Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Iulai 2014

 TALA TONU

Te Galoga o se Tamana—Te Mauaga o se Tamana

Te Galoga o se Tamana—Te Mauaga o se Tamana

NE FANAU toku tamana i Graz, Austria, i te 1899, tela la, a ia koi talavou i te taimi o te Taua Muamua a te Lalolagi. Ne ave a ia ki te kautau Siamani i te kamataga o te Taua i te Lua a te Lalolagi i te 1939. Ne mate tou tagata i te taimi ne taua ei i Lusia i te 1943. Se mea fakafanoanoa a te auala ne galo ei toku tamana kae ko lua fua oku tausaga. Ne seki ai eiloa se avanoaga ne maua ke iloa ne au a ia, kae se mea fakafanoanoa a te seai o se tamana, maise eiloa māfai e kilo atu ki nisi tamaliki ta‵gata i te akoga e isi ne olotou tamana. Fakamuli ifo, ne maua ne au e pelā me se talavou, se fakamafanafanaga mai te tauloto e uiga ki ‵tou Tamana faka-te-lagi, se Tamana tafasili i te maluga telā e se mafai o mate.—Sapa. 1:12.

AKU MEA NE TAULOTO I TE SIKAUTI

Mo te taimi koi tamaliki ei au

I te taimi ko fitu ei oku tausaga, ne fai au mo sui o te potukau talavou o te sikauti. A te sikauti se fakapotopotoga i te lalolagi kātoa telā ne fakatu ne te ofisa o kautau o Peletania ko Robert Stephenson Smyth Baden-Powell i Peletania i te 1908. I te 1916, ne fakatu ne tou tagata a te Wolf Cubs (io me ko te Cub Scouts) mō tamaliki ta‵gata fo‵liki.

Ne fiafia au ki malaga tafaofao a matou i fakaotiga o vaiaso—‵moe i faleie, pei a togiga, kae māti ki tagi o tulamu. Kae maise eiloa a taimi ne fakatasi ei au mo nisi sikauti, e aofia i ei a te usu pese i tafatafa o se afi i te afiafi po kae ta‵fao i te togāvao. Ne tauloto foki matou ki mea e uke e uiga ki te natula, telā ne fai ei ke fiafia au ki mea ne fai ne ‵tou Mafuaga.

E fakamalosigina foki a sikauti ke fai a amioga ‵lei i aso katoa. Tenei eiloa te tugāpati masani a latou. E fakatalofa te suā tino ki te suā tino i pati konei “Ke Toka Faeloa.” Ne gali ki a au a te mea tenei. I te potukau a matou telā e silia atu i te tokoselau tamaliki ta‵gata, e nofo ki te āfa ne Katolika, kae āfa ne Polotesano, kae tokotasi se tino lotu Puta.

Talu mai te 1920, ne fai faeloa a fonotaga a Sikauti i te lalolagi i taki fia tausaga. Ne kau au ki te fitu o fonotaga a Sikauti i te Lalolagi i Bad Ischl, Austria, i a Aokuso 1951, mo te iva o fonotaga a Sikauti i te Lalolagi i Sutton Park, i tafa o Birmingham, Egelani, i a Aokuso 1957. I se faigāmea fakamuli ifo, e nofo ki te 33,000 Sikauti mai atufenua e 85 ne ‵kau ki ei. E nofo foki ki se 750,000 tino ne āsi atu ki a matou i te fonotaga kae aofia i ei a te tupu fafine ko Elisapeta mai i Egelani. Ki a au, e pelā eiloa me se kautaina i te lalolagi kātoa. E seai se mea e iloa ne au me ko pili o masani au mo se kautaina telā e fakaofoofogia malosi atu—se kautaina faka-te-agaga.

TE TAIMI MUAMUA NE FETAUI EI AU MO SE MOLIMAU A IEOVA

A te kuka ko Rudi Tschiggerl, ko te tino muamua ne talai mai ki a au i taimi seki fuafuagina

I te ‵tau e ‵somo ei a lau o lakau i te 1958, ko tai oti aka eiloa i ei taku akoga fakamasani e pelā me se situati i te Grand Hotel Wiesler i Graz, Austria. I konā, ne talai mai ki a au a Rudolf Tschiggerl, se tino  e galue tasi mo au kae se kuka. Ne seki lagona aka eiloa ne au se mea e uiga ki te munatonu. Ne fakasae aka muamua ne ia a te akoakoga e uiga ki te Tolutasi kae fai mai me e sē se akoakoga mai te Tusi Tapu. Ne kinau au me e tonu eiloa te Tolutasi kae manako foki au o fakatalitonu atu ki tou tagata i a ia e ‵se. Ne fiafia au ki te tino galue tenā kae ne fakamoemoe au o fakamalosi atu ki a ia ke toe foki ki te Lotu Katolika.

