Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Iulai 2017

“Ke Tuku Atu Eiloa ne Ia . . . te Manuia ki Au Palani Katoa”

“Ke Tuku Atu Eiloa ne Ia . . . te Manuia ki Au Palani Katoa”

“‵Sala tou manuia ki te Aliki [Ieova], kae ka avatu ne ia ki a koe te mea e manako koe ki ei.”​—SALA. 37:4.

PESE: 135, 81

1. Ne a fakaikuga e ‵tau o fai ne se talavou ki aso mai mua, kae kaia e se ‵tau ei manavase malosi? (Ke onoono ki te ata i te kamataga.)

E TALI‵TONU a talavou me koi tuai o kamata se malaga, se mea poto ke palani faka‵lei ki te koga ka fano ki ei. A te olaga e pelā eiloa me se malaga, kae ko te taimi e fai ei te palani ki te koga ka fano koe ki ei, ko te taimi koi foliki ei koe. E tonu, e mafai o uke a fakalavelave ki te faiga o palani. Ne fai mai se tamaliki fafine e igoa ki a Heather: “E fakamataku. Me ka fai ne koe se fakaikuga ki tou olaga kātoa.” Kae ke loto malosi. Ne fai atu a Ieova ki ana tino: “Sa mataku, me i a au e fakatasi atu ki a koe. Sa manavase, me i a au ko tou Atua. Ka fakamalosi ne au a koe, ao, ka fesoasoani atu au ki a koe.”​—Isa. 41:10NW.

2. E iloa pefea ne koe i a Ieova e manako ke fai au palani mō se olaga fiafia i aso mai mua?

2 E manako a Ieova ke poto koe i te faiga o au palani mō aso mai mua. (Fai. 12:1; Mata. 6:20) E manako a ia ke fiafia koe kae fakamaoni ne tatou mai mea ola ne faite ne Ia, te ‵gali o mea e lavea ki mata, mea e lagona mo mea e tami ne tatou. Mafaufau foki ki tena atafai ki  a tatou kae akoako ne ia tatou ki te ‵toe olaga ‵lei. Kae ko latou kolā e ‵teke ne latou ana akoakoga, ne fai mai a Ieova: “Ne filifili ne koutou a te mea telā e fakafanoanoa mai ki a au. . . . Kiloke! Aku tavini ka fia‵fia, kae ko koutou ka masiasi. Kiloke! Aku tavini ka ka‵laga mo te fia‵fia ona ko te tulaga ‵lei i olotou loto.” (Isa. 65:12-14) E faka‵malugina a Ieova māfai e fai ne ana tino a filifiliga ‵poto i olotou olaga.​—Faata. 27:11.

PALANI KOLĀ KA FAKAFIAFIA ATU KI A KOE

3. Se a te mea e manako a Ieova ke fai ne koe?

3 Ne a palani e manako a Ieova ke fai ne koe? Ne faite ne ia a tino ke mafai o fia‵fia māfai e iloa faka‵lei ne latou a ia kae tavini fakamaoni atu foki ki a ia. (Sala. 128:1; Mata. 5:3) E ‵kese mo manu ne faite ne ia, kolā e lotoma‵lie fua ki te ‵kai, inu, kae fanafanau. E manako te Atua ke maua ne tatou te fiafia mai te faiga o palani e aoga i lō a mea kolā ko lotoma‵lie fua ki ei a manu. A tou Mafuaga ko “te Atua o te alofa” mo “te Atua fiafia,” telā ne faite ne ia a tino “ki tena fakatusa.” (2 Koli. 13:11; 1 Timo. 1:11; Kene. 1:27) Ka fiafia eiloa koe māfai e fakaakoako ki te ‵tou Atua alofa. Kai fakatalitonu aka eiloa ne koe a pati i te Tusi Tapu telā e fai mai: “E sili atu te fiafia o te tino telā e tuku atu ana mea i lō te maua ne ia”? (Galu. 20:35) A te mea tenā se munatonu fakavae ki olaga o tino. Tela la, e manako a Ieova ke fakaasi atu ne koe i au palani a te alofa ki tino mo te Atua.​—Faitau te Mataio 22:36-39.

4, 5. Se a te mea ne fai ei ke fiafia a Iesu?

