Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Ianuali 2017

E Mafai ne Koe o Tumau i te Uiga Agamalu Mai Lalo i Tofotofoga

E Mafai ne Koe o Tumau i te Uiga Agamalu Mai Lalo i Tofotofoga

“Sa‵sale i te agamalu fakatasi mo te ‵tou Atua!”MIKA 6:8, NW.

PESE: 48, 80

1-3. Se a te mea ne fakatamala ei te pelofeta mai Iuta o fai, kae se a te mea ne iku mai i ei? (Ke onoono ki te ata i te kamataga.)

E ISI se taimi i te vaitaimi ne pule i ei a te tupu ko Ielopoamo, ne uga ne Ieova se pelofeta mai Iuta ke fakaoko atu se fekau fakamasiasi e fakamasino ei te tupu ‵teke tenā o Isalaelu. Ne fakaoko atu mo te agamalu ne te pelofeta fakamaoni tenei a te fekau a te Atua, kae ne puipui ne Ieova a tena tavini mai i faifaiga fakasāua a Ielopoamo ona ko te kaitaua.1 Tupu 13:1-10.

2 I tena auala o foki ki tena fale, ne fetaui fakapoi a te pelofeta mo se toeaina mai i te fakai pili ko Peteli. Ne fai atu te toeaina i a ia se pelofeta foki a Ieova. Ne fakatogafiti ne ia te pelofeta tenei ke sē fakalogo ki te fakatonuga a Ieova ke mo a e ‘kai ki se falaoa io me inu ki se vai i Isalaelu’ kae ‘ke se foki i te auala ne vau ei a ia.’ Ne seki fiafia a Ieova. I tena auala foki atu ki tena fale, ne fanatu se leona i te auala tenā tamate ei ne ia te pelofeta a Ieova.1 Tupu 13:11-24.

3 Kaia a la ne fakamatamata ei te pelofeta agamalu tenei o olo fakatasi mo te toeaina matua faitogafiti? E se fakaasi mai i te Tusi Tapu. Kae kāti ne puli lele i a ia me ‵tau mo ia o ‘sasale i te agamalu  fakatasi mo te Atua.’ (Faitau te Mika 6:8, NW *) I te Tusi Tapu, a te sa‵sale fakatasi mo Ieova e fakauiga ki te talitonu ki a ia, ‵lago ki tena pulega sili, kae tautali i tena takitakiga. A te tino agamalu e manako malosi ke iloa aka ne ia me e mafai kae ‵tau foki mo ia o fesokotaki faeloa mo tena Tamana alofa kae malosi katoatoa. Ne mafai o fesili atu te pelofeta ki a Ieova ke fakapa‵tonu aka te mea tenā, kae seki fai mai i te Tusi Tapu me ne fai a ia penā. I nisi taimi, e fe‵paki foki tatou mo fakaikuga faiga‵ta penā, kae sē lavea ‵lei ne tatou te auala tonu e ‵tau o fai ei penā. A te ‵sala atu mo te agamalu ki te takitakiga a Ieova ka fesoasoani mai ke ‵kalo keatea tatou mai te faiga o mea ‵se matagā.

4. Ne a mea ka tauloto ne tatou i te mataupu tenei?

4 I te mataupu mai mua, ne tauloto tatou ki te pogai koi tāua eiloa te uiga agamalu mō Kelisiano mo te auala ke fakaasi atu ne tatou. Ne a tulaga e mafai o tofotofo aka ei te uiga agamalu o tatou? Kae e mafai pefea o ati aka ne tatou a uiga kolā e manakogina, ke fakatumau ei a te agamalu i taimi faiga‵ta? Ke tali aka a fesili konei, ka sau‵tala eiloa tatou ki fakanofonofoga masani e tolu kolā e mafai o tofotofogina i ei te ‵tou uiga agamalu, kae ka onoono tatou ki te auala e mafai ei ne tatou o fakafesagai atu mo te poto ki fakanofonofoga takitasi konā.Faata. 11:2.

MĀFAI KO MA‵FULI ‵TOU FAKANOFONOFOGA

5, 6. Ne fakaasi atu pefea ne Pasilai te uiga agamalu?

