Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Iulai 2014

A Tino o Ieova “ka Tiakina ne Latou a Amioga Ma‵sei”

A Tino o Ieova “ka Tiakina ne Latou a Amioga Ma‵sei”

“Ko latou [katoa] kolā e ka‵laga ki te igoa o Ieova ka tiakina ne latou a amioga ma‵sei.”—2 TIMO. 2:19.

1. Se a te mea e isi sena koga fakapito i ‵tou tapuakiga?

KAI lavea aka eiloa ne koe a te igoa o Ieova e tusi i luga i se fale io me se fale tausi mea mua? E mautinoa me i tau tali se mea tāua e tasi kae gali ke saga tonu ki ei. E se gata i ei, e isi se koga fakapito o te igoa totino o te Atua i ‵tou tapuakiga—a tatou ko Molimau a Ieova! I te lalolagi kātoa, e seai aka foki se potukau o tino i aso nei e ‵pili malosi atu te lotou fesokotakiga ki te igoa o te Atua e pelā mo tatou. E ui i ei, e iloa ne tatou i te tauliaga o tauave te igoa o te Atua e olo tasi mo tiute.

2. Se a te tiute e olo tasi mo ‵tou tauliaga o tauave te igoa o te Atua?

2 A te fakaaogaga fua o te igoa o te Atua e se maua i ei ne tatou a te taliaga a Ieova. E ‵tau mo tatou o ola e ‵tusa mo ana tulaga ‵lei i mea tau amioga. Ona ko te pogai tenā, e fakamasaua mai te Tusi Tapu ki a tatou i tino o Ieova e ‵tau o “‵fuli kea‵tea mai te mea masei.” (Sala. 34:14, NW) Ne fakaasi faka‵lei mai ne te apositolo ko Paulo a te fakatakitakiga fakavae tenei i te taimi ne tusi mai ei a ia: “Ko latou [katoa] kolā e ka‵laga ki te igoa o Ieova ka tiakina ne latou a amioga ma‵sei.” (Faitau te 2 Timoteo 2:19.) E pelā me ne ana Molimau, ko lauiloa tatou i te ka‵laga atu ki te igoa o Ieova. Kae ka tiakina pefea ne tatou a amioga ma‵sei?

 “FAKA‵MAO KEA‵TEA” MAI I AMIOGA MA‵SEI

3, 4. Se a te fuaiupu ne faigata ke malamalama i ei a tino a‵koga ki te Tusi Tapu, kae kaia?

3 Ke mafaufau ki te akoakoga faka-te-Tusi Tapu o pati a Paulo i te 2 Timoteo 2:19. E fakasino atu te fuaiupu tenei ki te ‵mautakitaki o “te fakavae o te Atua” kae e taku mai foki i ei a faka‵pulaga e lua kolā ne tusi i luga i ei. A te faka‵pulaga muamua, “E iloa ne Ieova ana tino,” e mautinoa ‵lei me ne siki mai i te Numela 16:5. (Ke onoono ki te mataupu mai mua atu.) A te lua o faka‵pulaga, “Ko latou [katoa] kolā e ka‵laga ki te igoa o Ieova ka tiakina ne latou a amioga ma‵sei,” ne faigata ke malamalama i ei a tino a‵koga ki te Tusi Tapu. Kaia?

4 E tuku mai se manatu fesoasoani i fakamunaga a Paulo me ne siki mai ne ia a pati konā mai i te suā koga. E ui i ei, e foliga mai me e seai se fuaiupu i Tusitusiga Faka-Epelu e fetaui mo pati a Paulo kolā ne siki mai. Tela la, se a te mea ne fakasino atu ki ei a te apositolo i tena faimaiga: “Ko latou [katoa] kolā e ka‵laga ki te igoa o Ieova ka tiakina ne latou a amioga ma‵sei”? Mai mua malie o te faipatiga tenei, ne siki mai ne Paulo ana pati mai te Numela mataupu e 16, telā e fakaasi mai i ei a te tala o te ‵tekega a Kola. E mata, e mafai foki o isi se sokoga o te lua o faka‵pulaga ki mea kolā ne ‵tupu i te ‵tekega tenā?

5-7. Ne a mea ne ‵tupu i aso o Mose e tuku mai i ei se fakavae ki pati a Paulo i te 2 Timoteo 2:19? (Ke onoono ki te ata i te kamataga.)

