalosi Aka ou Taina’

‘Foki Mai o Fakamalosi Aka ou Taina’

NE ‵NAU ‵ki eiloa te ‵tagi a Petelu mai tua o te fakafitiga me e se iloa ne ia a Iesu. E ui eiloa e taumafai te apositolo ke toe paleni a tena feitu faka-te-agaga, ne manako a Iesu o fakaaoga tou tagata ke fesoasoani atu ki nisi tino. Tela la, ne fai atu a Iesu ki a ia: “A ko koe, kafai e toe ‵fuli mai, ke fakamalosi atu la ou taina.” (Luka 22:32, 54-62) Ne gasolo ki mua a Petelu kae ne fai mo pou malosi e tokotasi o te fakapotopotoga Kelisiano i te senitenali muamua. (Kala. 2:9) I se auala tai ‵pau, e mafai foki ne se tagata telā ne tavini mua pelā me se toeaina o toe maua a te tiute tenā kae fiafia o fesoasoani atu ki taina mo tuagane tali‵tonu i te feitu faka-te-agaga.

A nisi tino kolā ne tavini mua pelā me ne ovasia, ko oti ne tapale kea‵tea, kāti ona ko te fakata‵mala o latou. Ne fai mai a Julio, * telā ne tavini mua pelā me se toeaina i Amelika ki Saute i tausaga e silia atu i te 20: “A te fakatokaga o lāuga, āsi atu ki taina, kae fai āsiga pelā me se tausi mamoe ki tino o te fakapotopotoga se vaega lasi o toku olaga! Ne galo fakavave atu, kae seai se mea e ‵toe mai i toku olaga. Kafai e tuku fakatasi a mea katoa, tenei eiloa te ‵toe vaitaimi matagā.” I aso nei, ko toe tavini atu a Julio e pelā me se toeaina.

“KE FIA‵FIA KOUTOU”

Ne tusi mai te soko ko Iakopo: “Ke fia‵fia koutou, e oku taina, māfai e fe‵paki koutou mo tofotofoga kese‵kese.” (Iako. 1:2) Ne fakasino atu a Iakopo ki tofotofoga kolā e iku mai i fakasauāga mo ‵tou tulaga sē ‵lei katoatoa. Ne taku mai ne tou tagata a manakoga totino, te fakailoga tino, mo nisi mea aka penā. (Iako. 1:14; 2:1; 4:1, 2, 11) Kafai e polopoloki tatou ne Ieova, e mafai o faka‵mae mai ki a tatou. (Epe. 12:11) Kae e se ‵tau o tapale kea‵tea ne tofotofoga penā a te fiafia mai i a tatou.

Kafai foki ne tapale tatou kea‵tea mai i se tulaga taulia i te fakapotopotoga, koi maua eiloa ne tatou a te avanoaga ke iloilo a te tulaga o ‵tou fakatuanaki kae fakaasi atu ‵tou a‵lofa ki a Ieova. E mafai foki o mafau‵fau tatou ki te pogai e tavini atu ei tatou. E mata, e fai  ne tatou ke aoga totino ki a tatou eiloa, io me ne fakamalosigina tatou ke kausaki atu ki se tauliaga penā ona ko ‵tou a‵lofa ki te Atua mo ‵tou tali‵tonu me i a ia te fakapotopotoga kae ‵tau o tausi faka‵lei atu ki ei? (Galu. 20:28-30) E fakatalitonu atu ne toeaina mua kolā ne tumau o tavini atu mo te fiafia ki tino katoa, e aofia i ei a Satani, me e tonu eiloa te lotou a‵lofa ki a Ieova.

I te taimi ne polopoloki ei te tupu ko Tavita i te faiga ne ia agasala matagā, ne talia ne ia a polopolokiga ‵mafa kae ne fakamagalogina. Ne usu mai penei a Tavita: “Amutia a tino kolā ko fakamagalogina olotou agasala, kolā ko faka‵magina foki olotou amioga ma‵sei. Amutia te tino telā e se taku‵segina ne te Aliki [Ieova], kae sē masani o loi.” (Sala. 32:1, 2) Ne faka‵ma a Tavita ne pati polopoloki kae ne fai ei a ia mo tausi mamoe ‵lei o tino o te Atua.

E pelā mo te masani, a taina kolā e toe ‵foki mai o tavini pelā me ne toeaina e fai pelā me ne tausi mamoe e ‵lei atu i lō te taimi muamua ne toeaina ei latou. Muna a se toeaina e tokotasi: “Ko malamalama faka‵lei atu nei au i te auala e tausi atu ei ki a latou kolā e fai mea ‵se.” Ne fai mai te suā toeaina: “Ko fakatāua malosi atu nei ne au a toku tauliaga o tavini atu ki taina.”

E MAFAI NE KOE O TOE FOKI MAI?

