Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Mati 2017

Se Taugasoa—Māfai ko Fakamataku te va Fakataugasoa

Se Taugasoa—Māfai ko Fakamataku te va Fakataugasoa

A Gianni mo Maurizio ne fai taugasoa mō se 50 tausaga. Kae e isi se taimi, ne oko te lā va fakataugasoa ki se tulaga masei. “I taimi faiga‵ta, ne fai ne au a nisi mea ‵se matagā telā ne fai ei ke ma‵sei māua,” ko pati a Maurizio. Ne fai mai foki a Gianni: “A Maurizio ko toku faiakoga i te taimi ne kamata ei au o sukesuke ki te Tusi Tapu. Ne fai a ia e pelā me se tino fakatonutonu ki a au i te feitu faka-te-agaga. Tela la, ne seki talitonu au ki te mea ne fai ne ia. Ne fai eiloa pelā me ko seai soku fakamoemoega me iloa ne au me ko se mafai māua o taugasoa. Ne foliga mai i a au ko tiakina.”

A TAUGASOA ‵lei e tāua ‵ki eiloa, kae ko te va fakataugasoa tumau e sē se mea e tupu fakafuasei. Kafai a te va fakataugasoa ko tu i se tulaga fakamataku, se a te mea e mafai o fesoasoani mai ke toe faka‵lei aka? E mafai o tauloto ne tatou a mea e uke mai i nisi tino kolā ne fakaasi mai i te Tusi Tapu kolā ne fai mo taugasoa ‵tonu kae fakamuli ifo, ne ‵tu atu olotou va fakataugasoa i se tulaga fakamataku.

KAFAI KO FAI NE SE TAUGASOA SE MEA ‵SE

A Tavita, telā se tupu kae se tausi mamoe foki, e mautinoa eiloa me ne isi ne ana taugasoa ‵lei. A Ionatana se tokotasi o taugasoa telā e masaua atu. (1 Samu. 18:1) Ne isi aka foki ne taugasoa o Tavita, e pelā mo te pelofeta ko Natano. E se fakaasi ‵tonu mai i te Tusi Tapu a te taimi ne kamata ei latou o taugasoa. Kae e isi se taimi ne fakaasi ‵tonu atu ne Tavita ana mea ‵funa ki a Natano e pelā eiloa mo koe ki sou taugasoa. Ne manako a Tavita o faite se fale mō Ieova. Kāti ne fakatāua malosi ne te tupu a te manatu o Natano e pelā me se taugasoa kae se tagata foki telā e maua ne ia te agaga o Ieova.—2 Samu. 7:2, 3.

Kae tiga te feitu tenā, ne sae aka se fakalavelave telā ne fai ei ke fakamataku te va fakataugasoa o laua. Ne mulilua a te tupu ko Tavita  mo Patisepa, kae fakamuli ifo, ne fai ne tou tagata ke tamate te avaga a tou fafine, ko Ulia. (2 Samu. 11:2-21) Mō se fia tausaga, ne fakamaoni eiloa a Tavita ki a Ieova kae fai ne ia te mea tonu. Kae oti aka, fai ei ne ia se agasala matagā! Se a te mea ne tupu ki te tupu ‵lei tenā? E mata, e se mafai o lavea ne ia te matagā o tena amioga tenā? E mata, ne mafaufau a ia, me e mafai o ‵funa ne ia mai i te Atua?

Ne a mea ne fai ne Natano? E mata, ka tuku ne ia ki te suā tino ke fakaasi atu ne ia te mea tenā ki te tupu? Ne iloa ‵lei ne nisi tino a te auala ne fakatoka ei ne Tavita ke tamate a Ulia. Tela la, kaia ne manako ei a Natano ke aofia a ia i te fakalavelave tenā, kae fai ei ke fakamakosu te lā va fakataugasoa telā ko leva ‵ki? E mafai foki o fakamataku ki te ola o Natano māfai e faipati a ia. Kae e se gata i ei, ko oti ne tamate ne Tavita a Ulia telā e seai sena mea ‵se ne fai.

Kae ko Natano se pelofeta a te Atua. Ne iloa ne ia me kafai e se faipati a ia, ka sē ‵pili te la fesokotakiga mo Tavita kae ka pakiakia valevale tena loto lagona. Ne fai ne tena taugasoa ko Tavita se mea telā e se maua ei ne ia te taliaga a Ieova. Ne manako malosi te tupu ki se fesoasoani ke toe faka‵lei tena fesokotakiga mo Ieova. E tonu, ne manako a Tavita ki se taugasoa tonu. A Natano se vaegā taugasoa eiloa penā. Ne filifili ne ia ke fakasae aka te mataupu tenei fakatasi mo se tala fakatusa telā e mafai o otia ei te loto o te tausi mamoe i aso mua. Ne fakaasi atu ne Natano a te fekau a te Atua i se auala telā ne fesoasoani atu ki a Tavia ke malamalama i te ‵mafa o ana agasala kae fakamalosi atu ke gasuesue fakavave a ia o fai se faiga.—2 Samu. 12:1-14.

