Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Iulai 2017

“‵Viki ki a Ioa!”​—Kaia?

“‵Viki ki a Ioa!”​—Kaia?

“‵Viki atu ki a Ioa! . . . Ko oko loa i te gali kae ‵lei ke ‵viki atu ki a ia!”​—SALA. 147:1, NW.

PESE: 59, 3

1-3. (a) E mata, ko te taimi fea ne tusi ei te Salamo 147? (e) Se a te mea e mafai o tauloto ne tatou mai te sukesuke ki te Salamo 147?

KAFAI e fai ne se tino se galuega gali io me fakaasi mai ne ia se uiga gali faka-Kelisiano, e ‵tau eiloa o maua ne ia a tavaega. Kafai e mafai o fai penā ki tino, ko tena uiga e ‵tau o uke atu a pogai ke ‵viki atu ki a Ieova te Atua! E mafai o ‵viki atu tatou ki a ia ona ko tena malosi sili, telā e lavea ne tatou i te fakaofoofogia o mea ne faite, io me ko ana faifaiga atafai ki tino, telā e fakamaoni i te tukumaiga o tena Tama fagasele e pelā me se taulaga togiola.

2 Ne fakaosofia a te tino ne tusi ne ia te Salamo e 147 ke ‵viki atu ki a Ieova. Ne fakamalosi foki ne ia a nisi tino ke ‵kau fakatasi latou o ‵viki atu ki a Ieova.​—Faitau te Salamo 147:1, 7, 12.

3 E se iloa ne tatou te tino ne tusi ne ia te salamo tenei, kae kāti ne ola a te faisalamo tenei i te taimi ne toe faka‵foki mai ei ne Ieova a tino Isalaelu ki Ielusalema mai te ave fakapagota ki Papelonia. (Sala. 147:2) A te toe faka‵fokiga o tino o te Atua ki te koga e fai ei te lotou tapuakiga tonu, ne fai ei ke otia te loto o te faisalamo kae ‵viki atu ki a Ieova. Kae ne toe fakaopoopo mai foki ne ia a nisi pogai e ‵tau ei o fai penā. Ne a pogai konā? Ne a pogai e ‵tau ei o kalaga atu koe “Aleluia!” i tou olaga?​—Sala. 147:1, Fa. 19:1, fml.

 E FAKA‵LEI NE IEOVA A TINO LOTO MAFATIA

4. I te taimi ne fakasaoloto ei ne te tupu ko Kulesa a tino Isalaelu kolā ne fakapagota, ne pefea olotou lagonaga, kae kaia?

4 Mafaufau ki lagonaga o tino Isalaelu i te taimi ne ‵nofo fakapagota ei i Papelonia. Ne fakaitaita atu a olotou fili ki a latou: “Usu mai ki a matou se pese e uiga ki Siona.” I te taimi tenā, a Ielusalema te pogai sili o te lotou fia‵fia ki a Ieova, ko oti ne ofa ki lalo. (Sala. 137:1-3, 6) Ne seki ma‵nako a tino Iutaia o usu te pese. Ne fati‵fati olotou loto, kae ne ma‵nako ki fakamafanafanaga mo fakamalosiga. Kae ne fakataunu eiloa a valoaga i te Muna a te Atua, ne faka‵sao latou e auala i a Kulesa, te tupu o Pelesia. Ne puke ne ia a Papelonia kae fakailoa atu: “[Ieova] . . . ne ‵tofi ne ia a au ke faite ne au se faletapu mō ia i Ielusalema . . . I te taimi nei, a koutou katoa kolā ko tino o tena fenua, ke na olo nei koutou ki te koga tenā, kae ke fakatasi atu [Ieova] te otou Atua ki a koutou.” (2 Nofo. 36:23) Ko oko eiloa i te fakamafanafana atu o te mea tenei ki tino Isalaelu kolā e ‵nofo i Papelonia!

