Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Tesema 2016

Te Agamalu​—Se Fakaasiga o te Poto

Te Agamalu​—Se Fakaasiga o te Poto

A Toñi se tino galue apo i te tausiga o tino ma‵tua, ne toko ne ia te pēle o te mataloa, kae tali mai ne se fafine ko tai pā fafine. Ne kaitaua te fafine kae kote ne ia a Toñi me ne ‵tau o tai oko vave atu ke tausi ki tena mātua telā ko matua. Ne seki talimuli a Toñi ki te galuega. Kae ne fakatoese atu a ia mo te agamalu ki te fafine mō te mea tenā.

I TE ‵toe fokiatuga mai tua ifo, ne toe kaitaua atu foki te fafine ki a Toñi. Ne a mea ne fai ne Toñi? “Se tulaga telā ne faigata ‵ki,” ne fakaasi mai ne ia. “Ana pati ‵mafa kolā ne fai mai, ne mea sē ‵tonu katoa.” Kae ui ei, ne toe fakatoese atu a Toñi kae fai atu ki te fafine me malamalama a ia i te tulaga faigata tenā e fepaki mo ia.

Moi fai koe ko Toñi, se a tau faka‵tau, ne a au mea ka fai? E mata, ka taumafai koe o fakaasi atu te agamalu? E mata, ka faigata ki a koe ke fa‵ki i tou kaitaua? E se mafai ne tatou o fakafiti te mea tenā, e se faigofie ke ‵nofo filemu tatou i tulaga e pelā mo te mea ne fakamatala atu i luga. Kafai ko mafatia ‵tou mafaufau io me se mea e fakaita ne ia tatou, e tai faigata loa ke tumau i te agamalu.

E tiga i ei, e fakamalosi atu te Tusi Tapu ki Kelisiano ke agamalu. A te tonuga loa, ne faka‵pau ne te Muna a te Atua a te uiga tenā ki te poto. “Ko oi te tino i a koutou e poto kae loto malamalama?” ne fesili atu a Iakopo. “Ke na fakaasi mai la ana galuega e auala i ana amioga ‵lei i te agamalu telā e maua mai i te poto.” (Iako. 3:13) I te auala fea e fai ei te  agamalu e pelā me se fakamaoniga o te poto mai te lagi? Kae se a te mea e fesoasoani mai ke ati aka ne tatou te uiga faka-atua tenei?

TE POTO E MAUA I TE AGAGA O TE AGAMALU

A te agamalu e fakafeoloolo ei te manavase. “A  te tali i te leo filemu e galo ei te kaitaua, kae kafai se tino e tali mo te leo malosi e fakatupu fua ne ia te kaitaua.”Faata. 15:1.

E mafai ne se faifaiga kaitaua o fakalasi te fakalavelave e pelā loa mo te fakaopoopo atu o penitini ki se afi. (Faata. 26:21) E ‵kese mai ei, a te tali atu i te agamalu e masani o iku atu ki te filemu. E mafai foki o fakamalū ne ia se tino kaitaua.

Ne lavea ne Toñi a te ‵tonu o te mea tenā. I te laveaga ne te fafine a te tali atu o Toñi i te agamalu, ne tagi ei a ia. Ne fakamatala atu ne ia me ne pokotia a ia i fakalavelave totino mo fakalavelave o te kāiga. Ne tuku atu ne Toñi se molimau ‵lei, kae ne kamata ei se akoga faka-te-Tusi Tapu—e pelā me se ikuga o ana uiga agamalu kae filemu.

E mafai o fai ne te agamalu ke fia‵fia tatou. E fia‵fia a latou kolā e agamalu, me ka fai mō latou te lalolagi.”Mata. 5:5.

Kaia e fia‵fia ei a tino agamalu? Mai te fakapei faeloa o te uiga agamalu ki a latou, a te tokoukega o tino kolā ne sauā muamua ko fia‵fia nei. Ko ‵fuli ‵ki olotou olaga, kae ko iloa ne latou me isi se fakamoemoega gali i aso mai mua telā e faka‵ tali mai mō latou. (Ko. 3:12) A Adolfo, se ovasia o fenua i Sepania, ne fakamatala mai ne ia tena olaga mua kae koi tuai o vau a ia ki te munatonu.

“A toku olaga e seai se fakavae, ko muna a Adolfo. “Ne kaitaua faeloa au, ke oko foki loa ki oku taugasoa ne ma‵taku i oku uiga fakamatamata kae sauā. Kae fakamuli ifo ne ‵fuli oku uiga. I se fusuga e tasi, ne ‵suki fakaono au kae ne ‵toto valevale telā toeitiiti loa kae mate au.”

Nei la, ko akoako atu ne Adolfo a nisi tino ke agamalu e auala i ana pati mo ana akoakoga. E tokouke ko fia‵fia ki ana uiga atafai kae fiafia. Ne fai mai a Adolfo me ne fiafia a ia ki te ‵fuliga telā ne mafai ne ia o fai. Kae loto fakafetai a ia ki a Ieova mō te fesoasoani ke ati aka ne ia se uiga agamalu.

A te agamalu e fai ne ia ke fiafia a Ieova. “Taku tama, a koe ke atamai kae ka fiafia malosi eiloa au. Ka isi se tali e mafai o avatu ne au ki so se tino tela e fakamasei ne ia au.”Faata. 27:11.

Ko oti ne fakaitaita a Ieova ne tena fili sili, ko te Tiapolo. E isi eiloa ne pogai e kaitaua ei te Atua ki vaegā fakamaseiga penā, kae ui ei e fakamatala mai i te Tusi Tapu i a Ieova e “tuai o ita.” (Eso. 34:6) Kafai e taumafai malosi tatou o fakaakoako ki uiga o te Atua ko te tuai o ita mo te agamalu, ka tau‵tali eiloa tatou i te auala o te poto telā e fakafiafia malosi atu ki a Ieova.—Efe. 5:1.

E faigata te tulaga o te lalolagi i aso nei. E sikomia tatou ne tino kolā e “fakamata‵mata, fia ‵sili, e muna ma‵sei, . . . gutu fatu‵fatu, e seai se loto pulea, e amio fakasaua.” (2 Timo. 3:2, 3) Kae tiga i ei, e se ‵tau o taofi ne te mea tenā se Kelisiano mai te atiakaga o te agaga o te agamalu. E fakamasaua mai ne te Muna a te Atua ki a tatou i “te poto mai te lagi e. . . filemu, e loto malamalama.” (Iako. 3:17) Mai te fakaasi atu te agaga o te filemu mo te fakasakosako atu, ko tuku atu loa ne tatou a fakamaoniga me ko oti ne maua ne tatou te poto mai te lagi. E fakaosofia tatou ne te poto tenā ke tali atu i te agamalu māfai ko fakaitaitagina tatou kae fai ei ke na fakapili‵pili malosi atu tatou ki te Mafuaga o te poto telā e seai sena gatamaiga, ko Ieova.