Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Ne Ofo Atu a Latou Eiloa mo te Loto Fia‵fia

Ne Ofo Atu a Latou Eiloa mo te Loto Fia‵fia

E AOFIA i Molimau loto finafinau kolā ne olo o tavini atu i fenua e manakogina malosi atu ei a tino talai o te Malo, ne tuagane ‵nofo taka e tokouke. Nisi o latou ko leva ne tavini atu i se fia o tausaga. Se a te mea ne fesoasoani ki a latou i tausaga ko ‵teka ke fia‵fia o tavini atu i fenua fakaa‵tea? Se a te mea ne tauloto ne latou mai te tavini atu i fenua fakaa‵tea? Ne fai pefea olotou olaga i fenua konā? Ne fakasau‵tala ne matou a nisi tuagane ata‵mai. Kafai koe se tuagane nofo taka kae fiafia o tavini atu mo te loto fiafia, e iloa ne matou me ka aoga ki a koe a tala o latou konei. E tonu, ka aoga katoa ki tino o te Atua a olotou fakaakoakoga.

MANUMALO MAI TE FAKALOTOLOTOLUA

Anita

E mata, kai mafaufau koe ki te auala e mafai o manumalo ei se tuagane nofo taka kae paenia i se fenua fakaa‵tea? A Anita, telā ko 70 tupu nei ana tausaga, ne fakalotolotolua ‵ki e uiga ki mea e mafai o fai ne ia. Ne tupu aka a ia i Egelani i te koga ne kamata o paenia ei kae koi 18 fua ana tausaga. “Au e fiafia o akoako a tino e uiga ki a Ieova,” ko ana muna, “kae e se talitonu au me mafai ne au o tavini atu i se fenua fakaa‵tea. Ne seki tauloto aka loa au ki se ‵gana fakaa‵tea kae talitonu au me e se mafai foki eiloa o iloa ne au. Ne poi malosi au i te taimi ne maua ne au se ‵kamiga ki te Akoga i Kiliata. Ne seki talitonu au me e mafai ne se tino e se tāua penei mo au o maua a te tauliaga tenā. Kae ne mafaufau au, ‘Kāfai e mafaufau a Ieova me e mafai ne au o fai a te mea tenā, ka taumafai eiloa au o fai penā.’ Kae ne tupu a te mea tenā i te 50 tausaga ko ‵teka. I te taimi ne tavini ei au fakamisionale i Tiapani.” Ne toe fai mai a Anita: “I nisi taimi, e faka‵kivi atu fua toku mata ki tuagane, ‘Fakatoka i a tatou ka olo i se malaga gali ‵ki telā ka sē mafai eiloa o puli i otou olaga, ke paenia i se fenua fakaa‵tea!’ Ko oko eiloa i toku fiafia, me e tokouke ko oti ne fai penā.”

FAKAMALOSI AKA TE LOTO MALOSI

I te taimi muamua, ne seki ma‵nako a tuagane e tokouke ke olo o tavini atu i fenua fakaa‵tea. Kae ne maua pefea ne latou te loto malosi?

Maureen

“I taku tupuakaga, ne manako malosi au ke aoga toku olaga ke fesoasoani atu ki nisi tino,” ko pati a Mau-reen, telā ko ono sefulu tupu nei ana tausaga. I te taimi ko 20 tupu ei ana tausaga, ne fano ei a ia ki Quebec, i Kanata, te koga e manakogina malosi i ei a paenia. “Fakamuli ifo, ne maua ne au toku ‵kamiga ke kau ki te Akoga i Kiliata, kae ne mataku au ma fano ki koga e se iloa ne au a tino i ei, kae ke fano au e aunoa mo oku taugasoa.” Ne toe fai mai a ia: “Ne manavase foki au ma tiaki toku mātua telā e tausi atu ki toku  tamana telā e masaki. I te ukega o po, ne ‵talo atu au kae tagi ki a Ieova e uiga ki oku fakalavelave konei. I te taimi ne fai‵pati au mo oku mātua e uiga ki oku fakalavelave, ne fakamalosi mai laua ke talia ne au te ‵kamiga. Ne lavea ne au te ‵lago malosi o te fakapotopotoga ki oku mātua. A te lavea atu o te lima atafai o Ieova ne fesoasoani mai ki a au ke talitonu me ka tausi mai foki ne Ia au. I te taimi nei, au ko toka o fano!” Talu mai i te 1979, ne tavini atu ei a Maureen fakamisionale i tausaga e silia atu mo te 30 i West Africa. I aso nei, koi paenia fakapito eiloa a Maureen kae tausi atu foki loa ki tena mātua i Kanata. Mai te mafaufau ki tausaga ne tavini atu ei a ia i fenua fakaa‵tea, ne fai mai a ia: “E toka faeloa a Ieova o fakamalie ne ia toku manakoga i so se taimi e manako au ki ei.”