Kae ko Rudolf, telā e fakaigoa ne matou ki a Rudi, ne manako o tuku mai ki a au se Tusi Tapu. Ne fai faeloa au ki ei me e ‵tau se Tusi Tapu Katolika. Ne kamata au o faitau ki ei kae seki leva, kae matea ne au se tamā pepa ne ‵lomi ne te Sosaiete o te Faleleoleo Maluga ne tuku ne Rudi ki loto i te Tusi Tapu. Ne seki fiafia au ki ei me ne manatu aka au i tusi penā e mafai o ‵tagi mai pelā me e ‵tonu kae tela la, e ‵se. Ne fiafia au ke sautala mo ia ki te Tusi Tapu. Ne poto a Rudi me ne seki toe tuku mai ne ia ki a au se tusi io se mekesini. E nofo ki te tolu masina, seāseā ko fai te mā sautalaga faka-te-Tusi Tapu kae masani sāle o oti i te valuapo.

I te otiga o taku akoga fakamasani i te fale-talimālō i toku fa‵kai ko Graz, ne toe ‵togi au ne toku mātua ke fano o akoga ki te fakateletelega o fale-talimālō. Tenā, fano ei au ki Bad Hofgastein, se fa‵kai e tu i se vanu i te atumauga ko te Alps, telā e tu i ei a te akoga. E isi se sokoga o te akoga tenā ki te Grand Hotel ,i Bad Hofgastein tela la, i nisi taimi ko fano au o galue i konā ke tai lasi atu taku mea e iloa mai i mea ne tauloto ne au i te akoga.

NE ĀSI MAI A TUAGANE MISIONALE E TOKOLUA

Ko Ilse Unterdörfer mo Elfriede Löhr ko kamata o sukesuke fakatasi mo au ki te Tusi Tapu i te 1958

Ne ave ne Rudi a toku fakatuatusi fou ki te ofisa lagolago i Vienna, kae toe ave ne te ofisa lagolago ki tuagane misionale e tokolua, ko Ilse Unterdörfer mo Elfriede Löhr. * I te aso e tasi ne kalaga mai a te tino galue o te fale-talimālō telā e fakafetaui ki tino kae fai mai i fāfine e tokolua kolā e faka‵tali i tua i te motoka e ma‵nako o fai‵pati ki a au. Au ne ‵segi me e se iloa ne au a lāua. Kae ne fano eiloa au ki tua o onoono aka me ko oi lāua. Ne iloa ne au fakamuli ifo me ne ga‵lue lāua pelā ne Molimau avefekau i Nazi, Siamani i te taimi ne fakatapu ei a te galuega mai mua o te Taua i te Lua a te Lalolagi. Mai mua foki o kamata te taua, ne puke lāua ne pulisimani ‵funa o Siamani (Gestapo) kae ave ki te falepuipui fakasaua i Lichtenburg. Kae i te taimi o te taua, ne ave lāua ki te falepuipui i Ravensbrück, i tafa o Berlin.

A te ma‵tua o tuagane konei ko nofo ki te matua o toku mātua, tela la, ne āva eiloa au ki a lāua. Tenā te pogai ne seki manako ei au o fakamāumāu a lā taimi mai te sautala fakatasi mo lāua i se fia o vaiaso io me ne masina ko fai atu ei au ki a lāua me ko sē manako au o faka‵soko te sautalaga. Tela la, ne fakamolemole atu au ki a lāua ke aumai fua se fakasologa o tusi siki e uiga ki te akoakoga a te Katolika ki apositolo. Ne fai atu au ki a lāua me ka ave ne au a te mea tenā ki te pope kae sautala fakatasi ki ei. Ne manatu aka au me ka maua ne au i ei a te munatonu.

