Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Tesema 2016

E Taui Atu ne Ieova a Tino Kolā e ‵Sala Malosi ki a Ia

E Taui Atu ne Ieova a Tino Kolā e ‵Sala Malosi ki a Ia

“E ‵tau o talitonu te tino telā e fanatu ki a ia me ola tonu te Atua kae e avatu ne ia te taui ki tino kolā e ‵sala malosi ki a ia.”​—Epe. 11:6.

PESE: 136, 139

1, 2. (a) Se a te sokoga o te alofa ki te fakatuanaki? (e) Kae ne a fesili ka sau‵tala tatou ki ei?

E A‵LOFA tatou ki a Ieova “me ne alofa muamua a ia ki a tatou.” (1 Ioa. 4:19) E tasi te auala e lavea atu ei ne tatou a tena alofa, me e mua faeloa a Ieova o fakamanuia ana tavini fakamaoni. Te lasi o te ‵tou a‵lofa ki te Atua, ka fakamalosi foki ne te mea tenā a te ‵tou fakatuanaki, sē ona fua me ola a ia, kae e tali‵tonu tatou me fakamaoni eiloa a ia o taui atu a latou kolā e a‵lofa tonu atu ki a ia.—Faitau te Epelu 11:6.

2 A te fai pelā me se tino taui se vaegā tāua ke iloa faka‵lei ne tatou me se vaegā tino pefea a Ieova mo ana mea e fai. E se katoatoa a te ‵tou fakatuanaki vagana fua e tali‵tonu tatou me i te Atua ka taui atu ne ia a latou kolā e ‵sala malosi ki a ia me i te “fakatuanaki ko te tali‵tonu mo te mautinoa ki mea kolā e fakamoe‵moe tatou ki ei.” (Epe. 11:1) E tonu, a te fakatuanaki e aofia i ei a te ‵tou fakamoemoega e uiga ki ana fakamanuiaga kolā ne tauto mai. Kae e aoga pefea ki a tatou a te fakamoemoega ke maua se taui? Ne taui atu pefea ne Ieova ana tavini i aso mua pelā foki mo ‵tou aso nei? Ke onoono aka tatou ki ei.

NE TAUTO MAI A IEOVA ME KA FAKAMANUIA NE IA ANA TAVINI

3. Se a te tautoga e maua ne tatou i te Malaki 3:10?

3 Ne fai ne Ieova te Atua se feagaiga ki ana tavini fakamaoni e uiga  ki se taui, tenā te pogai e ‵kami ne ia tatou ke kausaki malosi ke maua ana fakamanuiaga. E fai mai penei: “‘Fakamolemole, tofotofo mai au, . . . ’ Kae ne toe fai mai penei a Ieova, ‘kae ka lavea ne koutou me ka ‵tala ne au a fakamalama o te lagi kae ‵ligi ifo a vāega mea ‵lei katoa.’” (Mala. 3:10) E fakaasi ne tatou a te lasi o te ‵tou loto fakafetai mo te loto fiafia māfai e talia ne tatou a te meaalofa kaimalie a Ieova.

4. Kaia e mafai o tali‵tonu tatou ki pati a Iesu i te Mataio 6:33?

4 Ne fakatalitonu atu a Iesu ki ana soko me kafai e fakamuamua ne latou a te Malo, ka tausi atu eiloa a Ieova ki a latou. (Faitau te Mataio 6:33.) Ne fakavae eiloa a te tautoga tenei a Iesu ki te fakamaoni o Ieova ki ana folafolaga e uke kae ne fakamaoni eiloa a ia o tausi ki ei. E iloa ‵lei ne Iesu me i folafolaga a Ieova e se mafai o se fakataunu, e fakataunu eiloa. (Isa. 55:11) Kae e pelā mō tatou, e ‵tau mō tatou o tali‵tonu katoatoa ki a Ieova, me tausi eiloa a Ieova ki tena tautoga: “Ka se tiaki lele ne au koutou kae ka se tuku lele ne au koutou.” (Epe. 13:5) E mafai o fakafetui ne tatou a muna fakaosofia konei ki pati a Iesu ne fai e uiga ki te ‵sala muamua ki te Malo mo te amiotonu o te Atua.