Wendy

A Wendy, telā ko 60 tupu nei ana tausaga, ne kamata o paenia i Ausetalia i te taimi koi talavou ei a ia. Ne fai mai a ia: “I te taimi tenā, au e mata mā ‵ki kae faigata o faipati ki se tino e se masani mo au. Kae ne akoako mai ne te galuega fakapaenia, ke mafai ne au o sau‵tala mo so se tino, tenā ne malosi ei au kae ko se mā foki. Fakamuli, ko sē toe fakalavelave mai ki a au te mā. A te galuega fakapaenia ne akoako mai ke fakalagolago au ki a Ieova, kae ko kamata au o fiafia ke tavini atu i fenua fakaa‵tea. Au ne ‵kami ne se tuagane nofo taka telā ko 30 tupu ana tausaga i te taviniga fakamisionale i Tiapani, ke fanatu o talai i konā mō se 3 masina. A te ga‵lue fakatasi mo ia ne fakamalosi ei toku fia tavini atu i se fenua fakaa‵tea.” I te kogāloto o te 1980, ne fanatu ei a Wendy ki Vanuatu, se fenua e 1,100 maila (1,770 km) ki te saegala o Ausetalia.

A Wendy koi nofo nei eiloa i Vanuatu, kae ko tavini atu i te ofisa ‵fulitusi i konā. “A te lavea atu o potukau mo fakapotopotoga ‵fou i fenua i tua, ko te ‵toe mea fakafiafia eiloa ki a au,” ko ana pati. “A te faiga o se tamā tusaga i te galuega a Ieova i nisi fenua penei, se tauliaga fakaofoofogia telā e se mafai o fakamatalagina.”

Kumiko (i te kogaloto)

A Kumiko telā ko 60 tupu nei ana tausaga, ne tavini atu e pelā me se paenia tumau i Tiapani i te taimi ne fai atu tena soa ke na ga‵sue laua ki Nepal. “Ne fakamolemole fakafia mai a ia ke ga‵sue māua ki Nepal, kae ne tali atu faeloa au ki a ia, Ikai,” ko pati a Kumiko. “Ne manavase malosi au ma tauloto ki se ‵gana fou mo te fakatautau ki te olaga i konā. E ‵tai faigata foki loa ke maua ne tupe mō ola i se fenua fou. I te taimi ne manavase au ki mea konei, ne tupu se fakalavelave ki a au mo taku pasika kae ne ulu ei au i te fa‵kaimasaki. I konā eiloa, ne mafaufau au, penei: ‘Ko oi iloagina ne ia te suā mea e mafai o tupu ki a au? E mafai au o masaki malosi kae sē maua ne au te avanoaga ke fano au o paenia. E mata, e mafai au o fano o tavini atu mō se tausaga fua e tasi?’ Ne ‵talo malosi au ki a Ieova ke fesoasoani mai ke fano au.” Mai tua o te ‵talamaiga ki tua mo te fa‵kaimasaki, ne asi atu a Kumiko ki Nepal, kae fakamuli, olo ei laua mo tena soa ki te koga tenā.

A te mafaufau ki te sefulu tausaga ko ‵teka i te taviniga i Nepal, ne fai mai a Kumiko, penei: “A fakalavelave kolā ne manavase malosi au ki ei ne ‵vae keatea i oku  mua e pelā mo te Tai ‵Kula. Ne fiafia malosi au me ne tavini atu au i se koga e manakogina malosi a tino talai i ei. I taimi e uke e talai atu ei te tala ‵lei mai te Tusi Tapu ki se kāiga, e tokolima io me tokoono a tuakoi e au‵mai o fakalogo‵logo. Ke oko foki ki tamaliki fo‵liki e au‵mai foki i se auala āva ke maua ne latou a tamā pepa e uiga ki te Tusi Tapu. Se mea fakafiafia ke maua a tino fia‵fia ki te tala ‵lei i kogā koga penā.”