5. Se a te mea ne iloa ne te faisalamo e uiga ki te malosi o Ieova ke faka‵lei a fakalavelave?

5 Ne seki avatu ne Ieova a fakamafanafanaga ki te fenua fua o Isalaelu, kae ki tino taki tokotasi foki. E penā foki i aso nei. Ne tusi mai te faisalamo e uiga ki te Atua: “Ka fakamafanafana ne ia latou kolā e loto mafatia; kae fusi ne ia olotou pa‵kiaga.” (Sala. 147:3) E tonu, a Ieova e atafai ki a latou kolā e isi ne olotou fakalavelave—i te feitu faka-te-foitino mo mea tau lagonaga. I aso nei, e manako malosi a Ieova ke fakamafanafana mai kae faka‵lei aka ‵tou lagonaga. (Sala. 34:18; Isa. 57:15) E tuku mai ne Ia te poto mo te malosi ke mafai ne tatou o fakafesagai atu ki so se fakalavelave e fepaki mo tatou.​—Iako. 1:5.

6. E aoga pefea ki a tatou a te ‵fuliga o te faipatiga a te faisalamo i te Salamo 147:4? (Ke onoono ki te ata i te kamataga.)

6 Ne ‵fuli te faipatiga a te faisalamo ki mea i luga i te lagi, kae fai mai i a Ieova “e lau aka ne ia te aofaki o fetū” kae “kalaga atu a ia ki a latou katoa i olotou igoa.” (Sala. 147:4NW) Kaia ne ‵fuli ei tena faipatiga ki mea i luga i te lagi? Mafaufau ki te mea tenei: Ne lavea ne te faisalamo a fetū ki ana mata, kae se iloa ne ia te aofaki tonu o latou. I tausaga takitasi, a te aofaki o fetū e lavea ne tatou e gasolo aka eiloa ki luga. E mafau‵fau a nisi tino i te aofaki o fetū i te Kaniva a tatou e lau i piliona. Kae kāti e lau i tiliona o kaniva i te iunivesi! Ki a tatou, e se mafai o lau te aofaki o fetū! Kae ne tuku ne te Mafuaga a igoa io me ko fakamatalaga ki fetū katoa. E fakaasi mai ei me fakatāua ne Ieova a fetū takitasi. (1 Koli. 15:41) Kae pefea la a tino i te lalolagi? E iloa ne te Atua a tulaga o fetū takitasi, telā la, e iloa faka‵lei ne ia a koe—te koga tonu e nofo ei koe, ou lagonaga ‵tonu, mo te mea eiloa telā e manako a koe ki ei i so se taimi!

7, 8. (a) Kafai e faka‵sao ne Ieova ana tino mai tofotofoga, se a te mea e malamalama a ia i ei? (e) Fakamatala mai te alofa atafai o Ieova i te auala e fesoasoani atu ei ki tino sē ‵lei katoatoa.

7 E se gata fua i te fiafia o Ieova ki a koe, kae maua foki ne ia te malosi mo te loto alofa ke fesoasoani atu ki fakalavelave o koe i te olaga. (Faitau te Salamo 147:5.) Kāti ka mafaufau koe me ko tō faigata te tulaga e nofo ei koe kae ko tō ‵mafa foki te amoga e amo ne koe. E malamalama a te Atua i mea e mafai ne koe o fai, kae ‘masaua foki ne ia i a koe se ‵pefu.’ (Sala. 103:14) Ona ko te tulaga sē ‵lei katoatoa, e fai faeloa ne tatou a mea ‵se kolā ne fai ne tatou. E sala‵mo tatou i pati ne ‵to atu i ‵tou gutu, ko manakoga faka-te-fotino kolā e ‵tupu aka faeloa i loto i a tatou io me ko te kaisano ki mea e maua ne nisi tino! E se mafai o maua ne Ieova a vaegā vāivāiga penā; kae e lasi ‵ki  tena malamalama i a tatou, e se mafai o oko ki ei te ‵tou iloa!​—Isa. 40:28.