Ne a au mea e ‵tau o fai māfai e isi sou taugasoa telā ne fai ne ia se agasala matagā? E mafai o tofotofogina koe ke mafaufau me kafai e fakaasi ne koe ana mea ‵se, ka fakamasei ne koe te lua va fakataugasoa. Io me mafaufau koe me kafai e lipoti ne koe tena mea ‵se ne fai ki toeaina, kolā e mafai o fesoasoani ki a ia i te feitu faka-te-agaga, ka fakamasei ei ne koe te luā va fakataugasoa. Ne a mea ka fai ne koe?

A Gianni, telā ne taku atu muamua, ne toe fai mai: “Ne iloa ne au me e isi se mea ko ‵kese. A Maurizio ko se pili mai e pelā mo te taimi muamua. Ne fakaiku aka ne au ke fanatu ki a ia, faitalia te faigata ki a au ke fai penā. Ne mafaufau au penei: ‘Se a te mea e seki iloa ne ia telā e mafai ne au o fai atu ki a ia? E mafai eiloa o ‵kese ana faifaiga!’ Kae mai te masaua ne au me ne suke‵suke fakatasi māua, ne maua ei ne au te malosi ke faipati ki tou tagata. Ne fai eiloa ne Maurizio so se mea i te taimi ne manako ei au ki tena fesoasoani. Ne seki manako au ke galo atu toku taugasoa, kae ne manako au o fesoasoani atu ki a ia, me i a au e atafai ki a ia.”

Ne toe fakaopoopo mai a Maurizio: “A Gianni se tino fakamaoni—kae tonu eiloa a a ia. Ne iloa aka ne au me i ikuga o aku filifiliga ma‵sei e se ‵tau o ‵losi atu ki ia io me ko Ieova. Tela la, ne talia ne au te polopolokiga, kae fakamuli ifo, ne toe gasolosolo malie atu ki mua i te feitu faka-te-agaga.”

KAFAI E TUPU SE FAKALAVELAVE KI SE TAUGASOA

Ne isi foki ne nisi taugasoa o Tavita kolā ne fakamaoni ki a ia i taimi faiga‵ta. Se tokotasi mai i ana taugasoa konā ko Husai, telā e fakasino atu ki ei te Tusi Tapu me ko te “taugasoa fakamaoni o Tavita.” (2 Samu. 16:16; 1 Nofo. 27:33) Kāti a ia se ofisa pule telā se taugasoa pili eiloa o te tupu, se tokotasi foki telā e ave sale ne ia i nisi taimi a fakatonuga ‵funa.

I te taimi ne ‵faomālō ne te tama tagata a Tavita ko Apisaloma a te nofoaiga fakatupu, e tokouke a tino Isalaelu ne ‵kau ki a Apisaloma, kae sē ko Husai. I te taimi ne sola ei a Tavita, ne fanatu a Husai ki tou tagata. Ne logo‵mae malosi a Tavita ona ko te togafiti masei a tena tama tagata mo nisi tino kolā ne talitonu a ia ki ei. Kae e ui i ei, ne tumau eiloa Husai i te fakamaoni, e pelā me se tokotasi telā ne talia ke tu atu tena ola i te tulaga fakamataku kae ke fakataunu se galuega telā ne aofia i ei se tamatega o se tino. Ne seki fai fua ne Husai te mea tenā ona ko tena tiute e pelā me se ofisa pule. Kae ne fakatalitonu atu eiloa ne ia a ia eiloa e pelā me se taugasoa fakamaoni.—2 Samu. 15:13-17, 32-37; 16:15–17:16.

 Se mea fakamafanafana loto ke lavea atu te auala e ‵kau fakatasi ei a taina mo tuagane i aso nei ona ko te fesokotakiga telā e sili fakafia atu i so se tiute io me se tofiga i te fakapotopotoga. E auala i olotou faifaiga, e fai ‵tonu mai eiloa latou, “A matou ko otou taugasoa, e se ona ko te mea e ‵tau o fai matou penā, kae ona ko koutou e tāua malosi eiloa ki a matou.”

Tenei te mea ne oko ki te taina e igoa ki a Federico. Fakatasi mo te fesoasoani o tena taugasoa pele ko Antonio, ne ne manumalo ei a ia i se tulaga faigata i tena olaga. E fakamatala mai a Federico: “I te taimi ne vau ei a Antonio ki te motou fakapotopotoga, ne kamata o fai taugasoa māua. Ne fai māua mo tavini fesoasoani, kae ne fia‵fia māua o ga‵lue fakatasi. Mai tua ifo malie, ne ‵tofi aka a ia mo fai se toeaina. I tafa o te fai mo oku taugasoa, ne fai a ia mo fakaakoakoga ‵lei ki a au i te feitu faka-te-agaga.” Kae ne fai ne Federico se mea ‵se. Ne ‵sala fakavave atu a ia ki se fesoasoani i te feitu faka-te-agaga, kae ne seki fetaui ‵lei a ia ke fai pelā me se paenia io me se tavini fesoasoani. Ne saga atu pefea a Antonio ki ei?