Ne fakaasi atu ne Iesu me ka maua ne ana soko a te taui ona ko te lotou loto fia‵fia o tiaki olotou olaga masani kae tau‵tali atu i a ia (Ke onoono ki te palakalafa e 5)

5. Kaia ne fai ei a te ‵tali a Iesu ki a Petelu e pelā me se mea fakamalosi loto?

5 E isi se taimi ne fesili atu ei a te apositolo ko Petelu ki a Iesu: “Ko oti ne tiaki ne matou a mea katoa kae tau‵tali atu i a koe; ne a la mea ka maua ‵tonu ne matou?” (Mata. 19:27) I lō te ita atu a Iesu ki a Petelu mo tena vaegā fesili tenā, kae ne fai atu a Iesu ki ana soko me ka maua eiloa ne latou te taui ona ko te lotou loto fia‵fia o tiaki olotou olaga masani kae tau‵tali atu ki a ia. Ka pule fakatasi a apositolo fakamaoni mo nisi tino mo ia i te lagi. Kae i te vaitaimi foki eiloa tenei, e isi eiloa ne taui e maua ne tatou. Ne fai mai Iesu: “So se tino e tiaki ne ia tena fale, ana taina, ana tuagane, tena tamana, tena mātua, ana tama‵liki, io me ko ana manafa ona ko toku  igoa, ka uke fakafia atu ana mea e maua kae ka maua foki ne ia te ola-se-gata-mai.” (Mata. 19:29) E uke atu a fakamanuiaga ne maua ne ana soko i lō o mea kolā ne tiakina ne latou. E mata, e tāua atu malosi a ‵tou tamana, mātua, taina, tuagane, mo tama‵liki faka-te-agaga, i lō so se mea telā ne tiakina ne tatou ona ko te Malo o te Atua?

“E PELĀ ME SE TAULA MŌ ‵TOU OLA”

6. Kaia ne tauto atu a Ieova ki ana tino tapuaki me ka maua ne latou te taui?

6 Ona ko ana tautoga ne fai ki ana tino tapuaki e uiga ki te taui, e fesoasoani eiloa a Ieova ki a latou i taimi e tofotofogina i ei a olotou fakatuanaki. I tafa o fakamanuiaga ‵gali faka-te-agaga kolā e maua ne latou nei, e olioli eiloa a tavini fakamaoni a Ieova ki fakamanuiaga ‵gali kae uke atu kolā ka maua ne latou i aso mai mua. (1 Timo. 4:8) E tonu, e tali‵tonu tatou me i a Ieova ka fai pelā me se “tino telā e avatu ne ia te taui ki tino kolā e ‵sala malosi atu ki a ia” kae fesoasoani eiloa a te mea tenā ke tumau takitaki tatou i te fakatuanaki.—Epe. 11:6.

7. E fai pefea a te fakamoemoega e pelā me se taula?

7 I tena Lauga i te Mauga, ne fai atu a Iesu: “Ke fia‵fia kae ‵lifu, me i te otou taui e lasi i te lagi, me ne penā foki o fakasaua ne latou a pelofeta kolā ne mua atu i a koutou.” (Mata. 5:12 I tafa o latou kolā e maua ne latou a te taui ke ola i te lagi, a te fakamoemoega ki te ola-se-gata-mai i te lalolagi palataiso e fai pelā me se pogai o te “fiafia.” (Sala. 37:11; Luka 18:30) Faitalia me se a te ‵tou fakamoemoega ko te lagi io me ko te lalolagi, e fai a te ‵tou fakamoemoega e pelā me se “taula mō ‵tou ola, e mautinoa kae ‵mautakitaki.” (Epe. 6:17-20) E pelā loa mo te taula e taofi ‵mautakitaki ne ia se vaka i te taimi o te afā, a te fakamoemoega mautinoa e uiga ki te taui e fesoasoani mai ke tausi faka‵lei atu tatou ki ‵tou lagonaga, mafaufau, mo te ‵tou malosi i te feitu faka-te-agaga. Ka fesoasoani eiloa a te mea tenā ke lava te malosi ke kufaki ne tatou a tulaga faiga‵ta.