5 E fai mai te Tusi Tapu i tama ta‵gata a Eliapo ko Tatano mo Apilamo, ne ‵kau ki a Kola e pelā me ne takitaki o ‵teke atu ki a Mose mo Alona. (Nume. 16:1-5) Ne fakaasi faka‵sau atu ne latou a te lotou sē āva ki a Mose kae ‵teke ki tena tulaga pule mai te Atua. Ne ‵nofo fakatasi faeloa a tino ‵teke konā mo tino o Ieova kae ne fakamataku ‵ki ki te malosi faka-te-agaga o tino fakamaoni. I te okoga ki te aso ne faka‵kese ei ne Ieova ana tino tapuaki fakamaoni mo tino ‵teke, ne tuku mai ne ia se fakatonuga manino.

6 E faitau penei te tala: “Muna a te Aliki [Ieova] ki a Mose, ‵Fai atu ki tino ke faka‵mao kea‵tea mai faleie o Kola mo Tatano mo Apilamo.’ ‘Tenā, ne olo atu ei a Mose mo takitaki o Isalaelu ki a Tatano mo Apilamo.’ Muna a Mose ki tino Isalaelu, ‘Faka‵mao kea‵tea mo faleie o tino ma‵sei konā, kae sa puke eiloa ki se mea a latou, i a koutou ma malaia fakatasi mo latou.’ Tenā, ne faka‵mao kea‵tea ei latou mo faleie o Kola, mo Tatano, mo Apilamo.” (Nume. 16:23-27) Ne tamate ne Ieova a tino ‵teke katoa. Kae ko tino tapuaki a‵lofa fakamaoni kolā ne faka‵mao kea‵tea mai te tiakinaga o amioga ma‵sei—ne ‵sao.

7 E iloa ne Ieova a mea i ‵tou loto! E lavea ne ia a te a‵lofa fakamaoni o ana tino ki a ia. Kae koi manakogina eiloa ke fai ne ana tino a‵lofa fakamaoni se fakaikuga mautinoa, e ‵vae ei latou kea‵tea mai i tino sē amio‵tonu. Tela la, e mafai loa o fakaiku aka ne tatou me i te tusimaiga a Paulo: “Ko latou [katoa] kolā e ka‵laga ki te igoa o Ieova ka tiakina ne latou a amioga ma‵sei,” ne fakasino atu eiloa a ia ki te tala i te Numela 16:5, 23-27. E fetaui ‵lei a te fakaikuga tenā mo pati a Paulo: “E iloa ne Ieova ana tino.”—2 Tim. 2:19.

“SA SAGA KI KINAUGA VA‵LEA KAE SE AOGA”

8. Kaia e ‵tau ei o uke atu a mea e ‵tau o fai i lō te fakaaoga fua o te igoa o Ieova io me ko te kau ki te fakapotopotoga Kelisiano?

8 Mai te fakasino atu ki mea ne ‵tupu i aso o Mose, ne fakamasaua atu a Paulo ki a Timoteo ke fai sena fakaikuga mautinoa ko te mea ke puipui a tena fesokotakiga tāua mo Ieova. E uke atu a mea e ‵tau o fai ne se Kelisiano i lō te kau fua ki te fakapotopotoga, e pelā mo aso o Mose, e uke atu a mea e ‵tau o fai ne Kelisiano i lō te ka‵laga fua ki te igoa o Ieova. E ‵tau mo tino tapuaki fakamaoni o tiakina ne latou a amioga ma‵sei. Se a te uiga o te mea tenei ki a Timoteo? Kae ne a akoakoga e mafai o maua ne tino o Ieova i aso nei mai i pati fakatonutonu a Paulo?

9. Ne pokotia pefea a te fakapotopotoga Kelisiano mua i “kinauga va‵lea kae se aoga”?

 9 E tuku mai i te Muna a te Atua se takitakiga fakapito e uiga ki vaegā amioga ma‵sei kolā e ‵tau o tiakina io me ‵teke atu ki ei a Kelisiano. Pelā me se fakaakoakoga, e lavea ne tatou i tusi siki i tafa o te 2 Timoteo 2:19, me ne fai atu a Paulo ki a Timoteo “ke mo a e kinau latou ki uiga o pati” kae “sa saga ki kinauga va‵lea kae se aoga.” (Faitau te 2 Timoteo 2:14, 16, 23.) E akoako ne nisi tino i loto i te fakapotopotoga a akoakoga fakaaposetate. E foliga mai foki me fakasalalau ne nisi tino a mafaufauga kolā e fakamāfua aka i ei a kinauga. Kafai foki e se ‵teke tonu a manatu fakamuli ki te Tusi Tapu, kae e maua i ei a mavae‵vaega. E iku atu ki te fakamasei tino kae kinau i pati, ko faite mai i ei se tulaga vāivāi i te feitu faka-te-agaga. Tela la, ne faka‵mafa mai ne Paulo a te manakoga ke “sa saga ki kinauga va‵lea kae se aoga.”

