Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Fepuali 2016

Ke Tumau i te Tavini Atu ki a Ieova mo te Fiafia

Ke Tumau i te Tavini Atu ki a Ieova mo te Fiafia

MAFAUFAU la ki te ‵toe aso fakafiafia eiloa o tou olaga. E mata, ko te aso o tau fakaipoipoga io me ko te taimi ne fanau ei tau tamaliki muamua? Io me ko te aso telā ne fakamailoga ei tau tukuatuga ki a Ieova e auala i te papatisoga ki te vai? Tenā eiloa te ‵toe aso tāua kae fakafiafia ki tou olaga. Kae se mea fakafiafia ke lavea ne taina tali‵tonu a koe e molimau atu i mua o tino katoa me i a koe e alofa ki te Atua mo tou loto, foitino, mafaufau mo tou malosi kātoa!—Male. 12:30.

E mautinoa eiloa me ko oti ne maua ne koe te lagonaga fiafia mai te tavini atu ki a Ieova talu mai tau papatisoga. Kae ui i ei, ko oti ne galo atu i nisi tino talai o te Malo a te fiafia telā ne maua muamua ne latou. Kaia ne tupu ei a te mea tenei? Ne a pogai e ‵tau ei o tumau tatou i te tavini atu ki a Ieova mo te fia‵fia?

TE POGAI KO GALO ATU EI TE FIA‵FIA O NISI TINO

A te fekau o te Malo fakatasi mo te folafolaga me ko pili o fakaseai atu ne Ieova a te olaga masei tenei kae takitaki atu ki tena lalolagi fou—ko te pogai eiloa o te ‵tou fia‵fia. E se gata i ei, e fakatalitonu mai ki a tatou a te Sefanaia 1:14, penei: “Te aso fakamataku o te Aliki [Ieova] ko pili- ko pili mai eiloa, kae e vave o oko mai!” Kae kafai e mafau‵fau tatou me ko tō leva te taimi e ‵tau o faka‵tali tatou ki ei i lō te mea ne fakamoe‵moe tatou ki ei, e mafai loa o galo atu i ei te fiafia ne maua ne tatou muamua. E fai ne te mea tenei ke sē gasolo ki mua te ‵tou taviniga ki te Atua.—Faata. 13:12.

A maopoopoga fakafia‵fia fakatasi mo tino o te Atua e maua i ei a fakamalosiga ke tumau tatou i te tavini atu ki a Ieova mo te fia‵fia. E tonu, e fai ne amioga ‵lei a tavini a Ieova ke tosina atu tatou ki te tapuakiga tonu kae fesoasoani mai ke kamata o tavini atu tatou ki te Atua mo te fia‵fia. (1 Pe. 2:12) Kae se a te mea e mafai o tupu māfai e polopoloki se taina Kelisiano ona ko te sē ola o ia e ‵tusa mo tulaga o te Atua? Mai lalo i vaegā fakanofonofoga penā, a nisi tino kolā ne tosina mai ki te munatonu ona ko uiga amioatua o tino o Ieova, e mafai eiloa o loto vāi‵vai kae galo atu foki te lotou fia‵fia.

A te manako malosi ki koloa o te lalolagi masei tenei a Satani e mafai foki o ave keatea ne ia te ‵tou fiafia. E fakaaoga ne te Tiapolo tena lalolagi ke ma‵nako tatou ki mea kolā e se aoga malosi. Kae e ‵tau o masaua ne tatou a pati a Iesu, konei: “E seai se tino e mafai ne ia o tavini ki aliki e tokolua; me e takalialia a ia ki te suā tino, kae alofa ki te suā tino, e fakamaoni ki te suā tino kae sē fakamaoni ki te suā tino. E se mafai ne koutou o tavini ki te Atua mo koloa.” (Mata. 6:24) E se mafai o tavini tatou mo te fia‵fia ki a Ieova kae  taumafai foki i te taimi tenā ke maua ne tatou a mea katoa i te lalolagi tenei.