8. E fakamāmā pefea ne te fakamoemoega a te manavase?

8 A te ‵tou fakamoemoega faka-te-Tusi Tapu e isi sena malosi ke fakamu‵tana ne ia a mea kolā e manava‵se tatou ki ei nei. A folafolaga a te Atua e fai pelā me se sinu faka-te-agaga telā e faka‵noga ne ia a mea kolā e fakamanavase ei te loto. E fakamafanafana ‵ki ke iloa ne tatou o ‘‵pei atu ki a Ieova,’ a mea kolā e manava‵se tatou ki e, kae e tali‵tonu eiloa tatou me ka fakamalosi eiloa ne ia a tatou’! (Sala. 55:22) E loto tali‵tonu tatou me mafai eiloa ne te Atua “o fai a mea e uke atu i lō mea kolā e fakamolemole io me e mafau‵fau tatou ki ei.” (Efe. 3:20) Mafaufau la—e se fai mai pelā me uke, kae e fai mai me e “uke atu”!

9. E pefea te lasi o te ‵tou loto tali‵tonu me ka fakamanuia eiloa ne Ieova a tatou?

9 Ke maua te taui, e manakogina ke katoatoa ‵lei a te ‵tou fakatuanaki ki a Ieova kae ke faka‵logo foki tatou ki ana fakatonuga. Ne fai atu a Mose ki tino Isalaelu: “A te Aliki [ko Ieova] te otou Atua ka fakamanuia ne ia koutou i tena fenua tenā ne avatu ne ia mō koutou. E seai eiloa se tino i a koutou e mativa manafai e faka‵logo koutou ki a ia, kae tausi faka‵lei ki mea katoa konei ke fakatonu atu ne au i te aso nei. Ka fakamanuia eiloa koutou ne te Aliki [Ieova] e pelā eiloa mo tena tautoga.” (Teu. 15:4-6) E mata, e talitonu katoatoa koe me ka fakamanuia eiloa koe ne Ieova māfai e tumau eiloa koe o tavini atu a ki a ia, mo te fakamaoni? E uke ‵ki a pogai ‵tau e maua ei ne koe a te vaegā loto talitonu penā.

A IEOVA KO TE TINO TELĀ E AVATU NE IA TE TAUI

10, 11. Ne taui atu pefea ne Ieova a Iosefa?

10 Ne tusi a te Tusi Tapu ke aoga ki a tatou. E maua i ei a tala e uke e uiga eiloa ki te auala ne taui atu ne Ieova ana tavini fakamaoni. (Loma 15:4) Ne fai a Iosefa e pelā me se fakaakoakoga gali. Ona ko amioga ma‵sei ne fai ne ana taina mo te togafiti masei ne fai ne te avaga a tena matai, ne iku atu ei ki te ‵pei o ia ki te falepuipui i Aikupito. E mata, ko oti ne ‵kati katoatoa kea‵tea a ia mai tena Atua? Ikai! “Kae ko te Aliki ko [Ieova] ne fakatasi eiloa ki a Iosefa . . . kae fakamanuia foki ki a ia” (Kene. 39:21-23) I taimi faiga‵ta  konā ne fakatalitali eiloa a Iosefa mo te kufaki ki te Atua.