TE FAKAFESAGAI ATU KI FAKALAVELAVE

E seai se fakalotolotolua, me i tuagane ‵nofo taka loto ma‵losi konei kolā ne fakasau‵tala, ne fe‵paki foki mo fakalavelave. Kae ne fakafesagai atu pefea latou ki fakalavelave konā?

Diane

“A te mea muamua, se mea faigata ki au ke nofo mavae au mai oku kāiga,” ko pati a Diane, mai Kanata. Kae nei ko 60 tupu ana tausaga, kae koi tavini atu loa a ia e pelā me se misionale i Ivory Coast (nei ko Côte d’Ivoire) mō se 20 tausaga. “Ne fakamolemole au ki a Ieova ke fesoasoani mai ke alofa au ki tino i koga e tavini ei au. Ne fai mai se tokotasi o faiakoga i Kiliata, ko te Taina ko  Jack Redford, me e mafai eiloa o mana‵vase matou io me ‵poi ki tulaga o te olaga i koga e tavini ei matou, maise eiloa i te taimi e fakafesagai tonu atu matou ki te olaga mativa. Kae ne fai mai a ia: ‘Sa saga ki te olaga ma‵tiva. ‵Saga ki tino, ‵kilo tonu atu ki olotou mata. Onoono faka‵lei ki te auala e ‵saga mai ei māfai ko lagona ne latou te muna‵tonu mai i te Tusi Tapu.’ Kae tenā eiloa te mea ne fai ne au! Kae se fakamanuiga lasi ki a au! I te taimi ne talai atu au e uiga ki te tala fakamafanafana e uiga ki te Malo, ne lavea ne au te fiafia i mata o tino!” Se a foki te suā mea ne fesoasoani atu ki a Diane i tena taviniga i fenua fakaa‵tea? “Ne fakapilipili atu au ki aku akoga faka-te-Tusi Tapu kae ne maua ne au te fiafia tonu i te lavea atu o latou ko fai pelā me ne tavini fakamaoni a Ieova. Ko fai nei a te fenua e tavini ei au e pelā me ko toku fenua tonu. Ne maua ne au oku mātua, tamana, taina, tuagane faka-te-agaga, e pelā loa mo te tautoga a Iesu.”—Male. 10:29, 30.

A Anne telā ko 40 tupu nei ana tausaga, e tavini atu nei i Asia, i se koga e fakatapu ei ‵tou galuega. Ne fai mai a ia: “I te ukega o tausaga ne tavini atu ei au i koga kese‵kese, ne ‵nofo au mo tuagane kolā ne ‵mai i fenua kese‵kese mo olotou uiga foki e kese‵kese māfai e faka‵tusa ki a au. I nisi taimi e fai sāle a mea konā ke maua ei a mafaufauga sē ‵lei mo logo‵maega. Kae kafai e ‵tupu a fakalavelave penā, e taumafai malosi au ke fakapilipili atu ki a latou, ke malamalama faka‵lei au i olotou tuu. Ne galue malosi au ke fakaasi atu te alofa mo te loto malamalama ki a latou. Ne iku manuia aku taumafaiga kae ne maua ei ne au ne taugasoa ‵tonu kolā ne fesoasoani mai ke tumau i te tavini atu mō se taimi leva i fenua konā.”

Ute

I te 1993, a Ute mai Siamani, telā ko 50 tupu nei ana  tausaga, ne tavini atu fakamisionale i Madagascar. Ne fakamatala mai ne ia penei: “I te taimi muamua, ne taumafai malosi au o tauloto ki te ‵gana o te fenua tenā, mo te fakamasani atu ki te ‵tau vela, kae puipui foki au mai i te masaki ko te malalia, manu foliki ‵ki kolā e maua i pela mo vai mo ilo. Kae ne maua ne au a fesoasoani e uke. Ne fesoasoani mai ki au mo te kufaki a tuagane, olotou tama‵liki, mo aku akoga faka-te-Tusi Tapu ke tauloto te ‵gana. A toku soa i te galuega fakamisionale ne alofa kae tausi mai ki au i te taimi ne masaki ei au. Kae mai i mea katoa, ko Ieova eiloa ne fesoasoani malosi mai ki au. E fai atu faeloa ne au ki a Ia a mea e manavase au ki ei. Ko faka‵tali ei au—i nisi taimi e lau i aso, i nisi taimi i masina—ke maua ne au a tali ki aku ‵talo. Ne faka‵lei ne Ieova oku fakalavelave.” Ko 23 tausaga nei tausaga ne tavini atu ei a Ute i Madagascar.