TE TAULOTOGA E UIGA KI TE TAMANA TAPU TONU I TE LAGI

E fai mai te akoakoga a te Katolika Loma i te fakasolomaiga o pope telā ne kamata mai i te apositolo  ko Petelu e seki motu aka eiloa. (Ne fakauiga ‵se ne te lotu a pati a Iesu i te Mataio 16:18, 19.) E fai mai foki a tino Katolika i te pope e fakatuagagina māfai e faipati ki akoakoga fakalotu. Ne talitonu au ki te mea tenei kae manatu aka me kafai e fakatuagagina a te pope, telā e fakaigoa ne tino Katolika ki te Tamana Tapu, i akoakoga fakalotu kae fai mai i te Tolutasi e tonu, ko tena uiga e tonu eiloa. Kae kafai a ia e se fakatuagagina, ko tena uiga a te akoakoga e ‵se. E se tioa o fai a te fakasolomaiga o apositolo mo toe akoakoga tāua ki Katolika e tokouke, me i te ‵tonu io me ko te ‵se o nisi akoakoga a te Katolika e fakalagolago ki ei!

I te taimi ne āsi atu ei au ki te faifeau, ne seki maua ne ia o tali aku fesili, kae ne ‵futi mai ne ia mai i tena fatatusi se tusi ki te akoakoga a te Katolika e uiga ki te fakasolomaiga o apositolo. Ne fai mai tou tagata ke ave ne au ki te fale o faitau ki ei, kae toe foki mai au mo fesili e uke atu. Me ne seki mafai ne ia o tali mai aku fesili, ne fai mai tou tagata: “E se mafai ne au o fakamalie koe, kae e se mafai foki ne koe o fakamalie au. . . . Ke manuia koe!” Ne seki toe manako tou tagata ke sautala māua.

Mai konā, ne toka au o sukesuke fakatasi mo Ilse mo Elfriede ki te Tusi Tapu. E uke a mea ne akoako mai ne lāua ki a au e uiga ki te Tamana tonu kae Tapu i te lagi, ko Ieova te Atua. (Ioa. 17:11) Ne fai ne tuagane e tokolua konei a fakatasiga i te fale o se kāiga fia‵fia me e seki ai se fakapotopotoga i te kogā koga tenā. Ne nāi tino fua ne ‵kau mai. A te ukega o vaega o te fakatasiga e sautala fua ki ei a te avā tuagane me e seai se taina papatiso ke takitaki ne ia. Seāseā, ko vau se taina mai se koga fakaa‵tea o fai te lāuga mō tino katoa i se koga ne ‵togi.

TE KAMATAGA O KAU KI TE GALUEGA TALAI

Ne kamata o fai taku akoga faka-te-Tusi Tapu ne Ilse mo Elfriede i a Oketopa 1958, kae ne papatiso au i te tolu masina fakamuli ifo i a Ianuali 1959. A koi tuai au o papatiso, ne fakamolemole atu au ki a lāua me e mafai o kau au ki a lāua i te galuega talai mai fale ki fale, o onoono fua ki te auala ne fai ei te galuega talai. (Galu. 20:20) Mai tua o te kauatuga ki a lāua i te taimi muamua, ne fakamolemole atu au me e mafai o tuku mai se koga ke galue au i ei. Ne ‵tofi ne lāua au ki se fa‵kai, kae ne fano tokotasi au ki konā o talai i ei mai fale ki fale kae fai foki a toe āsiga ki tino fia‵fia. A te taina muamua ne kau au ki ei i te galuega talai mai fale ki fale ko te ovasia o fenua telā ne āsi fakamuli mai ki a matou.

I te otiga o taku akoga i te fale-talimālō i te 1960, ne toe foki au ki toku fa‵kai tonu o taumafai ke fesoasoani atu ki oku kāiga ke tauloto ki muna‵tonu mai te Tusi Tapu. E ui eiloa e seki ai se tino o latou kai vau ki loto i te munatonu, e isi ne tino ko kamata o fia‵fia.

