Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Tesema 2016

Mai te Alofa Tauanoa ne Fakasaoloto ei Koutou

Mai te Alofa Tauanoa ne Fakasaoloto ei Koutou

“Me e se ‵tau o fai te agasala mo fai te matai ki luga i a koutou, ona ko koutou ko . . . mai lalo i te alofa tauanoa o te Atua.”​—LOMA 6:14.

PESE: 46, 127

1, 2. Kaia e fia‵fia sale a Molimau a Ieova ki te Loma 5:12?

MAFAUFAU i a koe e manako ke tusi ki lalo se fakasologa o fuaiupu i te Tusi Tapu kolā e iloa ‵lei ne Molimau a Ieova kae masani sale o fakaaoga ne latou. E mata, te Loma 5:12 ka tafa ki luga i tau fakasologa? Mafaufau ki te uke o taimi ne fakasino sale koe ki te fuaiupu tenei: “Ne oko mai ei te agasala ki te lalolagi e auala i te tagata e tokotasi, a ko te mate e auala i te agasala, kae ne faka‵solo atu a te mate ki tino katoa me ko agasala a latou katoa.”

2 A te fuaiupu tenā e fakaaoga faeloa i te tusi ko te Ne a Mea e Akoako Tonu Mai i te Tusi Tapu? I te taimi e sau‵tala ei koe mo au tamaliki io me ko nisi tino ki te tusi tenei, kāti ka faitau ne koutou te Loma 5:12 māfai e sau‵tala koutou ki te fuafuaga a te Atua mō te lalolagi, te togiola, mo te tulaga o tino ‵mate—mataupu e 3,  5 mo te 6. Kae pefea te uke o taimi e mafaufau koe ki te Loma 5:12 e uiga ki tou tulaga i mua o Ieova, au faifaiga, mo ou fakamoemoega mō aso mai mua?

3. Se a te manatu tonu e ‵tau o fakafesagai atu tatou ki ei e uiga ki te agasala?

3 E tonu, a tatou katoa e ‵tau o fakafesagai atu ki te manatu tonu i a tatou ne tino agasala. E fai ne tatou a mea ‵se i aso katoa. Kae tali‵tonu tatou me masaua ne te Atua i a tatou ne faite mai te pefu, kae loto fiafia a ia o fakaasi mai tena alofa ki a tatou. (Sala. 103:13, 14) Ne aofia ne Iesu i te ‵talo fakaakoako a te akai ki te Atua ke: “Fakamagalo  mai omotou agasala.” (Luka 11:2-4) Tela la, e seai se pogai ke mafaufau faeloa tatou ki ‵tou mea ‵se kolā ko oti ne fakamagalo ne te Atua. E mafai eiloa o aoga ki a tatou a te mafaufau faeloa ki ana mea e mafai o fai —mo ana mea ko oti ne fai—ke fakamagalo tatou.

FAKAMAGALO E AUALA I TE ALOFA TAUANOA

4, 5. (a) Se a te mea ne fesoasoani ke tai fakamaina ei te Loma 5:12? (e) Se a te “alofa tauanoa” telā ne fakaasi mai i te Loma 3:24?

4 E maua ne tatou a fakamatalaga aoga mai nisi mataupu kolā e ‵lago atu ki pati a te apositolo ko Paulo i te Loma 5:12, maise eiloa i te mataupu e 6. Ka fesoasoani mai te mea tenei ke maina tatou i te pogai ne mafai ei ne te Atua o fakamagalo tatou. I te mataupu e 3, e fai‵tau tatou penei: “Ko oti ne agasala a tino katoa. . . , e taku amiotonugina latou e pelā me se meaalofa, ona ko tena alofa tauanoa e auala i te fakasaolotoga telā ne ‵togi ki te togiola a Keliso Iesu.” (Loma 3:23, 24) Se a te mea ne fakauiga ki ei a Paulo mai te fai atu o te “alofa tauanoa”? Ne fakaaoga ne ia se pati Eleni, telā i se fakamatalaga e tasi, e fakauiga ki te “loto fiafia faivasaga o tuku atu, e aunoa mo se fakamoemoega ke toe taui atu.” E seai se mea e maua mai i ei kae sē fakaaloalogina foki.