4 Ne tuku mai ne Iesu Keliso te ‵toe fakaakoakoga ‵lei mō tamaliki. I te taimi koi foliki i ei, ne tafao kae ne fiafia foki. E fai mai te Muna a te Atua me e isi se “taimi o te fiafia . . . mo te taimi o te ‵saka fiafia.” (Fai. 3:4) Ne fakapilipili foki a Iesu ki a Ieova mai te sukesuke ki te Tusi Tapu. I te taimi ko 12 ei ana tausaga, ne ofo a faiakoga i te faletapu i te “lasi o tena malamalama, e pelā foki mo ana tali” ki mataupu faka-te-Tusi Tapu.​—Luka 2:42, 46, 47.

5 Ne tupu aka a Iesu e pelā me se tamaliki fiafia. Se a te mea ne fai ei ke fiafia a ia? Ne iloa ne ia me mai tafa o mea masani e fai ne ia, e isi ne mea e manako te Atua ke fai ne ia, ko te “folafola atu te tala ‵lei ki tino ma‵tiva. . . mo te faka‵pulaga o mata o tino ‵kivi.” (Luka 4:18) A te faiga ne ia te loto o te Atua ne fai ei ke fiafia a ia. Ne fakamatala mai ana lagonaga i te Salamo 40:8NW penei: “A te faiga o tou loto, e toku Atua, ko toku fiafia.” Ne fiafia a Iesu ke akoako atu a tino e uiga ki tena Tamana faka-te-lagi. (Faitau te Luka 10:21.) Mai tua o te akoakoga ki se fafine e uiga ki te tapuakiga tonu, ne fai atu a Iesu ki ana soko: “A taku meakai ko te faiga o te loto o ia telā ne uga mai ne ia au kae ke fakapalele foki tena galuega.” (Ioa. 4:31-34) A te fakaasiatuga o te alofa ki te Atua mo nisi tino ne fai ei ke fiafia a Iesu. E mafai foki o fai ne ia koe ke fiafia.

6. Kaia e aoga ei a te sau‵tala fakatasi mo Kelisiano ata‵mai e uiga ki au palani mō aso mai mua?

6 E tokouke a Kelisiano ata ‵mai ne fia‵fia ki te lotou olaga talavou mai te tavini atu e pelā me ne paenia. Kaia e se sau‵tala fakatasi ei a koe mo nisi o latou ki au palani? “Taumafai ke maua ne koe ne manatu fakatonutonu e uke, kae ka manuia koe; kafai e se saga koe o ‵sala ne manatu fakatonutonu, ko tena uiga e se mafai o manuia tou taumafai.” (Faata. 15:22) E mafai o fakaasi atu ne vaegā tino faka-te-agaga penā me i te taviniga tumau ka tuku mai i ei a akoakoga kolā ka aoga ki a koe i tou olaga kātoa. Ne tauloto ne Iesu a mea e uke mai i tena Tamana i te taimi ne nofo ei a ia i te lagi. Kae ne tumau foki a ia penā i te faiga o tena taviniga i te lalolagi. E pelā me se fakaakoakoga, ne tauloto ne ia te fiafia telā e maua mai te fakaoko atu o te tala ‵lei ki loto o tino, penā foki te fiafia telā e maua māfai e tumau i te fakamaoni i tofotofoga. (Faitau te Isaia 50:4; Epe. 5:8; 12:2) Ke sau‵tala nei tatou ki nisi vaega o te taviniga tumau kolā e mafai o fai ei ke fiafia koe.

 TE POGAI E IKU MANUIA EI A TINO FAI SOKO

7. Kaia e fia‵fia ei a talavou e tokouke ki te faiga o soko?

7 Ne fai mai a Iesu: “Olo . . . ke fai a tino i ei mo oku soko . . . akoako atu latou.” (Mata. 28:19, 20) Kafai e palani koe ke fai pelā me se tino fai soko, ko filifili eiloa ne koe se galuega fakamalie loto, telā ka faka‵malu ei te Atua. E pelā mo nisi galuega, e manakogina te taimi ke maua ne koe te atamai. Fakamuli fua nei, ne fai mai te taina ko Timothy telā ne kamata o paenia i te taimi koi talavou i ei: “E fiafia au o galue tumau i te taviniga ki a Ieova, me tenā te auala e fakaasi atu ei toku alofa mō ia. I te taimi muamua, ne seki mafai ne au o kamata se akoga faka-te-Tusi Tapu, kae fakamuli ifo ne fanatu au ki te suā koga, kae i loto i se masina e tasi ne kamata ei ne au ne akoga faka-te-Tusi Tapu. E tokotasi mai ei ko kamata o kau mai ki te Fale Tapuaki. Mai tua o te lua masina ne akoga ei au i te Akoga mō Taina Taka, * ne maua ne au se tōfiga fou telā ne kamata ei ne au ne akoga faka-te-Tusi Tapu e fa. Ne fiafia au o akoako a tino, me lavea ne au te fulifuliga e fai ne te agaga tapu ki a latou.”​—1 Tesa. 2:19.