8 Kāti ko oti ne iloa ne koe te auala ne fesoasoani atu ei te lima malosi o Ieova ke manumalo koe i tofotofoga. (Isa. 41:10, 13) E pelā mo Kyoko, se tuagane paenia telā ne loto vāivāi mai tua o te mauaga ne ia se tōfiga fou. Ne fakaasi atu pefea ne Ieova te loto malamalama ki tena fakalavelave? I te tōfiga fou o ia, ne tokouke a tino kolā ne ‵nofo fakatasi mo ia kae malamalama i ana lagonaga. Ne maua ne ia se lagonaga e pelā eiloa me fai atu a Ieova ki a ia penei: “Au e alofa ki a koe, e se ko tena uiga i a koe se paenia, kae ona ko koe se tama a aku kae ko oti ne tuku mai tou ola mō au. E manako au ke fiafia koe i tou olaga e pelā me se tokotasi o aku Molimau!” Kae i tou tulaga, ne fakaasi atu pefea ne te Atua Malosi Katoatoa me “e se mafai o fuafuagina tena poto”?

E TUKU MAI NE IEOVA MEA E MANAKOGINA NE TATOU

9, 10. Ne a mea e tuku mai muamua māfai ko fesoasoani mai a Ieova ki a tatou? Fakamatala mai.

9 I nisi taimi e ma‵nako tatou ki mea faka-te-foitino. E pelā me se fakaakoakoga, kāti ka manavase koe me ka sē lava au mea‵kai. Kae tiga te feitu tenā, ko Ieova eiloa ne faite ne ia te auala e ola ei a mea e manakogina mo ‵kai, kolā e ma‵nako foki ki ei a tamā manu ko leveni! (Faitau te Salamo 147:8, 9.) Kafai e tumau i te fagai ne Ieova o leveni, e mafai o talitonu koe me ka tuku atu foki ne ia ou manakoga faka-te-foitino.​—Sala. 37:25.

10 Kae ko te ‵toe mea tāua, e tuku mai ne Ieova a ‵tou manakoga faka-te-agaga mo “te filemu o te Atua telā e sili fakafia atu i mea katoa kolā e malamalama i ei.” (Fili. 4:6, 7) Mafaufau ki se fakaakoakoga, ne lagona ne Mutsuo mo tena avaga a te malosi fesoasoani o Ieova i te taimi ne poko ei te tsunami i Tiapani i te 2011. Ne maua ne laua se avanoaga foliki ke ‵sao mai te ‵kake ki luga i te tuafale o te la fale. Kae i te aso tenā, toeitiiti ko ‵galo atu katoa la kope. Ne ‵nofo laua i se potu o te la fale i te po pouli kae ‵moko. I te tafataeao, ne ‵sala laua ki ne fakamalosiga faka-te-agaga. A te tusi fua e tasi ne maua ne laua ko te Yearbook of Jehovah’s Witnesses 2006. Ne lavea i ei ne Mutsuo a te ulutala tenei “The Deadliest Tsunamis Ever Recorded.” E fakamatala i ei te māfuie telā ne poko i Sumatra i te 2004 kae ne fakamāfua i ei te ‵toe tsunami telā ne lasi tena fakamaseiga i tala fakasolopito. Ne ‵tagi a Mutsuo mo tena avaga i te fai‵tauga ki tala konā. Ne lagona ne laua a te alofa atafai o te Atua i te tukuatuga o te fakamalosiga faka-te-agaga telā ne ma‵nako tonu eiloa laua ki ei. Ne alofa foki a Ieova o tuku atu a kope faka-te-foitino. E auala i taina faka-te-agaga, ne maua ne laua a fesoasoani kolā e tuku atu ki tino kolā ne pokotia. Kae ko te ‵toe mea telā ne fakamalosi atu ki a laua, ko te asiatuga o sui o te fakapotopotoga saukātoa a te Atua ki te fakapotopotoga a latou. Ne fai mai a Mutsuo: “Ne lagona ne au i a Ieova e pelā eiloa me nofo mai i tafa o maua taki tokotasi kae tausi mai. Ko oko eiloa i te fakamafanafana mai!” E tuku mai muamua ne Ieova a mea‵kai faka-te-agaga, kafai ko oti ko fakamalie mai ei ne ia ‵tou manakoga faka-te-foitino.