5 Ne fai mai a John Parkhurst, se tino sukesuke penei: “Kafai e fai‵pati e uiga ki te Atua mo Keliso, e masani sale [te pati Eleni tenā] o fakasino atu ki te lā loto fia‵fia faivasaga o tuku atu io me ko te loto a‵lofa i te faka‵saoga mo te fakaolaga o tino.” Kae fetaui ‵lei eiloa mo te ‵fuliga o te “alofa tauanoa” i te New World Translation. Kae ne fakaasi mai pefea ne te Atua a te alofa tauanoa tenei? Kae se a tena aoga ki tou fakamoemoega mo tou fesokotakiga mo ia? Ke onoono aka tatou.

6. E mafai pefea o maua ne tino taki tokotasi a mea aoga mai i te alofa tauanoa o te Atua?

6 A Atamu ko te “tagata e tokotasi” ne auala mai ei te agasala mo te mate kae ‘ne oko mai ei ki te lalolagi’.” Tela la, “ne pule mai te mate e pelā me se tupu ona ko te solitulafono o te tagata e tokotasi.” Ne toe fakaopoopo mai a Paulo me i te lasi o “te alofa tauanoa [o te Atua]” ne auala mai “i te tagata e tokotasi, ko Iesu Keliso.” (Loma 5:12, 15, 17) Ne maua ne tino ola katoa a ikuga ‵lei mai te alofa tauanoa tenā. Kae ne fai foki a “tino e tokouke mo fai ne tino amio‵tonu e auala i te fakalogo o te tagata e tokotasi.” A te tonuga loa, e mafai o iku atu a te alofa tauanoa o te Atua ki te “ola se-gata-mai e auala i a Iesu Keliso.”​—Loma 5:19, 21.

7. Kaia e fai ei te fakatokaga a te Atua ki te togiola e pelā me se fakaasiga o te loto alofa mo te alofa tauanoa?

7 E se ko te manakoga o Ieova ke tuku mai tena Tama ki te lalolagi ke fai te togiola. Kae ko tino agasala, kae sē ‵lei katoatoa, ne seki mafai o fetaui ‵lei mo te togiola telā ne tuku mai ne te Atua mo Iesu ke mafai ei o fakamagalo a agasala. Tela la, se mea tonu eiloa i te fakamagaloga mo te fakamoemoega ke ola ki te se-gata-mai se alofa ne maua tauanoa. E ‵tau o fakatāua malosi ne tatou te meaalofa a te Atua ko te alofa tauanoa kae ke aoga ki a tatou i aso takitasi o ‵tou olaga.

KE LOTO FAKAFETAI MŌ TE ALOFA TAUANOA O TE ATUA

8. Ne a kilokiloga sē ‵tonu e mafai o maua ne nisi tino e uiga ki olotou agasala?

8 Ona ko tatou ne tino sē ‵lei katoatoa ne mafua mai i a Atamu, e ma‵nako faeloa tatou o fai a mea ‵se, fai a mea ma‵sei kae agasala. Kae se mea matagā ke fakaiku aka ne tatou ne manatu sē tonu e uiga ki te alofa tauanoa o te Atua, e pelā mo te mafaufau penei: ‘Kafai foki loa e fai ne au se mea ‵se—telā i te kilokiloga a te Atua se agasala—e se ‵tau mo au o manavase ki ei. Au ka fakamagalo ne Ieova.’ E fakafanoanoa, me ko oti ne ma‵natu aka penā a nisi Kelisiano i taimi foki loa koi ola ei a apositolo. (Faitau te Iuta 4.) Ke mo a eiloa e mafau‵fau tatou ki se manatu penā; kae mafai eiloa o isi ne kilokiloga ‵se penā i loto i a tatou, io me kāti  ko oti ne ‵toki ki loto i a tatou kae ko kamata o ola aka.