8. Ne mafai pefea ne nisi talavou Kelisiano o ‵kau katoatoa atu ki te faiga o soko?

8 Nisi talavou Kelisiano ne tauloto ki se ‵gana fou. E pelā mo Jacob, mai Amelika ki mātū telā ne tusi mai penei: “I te taimi ko fitu ei oku tausaga, e tokouke oku taugasoa ne tino mai Vietnam. Ne manako au ke fakaasi atu ki a latou a mea e uiga ki a Ieova, telā ne fai ei aku palani mai tua ifo ke tauloto au ki te lotou ‵gana. I te ukega o taimi, ne tauloto au ki te ‵gana mai i te fakatusa‵tusa ne au a Te Faleleoleo Maluga i te ‵gana palagi mo te ‵gana Vietnam. Ne fai taugasoa foki au ki tino mai se fakapotopotoga i te ‵gana Vietnam telā e pili mai. I te taimi ko 18 ei oku tausaga, ne kamata au o paenia. Fakamuli ifo, ne kau atu au ki te Akoga mō Taina Taka. Ne fesoasoani mai te mea tenei ki taku galuega fakapaenia i te taimi tenā, ona ko au ko te toeaina tokotasi fua i te fakapotopotoga i te ‵gana Vietnam. E tokouke a tino Vietnam ne ofo me iloa ne au o faipati i te ‵gana a latou. Ne ‵kami ne latou au ki loto i te fale, kae ne mafai faeloa o suke‵suke mo latou ki te Tusi Tapu. Nisi o latou ne ga‵solo ki mua kae papatiso.”​—Fakatusa ki te Galuega 2:7, 8.

9. Se a te akoakoga e tuku mai ne te faiga o soko?

9 A te faiga o soko se akoakoga e akoako ei koe ki uiga ‵lei i te faiga o galuega, te atamai ke fesokotaki atu, loto toa, kae ke apo foki i te akoako atu. (Faata. 21:5; 2 Timo. 2:24.) E fakafiafia te galuega tenei, me ka tauloto koe ki te auala ke fakatalitonu atu me fakavae au akoakoga ki te Tusi Tapu. Ka tauloto foki koe ki te auala ke ga‵lue fakatasi mo Ieova.​—1 Koli. 3:9.

10. E mafai pefea o maua ne koe te fiafia i se koga talai telā e se tokouke a tino fia‵fia i ei?

10 E mafai eiloa o maua ne koe te fiafia faitalia te sē tokouke o tino e fia‵fia ki te tala ‵lei. A te faiga o soko e aofia i ei te ga‵lue fakatasi pelā me se tīmu. A te fakapotopotoga kātoa e ‵sala ki tino loto ‵lei. E tiga eiloa e tokotasi fua te taina io me se tuagane ne maua ne ia te tino telā ne fai fakamuli pelā me se soko, a tatou katoa ne aofia i te ‵salaga tenā kae maua fakatasi foki ne tatou te fiafia mai ei. E pelā mo Brandon telā ne fakamāumāu ne ia tausaga e iva ke paenia i se koga telā e se fia‵fia i ei a tino. Ne fai mai a ia: “Au e fiafia o talai me tenā loa te mea ne manako mai a Ieova ke fai ne tatou. Ne kamata au o paenia i te taimi ne oti ei aku akoga. Se mea fakafiafia ki a au ke fakamalosi atu ki talavou i te motou fakapotopotoga kae ke lavea atu foki te ga‵solo o latou ki mua i te feitu faka-te-agaga. Mai tua o te kauatuga ki te Akoga mō Taina Taka, ne maua ne au se ‵kamiga ke tavini atu e pelā me se paenia. E tonu, ne seki maua ne au se tino i taku koga talai telā ne papatiso, kae ko nisi tino ne maua ne latou. Kae e fiafia eiloa au me ne kau katoatoa atu au ki te galuega ko te faiga o soko.”​—Fai. 11:6.