SE OLAGA I TE TAVINIGA TUMAU

I te taimi ko 20 tupu ei oku tausaga

I te 1961, ne faitau a tusi mai te ofisa lagolago ki te fakapotopotoga e fakamalosi aka i ei a te galuega fakapaenia. Au koi nofo taka kae malosi, tela la, ne manatu aka au me e seai saku fakamasakoga ke sē paenia au. Ne faipati au ki te ovasia o fenua, ko Kurt Kuhn, me ne a ana manatu ki toku galue i te galuega ‵togi mō se fia o masina ko te mea ke mafai ne au o ‵togi se motoka telā ka aoga ki te galuega fakapaenia. Tenei tena tali, “E mata, ne ma‵nako a Iesu mo te kau apositolo ki se motoka ko te mea ke ga‵lue i te taviniga tumau?” Tenā ne gata ei au! Ne palani au ke kamata fakavave o galue fakapaenia. Kae ona ko au e galue i te 72 itula i vaiaso katoa i te koga ‵kai o te fale talimālō, e ‵tau o fai muamua ne au ne ‵fuliga.

Ne fakamolemole au ki toku pule me e talia ne ia  ke galue au ki te 60 itula i te vaiaso. Ne talia ne tou tagata taku fakamolemole ako toku ‵togi e tumau eiloa. Mai tua malie ifo, ne fakamolemole au ki a ia me e mafai au o galue ki te 48 itula i te vaiaso. Ne talia foki ne tou tagata a te fakamolemole tenā kae tumau eiloa toku ‵togi. Ne toe fakamolemole au ke galue fua ki te 36 itula i te vaiaso, io me 6 itula i te 6 o aso, kae ne talia foki a te fakamolemole tenā. Kae se mea fakaofoofogia, i toku ‵togi e tumau eiloa! E foliga mai i toku pule e se manako o tiakina au. Mai te fakasologa tenā, ne kamata ei au o paenia tumau. I te taimi tenā, e ‵tau o 100 itula e galue ne te paenia i te masina.

E fa masina mai tua ifo, kae filifili au mo fai se paenia fakapito mo se tavini a te fakapotopotoga i se fakapotopotoga foliki i te kogā koga ko Carinthia, i te fa‵kai o Spittal an der Drau. I taimi konā, a itula o te paenia fakapito e ‵tusa mo te 150 i te masina. E seai soku taugasoa paenia, kae ne fakatāua ne au a te ‵lago mai o te tuagane ko Gertrude Lobner, telā ne galue pelā me se tino fesoasoani ki te tavini o te fakapotopotoga. *

NE ‵FULI FAKAVAVE A TOFIGA

I te 1963, ne ‵kami au ke galue i te galuega a te seketi. I nisi taimi, e faimalaga au i te tuleni mai te fakapotopotoga e tasi ki te suā fakapotopotoga, kae tauave a pausi ‵mafa. E seai ne motoka a te tokoukega o taina, tela la, e seai se tino e mafai o vau o puke au i te koga e ‵tu ei a tuleni. Ko te mea ke sē ma‵sei a lagonaga o taina, ne seki manako au o fano i se motoka ‵togi ki te koga e nofo ei au, tenā ne sasale ei au ki toku koga nofo.

I te 1965, koi nofo taka eiloa au, ne ‵kami au ke kau ki te vasega 41 o te Akoga i Kiliata. A te tokoukega o tino kolā e a‵koga mo au koi ‵taka foki. Ne poi masei au i te otiga o te akoga me ne ‵tofi au ke toe foki ki toku fenua tonu ko Austria o faka‵soko i te galuega a te seketi. A koi tuai o tiaki ne au a te Iunaite Sitete, ne fakamolemole mai ke olo au mo te ovasia o fenua mō se fa vaiaso. Ne fiafia lasi au o ga‵lue mo Anthony Conte, se taina alofa telā ne fiafia foki o galue i te galuega talai kae apo malosi i ei. Ne ga‵lue tasi māua i te kogā koga ko te Cornwall i Niu Ioki.

Te aso o te mā fakaipoipoga

I te taimi ne toe foki ei au ki Austria, ne ‵tofi au ki se seketi telā ne fetaui ei au mo Tove Merete, se tuagane taka kae tino gali. Ne puti aka a ia i te munatonu mai te taimi ko lima ei ana tausaga. I te taimi ne fesili mai ei a taina me ne fetaui pefea māua, ne faifa‵kata atu māua, “Ne fakatoka ne te ofisa lagolago a te mea tenā.” Ne avaga māua i se tausaga fakamuli ifo, i a Apelila 1967, kae ne talia eiloa ke faka‵soko māua i te galuega a ovasia faima‵laga.