9, 10. Ne fakasaoloto pefea a Paulo mo nisi tino mai te agasala mo te mate?

9 Ne faka‵mafa ne Paulo me ‵tau mo tatou o ‵teke malosi atu ki te kilokiloga tenei: ‘E ‵lei, i te Atua e malamalama. Kae se saga mai a ia ki oku manakoga io me ko aku faifaiga ‵se.’ Kaia? E pelā mo te mea ne tusi mai ne Paulo, a Kelisiano “ko oti ne ‵mate . . . e uiga ki te agasala.” (Faitau te Loma 6:1, 2.) I te taimi koi ola ei latou i te lalolagi, ne mafai pefea o fai atu i a latou “ko oti ne ‵mate . . . e uiga ki te agasala”?

10 Ne fakagalue ne te Atua a te togiola ki a Paulo mo nisi tino i te senitenali muamua. Telā ne fakamagalo ei ne Ieova olotou agasala, fakaeke latou ki te agaga tapu, kae fakaigoa latou ke fai mo ana tama faka-te-agaga. Ne maua foki ne latou te fakamoemoega ki te lagi. Kafai ne fakaasi atu ne latou te olotou tumau i te fakamaoni, ka mafai ei o ola kae pule fakatasi latou mo Keliso i te lagi. Kae ne mafai eiloa o fai atu a Paulo i te taimi koi ola ei latou i a latou “ko oti ne ‵mate . . . e uiga ki te agasala.” Ne fakaaoga ne ia te fakaakoakoga a Iesu, telā ne mate pelā me se tagata faka-te-foitino kae toe fakatu aka e pelā me se tino faka-te-agaga i te lagi. Ne seki toe pule atu a te mate ki luga i a Iesu. E pena foki a Kelisiano fakaekegina, kolā ne mafai o fai atu i a latou “ko oti ne ‵mate . . . e uiga ki te agasala.” (Loma 6:9, 11) Ne seki toe ola latou i te olotou olaga mua. Ne seki toe faka‵logo latou ki manakoga agasala kolā e pulemālō io me faimālō atu ki a latou. Ko oti ne ‵mate latou ki te olaga mua tenā.

11. I te auala fea e fai ei tatou kolā e fakamoe‵moe ke ola ki te se-gata-mai i te Palataiso e pelā me “ko oti ne ‵mate . . . e uiga ki te agasala”?

11 Kae ea tatou? Koi tuai o fai tatou pelā me ne Kelisiano, ne fai sale ne tatou a agasala, e aunoa mo te iloa me pefea te ‵se io me ko te ma‵sei o ‵tou faifaiga i mua o te Atua. Ne fai eiloa tatou e pelā me ne “pologa ki amioga lai‵lai mo amioga solitulafono.” Ne mafai foki o fai atu i a tatou ne “pologa a te agasala.” (Loma 6:19, 20) Fakamuli ifo ne iloa ne tatou te munatonu i te Tusi Tapu, fai a ‵fuliga ki ‵tou olaga, tuku atu tatou ki te Atua, kae papatiso. Mai konā, ne ma‵nako ei tatou o “faka‵logo . . . mo te loto kātoa” ki akoakoga mo tulaga o te Atua. Kafai foki loa ne seki faipatigina tatou i te auala tenā, kae ko oti eiloa tatou “ne fakasaoloto mai te agasala” kae “ko fai nei . . . mo pologa a te amiotonu.” (Loma 6:17, 18) Tela la, e mafai foki o fai tatou pelā me “ko oti ne ‵mate . . . e uiga ki te agasala.”