 TE KOGA E IKU ATU KI EI AU PALANI

11. Se a te vaega o te taviniga tapu telā ne fia‵fia ki ei a talavou e tokouke?

11 E uke avanoaga ke tavini atu ki a Ieova. E pelā mo galuega fakatū‵tu kolā e ga‵lue i ei a talavou e tokouke. E lau i selau o Fale Tapuaki ‵fou e manakogina ke faite. A te faitega o latou se galuega ‵malu telā e tavae ei te Atua kae fai ei ke fiafia koe. E penā foki i nisi galuega ‵malu, a te ga‵lue fakatasi mo taina se mea fakafiafia. A galuega fakatū‵tu se vaega o akoakoga mai i a Ieova, e akoako i ei ke iloa ne koe o fakaaoga tou mafaufau, ke fai pelā me se tino galue poto, kae ke fakalogo ki a latou kolā e fai ne latou te takitakiga.

E uke ‵ki a fakamanuiaga e faka‵tali mai mō latou kolā e fia ‵kau i te taviniga tumau (Ke onoono ki palakalafa 11-13)

12. E mafai pefea o iku atu a te galuega fakapaenia ki nisi avanoaga?

12 Ne fai mai se taina e igoa ki a Kevin: “Talu mai i taku folikiga, ne manako au ke galue i te taviniga tumau ki a Ieova. Tela la, ne kamata au o paenia i te taimi ko 19 ei oku tausaga. Ne galue au i se taina telā se kamuta ke mafai o tausi ei au i te feitu faka-te-foitino. Ne tauloto au ki te faka‵pikiga o tuafale, famalama, mo mataloa. Fakamuli ifo, ne galue au i se tīmu telā e fesoasoani i taimi o alikeni mō se lua tausaga, mo te ‵toe faitega o Fale Tapuaki mo fale ke ‵nofo i ei a taina. I te taimi ne logo ei au me manakogina ne tino ki galuega fakatū‵tu i Afelika ki Saute, ne avatu taku fakatagi ke galue au i ei kae ne maua ne au. I konei i Afelika, ne ga‵sue faeloa matou mai te Fale Tapuaki e tasi ki te suā Fale Tapuaki i nāi vaiaso. Ne fai eiloa a te motou potukau fakatū‵tu e pelā me se kāiga. E ‵nofo fakatasi matou, suke‵suke fakatasi ki te Tusi Tapu, kae ga‵lue fakatasi. Ne fiafia foki au o ga‵lue fakatasi mo taina i te koga tenā i vaiaso katoa. A te palani ne fai ne au i taku folikiga ne fai ei ke fiafia au i auala kolā ne seki fakamoemoe au ki ei.”

13. E fai pefea te taviniga i te Peteli e pelā me se mea fakafiafia ki talavou?

13 A nisi tino kolā ne fakataunu olotou palani  ke tavini tumau atu ki a Ieova, ko ga‵lue nei i te Peteli. A te taviniga i te Peteli se mea fakafiafia i te olaga, me i mea katoa e fai ne koe i konā e fai mō Ieova. E fesoasoani mai te kāiga Peteli ke tuku atu a mea‵kai faka-te-agaga. Ne fai mai a Dustin telā se tino galue i te Peteli: “Ne fai ne au a te taviniga tumau e pelā me se mea ke kausaki ki ei i te taimi ko iva ei oku tausaga, kae ne kamata au o paenia i te taimi ne oti ei aku akoga. Mai tua o se tasi mo te āfa tausaga, ne ‵kami ei au ke galue i te Peteli, telā ne tauloto ei au ki te fakagaluegaga o masini ‵lomi tusi kae fakamuli ifo ki te fakapolokalamega o komupiuta. I te Peteli, ne lagona ei ne au mō te taimi muamua a te ‵gali o ikuga kolā e maua mai i te faiga o soko i te lalolagi kātoa. E fiafia au ki te taviniga tumau i konei, me i mea kolā e fai ne matou e fesoasoani atu ke fakapili‵pili atu a tino ki a Ieova.”

