Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Iulai 2017

Fesili Mai Tino Fai‵tau

Fesili Mai Tino Fai‵tau

E mata, se mea ‵lei ke tausi ne se Kelisiano se vaegā fana, ke puipui ei a ia mai nisi tino?

E tiga eiloa e fakaaoga ne Kelisiano a auala kolā e puipuigina ei latou, kae e se fai ne latou a mea konā e ‵tusa mo fakatakitakiga mai te Tusi Tapu. E ‵teke atu a manatu fakatonutonu konei ki te fakaaogaga o meatau faka-te-foitino, e pelā mo vaegā fana kese‵kese mo nisi vaegā meatau kolā e puipui ei latou mai nisi tino. Ke onoono aka tatou ki mea konei mai lalo:

I te kilokiloga a Ieova, a te ola—maise loa te ola o se tino—e tapu. Ne iloa ‵lei ne te faisalamo ko Tavita me i a Ieova “ko te pogai o te ola katoatoa.” (Sala. 36:9) Tela la, kafai e filifili aka ne se Kelisiano ke fakaaoga a mea kolā e puipui i ei a ia io me ko ana kope, ka fai ne ia so se mea i tena malosi eiloa ke kalo keatea mai te tamate ne ia o se tino kae pisipisia ei a ia i toto o te tino tenā.—Teu. 22:8; Sala. 51:14.

E tiga eiloa e mafai o iku atu a te fakaaogaga o mea e uke ke tamate ei se tino, a te fana ko te ‵toe mea faigofie ke tamate ki ei se tino—i se auala fakafuasei io me i se auala telā ko oti ne fakamoemoe ki ei. * E se gata i ei, kafai e lavea ne se tino kaitaua—telā ko leva ne kaitaua—me isi se fana a te suā tino, e mafai eiloa o tai fakamataku te tulaga tenā, kae e iku atu ki te mate.

I te taimi ne fai atu ei a Iesu ki ana soko ke fakatoka olotou pelu i te ‵toe po o tena olaga i te lalolagi nei, ne seki mafaufau a ia ke tauave ne latou ke fai pelā me se puipuiga. (Luka 22:36, 38) I lō te fai penā, ne manako a Iesu ke fai pelā me se akoakoga ke akoako ei latou ke se  fakasaua, māfai foki loa e fakafesagai atu ki se vaitino mo meatau. (Luka 22:52) Mai tua o te fakaaogaga ne Petelu se pelu e tasi ki se sotia a te faitaulaga sili, ne fakatonu atu a Iesu ki a Petelu penei: “Fakafoki tau pelu ki tena koga.” Oti aka, fai atu ei ne Iesu se munatonu tāua, se fakatakitakiga telā e puipui i ei ana soko ke oko mai ki te aso nei: “Latou katoa kolā e fakaaoga te pelu, e ‵mate foki i te pelu.”​—Mata. 26:51, 52.

E ‵tusa mo pati i te Mika 4:3, a tino o te Atua e “tuki olotou pelu ke fai mo mea fakamalū laukele. Ka ko olotou tao ke fai mo naifi ‵vele vao.” A te uiga matea tenei o Kelisiano ‵tonu e fetaui ‵lei eiloa mo pati fakamalosi loto a Paulo, penei: “Sa taui atu te masei ki te masei. . . . Fai te mea e mafai o fai ne koutou ke tausi te filemu i te va o koutou mo tino katoa.” (Loma 12:17, 18) Faitalia te uke o fakalavelave ne fakafesagai mo Paulo, e aofia i ei a “mea fakama‵taku mai tino kai‵soa,” ne ola a ia e ‵tusa mo ana pati, kae ne seki fakatāua ne ia a tena puipuiga totino ke tāua atu i lō fakatakitakiga faka-te-Tusi Tapu. (2 Koli. 11:26) Kae ne talitonu a ia ki te Atua mo te poto telā e maua i tena Muna—te poto telā e ‵lei atu i lō “meatau.”​—Fai. 9:18.