I te taimi ne fepaki a Federico mo mea faiga‵ta, ne fakalogologo kae fakamalosi atu tena taugasoa ko Antonio ki a ia

E fakamasaua mai a Federico, penei: “Ne mafai o lavea ne au me ne lagona ne Antonio a toku logo‵mae. Ne taumafai malosi a ia o fesoasoani mai ki a au i mea tau lagonaga. Ne tausi malosi mai a ia i te feitu faka-te-agaga kae ne seki tuku tiaki ne ia au. Ne fakamalosi ne ia au ke toe maua te malosi faka-te-agaga kae ke se ‵fiu vave.” E fakamatala mai a Antonio, penei: “Ne fakamāumāu ne au a taimi e uke mo Federico. Ne manako au ke sē mā a ia ma faipati mai ki a au e uiga ki so se mea, ke oko foki eiloa ki ana fakalavelave.” Se mea fakafiafia, ne toe maua fakamuli ne Federico te malosi i te feitu faka-te-agaga kae ne ‵tofi aka a ia fakamuli mo fai se paenia mo se tavini fesoasoani. Ne fai mai a Antonio, penei: “E tiga eiloa ko tavini atu nei māua i fakapotopotoga kese‵kese, ko sili atu nei te ‵pili o māua i lō te taimi mua.”

E MATA, KA FAKALOILOIGINA KOE?

E pefea ou lagonaga māfai e fulitua atu sou taugasoa ki a koe i te taimi telā e manako malosi koe ki a ia? E mafai o logo‵mae malosi koe i nisi mea. E mata, ka mafai o fakamagalo ne koe a ia? E mata, e mafai o toe fakamalosi aka a te lua va fakataugasoa?

Mafaufau ki te mea ne tupu ki a Iesu i ana aso fakaotioti i te lalolagi nei. Ne fakamāumāu ne ia  a taimi e uke mo ana apositolo fakamaoni, kae ne maua ne latou se fesokotakiga fakapito. Tela la, ne taku eiloa ne Iesu latou ki ana taugasoa. (Ioa. 15:15) Kae se a te mea ne tupu i te taimi ne puke fakapagota ei a ia? Ne ‵tele keatea ana apositolo. Ne fakaasi ‵tonu atu ne Petelu me e se mafai ne ia o tiakina a tena Matai, kae i te po eiloa tenā, ne fakafiti ne Petelu me e se iloa ne ia a Iesu!—Mata. 26:31-33, 56, 69-75.

Ne iloa ne Iesu me ka fakafesagai tokotasi atu a ia ki tena toe tofotofoga. Kae e isi ne pogai ne ‵tau ei mo ia o fanoanoa, kae logo‵mae foki. Kae i tena sau‵talaga mo ana soko i se fia o aso mai tua o tena toetuga, e se lavea atu eiloa se tamā fameo, loto masei, io me salamō. Ne seki manako eiloa a Iesu o fakasae aka a vāivāiga o ana soko, e aofia ei a mea kolā ne fai ne latou i te po ne puke fakapagota ei a tou tagata.

I lō te fai penā, ne fakamalosi atu a Iesu ki a Petelu mo nisi apositolo. Ne talitonu a ia ki a latou mai te tukuatuga o nisi fakatonuga ki te ‵toe galuega tāua e uiga ki te faiga o akoakoga i tala fakasolopito o tino. Ne kilo atu a Iesu ki ana apositolo e pelā me ko ana taugasoa. Ne tumau eiloa te aoga o tena alofa ki a latou. Ne taumafai malosi eiloa latou ke mo a e toe tiakina ne latou a te lotou Matai. E tonu, ne fai faka‵lei eiloa ne latou te galuega telā ne fakatonu atu ne ia ke fai ne ana soko.—Galu. 1:8; Ko. 1:23.

Ne masaua faka‵lei eiloa ne te tuagane e igoa ki a Elvira a te taimi ne sē ‵lei ei te lā va mo tena taugasoa pele ko Giuliana: “I te taimi ne fai mai ei me ne logo‵mae a ia i te mea ne fai ne au ki a ia,” ne fai mai a Elvira, “Au ne seki fiafia. Ne isi eiloa ne pogai ne ‵tau ei mo ia o kaitaua. Kae ko te mea telā e fiafia au ki ei, me ne manavase malosi a ia ki a au e penā foki mo ikuga o aku amioga. E loto fakafetai faeloa au me ne manavase eiloa a ia ki fakamaseiga ne pokotia au i ei kae sē ko mea ‵se ne fai ne au ki a ia. Ne fakafetai au ki a Ieova me ne maua ne au se taugasoa telā ne fakatāua malosi ne ia au i lō ana lagonaga totino.”

Tela la, ka saga atu pefea se taugasoa ‵lei māfai te va fakataugasoa ko tu atu i se tulaga fakamataku? Ka loto fiafia eiloa a ia o faipati atu mo te atafai māfai e manakogina. Ka fai eiloa te taugasoa tenā e pelā mo Natano mo Husai, kolā ne tumau i te fakamaoni faitalia a taimi ma‵sei, e pelā foki mo Iesu, telā ne loto fiafia o fakamagalo. E mata, a koe se vaegā taugasoa penā?