NE A AU PALANI MŌ ASO MAI MUA?

14. E mafai pefea ne koe o fai au palani ke kau atu ki te taviniga tumau?

14 E mafai pefea o palani koe ke galue i te taviniga tumau? Kae sili atu i mea katoa, ka fesoasoani atu a uiga faka-te-agaga ke tavini katoatoa atu koe ki a Ieova mo te manuia. Tela la, ke tu mautakitaki koe i au sukesukega ki te Muna a te Atua, mafaufau ‵loto ki ei, kae ‵sala ki auala ke fakaasi atu ei au mea ne tauloto i fakatasiga a te fakapotopotoga. I te taimi koi akoga ei koe, e mafai o maua ne koe te iloa mo te atamai e pelā me se tino talai o te tala ‵lei. Tauloto ke fiafia tonu koe ki tino mai te apo i te faiga o fesili ke iloa ne koe olotou manatu kae fakalogologo faka‵lei ki a latou. E mafai foki o fesoasoani koe ki te fakapotopotoga, e pelā mo te ‵fuluga mo te tausiga faka‵lei o te Fale Tapuaki. E fiafia a Ieova ki a latou kolā e loto mau‵lalo kae fia‵fia o ofo atu a latou eiloa. (Faitau te Salamo 110:3; Galu. 6:1-3) Ne ‵kami ne te apositolo ko Paulo a Timoteo ki te galuega faka-misionale ona me “ne taku ‵lei a ia ne taina.”—Galu. 16:1-5.

15. E mafai pefea o fai au palani ke maua se galuega e tausi ei a koe?

15 E manakogina ko latou kolā i te taviniga tumau ke ‵sala ne auala e mafai ei o tausi latou i te feitu faka-te-foitino. (Galu. 18:2, 3) Kāti e manakogina ke fai se tamā akoakoga ke maua se tamā galuega i te koga e nofo ei koe. I te taimi e fai ei au palani, ke sau‵tala mua mo te ovasia o fenua io me ko paenia i tau fakapotopotoga. Fesili atu ki galuega e ‵lei ki paenia. Kae e pelā mo pati i te Tusi Tapu, “tuku atu ki a Ieova so se mea e fai ne koe, kae ka manuia eiloa au palani.”​—Faata. 16:3; 20:18NW.

16. E mafai pefea o fesoasoani atu te taviniga tumau ki a Ieova i te taimi koi talavou ei koe ke fakatoka koe mō nisi tiute i aso mai mua?

16 E mafai o mautinoa i a koe i a Ieova e manako ke “puke ‵mau” koe ki te olaga fiafia i aso mai mua. (Faitau 1 Timoteo 6:18, 19.) E fesoasoani atu a te taviniga tumau ke fesokotaki faeloa koe mo taina i te taviniga tumau kae fesoasoani atu ei ke fai a koe e pelā me se Kelisiano matua ‵lei. Ko oti foki ne iloa ne te tokoukega, i te tavini ki a Ieova i te taimi koi talavou i ei, e fesoasoani atu foki ke manuia koe i tou olaga avaga. A latou kolā ne paenia mai mua o a‵vaga, e masani sale o ga‵lue tumau i te taviniga fakatasi mo olotou avaga māfai ko oti ne avaga.—Loma 16:3, 4.

17, 18. E aofia pefea tou loto i te faiga o au palani?

17 E aofia a te loto i te faiga o palani. E fai mai a Ieova i te Salamo 20:4: “Ke tuku mai ki a koe a mea e manako koe ki ei kae fakataunu foki ne ia au fuafuaga katoa.” Tela la, mafaufau ki mea e manako koe o fai i tou olaga. Mafaufau ki mea e fai ne Ieova i ‵tou taimi nei mo te auala e mafai o fesoasoani atu koe i tena taviniga. Ko fai ei au palani ke fakafiafia atu ki a ia.

18 A te tavini katoatoa atu ki a Ieova ka maua ei ne koe a te lotomalie katoatoa me tenā eiloa te vaegā olaga e faka‵malu atu ki te Atua. E tonu, ke “‵sala ke maua te fiafiaga sili i a Ieova, kae ka tuku atu ne ia a manakoga o tou loto.”​—Sala. 37:4NW.

^ pala. 7 Ko oti ne sui ki te Akoga mō Tino Talai o te Malo.