I te tausaga fakamuli ifo, ne iloa aka i ei ne au me mai te alofa tauanoa o Ieova, ne puke ei ne ia au e pelā me se tama faka-te-agaga. Mai konā, ne kamata ei se fesokotakiga fakapito mo toku Tamana faka-te-lagi e pelā foki mo latou katoa kolā e “ka‵laga atu: Apa, te motou Tamana!” i te Loma 8:15.

Ne tumau eiloa te ga‵lue tasi o māua mo Merete i te galuega a ovasia faima‵laga ke oko eiloa ki te 1976. I nisi taimi o te ‵tau ‵moko, e ‵moe māua i potu e seai ne mea faka‵vela i ei kae ko te ‵moko e nofo mai lalo i te leai. I te taimi e tasi ne ala aka ei māua, a te feitu ki luga o te mā pulagiketi ko makeke kae ‵kena i te  ea telā e mānava ne māua ki tua ko poloka! Ne fakaiku aka ne māua ke tauave se tamā mea faka‵vela e fakaola ki te iti ke fakamafanafana ki ei māua i te po. I nisi koga, kafai e fia olo māua ki te fale koukou i te po, e ‵tau māua o sa‵sale i loto i te kiona ki se fale foliki mai tua kae masani o ‵moko ‵ki. E seai foki se koga e ‵nofo māua i ei, tela la, i Aso Gafua e masani o ‵nofo māua i fale foki eiloa kolā ne ga‵lue māua i ei i loto i te vaiaso. Kae i te taeao o te Aso Lua, ko ma‵laga māua ki te suā fakapotopotoga.

E fiafia au o fai atu me ne ‵lago malosi mai faeloa a taku avaga pele ki a au i tausaga e uke. E fiafia malosi tou fafine ki te galuega talai kae ne seki faka‵tuka aka eiloa ne au a ia ke sē fano o talai. E alofa a ia ki taugasoa kae manavase malosi ki nisi tino. A te mea tenei se fesoasoani lasi ‵ki.

I te 1976, ne ‵kami māua ke ga‵lue i te ofisa lagolago o Austria i Vienna, kae ne filifili ei au mo fai se sui i te Komiti o te Ofisa Lagolago. I te taimi tenā, a te ofisa lagolago o Austria e tausi atu ki galuega i nisi atufenua o Eulopa ki Saegala kae fakatoka a auala ‵funa e ave ei a tusi ki atufenua konā. Ne takitaki ne te taina ko Jürgen Rundel a te fakatokaga tenei me ne uke ana manatu ne fakaasi mai i ei. Ne ga‵lue tasi au mo tou tagata kae fakamuli ifo, ne fakamolemole mai ki a au ke onoono ki te ‵fuliga o tusi ki ‵gana e sefulu o atufenua o Eulopa ki Saegala. Ne tumau eiloa a Jürgen mo tena avaga ko Gertrud i te ga‵lue mo te fakamaoni e pelā me ne paenia fakapito i Siamani. Kamata i te 1978, ne fakatoka ne te ofisa lagolago o Austria a mekesini kae ‵lomi ki ‵gana e ono i se tamā masini ‵lomi tusi. Ne ave foki ne matou a feagaiga ki atufenua kese‵kese kolā ne fakamolemole mai ki ei. A te tagata telā ne onoono ki fakatokaga konei ko Otto Kuglitsch, telā e tavini nei mo tena avaga ko Ingrid i te ofisa lagolago i Siamani.

I Austria, ne fiafia malosi au ki vaegā talaiga e uke, e aofia i ei a te talai i auala

Ne faite foki ne taina i Eulopa ki Saegala a tusi i olotou fenua eiloa mai te fakaaogaga o masini kopi io me e ‵lomi mai i lipine o ata. Kae koi manakogina eiloa ne latou se fesoasoani mai i atufenua mai tua. Ne puipui ne Ieova a te galuega tenei, kae ne a‵lofa matou mai i te ofisa lagolago ki taina kolā ne ga‵lue mai lalo i tulaga faiga‵ta mo fakataputapuga i tausaga e uke.