11 I se fia o tausaga ki tua ifo, ne ‵tala ne Falao a Iosefa ki tua mai te falepuipui, kae ne fai ne ia a te tagata loto maulalo tenei mo fai te tokolua o tino pule i te fenua ko Aikupito. (Kene. 41:1, 37-43) I te taimi ne fanau ei a tena avaga ki ana tama tāgata tokolua, “ne fakaigoa ne Iosefa a tena tama tagata matua ki a Manase, me fai mai a ia, ‘ne fai ne te Atua ke fakapuli ne ia ana fakalavelave katoa pelā foki mo kāiga o tena tamana.’ Kae ne fakaigoa ne ia a te tokolua o ana tama ki a Efalaima, me fai mai a ia, ‘Ko oti ne fai ne te Atua ke ‵fua malosi au i te fenua ne puapuagatia ei au.’ ” (Kene. 41:51, 52) Ona me ne tumau eiloa a Iosefa i te fakamaoni ki te Atua, ne taui atu ei ne te Atua ana fakamanuiaga ki luga i a ia telā ne iku atu ei ki te ‵sao a ola o tino Isalaelu pelā foki mo tino Aikupito. Kae ko te manatu tāua tenei, ne iloa ‵lei ne Iosefa me ko Ieova ne tuku atu ne ia te taui kae ne fakamanuia foki ne ia a ia.—Kene. 45:5-9.

12. Ne tumau pefea a Iesu i te fakamaoni i tulaga faiga‵ta?

12 A Iesu Keliso ne penā foki, ne tumau eiloa a ia i te fakamaoni ki te Atua faitalia te uke o vaegā tofotofoga ki tena fakatuanaki ne fe‵paki mo ia, kae ne maua eiloa ne ia te taui. Se a te mea ne fesoasoani atu ki a ia ke mafai ne ia o fakafesagai atu ki tulaga faiga‵ta konā? E fai mai penei te Muna a te Atua: “Me ne kufaki ne ia te lakau fakasāua, ona ko te fiafia telā e moe i ana mua, ne seki saga atu a ia ki tena masiasi.” (Epe. 12:2) Ne maua eiloa ne Iesu te fiafia lasi mai i te faka‵malu ne ia te igoa o te Atua. E se gata i ei, ne maua ne ia te taui telā mai te taliaga a tena Tamana mo nisi tauliaga ‵gali foki. E fai mai te Tusi Tapu, “ne sagasaga ifo i te feitu fakaatamai o te nofogaaliki o te Atua.” Kae i nisi fuaiupu e fai mai penei: “Ne fakamaluga aka ei ne te Atua a ia ki se tulaga telā e maluga atu kae tuku atu ki a ia mo te kaimalie a te igoa telā e sili atu i igoa katoa.”—Fili. 2:9.

E SE PULI I A IEOVA A ‵TOU MEA E FAI

13, 14. Ne a lagonaga a Ieova ki mea e fai ne tatou mō ia?

13 E tali‵tonu katoatoa tatou me i a Ieova e fiafia ki ‵tou taumafaiga e fai ke tavini atu ki a ia. E maina ‵lei a ia i mea kolā e manava‵se tatou ki ei. E fakaasi mai ne ia a tena alofa i taimi e fe‵paki ei tatou mo fakalavelave ki mea tau tupe, ma‵saki io me ko fakalavelave e uiga ki ‵tou lagonaga, ko mea kolā e faka-mu‵tana ei ‵tou taviniga ki a ia. Kae e tali‵tonu katoatoa tatou me alofa eiloa a Ieova ki taumafaiga e fai ne ana tavini ke tumau faeloa latou i te fakamaoni atu ki a ia.—Faitau te Epelu 6:10, 11.

