Ne aveave pefea a te afi i aso mua?

E FAI mai te tala i te Tusi Tapu i te Kenese 22:6, NW, me i te taimi ne fakatoka ei se taulaga i se koga ‵mao, ne puke ne Apelaamo “a fafie mō te taulaga ‵sunu kae tuku atu ki tena tama ko Isaako. Kae e puke i ana lima a te afi mo te naifi, kae ne sa‵sale fakatasi atu lāua.”

E se fakamatala mai i te Tusi Tapu a te auala ne fakaaoga ke faka‵ka i ei a te afi i aso mua. E uiga ki te fesili tenei, kāti ne fakamatala mai ne se tino tusitala e tokotasi me “moi ne faka‵ka loa te afi mai te fale ke oko ki te koga e ofo atu ei te taulaga, ailoga e mafai o tumau faeloa te ‵ka o te afi ona ko te ‵mao o te koga ne faima‵laga atu ei” a Apelaamo mo Isaako. Tela la, e mafai o fakauiga a mea kolā ne pukepuke ne Apelaamo i tena lima ki mea kolā e faka‵ka ei a te afi.

Kae e fai mai a nisi tino, me e sē se mea faigofie ke faka‵ka te afi i aso mua. Ne faigofie atu ki tino ke puke mai ne latou a fatu kalā mai olotou tuakoi i lō te taumafai o faka‵ka te afi i a latou eiloa. E tokouke a tino tusitala e tali‵tonu me ne puke ne Apelaamo i ana lima se meāfale—kāti se ulo e ‵sai tena kau ki te seni—kolā e ‵fonu i fatu kalā io me ko malala ‵ka kolā ne fakaaoga mai i te po. (Isa. 30:14) A malala ‵ka e mafai o aveave kae faigofie o faka‵ka ei te afi mai te fakaaogaga o lakau ma‵lo maise loa i malaga ‵loa penei.