5 A te fakama‵fuliga ki ‵tou fakanofonofoga totino io me ko tōfiga e mafai o tofotofo i ei te ‵tou uiga agamalu. I te taimi ne fakamolemole atu ei a Tavita ki te toeaina ko Pasilai telā ko 80 ana tausaga ke talia tena ‵kamiga ki te palesi o te tupu, ne mafai eiloa o fakaaloalogina a Pasilai. Kafai e talia ne ia te ‵kamiga a Tavita, ka mafai foki ei o tumau te feskotakiga ‵pili o lāua mo te tupu. Kae ne seki talia ne Pasilai. Kaia? Ona ko ia ko matua, ne fai atu a ia ki a Tavita me e se manako a ia o fakafi‵ta atu ki te tupu. Telā ne filifili ei ne Pasilai a Kimeama, se tokotasi o ana tama ta‵gata, ke sui ne ia tou tagata.2 Samu. 19:31-37.

6 Ne fesoasoani atu te uiga agamalu ki a Pasilai ke fai ne ia se fakaikuga poto. Ne seki talia ne ia te ‵kamiga a Tavita ona fua ko te mafaufau me e se maua ne ia o fai a tiute io me ko manako a ia o manava malie ona ko te matua. Kae ko te tonuga loa, ne iloa ‵lei kae talia foki ne ia a ‵fuliga ki ana fakanofonofoga penā foki mo ana tapulā. Ne seki manako a ia o fai a mea kolā e silia atu mo tena malosi. (Faitau te Kalatia 6:4, 5.) Kafai e fakatāua ne tatou a tōfiga, te fia maluga, io me ko te fia takutakua, ka fakamāfua aka i ei te fia fai tavaega, fakatau‵fai, kae iku atu fakamuli ki te fanoanoa. (Kala. 5:26) Kae e fesoasoani mai eiloa te uiga agamalu ke ‵saga tonu atu tatou ki taumafaiga e mafai o fai ne tatou ke faka‵malu ei te Atua kae fai foki te ‵toe mea e mafai o fai ke fesoasoani atu ki nisi tino.1 Koli. 10:31.

7, 8. E fesoasoani mai pefea te uiga agamalu ke ‵kalo keatea tatou mai te fakalagolago ki a tatou eiloa?

7 A tiute tai lasi atu e masani o mai ‵tasi mo se pulega foki e tai lasi, kae e mafai o tofotofo aka ei ‵tou uiga agamalu. I te logoga a Neemia i te tulaga faigata ne oko ki tino i Ielusalema, ne ‵talo atu a ia mo te loto finafinau ki a Ieova. (Nee. 1:4, 11) Ne oko mai te fakamanuiaga a Ieova i te taimi ne fili ei ne te tupu ko Aletaseta a Neemia mo fai te kovana. Kae faitalia tena tulaga maluga, maumea, kae fakaaloalogina, ne seki fakalagolago lele eiloa a Neemia ki tena iloa mo tena atamai. Ne sa‵sale fakatasi faeloa a ia mo te Atua. Ne tumau a ia  i te ‵sala atu ki te takitakiga a Ieova mai i te sukesuke ki tulafono a te Atua. (Nee. 8:1, 8, 9) Ne seki fia pule atu a Neemia ki luga i nisi tino; kae ne tavini atu eiloa a ia ki te mea e mafai ne ia o fai.Nee. 5:14-19.

8 Ne fakaasi mai ne te fakaakoakoga a Neemia a te auala e mafai o fesoasoani mai ei te uiga agamalu ke mo a ma fakalagolago ki a tatou eiloa, māfai ko isi ne fakama‵fuliga ki ‵tou tōfiga io me ko maua ne tatou ne tiute fakaopoopo. A te fakalagolago ki te iloa totino e fai ei ke kamata o saga atu se toeaina ki fakalavelave i te fakapotopotoga e aunoa mo te ‵talo muamua atu ki a Ieova. A nisi tino e fai muamua olotou fakaikuga ko ‵talo atu ei ki a Ieova ke fakamanuia atu. E mata, tenā te agamalu? A te tino agamalu ka masaua faeloa ne ia tena tulaga i mua o Ieova penā foki mo tena tiute i fakatokaga a te Atua. Ke masaua me se mafai o ‵pau a ‵tou atamai mo Ieova. Maise eiloa māfai ko fe‵paki tatou mo se fakalavelave ko masani tatou ki ei, e ‵tau o fakaeteete ke mo a eiloa e fakalagolago ki a tatou eiloa. (Faitau te Faataoto 3:5, 6.) E pelā me ne tino i te kaukāiga o te Atua, e tauloto tatou ke mafau‵fau ki te auala e fakataunu ei a tiute i se kāiga io me i te fakapotopotoga i lō te fai pelā mo tino o te lalolagi kolā e taumafai ke maua se tōfiga io me avaka malie ki se tōfiga maluga i se galuega ‵togi.1 Timo. 3:15.