SE ĀSIGA FAKAPITO KI ROMANIA

I te 1989, ne maua ne au te tauliaga ke olo tasi mo te Taina ko Theodore Jaracz, se sui o te Potukau Pule ki Romania. A te fakamoemoega maluga ko te fesoasoani ki se potukau lasi o taina ke toe ‵kau fakatasi  mo te fakapotopotoga saukātoa. Kamata mai i te 1949, ne fakagata te fesokotaki o latou mo te fakapotopotoga saukātoa ona ko pogai kese‵kese, kae faka‵tu olotou fakapotopotoga totino. E ui i ei, ne tumau eiloa latou i te talai kae papatiso a tino. Ne ‵pei foki latou ki te falepuipui ona ko te lotou tulaga faka-Kelisiano ko te sē ‵kau ki se feitu, e pelā loa mo mea ne fai ne taina kolā ne vaega o te fakapotopotoga saukātoa telā ne talia ne te laumua o tatou. Koi fai eiloa te fakataputapuga i Romania, tela la, ne maopoopo ‵muni matou i te fale o te Taina ko Pamfil Albu, fakatasi mo toeaina tāua e tokofa mo sui o te Romania Country Committee. Ne ave foki ne māua a Rolf Kellner, se tino fakamatala pati mai i Austria.

I te lua o po ne sautala ei matou, ne fakatagi atu a te Taina ko Albu ki ana toeaina e tokofa ke ‵kau mai ki a tatou mai te fai atu penei, “Kafai e se fai nei ne tatou, kāti ka sē maua eiloa ne tatou a te suā avanoaga.” Mai tua o te faipatiga tenei, e nofo ki te 5,000 taina ne ‵foki mai ki te fakapotopotoga saukātoa. Se manumalo eiloa ki a Ieova kae se takavale ki a Satani!

Ko pilipili ki te fakaotiga o 1989, mai mua o pakū a te Kominisi i Eulopa ki Saegala, ne ‵kami māua mo taku avaga ne te Potukau Pule ke olo atu māua ki te laumua i Niu Ioki. Ne ‵poi ‵ki māua i te mea tenei. Ne tavini māua i te Peteli i Brooklyn i a Iulai 1990. I te 1992, ne filifili ei au e pelā me se tino fesoasoani ki te Komiti o te Galuega Talai o te Potukau Pule, kae talu mai i a Iulai 1994, ne maua ei ne au a te tauliaga ke fai mo sui o te Potukau Pule.

TE MAFAUFAU KI TAIMI KO ‵TEKA KAE KILO ATU KI TE TAIMI MAI MUA

Fakatasi mo taku avaga i Brooklyn, Niu Ioki

Ko leva ne ‵teka ki tua a taimi ne galue ei au i se fale talimālō. Nei la, ko fiafia au ki te tauliaga o fakatoka kae fakasoa a mea‵kai faka-te-agaga ki ‵tou taina i te lalolagi kātoa. (Mata. 24:45-47) Kafai au e toe kilo ki tua i te 50 tausaga ne galue ei au i te taviniga tumau, e ‵fonu toku loto i te loto fakafetai mo te fiafia ki fakamanuiaga a Ieova ki ‵tou kautaina i te lalolagi kātoa. E fiafia malosi au o kau ki fono i atufenua kolā e tauloto ne tatou i ei a mea e uiga ki ‵tou Tamana faka-te-lagi, ko Ieova, mo te munatonu mai te Tusi Tapu.

E ‵talo au ke suke‵suke a te fia miliona o tino ki te Tusi Tapu, talia a te munatonu, kae tavini fakatasi atu ki a Ieova mo ‵tou kautaina Kelisiano i te lalolagi kātoa. (1 Pe. 2:17) E fakamoemoe foki au ke kilokilo ifo mai luga i te lagi ki te ‵toe faka‵tuga o tino i te lalolagi, kae ka lavea i ei ne au i te fakaotiga a toku tamana faka-te-foitino. Au e fakamoemoe ko toku tamana, toku mātua, mo nisi kāiga pele ke ma‵nako katoa o tapuaki ki a Ieova i te Palataiso.

E fakamoemoe au o kilokilo mai luga i te lagi ki te ‵toe faka‵tuga o tino i te lalolagi, kae ka lavea i ei ne au i te fakaotiga a toku tamana faka-te-foitino

^ pala. 15 Onoono ki te lā tala i te lōmiga o The Watchtower, i a Novema 1, 1979.

^ pala. 27 Nei la, i lo te fakaigoa ki te tavini mo te tavini fesoasoani o te fakapotopotoga, e filifili ne potukau o toeaina takitasi se kouotineita mo te failautusi.