Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Setema 2016

Mea Aoga e Maua Mai te Takitakiga a Ieova i Aso Nei

Mea Aoga e Maua Mai te Takitakiga a Ieova i Aso Nei

SE FILIFILIGA POTO I POLANI

“I TE taimi ko 15 ei oku tausaga, kae papatiso au, kae i se ono masina mai tua ifo, ne kamata o tavini atu au e pelā me se paenia lagolago. I se tausaga mai tua, ne faka‵fonu ne au te pepa paenia tumau. I taku otiga mai i akoga lasaga lua, ne fakamolemole atu au ke tavini atu i se koga telā e lasi te manakoga i ei mō tino talai o te Malo. Ne manako au o fano kea‵tea mai toku fa‵kai e pelā foki mo toku tupuna fafine telā ne ‵nofo fakatasi mo au kae e sē se Molimau a Ieova. Ko oko eiloa i toku fanoanoa i te taimi ne fai mai ei te ovasia o te fenua me ka toe foki atu au ki te fa‵kai ne fanau ei au o tavini atu i konā! Ne taumafai au o ‵funa oku lagonaga mai i a ia. Ne kilo fua au ki lalo o sasale atu keatea, kae mafaufau ki ana pati ne fai mai. Ne fai atu au ki toku soa telā e paenia mo au: “Kāti au e pelā mo Iona. I te fakaotiga, ne fano loa a Iona ki Nineva. E penei mo au, ka tavini atu loa i te koga ne vau au i ei.”

“Ko nofo nei ki te fa tausaga ne tavini atu ei au i toku fa‵kai, kae ko mafai o lavea ne au a te poto ke tautali ki te fakatonuga telā ne tuku mai. Ne fai a taku kilokiloga sē ‵lei e pelā me se fakalavelave. Kae nei la, ko maua ne au te fiafia. I se masina e tasi, ne mafai ne au o fai a akoga faka-te-Tusi Tapu e 24. Fakafetai ki a Ieova, me ko mafai foki o kamata ne au se akoga faka-te-Tusi Tapu mo toku tupuna fafine telā ne ‵teke muamua.”

SE IKUGA FAKAFIAFIA I FITI

Ne fai ne se tino akoga ki te Tusi Tapu i Fiti a te filifiliga me kau atu a ia ki se fono o te atufenua faka-Kelisiano io me olo fakatasi a ia mo tena avaga ki se aso fanau o te kāiga a tena avaga. Ne talia ne tena avaga ke kau tou fafine ki te fono o te atufenua. Ne fai atu tou fafine me e mafai o fanatu a ia fakamuli. Kae i te taimi ne foki atu ei a ia ki te fale mai tua o te fono, ne iloa aka ne ia me e ‵tau o ‵kalo keatea a ia mai te tulaga telā e mafai o fakamataku ki tena feitu faka-te-agaga, tela la, ne seki fano ei tou fafine.

Kae i te taimi ne fai atu ei te tagata ki ana kāiga i tena avaga e vau māfai ko oti te “fakatasiga a Molimau,” ne fai atu ana kāiga, “Ka sē vau eiloa tou fafine; a Molimau a Ieova e se fakamanatu ne latou a aso fanau!” *

Tela la, ne fakamatamata eiloa tena avaga me ne tu mautakitaki eiloa tou fafine i ana talitonuga kae tautali i tena loto lagona. Ne fai ne tena fakamaoni ke tuku atu ne ia se avanoaga ke talai atu ki tena avaga, e pelā foki mo nisi tino. Se a te ikuga? Ne talia ne tena avaga se akoga faka-te-Tusi Tapu kae ne kamata foki o kau atu ki fakatasiga fakatasi mo tou fafine.

^ pala. 7 Ke onoono ki te “Fesili Mai Tino Fai‵tau” i The Watchtower i a Tesema 15, 2001.