E fakatāua ne Kelisiano a te ola i lō mea faka-te-foitino. “Faitalia te uke o mea [a se tagata] kae e se maua ne ia mai i ei a te ola.” (Luka 12:15) Tela la, kafai e se mafai ne te leo agamalu o taofi se meatau mai se tino kaisoa, ko ‵tau ei mo Kelisiano ‵poto o faka‵logo ki te fakatakitakiga ne fakaasi mai ne Iesu e auala i ana pati: “Sa ‵teke ki te tino masei.” Kāti e pelā eiloa me ko manakogina ke tuku atu ‵tou gatu ‵tao loto mo ‵tou gatu i tua, i se auala fakatusa. (Mata. 5:39, 40; Luka 6:29) * E tonu, a te ‵toe auala ‵lei, ko te puipui mai tulaga fakama‵taku. Kafai e ‵kalo keatea tatou mai “mea e sona fakamata‵mata ki ei a [tatou]” kae lavea mai ne ‵tou tuakoi i a tatou ne Molimau a Ieova kolā e a‵lofa kae filemu, e mafai eiloa o ‵kalo keatea tatou mai te taketi a tino fakasaunoa.​—1 Ioa. 2:16; Faata. 18:10.

E āva eiloa a Kelisiano ki loto lagona o nisi tino. (Loma 14:21) Kafai ko iloa aka me e tausi ne se tino o te fakapotopotoga se fana ke puipui ei a ia mai tino, e mafai eiloa o ‵poi a nisi tino, kae loto vāi‵vai foki. E fakamalosi aka tatou ne te alofa ke fakamuamua a manakoga o nisi tino i lō tatou, faitalia loa e mafai o isi se saolotoga o tatou ke tausi a mea penā.​—1 Koli. 10:32, 33; 13:4, 5.

E taumafai a Kelisiano ke fai pelā me ne fakaakoakoga ‵lei. (2 Koli. 4:2; 1 Pe. 5:2, 3) I te otiga ne maua ne ia a polopolokiga mai te Tusi Tapu, a te Kelisiano telā koi tausi eiloa ne ia se fana pelā me se puipuiga mai nisi tino, e mafai o fai pelā me se fakaakoakoga sē ‵lei. Ko se fetaui ‵lei foki a ia mō tiute io me ko tauliaga fakapito i te fakapotopotoga. E tenā foki te fakatakitakiga e fakagalue ki Kelisiano kolā e tumau i te tauave o se meatau e pelā me se vaega o tena galuega ‵togi. E sili atu te ‵lei ke ‵sala atu ki se suā galuega! *

A te auala telā e filifili ne te Kelisiano ke puipui ei a ia, tena kāiga mo ana kope, se mea totino eiloa, e penā foki eiloa mo te filifiliga o tena galuega. A te fakatakitakiga tenā mai te Tusi Tapu e fakaata mai i ei a te poto o te Atua mo tena alofa mō tatou. Ona ko fakatakitakiga konā, e filifili eiloa ne Kelisiano kolā ko ma‵tua ‵lei i te feitu faka-te-agaga ke mo a ma tausi se meatau ke puipui ei mai nisi tino. E iloa ne latou me i te puipuiga tonu kae tumau e maua ne tino kolā e fakaasi atu ne latou te tali‵tonu ki te Atua mai te ola e ‵tusa mo fakatakitakiga i te Tusi Tapu.​—Sala. 97:10; Faata. 1:33; 2:6, 7.

I te taimi o te fakalavelave lasi, ka fakalagolago eiloa a Kelisiano ki a Ieova, kae ke se ‵pulu ne latou a latou eiloa

^ pala. 3 Kāti e filifili aka ne se Kelisiano ke ‵sala sena fana (e pelā me se rifle io me se shotgun) mo tamate ki ei a manu mō ‵kai io me ke puipui ei a ia mai manu fe‵kai. Kae kafai e se fakaaoga, se mea ‵lei ke mo a e faulu ne polofana ki ei, kāti e mafai foki o tuku faka‵lei, io me ‵loka faka‵lei i se koga. I koga ‵togi fana kolā e seai ne laisene kae fakagalue i se auala sē tonu, e ‵tau mo Kelisiano o faka‵logo ki te tulafono.—Loma 13:1.

^ pala. 2 E uiga ki te ‵pulu ne se tino a ia eiloa mai te pukemālō, ke onoono aka ki te mataupu ko te “How to Prevent Rape” i te lōmiga o te Awake!, i a Mati 8, 1993.

^ pala. 4 E maua eiloa a nisi fakamatalaga ki te fesili e uiga ki te talia o se galuega telā e aofia i ei a meatau, i The Watch Tower 1, 2005, itu. 31; mo te Iulai 15, 1983, itu. 25-26.