14 Ke masaua foki, me mafai o olo atu tatou ki a ia e auala i ‵tou ‵talo, me “tali mai” a ia ki ‵tou ‵talo, kae ka saga mai a ia ki mea kolā e manava‵se tatou ki ei. (Sala. 65:2) “Te Tamana o te alofa fakamagalo. Ko ia foki ko te Atua o fakamafanafanaga katoa” ka tuku mai ne ia a fakamalosiga e uiga ki ‵tou lagonaga pelā foki mo te fesoasoani faka-te-agaga e manakogina ne tatou e auala i ‵tou taina tali‵tonu. (2 Koli. 1:3) E fiafia eiloa te loto o Ieova māfai e fakaasi atu ne tatou a te alofa ki nisi tino. “Kafai e avatu ne koe ne mea ki tino ma‵tiva, e pelā eiloa me se mea e tuku atu ne koe ki te Aliki [Ieova], tela la, e ‵toe taui mai ne te Aliki [Ieova] ki a koe e ‵tusa eiloa mo tou aga ‵lei.” (Faata.  19:17; Mata. 6:3, 4) Tela la, kafai e fesoasoani atu tatou ki a latou kolā e pokotia ne se fakalavelave, e kilo atu a Ieova ki ‵tou faiga gali konā e pelā eiloa me se kaitalafu ne fai atu ki a ia. Kae e tauto mai a Ia, me ka taui mai eiloa ne ia a te alofa tenā.

TAUI I TE TAIMI NEI KE OKO FOKI KI TE SE-GATA- MAI

15. Ne a taui e olioli ke maua ne koe? (Onoono ki te ata i te kamataga.)

15 A Kelisiano fakaekegina e fakamalosi latou ne te fakamoemoega e uiga ki te maua ne latou a “te foualiki o te amiotonu mai te taimi tenei o fano ki mua, telā ka tuku mai . . . e pelā me se taui ne te Aliki.” (2 Timo. 4:7, 8) E se fakauiga i ei me i a koe e se fakatāua ne te Atua māfai ne ‵kese a tou fakamoemoega ne tuku atu ne te Atua ki a koe. E lau i miliona a “nisi mamoe” a Iesu e olioli ke maua ne latou a te taui ko te ola se-gata-mai i te lalolagi palataiso. “Ka maua ne latou te manuia mo te filemu katoatoa.”—Ioa. 10:16; Sala. 37:11.

16. Ne a muna fakamafanafana e maua ne tatou i te 1 Ioa. 3:19, 20?

 16 I nisi taimi, kāti e mafaufau koe me mu‵tana au mea e fai, io me fakalotolotolua koe ki au taumafaiga me fiafia ki ei a Ieova io me ikai. E mafai foki o fakalotolotolua tatou me e mata, e ‵tau o maua ne tatou se taui mai ei. Kae ke mo a eiloa e puli i a tatou me e “sili atu te Atua i ‵tou loto kae e iloa ne ia a mea katoa.” (Faitau te 1 Ioane 3:19, 20.) E taui eiloa ne Ieova so se taviniga e fai atu ne tatou ki a ia mai i ‵tou ‵kano loto tonu, kae ne fakamalosi aka a te mea tena ne te ‵tou fakatuanaki mo ‵tou alofa ki a ia, faitalia me pefea a te foliki o te mea tenā e tuku atu ne tatou ki a ia.—Male. 12:41-44.

17. Ne a taui kolā ko oti ne maua ne tatou i te taimi nei?

17 I aso fakaotioti o aso fakaoti konei i te fakanofonofoga a Satani, koi fakamanuia eiloa ne Ieova ana tino. E fakamautinoa eiloa ne ia me i ana tino tapuaki ‵tonu e tumau eiloa i te olaola ‵lei i te palataiso faka-te-agaga, kae tuku faeloa mai ne ia a mea‵kai faka-te-agaga e uke mō ana tino. (Isa. 54:13) E ‵tusa loa mo te tautoga a Iesu, me e tuku mai eiloa ne Ieova a te taui ki a tatou i te taimi nei mai te talia ne ia tatou ke fai mo fai se vaega o tena kau kāiga a‵lofa o taina mo tuagane faka-te-agaga i te lalolagi kātoa. (Male. 10:29, 30) E se gata i ei, a latou kolā e ‵sala malosi ki te Atua ka taui atu ne ia ki a latou ana fakamanuiaga e uke ke maua te filemu tonu o te mafaufau, te lotomalie, mo te fiafia tonu.​—Fili. 4:4-7.