10. E ‵tau o ‵saga atu pefea tatou māfai e fe‵paki mo te aposetasi?

10 I aso nei, e se masani o fe‵paki a tino o Ieova mo aposetate i loto i te fakapotopotoga. Kafai foki e tuku faka‵sau atu tatou ki akoakoga kolā e se ‵lago ki ei te Tusi Tapu, faitalia me ne maua mai i fea, e ‵tau mo tatou o ‵teke atu mo te mautinoa ki ei. Se mea valea ke sautala mo aposetate, faitalia me fakafesagai a mata, i te itaneti, io me se isi auala aka. Kafai foki e isi se mafaufauga ke fesoasoani atu ki te tino tenā, ka fai ne te sau‵talaga tenā ke sē faka‵logo tatou ki te fakatakitakiga mai Tusi Tapu telā ne fatoa mafau‵fau tatou ki ei. E pelā me ne tino o Ieova, e ‵tau mo tatou o ‵kalo katoatoa kea‵tea, ao ke ‵teke atu ki te aposetasi.

‵Kalo kea‵tea mai te sautala mo aposetate (Ke onoono ki te palakalafa e 10)

11. Se a te mea e mafai o faka‵sae aka i ei a “kinauga va‵lea,” kae e mafai pefea o fai a toeaina Kelisiano mo fakaakoakoga ‵lei?

11 E isi aka foki ne nisi mea i tafa o te kau aposetate kolā e mafai o fakamakosu aka i ei a te filemu o te fakapotopotoga. Pelā me se fakaakoakoga, a te kese‵kese o manatu e uiga ki fakafiafiaga e mafai o iku atu ki “kinauga va‵lea kae se aoga.” E tonu, kafai e fakamalosi ne se tino a te fakafiafiaga telā e soli i ei a tulaga ‵lei o Ieova i mea tau amioga, e se ‵tau o talia ne toeaina Kelisiano se uiga penā ko te mea fua ke seai se kinauga. (Sala. 11:5; Efe. 5:3-5) E ‵tau mo toeaina o fakaeteete ke mo a e fakatāua olotou kilokiloga totino. E tau‵tali eiloa latou mo te fakamaoni i te fakatonuga faka-te-Tusi Tapu telā ne tuku mai ki ovasia Kelisiano: “Tausi faka‵lei te lafu mamoe a te Atua tenā e tausi ne koutou, . . . Ke se pule atu koutou e pelā me ne aliki ki luga i a latou kolā ko fai mo tofi o te Atua, kae ke fai koutou mo fakaakoakoga ‵lei ki te lafu mamoe.”—1 Pe. 5:2, 3; faitau te 2 Kolinito 1:24.

12, 13. (a) Se a te tulaga o Molimau a Ieova e uiga ki te filifiliga o fakafiafiaga, kae ne a fakatakitakiga mai te Tusi Tapu e fakaaoga ne latou? (e) E fakagalue aka pefea a fakatakitakiga fakavae kolā ne sautala ki ei i te palakalafa e 12 ki nisi mea totino?

12 E uiga ki fakafiafiaga, e se fai ne ‵tou fakapotopotoga se iloiloga ki ata, tafaoga i vitio, tusi, io me ko pese ko te mea ke pule mai ki mea kolā e ‵tau mo tatou o ‵kalo kea‵tea mai i ei. Kaia la e se fai ei penā? Me e fakamalosi mai te Tusi Tapu ki tino taki tokotasi ke akoako “te malosi o olotou mafaufau, ke fakavasega aka ei a mea ‵tonu mo mea ‵se.” (Epe. 5:14) E tuku mai i te Tusi Tapu a fakatakitakiga fakavae faigofie kolā e mafai o fakaaoga ne se Kelisiano māfai e filifili ki fakafiafiaga. A ‵tou fakamoemoega ko te “fakamautinoa aka faeloa . . . a mea kolā e talia ne te Aliki” i feitu katoa o te olaga. (Efe. 5:10) E akoako mai te Tusi Tapu me e isi se malosi pule e ‵nofo mo ulu o kāiga, tela la, e mafai ne latou o filifili ke sē talia ne fakafiafiaga mautinoa i loto i olotou kāiga. *1 Koli. 11:3; Efe. 6:1-4.