‘KE FIA‵FIA TATOU KI TE ALIKI TE ATUA O TE ‵TOU FAKAOLATAGA’

E sē se amoga ‵mafa ki tino kolā e a‵lofa ki a Ieova ke tavini atu ki a ia. (1 Ioa. 5:3) Masaua me ne fai mai a Iesu, penei: “O‵mai ki a au, a koutou katoa kolā e fi‵ta kae ‵mafa otou amoga, me ka tuku atu ne au ki a koutou se malosi fou. Ke puke ne koutou taku amo kae fakaakoako mai ki a au, me i a au e agamalu kae loto maulalo, kae ka maua ne koutou i ei se malosi fou. Me e māmā taku amo, kae amogofie foki taku amoga.” (Mata. 11:28-30) A te amoga telā e amo ne Kelisiano ‵tonu e maua i ei te malosi fou kae iku atu ki te fiafia. E mautinoa eiloa me isi ne pogai ‵lei ke maua ne tatou te fiafia sili i te taviniga ki a Ieova. Ke na onoono nei tatou ki pogai tāua e tolu e mafai ei o fai ‘ke fia‵fia tatou ki te Aliki te Atua o te ‵tou fakaolataga.’—Sapa. 3:18.

E tavini atu tatou ki te Tino telā ne tuku mai ne ia te ola, te Atua fiafia. (Galu. 17:28; 1 Timo. 1:11) Ko iloa ne tatou me e ‵nofo kaitalafu tatou ki te ‵tou Mafuaga. Tela la, e tumau eiloa tatou i te tavini atu ki a ia mo te fia‵fia, faitalia te uke o tausaga talu mai te taimi ne papatiso ei tatou.

Ne fakatumau ne Héctor tena fiafia mai te masaua faeloa ne ia te fakamoemoega o te Malo kae tumau i te gasolo ki mua

Mafaufau la ki a Hector, telā ne tavini atu ki a Ieova e pelā me se ovasia faimalaga mō se 40 tausaga. Ne galue malosi eiloa tou tagata faitalia eiloa tena tulaga “matua.” (Sala. 92:12-14NW) Ne fai ne te masaki o tena avaga ke mu‵tana ana mea e fai i te taviniga ki te Atua, kae e seki fakavāivāi atu eiloa ki tena fiafia. E fai mai a ia: “Faitalia me se mea fakafanoanoa ke lavea atu te malosi o taku avaga ko gasolo ifo ki lalo kae ko faigata foki ke tausi atu ki tou fafine, ne seki talia ne au ke taofi ne te mea tenei a taku taviniga ki te Atua tonu mo te fiafia. Ne alofa malosi kae tavini atu au mo te loto kātoa ki a Ieova, ona ko te mea e nofo kaitalafu au ki a ia telā ne faite ne ia te tagata mō se pogai. E taumafai eiloa au o gasolo ki mua i te faiga o te galuega talai, kae taumafai foki o tausi ne au te fakamoemoega e uiga ki te Malo i te toku mafaufau ko te mea ke mo a ma galo atu ei toku fiafia.”

Ne tuku mai ne Ieova te taulaga togiola, ko te mea ke mafai o maua ne tatou se olaga fiafia. E tonu, “ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea ke se fakaseai atu so se tino e fakatuanaki ki a ia kae ke maua ne ia te ola se-gata-mai.” (Ioa. 3:16) Ao, e mafai o fakamagalo ‵tou agasala kae maua te ola se-gata-mai telā e fakavae ki te fakatuanaki ki te fakatokaga alofa a te Atua e auala i te taulaga togiola a Iesu. E mata, a te mea tenā e sē se pogai ‵lei ke fakaasi atu ei te loto fakafetai? Kae e mata, e se ‵tau o fakamalosi aka tatou ne te loto fakafetai ke tavini atu ki a Ieova mo te fia‵fia?

Ne fakafaigofie ne Jesús tena olaga kae ne tavini atu ki a Ieova mo te fiafia mō se fia o tausaga

E fai mai te taina ko Jesús, telā e nofo i Mekisiko, penei: “Ne pologa eiloa au ki taku galuega, i nisi taimi  e galue eiloa au fakaovataimi i aso takitasi e tiga eiloa e se manakogina ke fai penā. Ne galue eiloa au penā ke maua aku tupe e tai uke atu. Kae ne tauloto au e uiga ki a Ieova mo te auala ne tuku mai ne ia tena Tama ki tino katoa. Ne maua ne au se manakoga malosi ke tavini atu ki a ia. Tela la, ne tuku atu toku ola ki a Ieova, kae i te 28 tausaga mai tua ne galue ei au mō te kamupane, ne fakaiku aka ne au ke tiaki taku galuega kae kau atu ki te taviniga tumau.” Tenā eiloa te tausaga ne kamata ei taku taviniga fakafiafia ki a Ieova.