TE MAUAGA O PATI FAKATAUEMU IO ME KO TAVAEGA

9, 10. E fesoasoani mai pefea te uiga agamalu ke fakafesagai atu ki pati fakatauemu?

9 E mafai eiloa o faigata ke pule atu ki ‵tou lagonaga māfai ko fakafesagai atu ki pati fakatauemu. Ne tagi faeloa a Hana i a Penina, tena fili, mo te fakaitaita atu ki a ia. Ne alofa te avaga a Hana ki a ia, kae ko ia la e se fanau. Fakamuli ifo, i te taimi ne ‵talo ei a ia i te faleie tapu, ne ‵losi ‵se atu te Faitaulaga Sili ko Eli i a ia e konā. Mafaufau aka la! Faitalia a mea katoa konā, ne taofiofi ne te fafine agamalu tenei ko Hana ana lagonaga kae ne tali atu mo te āva ki a Eli. A te ‵talo fakaotia loto a ia ne fakamau ki loto i te Tusi Tapu. Se fakaasiga lasi ‵ki o te fakatuanaki, tavaega, mo te loto fakafetai.1 Samu. 1:5-7, 12-16; 2:1-10.

10 E mafai foki ne te uiga agamalu o fesoasoani  mai ke “fakatakavale faeloa . . . a te masei ki te ‵lei.” (Loma 12:21) E mauagatā o ‵tonu a faifaiga i te fakanofonofoga a Satani, kae e manakogina ke taua atu tatou o ‵teke ki te lagonaga kaitaua ona ko faifaiga a tino ma‵sei. (Sala. 37:1) Kafai ko ‵sae aka a fakalavelave i vā o taina mo tuagane faka-te-agaga, e siliga atu te ‵mae tenā. Kae ko te tino agamalu ka fakaakoako atu eiloa ki a Iesu. “I taimi ne pati masei atu ei ki a ia,” e fai mai te Tusi Tapu, “ne seki taui atu ne ia ki pati ma‵sei . . . , kae ne tuku atu faeloa ne ia a ia ki te tausiga a te tino telā e fai ne ia a fakamasinoga ‵tonu.” (1 Pe. 2:23) Ne iloa ne Iesu i te taui ma sui i a Ieova. (Loma 12:19) E fakamalosi atu foki penā ki Kelisiano ke loto maulalo kae “ke se taui atu te masei ki te masei.”1 Pe. 3:8, 9.

11, 12. (a) E fesoasoani mai pefea te uiga agamalu ke fakafesagai atu tatou ki pati takolekole io me ko tavaega kolā ko tō silia? (e) E fesoasoani atu pefea a te uiga agamalu ki ‵tou filifiliga e uiga ki gatu mo teuga penā foki mo ‵tou faifaiga?

11 A pati takolekole io me ko tavaega kolā ko tō silia e mafai o tofotofo foki ei te ‵tou uiga agamalu. Mafaufau ki te auala ne saga atu ei a Eseta ki pati tavae i te okoatuga ki tena taimi i se faigamea. Ne tu ‵kese eiloa tena gali kae ne teuteu a ia ki mea fakagaligali mō se tausaga e tasi. Ne ‵nofo faeloa a ia i aso katoa mo tamafine mata‵gali mai i te emupaea o Pelesia kolā ka fakatau‵fai ke fili ne te tupu. Kae ne tumau a ia i ana uiga āva kae filemu. Ne seki fakamatamata a ia io me ne fia maluga mai tua o tena filiga ke fai mo fai te avaga a te tupu.Eseta 2:9, 12, 15, 17.

E mata, e fakaasi atu i ‵tou gatu mo teuga me e āva tatou ki a Ieova mo nisi tino, io me fakaasi atu ei te sē lava o te uiga agamalu? (Ke onoono ki te palakalafa e 12)