13 A fakatakitakiga fakavae mai te Tusi Tapu kolā ne sautala ki ei mai luga e se  fakaaoga fua ki te filifiliga o ‵tou fakafiafiaga. E mafai foki o faka‵sae aka a kinauga ne manatu kese‵kese e uiga ki gatu mo teuga, te ola ‵lei mo mea‵kai paleni, mo nisi manatu aka. E ‵tusa mo mea konā, kafai e seai se fakatakitakiga mai te Tusi Tapu ne soli i ei, e ‵poto eiloa a tino o Ieova o ‵kalo kea‵tea mai te kinau i mea penā, “me i pologa a te Aliki e se ‵tau o kinau, kae e ‵tau o uiga filemu ki tino katoa.”—2 Timo. 2:24.

‵KALO KEA‵TEA MAI I TAUGASOA MA‵SEI!

14. Se a te tala fakatusa ne fakaaoga ne Paulo ke faka‵mafa mai i ei a te manakoga ke ‵kalo kea‵tea mai taugasoa ma‵sei?

14 Se a te suā auala e mafai ei ne tino kolā e “ka‵laga ki te igoa o Ieova [o] tiakina ne latou a amioga ma‵sei”? Mai te ‵kalo kea‵tea mai tino amio ma‵sei. Ko oko eiloa i te aoga me ne faka‵soko ne Paulo a tena tala fakatusa ki te “tu ‵mautakitaki o te fakavae o te Atua” ki te suā tala fakatusa. Ne tusi mai tou tagata e uiga ki “se fale lasi” mo “ipu aulo mo ipu siliva e pelā foki mo ipu lakau mo ipu kele. E faite a nisi ipu mō se pogai aoga a ko nisi ipu mō se pogai sē aoga.” (2 Timo. 2:20, 21) Tenā, ne fakamalosi atu ei tou tagata ki Kelisiano ke “‵kalo kea‵tea,” io me ‵vae latou kea‵tea mai i ipu “mō se pogai sē aoga.”

15, 16. Se a te mea e mafai o tauloto ne tatou mai te tala fakatusa o “se fale lasi”?

15 Se a te uiga o te tala fakatusa tenei? I te tala fakatusa, e faka‵tusa ne Paulo te fakapotopotoga Kelisiano ki se “fale lasi” kae ko tino taki tokotasi o te fakapotopotoga ki “ipu” io me ko meaafale. I loto i te fale, e isi ne meaafale e mafai o fakamasei ne te pisi tai io me ko nisi mea aka. Kafai e tupu se mea penā, ka ‵vae ne te pule o te fale a meaafale penā kea‵tea mo mea ‵ma, ko mea kolā e fakaaoga sale mo fai a mea‵kai.

16 E penā foki a tino o Ieova i aso nei kolā e taumafai o ola i se olaga ‵ma, e ‵tau o ‵kalo kea‵tea mai te atiakaga o se fesokotakiga ‵pili mo tino taki tokotasi i loto i te fakapotopotoga kolā e tumau i te sē faka‵logo ki fakatakitakiga fakavae a Ieova. (Faitau te 1 Kolinito 15:33.) Kafai e tonu me  tenei te mea e ‵tau o fai ki nisi tino i loto i te fakapotopotoga, kae sili atu la te tāua ke “‵kalo kea‵tea” tatou mai te mauaga o se fesokotakiga ‵pili mo tino mai tua o te fakapotopotoga kolā e ‘va‵lea ki tupe, sē faka‵logo ki mātua, sē a‵lofa fakamaoni, e gutu fatu‵fatu, e amio fakasaua, e se ma‵nako ki mea ‵lei, e faitogafiti, kae va‵lea ki fakafiafiaga i lō te a‵lofa ki te Atua’!—2 Timo. 3:1-5.

E FAKAMANUIA NE IEOVA A ‵TOU FAKAIKUGA MAUTINOA

17. Ne ‵saga tonu pefea a tino Isalaelu a‵lofa fakamaoni o ‵teke atu ki amioga ma‵sei?

17 E taku fakapitoa mai i te Tusi Tapu a te mautinoa ‵lei a te ga‵sue o te kau Isalaelu i te taimi ne fai atu ki ei “ke faka‵mao kea‵tea mai faleie o Kola mo Tatano mo Apilamo.” E fai mai te tala me “ne faka‵mao fakavave latou kea‵tea.” (Nume. 16:24, 27, NW) E seai eiloa se fakatalave io me se fakatuai. E faipati foki te fuaiupu ki te ‵saga tonu o latou o faka‵logo. Ne “faka‵mao ei [latou] kea‵tea . . . mai i feitu katoa.” E se talia ne tino a‵lofa fakamaoni o fai so se mea masei. E se fakalotolotolua io me vaelua te faka‵logo o latou. E manino ‵lei a te ‵lago o latou ki a Ieova kae ‵teke ki amioga ma‵sei. Ne a akoakoga e mafai o tauloto ne tatou mai te fakaakoakoga tenei?