MEA AOGA E MAUA MAI TE MALOSI FAKA‵SAO TINO O IEOVA

11. Ne a mea e manakogina ke fai ne latou kolā e fia maua a mea aoga mai te malosi faka‵sao tino o Ieova?

11 E toka faeloa a Ieova o ‘siki aka ne ia a tino loto maulalo.’ (Sala. 147:6a) Kae aoga pefea ki a tatou a te toka faeloa o Ieova o gasue mō tatou? E ‵tau o maua se va fakataugasoa ‵lei mo ia. Kae ke fai penā, e manakogina ke ati aka ne tatou te uiga agamalu. (Sefa. 2:3) A tino agama‵lu e fakalago‵lago ki te Atua ke faka‵lei aka olotou fakalavelave kae ke ave kea‵tea te logo‵mae ne maua mai ei. E kilo atu a Ieova ki a latou konā kae fakamisikata ke fakaasi atu ei tena taliaga.

12, 13. (a) Ke maua a mea aoga mai te fesoasoani o te Atua, ne a mea e ‵tau o ‵kalo keatea tatou mai ei? (e) Ko oi a tino e fiafia ki ei a Ieova?

 12 I te suā feitu, a te Atua e “tuki palapala ne ia ke ii ki lalo i te laukele a tino amio ma‵sei.” (Sala. 147:6e) Ko oko eiloa i te ma‵losi o pati konei! Ke maua a mea aoga mai te alofa fakamaoni o Ieova kae ke sē kaitaua mai, e ‵tau mo tatou o takalia‵lia ki te masei. (Sala. 97:10) E pelā me se fakaakoakoga, e ‵tau o takalia‵lia tatou ki amioga fakatauavaga sē ‵tau. Ko tena uiga, e ‵tau mo tatou o faka‵mao mai so se mea telā e mafai o ‵taki atu ei tatou ki faifaiga ma‵sei penā, e aofia i ei a ata ma‵sei. (Sala. 119:37; Mata. 5:28) E mafai o faigata te mea tenei, kae ko te mauaga o fakamanuiaga a Ieova ko te ‵toe mea aoga ke kausaki atu tatou ki ei.

13 Ke taua atu i te taua tenei, e manakogina ke fakalago‵lago tatou ki a Ieova, kae sē ki a tatou eiloa. E mata, ka fiafia a ia māfai e taumafai tatou o ‵sala fesoasoani ki te “malosi o te solofanua,” telā e ‵saga atu ki ei a tino ke faka‵sao latou? Ikai! E se fakalago‵lago foki tatou ki te “ma‵losi o vae o se tagata,” e pelā mo tatou io me ko nisi tino ke maua mai ei te faka‵saoga. (Sala. 147:10NW) I lō te fai penā, e ‵tau mo tatou o olo atu ki a Ieova kae fakamolemole atu ki tena fesoasoani. E ‵kese mai tagata fakatonutonu, e se mafai o fi‵ta a ia i ‵tou fakatagi, faitalia eiloa te akai ‵soko atu o tatou ki a ia mō se fesoasoani. E “fiafia a [Ieova] ki a latou kolā e āva ki a ia, pelā foki mo latou kolā e tali‵tonu i tena alofa tumau.” (Sala. 147:11) E mafai o tali‵tonu tatou me auala i tena alofa tumau, ka piki ‵mau mai kae fesoasoani mai a ia ke fakatakavale ne tatou ‵tou manakoga ‵se.

14. Se a te mea ne fakamalosi aka ei te loto talitonu o te faisalamo?

14 E tuku mai ne Ieova se fakavae ke tali‵tonu tatou me ka fesoasoani a ia ki ana tino māfai ko ma‵nako latou ki ei. I te taimi ne mafaufau ei te faisalamo ki te fakafouga o Ielusalema, ne usu atu a ia e uiga ki a Ieova: “E tausi ne ia ou mataloa ke ma‵losi; e fakamanuia foki ne ia ou tino. E tausi ne ia a tuakoi o tou fa‵kai ke saogalemu.” (Sala. 147:13, 14) Ko oko eiloa i te fakamalosi loto ki te faisalamo ke iloa atu i a Ieova e fakamalosi ne ia a mataloa o te fa‵kai ke puipui ei ana tino tapuaki!

E fesoasoani mai pefea te Muna a te Atua māfai ko ‵numi tatou i tofotofoga? (Ke onoono ki palakalafa 15-17)

15-17. (a) Ne a lagonaga e mafai o maua ne tatou i nisi taimi e uiga ki tofotofoga e fe‵paki mo tatou, kae ne fakaaoga pefea ne Ieova tena Muna ke fesoasoani mai? (e) Fakamatala mai te auala e ‘tele makini ei te Muna a te Atua.’

