E mata, e talitonu koe me i aso mua, ne ‵toki ne se tino a mouku i te fatoaga saito a te suā tagata?

A te ‵kopi tenei o te Digest telā ne ‵lomi i te 1468 ne te Emepela ko Justinian se tasi o tusi mai tusi e uke kolā ne aofia i ei a fakamatalaga e uiga ki mea tau tulafono i aso mua

I TE Mataio 13:24-26, ne fai mai a Iesu, penei: “A te Malo o te lagi e pelā me se tagata telā ne ‵toki ne ia a fuaga ‵lei i tena fatoaga. I te taimi ne ‵moe ei a tino i te po, ne fanatu tena fili, ‵toki ne ia a mouku i va o saito, fano ei keatea. I te taimi ne ola aka ei a lakau kae ‵fua mai, ne ola aka foki a mouku.” Ne fakafesili aka ne tino tusitala kese‵kese me e mata, a te tala fakatusa tenei se mea tonu, kae ne fakaasi mai i tusitusiga mua o tulafono a te kau Loma me se mea tonu.

“A te ‵tokiga o mouku i se fatoaga ona ko te fia taui ma sui . . . se agasala mai lalo i te tulafono faka-Loma. A te faiga o te tulafono ki te mataupu tenā e fakaasi mai ei i te faifaiga tenā se mea masani,” ko pati i se tikisonale i te Tusi Tapu. E fakamatala mai a te tino sukesuke i mea tau tulafono ko Alastair Kerr me i te 533 T.A., ne ‵lomi ne te Emepela o Loma ko Justinian a tena tusi ko te Digest, se fakasologa o tulafono a te kau Loma mo vaegā tusitusiga mai tino kolā e ‵poto i mea tau tulafono (kāti mai i te 100-250 T.A.). E ‵tusa mo te tusi tenei (Digest, 9.2.27.14), ne fakasino atu loa a te tino poto i mea tau tulafono ko Ulpian ki se fakamasinoga telā ne fai ne se tino maluga o Loma i te lua senitenali, ko Celsus. E isi ne mouku ne ‵toki i se fatoaga a te suā tino, kae ne iku atu eiloa ki te fakamaseiga o lakau kaina katoa. Ne fakaasi mai i te Digest a saolotoga mai lalo i te tulafono kolā e tuku atu ki te tino i a ia te fatoaga, io me ki te tino galue, ke maua mai se fakasalaga o te tino telā ne fakamasei ne ia.

A te vaegā uiga masei tenā ne sae aka i te Emupaea o Loma i aso mua se fakaasiga me e tonu eiloa te mea telā ne fakamatala mai ne Iesu.

E pefea te lasi o te saolotoga ne tuku ne Loma ki tino pule Iutaia i Iuta i te senitenali muamua?

I TE taimi tenei, a Iuta e nofo mai lalo i te pulega a Loma, telā ne sui ne se kovana fakatasi mo se kautau kolā e ‵nofo mai lalo i a ia. A te mea telā ne saga malosi a ia ki ei ko te ‵taega o lafoga mō Loma kae ke fakatumau te filemu mo te pulepulega. Ne fia‵fia te kau Loma i te fakataputapuga o faifaiga solitulafono mo te fakasalaga o so se tino telā e soli ne ia. Kae ne lotoma‵lie eiloa te kau Loma ke tuku katoatoa a te fakateletelega o te koga tenā ki te kau Iutaia.

Ko te Sanetulini a te kau Iutaia e fono

Ne fai te sanetulini mo fai te fono maluga a tino Iutaia telā e fai ei a fakamasinoga e uiga ki te tulafono a te kau Iutaia. E isi foki ne fono fakamasino fo‵liki ne faka‵tu aka i Iuta kātoa. A te ukega o fono fakamasino e fai sale i koga konā e aunoa mo tino pule‵pule Loma. Kae e tasi fua te mea e se mafai o fai i fono fakamasino a te kau Iutaia e uiga ki te tamatega o tino soli tulafono— ko te saolotoga telā e maua fua ne tino Loma. A te mea lauiloa e tasi telā ne seki aofia i ei, ko te fakamasinoga ne sui o te Sanetulini a Setefano kae ne iku atu ki te peipei ki fatu ke mate.—Galu. 6:8-15; 7:54-60.

Ne soli ne te Sanetulini a te kau Iutaia a te malosi o te tulafono telā ne fakatapulā fua ki te kau Loma. Kae ko te “‵toe tulafono ‵mafa,” ko te fakamatalaga a te tino poto ko Emil Schürer, “ko te mafai ne tino pule‵pule o Loma o fai so se fakamasinoga i so se taimi, kae e fai ne latou māfai e iloa ne latou me aofia i ei se kinauga fakapolitiki.” A te fakaakoakoga e tasi o te vaegā fakamasinoga tenā ne tupu i te taimi o te takitakiga a te pule kautau ko Kalaotia Lusia, telā ne puke fakapagota ne ia a Paulo, se tino nofo tumau o Loma.—Galu. 23:26-30.