18. Se a te mea ne fakauiga a Paulo ki ei i te taimi ne fakamalosi atu ei a ia ki a Timoteo ke “tele kea‵tea mai manakoga masani o talavou”?

18 Kafai e ma‵nako tatou o puipui ‵tou va fakataugasoa mo Ieova, e ‵tau mo tatou o ga‵sue fakavave mo te mautinoa. Tenei te mea ne fakauiga a Paulo ki ei i te taimi ne fakamalosi atu ei a ia ki a Timoteo ke “tele kea‵tea mai manakoga masani o talavou.” (2 Timo. 2:22) I te taimi tenā, a Timoteo ko tagata, kāti ko nofo ki te 30 tupu ana tausaga. Kae ko te valea ki “manakoga masani o talavou” e se fakatapulā faeloa ne te matua o te tino. Kafai e fe‵paki a Timoteo mo manakoga penā, e ‵tau mo ia o “tele kea‵tea” mai i ei. E ‵tau mo Timoteo o ‘tiakina a amioga ma‵sei.’ Ne fakaoko mai foki ne Iesu se fekau penā i tena faimaiga: “Kafai foki ko tou mata e fakaagasala ne ia koe, ‵kape ke to kae ‵pei keatea.” (Mata. 18:9) I aso nei, a Kelisiano kolā e faka‵logo ki te polopolokiga tenei, e ga‵sue fakavave eiloa mo te mautinoa o puipui olotou feitu faka-te-agaga, e aunoa mo se fakatalave io me se fakatuai.

19. Ne gasue‵sue pefea a nisi tino i aso nei mo te mautinoa o puipui a latou eiloa mai tulaga fakama‵taku i te feitu faka-te-agaga?

19 Ne fai ne nisi tino kolā ne inu malosi ki meainu ma‵losi a koi tuai o fai mo fai ne Molimau se filifiliga totino ke sē toe inu ki se meainu malosi. E ‵kalo kea‵tea a nisi tino mai vaegā fakafiafiaga mautinoa kolā e se ma‵sei i a latou eiloa, kae mafai o fakaoso aka i ei a manakoga ma‵sei. (Sala. 101:3) Pelā me se fakaakoakoga, a koi tuai o fai mo fai se Molimau, ne fiafia se taina e tokotasi ki amioga fai valevale i koga ‵saka kolā ne fano sāle a ia ki ei. Kae mai tua o te taulotoga ki te munatonu, ne ‵kalo katoatoa kea‵tea tou tagata mai te saka, ke oko foki ki maopoopoga a Molimau me e manavase tou tagata i te mea ma toe olo aka a manakoga mo mafaufauga sē ‵lei o ana aso ko ‵teka. E tonu, e se manakogina ke ‵kalo katoatoa kea‵tea a Kelisiano mai te inu kava, saka, io me ko nisi mea kolā e se ma‵sei i a latou eiloa. Kae e ‵tau mo tatou katoa o gasue‵sue faka‵lei mo te mautinoa ke puipui a tatou eiloa mai i tulaga fakama‵taku i te feitu faka-te-agaga.

20. Faitalia me e se faigofie ke ‘tiakina a amioga ma‵sei,’ se a te mea e maua i ei ne tatou a te loto talitonu mo fakamafanafanaga?

20 A te tauliaga o tauave te igoa o te Atua e ‵mai tasi mo tiute. E ‵tau mo tatou o ‘tiakina a amioga ma‵sei’ kae “‵kalo kea‵tea mai i mea ma‵sei.” (Sala. 34:14, NW) E tonu, e se faigofie faeloa ke fai penā. Kae se mea fakamafanafana loto ke iloa atu me ka alofa faeloa a Ieova ki “ana tino” kolā e taofi ‵mau ki ana auala amio‵tonu.—2 Timo. 2:19; faitau te 2 Nofoaiga Tupu 16:9a.

^ pala. 12 Ke onoono ki te jw.org ki te mataupu ko te “Do You Ban Certain Movies, Books, or Songs?” mai lalo i te ABOUT US > FREQUENTLY ASKED QUESTIONS.