12. Ne a filifiliga e ‵tau o fai ne tatou taki tokotasi?

12 Mafaufau ki a koe e uiga ki pati a Paulo konei: “Ke se talia ne koutou ke pule atu faeloa te agasala e pelā me se tupu ki otou foitino i te otou faka‵logo ki olotou manakoga.” (Loma 6:12) E mafai o fai ne tatou “ke pule atu faeloa te agasala” mai te fai o mea kolā e manako a te ‵tou foitino sē ‵lei katoatoa o fai. E tiga loa e mafai ne tatou o fai “ke” pule mai te agasala io me ‵teke atu ke se pule mai, kae ko te fesili la, Se a te mea e ma‵nako tonu ki ei ‵tou loto? Ke fesili ifo ki a koe: ‘I nisi taimi, e mata, e talia ne au ke fakalogo ki toku foitino sē ‵lei katoatoa io me ko toku mafaufau ki se koga ‵se ke fano au ki ei? E mata, ko oti ne mate au e uiga ki te agasala? E mata, e ola au mō te Atua e auala i a Iesu Keliso?’ E fakaasi mai katoa ne mea konei me pefea te lasi o te ‵tou loto fakafetai ki te alofa tauanoa o te Atua telā ne fakaasi e auala i te fakamagalōga o tatou.

SE TAUA E MAFAI O MANUMALO EI KOE

13. Ne a fakamaoniga ki a tatou ke loto tali‵tonu me mafai o fulitua tatou ki te agasala?

13 Ne fulitua a tino o te Atua ki “fuataga kolā ne tau sāle [ne latou]” kae koi tuai o iloa ne latou o a‵lofa, kae tavini ki te Atua. Ne mafai o aofia i olotou olaga mua a ‘mea kolā ko fakamasiasi atu nei ki a latou’ kae ne ‵tau o iku atu ki te ‵mate. (Loma 6:21) Kae ne ‵fuli latou. Se mea tonu te mea tenā ki tino Kolinito e tokouke kolā ne tusi atu ki ei a Paulo. A nisi o latou  ne tino ifo ki tupua, tino mulilua, tino amio fakasotoma, tino kai‵soa, tino ko‵nā, mo vaegā amioga penā. Kae ko oti “ne ‵fulu faka‵ma” kae “fakatapu.” (1 Koli. 6:9-11) Kae tenā foki te mea tonu ne tupu ki nisi tino i te fakapotopotoga i Loma. Ne fakaosofia a Paulo ke tusi atu ki a latou: “Ke mo a foki e tuku atu faeloa otou foitino ki te agasala e pelā me ne meatau o faifaiga sē ‵tonu, kae ke tuku atu koutou ki te Atua e pelā me ne tino ne toe ola mai te mate, kae ke tuku atu foki otou foitino ki te Atua e pelā me ne meatau o te amiotonu.” (Loma 6:13) Ne mautinoa i a Paulo me mafai ne latou o tumau i te ‵ma i te feitu faka-te-agaga kae ka maua faeloa ne latou a mea aoga mai te alofa tauanoa o te Atua.

14, 15. Se a te mea e ‵tau o fesili ifo tatou ki ei e uiga ki te ‘faka‵logo mo te loto kātoa’?

14 E tai ‵pau foki mo ‵tou aso nei. Ne fai foki ne nisi taina mo tuagane a mea ne fai ne latou kolā i Kolinito. Kae ne ‵fuli foki latou. Ne tiaki ne latou olotou uiga agasala mua kae ko oti “ne ‵fulu faka‵ma.” Se mea tonu te mea tenā faitalia me se a te tulaga o tatou, kae se a tou tulaga i mua o te Atua i te taimi nei? Nei la, ko maua ne tatou te alofa tauanoa o te Atua mo ikuga o tena loto fakamagalo, e mata, ko oti ne fakaiku aka ne tatou ke se toe ‘tuku atu ‵tou foitino ki te agasala’? Kae i lō te fai penā, e mata ‘ka tuku atu otou foitino ki te Atua e pelā me ne tino ne ola mai i te mate’?