12 E fesoasoani mai faeloa a te uiga agamalu ke fai ‵tou gatu, tēuga, mo ‵tou uiga i se auala ‵lei kae āva. E masaua ne tatou me ‵tau o ‵futi mai ne tatou a loto o tino, e se mai i te fakamatamata io me ko te ‵saga ifo loa ki a tatou eiloa, kae mai i te fakaasiatuga o te ‘agaga filemu mo te agamalu.’ (Faitau te 1 Petelu 3:3, 4; Iele. 9:23, 24) A uiga fakamata‵mata i ‵tou loto ka ‵sae aka fakamuli i ‵tou faifaiga. E pelā me se fakaakoakoga, e mafai ne tatou o pati faka‵logo me e maua ne tatou a tauliaga fakapito, e iloa ne tatou a mea ‵funa, io me maua ne tatou se fesokotakiga ‵pili mo taina tōfia. Io me e mafai o fakamatala atu ne tatou se mea i se auala ke maua fua i ei ne tatou a tavaega mai manatu io me ko galuega kolā e isi foki ne tusaga o nisi tino ne fai ki ei. Kae ne tuku mai ne Iesu se fakaakoakoga gali. A vaega ‵gali o ana pati ne fai, ne siki mai io me ne fakamatala mai ne ia mai i Tusitusiga Epelu. Ne faipati a ia i se auala telā e mafai o iloa ne ana tino fakalogo‵logo i pati e fai ne ia ne mai i a Ieova kae sē ko tena iloa io me ko tena poto.Ioa. 8:28.

FAKAFESAGAI ATU KI TE UIGA FAKALOTOLOTOLUA

13, 14. E fesoasoani mai pefea te uiga agamalu ke mafai ne tatou o fai a fakaikuga kolā e tai ‵lei atu?

13 A te suā tofotofoga o te ‵tou uiga agamalu ko te faiga o fakaikuga. I te taimi ne nofo ei te apositolo ko Paulo i Kaisaleia, ne fai atu te pelofeta ko Akapasi me kafai e tumau loa a ia i tena malaga ki Ielusalema, a ia ka pikifao. E mafai foki o iku atu ki te tamate. Ona ko te ma‵taku va‵lea, ne fakamolemole atu a taina ki a Paulo ke sē fano. Kae ne seki ‵tuka te loto o Paulo. Ne seki talitonu katoatoa foki ki a ia eiloa io me ne faka‵mate i te mataku. Ne talitonu katoatoa a ia ki a Ieova kae ne toka a ia o fai so se tōfiga, telā e tuku atu ne Ieova ke fai ne ia. I te lagonaga ne latou te mea tenei, ne fakagata ne taina mo te agamalu a te lotou faka‵tuka atu ki te fakaikuga a Paulo ke fano ki Ielusalema.Galu. 21:10-14.

14 E mafai foki ne te uiga agamalu o fesoasoani mai ke fai ne tatou a fakaikuga ‵lei faitalia me sē malamalama ‵lei io me sē mafai ne tatou o pule faka‵lei atu ki ikuga o ‵tou mea e fai. E pelā me se fakaakoakoga, kafai ko ‵kau atu tatou ki se vaega o te taviniga tumau, se a te mea ka tupu māfai ko ma‵saki tatou? E a māfai ko manakogina ne ‵tou mātua kolā ko ma‵tua a ‵tou fesoasoani? Ka tausi pefea tatou māfai ko ma‵tua? E seai se aofaki o ‵talo io me  ne sukesukega e mafai o fakaasi mai ei a tali mautinoa ki fesili konei. (Fai. 8:16, 17) A te ‵tou tali‵tonu ki a Ieova ka fesoasoani mai ke sē gata fua i te iloa kae ke talia foki ne tatou a ‵tou tapulā. Mai tua o te faiga o sukesukega, sau‵tala mo nisi tino, kae ‵talo atu mō te takitakiga, e ‵tau mo tatou o gasue‵sue i te auala telā e takitaki ei tatou ne te agaga tapu o te Atua. (Faitau te Failauga 11:4-6.) Ka fai ei ke tuku mai ne Ieova se fakamanuiaga, io me ka mafai o fakamafuli malie ne ia a ‵tou fakamoemoega.Faata. 16:3, 9.

KE ATI AKA TE UIGA AGAMALU

15. E fesoasoani mai pefea a te mafaufau ki a Ieova ke tumau tatou i te loto maulalo?

15 Ona ko te agamalu e uke ana aoga, e mafai pefea o tai fakamalosi aka ne tatou? Ke onoono tatou ki auala e fa. Muamua la, ka ati aka ne tatou se uiga agamalu lasi mo te fakaaloalo ki a Ieova māfai e fakaasi atu ne tatou mo te loto fakafetai a te uke mo te ma‵luga o ana uiga mo tena tulaga. (Isa. 8:13) Masaua, e sa‵sale fakatasi tatou mo te ‵tou Atua Malosi Katoatoa, kae e sē se agelu io me se tagata. A te masaua faeloa o te mea tenā ka fai ei ‘ke loto mau‵lalo tatou mai lalo i lima ‵mafi o te Atua.’1 Pe. 5:6.