A fuataga kolā e tau ne tatou, e se iku atu ki te fanoanoa kae ki te fiafia lasi. E mata, koi masaua ne koe te vaegā olaga ne ola muamua koe i ei a koi tuai o iloa ne koe a Ieova? Ne fakamasaua atu a Paulo ki Kelisiano i Loma me i a latou “ne fai mo pologa a te agasala” kae ko fai nei latou mo “pologa a te amiotonu.” Ne tau ne latou a “fuataga ‵ma i se auala tapu,” kae i te fakaotiga, ko te ola se-gata-mai. (Loma 6:17-22) E tau‵tali atu foki tatou i se auala telā e tapu, kae fakasaoloto tatou mai ikuga o te sē ‵ma i te feitu i mea tau amioga io me ko amioga fakasaua. Ma‵faga la o mea fakafiafia!

“A tausaga kolā ne fakamāumāu ne au i te tavini atu ki a Ieova, ko toe taimi fakafiafia eiloa i toku olaga.”—Jaime

Mafaufau la ki te tala o Jaime, se tino e se talitonu ki te Atua, kae e talitonu me i tino e māfua mai i manu, kae ko ia foki se tino faipelē. Ne kamata o kau atu a Jaime ki fakatasiga Kelisiano kae ne ofo i te alofa telā ne fakaasi atu ne taina i konā. Ke tiakina tena olaga mua, ne akai atu a Jaime ki a Ieova ke fesoasoani atu ki tou tagata ke talitonu ki a Ia. Ne fai mai a Jaime, penei: “Ne tauloto malielie au e uiga ki te Tamana alofa mo te Atua loto fakamagalo e pelā me se tino tonu telā e ola. A te tausi ki tulaga amio‵tonu o Ieova ne fai pelā me se puipuiga ki a au. Moi ne seki ‵fuli toku olaga, penei ko leva loa au ne tamate, e pelā mo nisi o oku taugasoa kolā ne aofia mo au i te faipelē. A tausaga kolā ne fakamāumāu ne au i te tavini atu ki a Ieova, ko toe taimi fakafiafia eiloa i toku olaga.”

KE MO A MA ‵FIU VAVE!

E ‵tau o pefea ou lagonaga a koi fakatalitali koe ki te gataga o te olaga masei tenei? Masaua la, me kafai e ‘‵toki ne tatou a mea mō te agaga’ ka ‘tau eiloa ne tatou te ola se-gata-mai.’ Tela la, “ke mo a ma ‵fiu tatou i te faiga o mea ‵lei, me ka tau eiloa ne tatou a mea ‵lei i te taimi tonu māfai e se ‵fiu tatou.” (Kala. 6:8, 9) Mai te fesoasoani o Ieova, e mafai o kufaki tatou, ga‵lue malosi ke ati aka a uiga kolā e manakogina mō te faka‵saoga i te “fakalavelave lasi,” kae tumau i te tavini atu ki a Ieova mo te fia‵fia i te taimi foki loa tenei koi fakafesagai atu ki fakalavelave faiga‵ta.—Faka. 7:9, 13, 14; Iako. 1:2-4.

E mafai o loto tali‵tonu tatou me ka taui mai te ‵tou kufaki, me e lavea ‵lei ne te Atua a ‵tou galuega mo te ‵tou a‵lofa ki a ia mo tena igoa. Kafai e tumau tatou i te tavini atu ki a Ieova mo te fia‵fia, ka ‵pau eiloa tatou mo te faisalamo ko Tavita, telā ne fai mai penei: “E iloa faeloa ne au i te Aliki [Ieova] e pili mai ki a au; e seai se mea e mafai o fakagasue toku talitonuga. Telā te mea e ‵fonu ei au i te fiafia mo te fakafetai me maua faeloa ne au te olaga tokagamalie.”Sala. 16:8, 9.