15 Ke fai tatou penā, e ‵tau mo tatou o ‵kalo keatea mo te mautinoa mai te filifili ke fai a agasala kolā ne logo‵mae ei a nisi tino i Kolinito. E aoga ki a tatou te mea tenā māfai e fai atu tatou me ko oti ne talia ne tatou te alofa tauanoa o te Atua kae ko se ‘pule mai te agasala ki a tatou.’ Tela la, e mata, ka fakaiku aka ne tatou ke ‘faka‵logo mo te loto kātoa’ mai te fai o te mea e mafai ne tatou o fai ke ‵kalo keatea mo agasala kolā e fai ne nisi tino me seai ne agasala matagā?—Loma 6:14, 17.

16. Eiloa pefea ne tatou i te fai e pelā me se Kelisiano, e uke atu a mea e aofia i ei i lō te tiaki ne tatou a te faiga o agasala matagā?

16 Ke mafaufau ki te apositolo ko Paulo. E mafai o mautinoa i a tatou me seki kau atu a ia ki te faiga o agasala matagā kolā e taku mai i te 1 Kolinito 6:9-11. Kae tiga i ei, ne fakaasi ‵tonu mai ne ia me koi maua eiloa ne ia te lagonaga sē ‵lei mai te agasala. Ne tusi mai a ia: “Au se tagata faka-te-foitino, telā ne fakatau atu mo fai te pologa a te agasala. Me e se malamalama au i aku mea e fai. Me e se fai ne au a te mea telā e manako au o fai; kae e fai ne au a te mea telā e takalialia au ki ei.” (Loma 7:14, 15) E fakaasi mai i konei me isi aka foki ne nisi mea kolā ne fai pelā me ne agasala i te kilokiloga a Paulo. (Faitau te Loma 7:21-23.) Kae e ‵tau foki o fai tatou penā i te taimi e taumafai ei tatou ke “faka‵logo . . . mo te loto kātoa.”

17. Kaia e manako ei koe o fakamaoni?

17 Mafaufau ki se fakaakoakoga, ko te mataupu ki te fakamaoni. A te fakamaoni se fakavae mo tino lotu Kelisiano. (Faitau te Faataoto 14:5; Efeso 4:25.) A Satani ko te “tamana . . . o te loi.” Kae ona ko te ‵loi, ne ‵galo atu a ola o Anania mo tena avaga. E se ma‵nako tatou ke fakaakoako atu ki vaegā tino penā—e ‵kalo keatea tatou i te loi. (Ioa. 8:44; Galu. 5:1-11) E mata, e oko foki ki konā te ‵tou fakamaoni? I te tonuga loa, a te ‵tou fakamaoni e ‵tau o fakaata atu ei te ‵tou loto fakafetai mō te alofa tauanoa o te Atua.

18, 19. E ‵kese pefea te fakamaoni mai te fai atu o se tamā loi?

18 A te loi ko te taku atu o te mea sē tonu. Tela la, e manako a Ieova ke mo a eiloa e taku atu se tamā loi. Ne fakamalosi atu a ia ki tino Isalaelu mua: “Faka‵malu ki otou foitino, me i a au, te Aliki te otou Atua e ‵malu.” Tuku atu ei ne ia a fakaakoakoga ke fai pelā me ne tino e ‵malu. E isi ne nāi mea mai ei, ne fai atu te Atua: “E tapu te kaisoa, te faitogafiti mo te loi.” (Levi. 19:2, 11) Se mea fakafanoanoa, me tiga eiloa e fai atu se tino me e se mafai lele a ia o loi, e mafai eiloa o mafaufau ke faka‵se ne ia a nisi tino, mai i ana faifaiga fakaloiloi.