16. E fakamalosi aka pefea a tatou ne te mafaufau ‵loto ki te alofa o te Atua ke uiga agamalu?

16 Te lua, ko te mafaufau ‵loto ki te alofa o Ieova ka fesoasoani mai ke ati aka te uiga agamalu. Ne tusi mai te apositolo ko Paulo me i a Ieova e “fakatāua malosi” ne ia a vaega o te foitino kolā e se tāua malosi. (1 Koli. 12:23, 24) I se auala tai ‵pau, e atafai mai a Ieova ki a tatou taki tokotasi faitalia ‵tou tapulā. E se mafai ne ia o fakatusa‵tusa tatou ki nisi tino, io me taofi aka tena alofa mai i a tatou māfai ko fai ne tatou a mea ‵se. Ona ko te alofa o Ieova, e maua ne tatou te lagonaga saogalemū māfai e tavini atu tatou i tena kaufale.

17. E aoga pefea ki a tatou a te ‵kilo atu faeloa ki mea ‵lei i nisi tino?

17 Te tolu, a te loto fakafetai ki ‵tou tulaga i te taviniga ki a Ieova ka gasolo ki mua māfai e fakaakoako tatou ki te ‵tou Atua, kae ‵kilo atu ki mea ‵lei i nisi tino. I lō te fia fai ke lavea tatou io me ke fai faeloa ke pule‵pule tatou, ka fakaasi atu eiloa ne tatou te uiga agamalu māfai e ‵sala atu tatou ki te fesoasoani o nisi tino kae taliagofie olotou manatu. (Faata. 13:10) Ka fia‵fia fakatasi tatou māfai ko maua ne latou a tauliaga. Kae ka tavae ne tatou a Ieova māfai ko lavea ne tatou a te auala e fakamanuia ei ne ia a “taina i te lalolagi kātoa.”1 Pe. 5:9.

18. E mafai pefea o akoako ne tatou ‵tou loto lagona ke maua te uiga agamalu mai te Atua?

18 Ako te fa, a ‵tou uiga agamalu ka fakamalosi aka i te taimi e akoako ei a ‵tou loto lagona ki fakatakitakiga mai te Tusi Tapu. Ka ati aka ne tatou se faka‵tauga ‵lei mai te tauloto mo te agamalu ke lavea ne tatou a mea mai i te kiloga a Ieova. E auala i te sukesuke faeloa, ‵talo, kae fakagalue a mea ne tauloto ne tatou, ka mafai ei o fakamalosi malielie ne tatou a ‵tou loto lagona. (1 Timo. 1:5) E tauloto tatou ke fakamuamua a nisi tino. Kafai e fai ‵tou tusaga, e tauto mai a Ieova me ka ‘fakakatoatoa ne ia ‵tou akoakoga,’ kae fesoasoani mai ke ati aka ne tatou te uiga agamalu mo nisi uiga fakaatua.1 Pe. 5:10.

19. Se a te mea ka fesoasoani mai ki a tatou ke tumau i te uiga agamalu ki te se-gata-mai?

19 A te tamā fakamatamata ne galo atu ei te ola o te pelofeta mai Iuta telā e seki taku mai tena igoa penā foki mo te tulaga ‵lei o ia i mua o te Atua. Kae e mafai eiloa o agama‵lu tatou mai i lalo i tofotofoga. A tavini fakamaoni i aso mua mo tino agama‵lu i aso nei, ne fakamaoni mai ne latou me e mafai o fai penā. Ko te lasi o te ‵tou sa‵sale fakatasi mo Ieova, ko te lasi foki o te ‵tou agamalu. (Faata. 8:13) Faitalia a ‵tou tulaga i aso nei, a te sa‵sale fakatasi mo Ieova se tauliaga gali telā e se fakanafagina. Ke fakatāua te tulaga ‵malu tenā, kae ke tumau i te fai o te ‵toe mea e mafai o fai ke sa‵sale i te agamalu fakatasi mo Ieova ke oko loa ki te se-gata-mai.

[Fakamatalaga mai lalo]

^ pala. 3 Mika 6:8NW: “Ne fai atu ne ia ki a koe a te mea ‵lei, e te tagata. Kae se a te mea e manako ki ei a Ieova mai i a koe? Ke fai fua ne koe te fakamasinoga tonu, ke fakatāua te fakamaoni, Kae ke sasale i te agamalu fakatasi mo tou Atua!”