E UKE ‵KI A FAKAMANUIAGA I OLOTOU OLAGA

E pelā eiloa mo nisi tino kolā ne tavini atu i koga e lasi te manakoga i ei i fenua fakaa‵tea, e fakamatala mai ne tuagane ‵nofo taka konei, me i te tavini atu i fenua fakaa‵tea ne maua ei ne latou a fakamanuiaga e uke i olotou olaga. Ne a fakamanuiga konā?

Heidi

A Heidi, mai Siamani, telā ko 70 tupu nei ana tausaga, koi tavini atu eiloa fakamisionale i Ivory Coast (nei Côte d’Ivoire) talu mai 1968. Ne fai mai a ia, “A te mea fakafiafia ‵ki ki a au, ko te lavea atu o aku tamaliki faka-te-agaga koi sa‵sale eiloa i te munatonu.’ A nisi akoga faka- te-Tusi Tapu a aku muamua, ko paenia nei kae ko nisi ko toeaina i te fakapotopotoga. E tokouke a latou ko ka‵laga mai sāle ki au Mama io me Tupuna. E tokotasi te toeaina mo tena avaga mo lā tama ko fai pelā me ne kāiga o oku. Tela la, ne tuku mai eiloa ne Ieova ki a au se tama tagata, se fugaono mo mokopuna e tokotolu.”—3 Ioa. 4.

Karen (i te kogaloto)

A Karen mai Kanata, telā ko 70 tupu nei ana tausaga, ne tavini atu i West Africa mō tausaga e sili atu mo te 20. Ne fai mai a ia: “A te olaga fakamisionale ne akoako mai ke talia ne au a mea faiga‵ta, alofa kae ke loto kufaki. E se gata i ei, a te ga‵lue fakatasi mo tino e tokouke kolā ne au‵mai mai fenua kese‵kese ne fai ei ke fakalauefa atu taku kilokiloga e uiga ki a latou. Ne tauloto ne au me e uke a auala kese‵kese e mafai ei o fai se mea. Kae se fakamanuiaga nei ke maua a taugasoa ‵tonu mai te lalolagi kātoa! E tiga loa ko ‵fuli omotou olaga io me ko kogā koga e tavini atu ei matou, kae ko te vā fakataugasoa o matou koi tumau eiloa.”

A Margaret, mai i Egelani, telā 70 tupu nei ana tausaga, ne tavini atu i Laos. Ne fai mai a ia: “A te tavini atu i fenua fakaa‵tea ne fai ei ke lavea tonu eiloa ne au te auala e ‵taki mai ei ne Ieova a tino mai fenua mo olaga kese‵kese ki tena fakapotopotoga. A te mea tenā e fakamalosi ne ia toku fakatuanaki. E tuku mai ei ki a au se loto talitonu katoatoa i a Ieova e takitaki ne ia tena fakapotopotoga kae ko ana fuafuaga ka fakataunu eiloa.”

E tonu, ne fakatakato ne tuagane ‵nofo taka kolā e tavini atu i fenua fakaa‵tea se fakamaoniga gali o te taviniga faka-Kelisiano. E fakamālō atu tatou ki a latou. (Fama. 11:40) Kae se mea fakafiafia me ko gasolo o uke te aofaki o latou. (Sala. 68:11) E mata, e mafai ne koe o iloilo aka a ou fakanofonofoga kae tautali ki fakaakoakoga a tuagane loto finafinau konei ne fakasau‵tala atu i te mataupu tenei? Kāfai e mafai koe o fai penā, e seai se fakalotolotolua me ka mafai eiloa ne koe o “‵tami kae onoono i a Ieova e aga‵lei.”Sala. 34:8.