E mata, e fakaiku aka ne tatou ke ‵kalo kea‵tea mai te loi mo te fakatogafiti tino? (Ke onoono ki te palakalafa e 19)

 19 E pelā me se fakaakoakoga, ne fai atu se tagata ki tena pule io me ne tino e ga‵lue tasi mo ia me ka se oko atu a ia ki te galuega i te suā aso io me ka malōlō vave a ia me isi sena asiga i te “tokita”. Kae ko te tonuga, a tena ‘asiga i te “tokita” ko te fanatu fakavave fua ki te koga e puke ei vailakau io me ‵togi tena pili ki te ofisa o te tokita. Kae ko te pogai tonu o te sē fanatu ki te galuega ko te mea ke mafai ne ia o fano fakavave ki se koga io me olo mo tena kāiga o ta‵fao i te tafatai. E mafai o tonu malie a ia i tena fakamatalaga ki te asiga i te “tokita,” kae e mata, e mafai o fai atu koe i a ia e fakamaoni? Io me ko oti ne fakaloiloi ne a tino? E mafai o iloa ne koe ne fakaakoakoga tai ‵pau penā ki te fakaloiloi atu mo te mautinoa o nisi tino. Kāti e fai penā ke ‵kalo keatea i se fakasalaga io me ke maua ne mea mai fi‵tāga o nisi tino. Faitalia e mafaufau koe me se tamā loi, kae pefea la te fakatakitakiga a Ieova: “E tapu te . . . loi”? Mafaufau foki ki te Loma 6:19, telā e fai mai: “Ke tuku atu otou foitino e pelā me ne pologa a te amiotonu telā ka iku atu ei ki te mauaga o se tulaga tapu.”

20, 21. Se a te mea e fakamalosi ne te alofa tauanoa ke fai ne tatou?

20 A te manatu tāua i konei, ko te ‵tou loto fakafetai ki te alofa tauanoa o te Atua e uke atu a mea e aofia i ei i lō te ‵kalo keatea fua mai te mulilua, te ko‵nā, io me ko nisi agasala kolā ne fai ne tino i Kolinito. A te talia o te alofa tauanoa o te Atua e se fakauiga fua ki te ‵kalo keatea mai amioga fakatauavaga sē ‵tau kae ke taua atu foki ki fakafiafiaga kolā e fakamalosi ei a faifaiga fakatauavaga sē ‵tau. A te tuku atu o ‵tou foitino e pelā me ne pologa ki te amoitonu ka sē puipui fua ne ia tatou mai te ko‵nā, kae ka fakamalosi aka foki ei tatou ke fakagata te inu ki te tulaga telā ko pilipili ki te konā. E manakogina a taumafaiga malosi ke mafai ne tatou o taua atu ki vaegā faifaiga ma‵sei penā; kae se taua telā e mafai o manumalo ei tatou.

21 A te mea e ‵tau o kausaki tatou ki ei ko te ‵kalo kea‵tea mai amioga mātaga penā foki mo amioga kolā e se tō fakalumaluma. E se mafai ne tatou o ‵lei katoatoa i te feitu tenā. Kae tiga i ei, e ‵tau o taumafai tatou ke fai penā, ke oko foki loa ki a Paulo ne fai foki penā. Ne fakamalosi atu a ia ki ana taina: “Ke se talia ne koutou ke pule atu faeloa te agasala e pelā me se tupu ki otou foitino i te otou faka‵logo ki olotou manakoga.” (Loma 6:12; 7:18-20) I te taimi e taua atu ei tatou ki vaega katoa o te agasala, e fakaasi atu eiloa ne tatou a te loto fakafetai tonu ki te alofa tauanoa o te Atua e auala i a Keliso.

22. Se a te mea e faka‵tali mai mō latou kolā e fakamaoni atu ne latou te olotou loto fakafetai mō te alofa tauanoa o te Atua?

22 E auala i te alofa tauanoa o te Atua, ko oti ne fakamagalo ‵tou agasala kae ka fakamagalo faeloa. Ona ko te loto fakafetai, ke na ga‵lue tatou ke fakatakavale so se manakoga ke talia a mea kolā e fai ne tino me ne agasala fo‵liki. Ne faka‵mafa mai ne Paulo a te taui telā e fakatali mai mō tatou: “Ona ko koutou ko saoloto mai te agasala kae ko pologa nei koutou ki te Atua, ko tau eiloa ne koutou te fuataga ‵ma i se auala tapu, kae i te fakaotiga, ko te ola se-gata-mai.”—Loma 6:22.