15 E mafai o fakafesagai atu koe ki mea faiga‵ta kolā ka fai ei ke manavase koe. E mafai o tuku atu ne Ieova te poto ke fa‵ki koe i ei. Ne faipati te faisalamo e uiga ki tena Atua telā “e fai ne ia tena fakatonuga ki te lalolagi; a tena muna e tele makini.” Mai te fakasino atu ki a Ieova e pelā me ‘aumai ne ia te kiona, e fakasalalau ne ia te sau ‵moko, kae faka‵to ifo ne ia a vaiua fatu,’ ne fesili atu te faisalamo: “Ko oi e mafai o kufaki i tena ‵moko?” Ne toe fakaopoopo mai ne ia i a Ieova “e fai atu ne ia tena muna, ko liuvai i ei.” (Sala. 147:15-18NW) A te ‵tou Atua poto kae malosi katoatoa, telā e pule i te kiona mo vaiua fatu, e mafai ne ia o fesoasoani atu ke fakafesagai atu koe ki so se fakalavelave e fepaki mo koe.

16 I aso nei, e takitaki tatou ne Ieova ki tena Muna, ko te Tusi Tapu. A ko “tena muna e tele makini” telā e fakaasi mai i te toka ‵lei o ia ke tuku mai te takitakiga faka-te-agaga i so se taimi e ma‵nako tatou ki ei. Mafaufau ki mea aoga e maua ne koe mai te faitauga ki te Tusi Tapu, sukesuke ki tusi a te “tavini fakamaoni kae poto,” te onoono ki te JW Broadcasting, onoono ki te fakatuatusi ko te jw.org, sau‵tala mo toeaina, kae ‵kau fakatasi mo taina Kelisiano. (Mata. 24:45) E a, e lavea ne koe a te makini o te auala e tuku atu ei ne Ieova a tena takitakiga ki a koe?

17 Ne iloa ne Simone te malosi o te Muna a te Atua. Ne mafaufau tou fafine i a ia e se aoga, kae ne fakalotolotolua foki ki te maua ne ia o te taliaga a Ieova. Kae i taimi e loto vāivāi ei a ia, ne  tumau eiloa a ia i te ‵talo, kae ‵fuli atu ki a Ieova mō se fesoasoani. Ne fakalavelave faeloa i te faiga o ana sukesukega totino ki te Tusi Tapu. Ne fai mai tou fafine, “I so se tulaga faigata ne oko au ki ei, ne maua faeloa ne au a fakamalosiga mo te takitakiga a Ieova.” Ne fesoasoani atu te mea tenei taumafai o fakatumau ne ia se kilokiloga ‵lei.

18. E iloa pefea ne koe i te Atua e pili atu ki a koe, kae ne a pogai e ‵tau ei o kalaga atu koe “‵Viki ki a Ioa!”?

18 Ne iloa ne te faisalamo a te tu ‵kese o tino o te Atua i aso mua. Ko latou fua te fenua ne tuku atu ki ei a “pati” a te Atua mo “tulafono fo‵liki mo fakamasinoga.” (Faitau te Salamo 147:19, 20, * NW) I aso nei, ko oko eiloa i te taulia o tatou ke fai pelā mo tino fua kolā e fakaigoa ki te igoa o te Atua i aso nei. Mai te iloa ne tatou a Ieova kae fakagalue tena Muna, ka mafai ei o fia‵fia tatou i te tauliaga ke fai taugasoa tatou mo ia. E pelā mo te tino ne tusi ne ia te Salamo 147, e mata, e maua ne koe a pogai e uke ke “‵Viki ki a Ioa!” kae fakamalosi atu a nisi tino ke fai foki penā?

[Fakamatalaga mai lalo]

^ pala. 18 Salamo 147: 19, 20NW: E folafola atu ne ia ana pati ki a Iakopo, Ana tulafono fo‵liki mo fakamasinoga ki Isalaelu. Ne seki fai eiloa ne ia se mea penā ki se isi fenua; E seai se lotou mea e iloa e uiga ki ana fakamasinoga. ‵Viki atu ki a Ioa!