18, 19. Ne a lagonaga o tavini a Ieova e uiga ki taui kolā ne maua ne latou?

18 A tavini a Ieova i te lalolagi kātoa e mafai o fakamaoni atu ne latou a taui ‵gali kolā ko oti ne maua ne latou mai i a ia. E pelā me se fakaakoakoga, Ne fai mai a Bianca se fafine Siamani penei: “E se mafai eiloa o gata toku loto fakafetai ki a Ieova i te taimi ne taotaomaki ei au ne oku fakalavelave e uke ‵ki kae ne fai eiloa a ia e pelā me se tino fesoasoani i oku tafa o fakamafanafana mai au i aso takitasi. A te lalolagi i tua, e ‵fonu i fakalavelave e aunoa mo se faka‵leiga. Kae i te taimi ne ga‵lue fakatasi ei au mo Ieova, ne lagona eiloa ne au a tena tausiga alofa. Kafai ne fai ne au se mea mō ia, e fakamanuia mai ne ia au fakaselau taimi.”

19 Ne fai mai a Paula se fafine telā ko 70 ana tausaga i Kanata telā ko se mafai ne ia o gasuesue malosi ona ko te fakalavelave ki tena ivi tua penei, “E tonu ko se mafai ne au o gasue malosi kae e se fakauiga i ei me ko fakamu‵tana ifo foki aku mea e fai i te galuega talai. E fakaaoga eiloa ne au a nisi vaegā auala e fai ei a te galuega talai, e pelā mo te fakaaogaga o te telefoni mo te talai atu ki so se tino i so se avanoaga e maua. Ne tausi ne au se tama tusi kae e isi ne tusi siki i ei mo manatu tāua foki mai ‵tou tusi kolā e mafai ne au o fakaaoga, ne fai ne au a te fakatokaga tenei e pelā me se fakamalosiga foki ki au. Kae ne fakaigoa ne au a te tusi tenei ki te ‘Taku Tusi Fakasao.’ A te loto vāivāi e sē se mea tumau māfai e ‵saga tonu atu faeloa tatou ki folafolaga a Ieova. E toka faeloa a Ieova o fesoasoani mai ki a tatou, faitalia me se a te tulaga ne oko tatou ki ei.” Kāti e tai ‵kese loa a te tulaga o koe mai i a Bianca mo Paula. E tigā i ei, e mafai o toe mafaufau koe ki auala e uke ne taui atu ei ne Ieova a koe mo nisi tino i ou tafa. Ko tafaga la te gali māfai e toe onoono koe ki fakamanuiaga e uke ne taui atu ne Ieova i te taimi nei, e pelā foki mo nisi fakamanuiaga kolā ka taui atu ki a koe i aso mai mua nei!

20. Kafai e tumau tatou i te tavini atu ki a Ieova mo te loto kātoa, ne a mea ka fakamoe‵moe tatou ki ei?

20 Ke mo a eiloa e puli me i au ‵talo e fai atu mo te loto kātoa mo au pati e fai atu ki te Atua “ka lasi ‵ki te . . . taui e maua.” E ‵tau o mautinoa i a koe, me ka “maua ne koutou te fakataunuga o te folafolaga māfai ko oti ne fai ne koutou a te loto o te Atua.” (Epe. 10:35, 36) Tela la, ke tumau eiloa tatou o fakamalosi a ‵tou fakatuanaki kae fai ‵tou galuega mō Ieova mo ‵tou loto kātoa. E mafai ne tatou o fai a te mea tenei, me iloa ‵lei ne tatou me ko Ieova fua tokotasi ko te tino telā ka tuku mai ne ia a te taui ki a tatou i tena taimi tonu.—Faitau te Kolose 3:23, 24.