Ne tusi mai a te faisalamo: “E se fakasala ‵soko ne [Ieova] a tino.” (Sala. 103:9) Tela la, e se ‵tau mo tatou o mafau‵fau pelā me ko sē toe talitonu te Atua ki se tino telā ne fai ne ia se agasala matagā. “Ne fanoanoa ‵ki eiloa au ona ko toku fakatamala,” ko pati a Ricardo, telā ne tapale ana tauliaga e pelā me se toeaina mai tua o tausaga e uke ne tavini ei a ia e pelā me se toeaina. “E leva ‵ki te taimi ne taofi ei au ne oku lagonaga me ko sē fetaui ‵lei au, mai te toe foki mai o tavini ki taina e pelā me se ovasia. Ne sē lava toku loto talitonu me e mafai o fakatalitonu atu ne au a toku fakatuagagina. Kae ona ko au e fiafia o fesoasoani ki nisi tino, ne mafai ei ne au o fai akoga faka-te-Tusi Tapu, fakamalosi a taina i te Kingdom Hall, kae ga‵lue fakatasi mo latou i te galuega talai. Ne fesoasoani mai a te mea tenā ke toe maua ne au a te loto talitonu, kae nei la, ko toe tavini atu au pelā me se toeaina.”

Ko oti ne fesoasoani atu a Ieova ki taina ke toe maua te fiafia mo te manakoga ke tavini atu

A te ita fakamoemoe e mafai o taofi ei se taina mai te taviniga e pelā me se toeaina. E sili fakafia atu i te ‵lei ke fai pelā mo te tavini a Ieova ko Tavita, telā ne tele kea‵tea mai te tupu loto masei ko Saulo! Ne ita a Tavita ma toe taui atu ki a Saulo, faitalia me ne maua ne ia  avanoaga ke fai penā. (1 Samu. 24:4-7; 26:8-12) I te taimi ne mate ei a Saulo i te taua, ne tagi fanoanoa a Tavita i tena mate, kae ne fakasino atu ki a ia mo tena tama ko Ionatana e pelā me “ne tino ‵lei kae fagasele.” (2 Samu. 1:21-23) Ne seki ita fakamoemoe a Tavita.

Kafai e mafaufau koe me ne seki malamalama io me ne seki tonu te fakamasinoga o koe, ke mo a e talia ne koe ke pule a te ita i ou mafaufauga. Pelā me se fakaakoakoga, i te taimi ne fakamalōlō ei a William mai tua o se 30 tausaga ne tavini ei pelā me se toeaina i Peletania, ne kaitaua tou tagata ki nisi toeaina. Se a te mea ne fesoasoani atu ki a William ke toe paleni faka‵lei? “Ne fakamalosi mai ki a au a te faitauga ki te tusi o Iopu,” ko ana pati. “Kafai ne fesoasoani a Ieova ki a Iopu ke faka‵lei mo ana taugasoa e tokotolu, e sili atu la a Tena fesoasoani mai ki a au ke faka‵lei toku va mo toeaina Kelisiano!”—Iopu 42:7-9.

E FAKAMANUIA NE IEOVA A LATOU KOLĀ E TOE TAVINI PELĀ ME NE TAUSI MAMOE

Kafai ne filifili aka ne koe ke malōlō mai i te tausiga o te lafu mamoe a te Atua, se mea ‵lei ke mafaufau koe ki te pogai ne fai ei ne koe. E mata, ko tō uke ou fakalavelave totino? E mata, ko fakatāua atu ne koe a nisi mea i tou olaga? E mata, e loto vāivāi koe ona ko te tulaga sē ‵lei katoatoa o nisi tino? Faitalia me se a, ke masaua, me ne uke atu auala ne mafai ei ne koe o fesoasoani atu ki nisi tino i te taimi ne tavini ei koe pelā me se toeaina. Ne fakamalosi atu au lāuga mo au fakaakoakoga ki a latou, kae fesoasoani atu au āsiga pelā me se tausi mamoe ke kufaki latou i olotou tofotofoga. A te galue o koe e pelā me se toeaina fakamaoni e fakafiafia atu ki te loto o Ieova, e pelā foki mo koe.—Faata. 27:11.

Fakatalitonu atu a tou alofa ki a Ieova mai i te kau atu ki te taviniga tapu mo te fiafia

Ko oti ne fesoasoani atu a Ieova ki taina ke toe maua te fiafia mo te manakoga o fai te takitakiga i te fakapotopotoga. Kafai ne manako koe o taofi tau taviniga e pelā me se toeaina io me ne tapale kea‵tea, e mafai ne koe o toe kausaki atu ke ‘maua a te tofi ko te ovasia.’ (1 Timo. 3:1) Ne ‘seki gata te talo atu’ o Paulo ko te mea ke ‵fonu a Kelisiano i Kolose i te iloaga tonu e uiga ki te loto o te Atua “ko te mea ke sa‵sale [latou] i se auala telā e talia ne Ieova kae ke fakafiafia katoatoa atu ki a ia.” (Ko. 1:9, 10) Kafai e toe taulia koe ke tavini atu e pelā me se toeaina, kilo ki a Ieova e maua ei ne koe te malosi, kufaki, mo te fiafia. I aso fakaoti konei, e ma‵nako a tino o te Atua ki te fesoasoani faka-te-agaga o tausi mamoe a‵lofa. E mata, e mafai kae loto fiafia koe o fakamalosi ou taina?

^ pala. 3 Ko oti ne ‵fuli a nisi igoa.