Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Fepuali 2016

 TALA TONU

Ne Fakamanuia ne Ieova Taku Galuega Talai

Ne Fakamanuia ne Ieova Taku Galuega Talai

Ne fai atu au ki te ofisa o te kautau me ko oti ne ‵pei atu au ki te falepuipui me e se manako au o kau atu ki te taua. Ne fesili atu au ki tou tagata, penei: “E mata, ka toe fakamalosi mai koe ke toe kau atu au ki ei?” A te sau‵talaga tenei mai luga ko te lua o taimi ne maua ne au se ‵kamiga ke kau atu ki te kautau o Amelika.

AU NE fanau i te tausaga e 1926 i Crooksville, Ohio i Amelika. A oku mātua e se ne tino ‵lotu, kae ne fakamalosi mai laua ko matou tama‵liki e tokovalu ke olo ki te lotu. Ne kau eiloa au ki te lotu Metotisi. I te taimi ko 14 ei oku tausaga, ne tuku mai ne te faifeau se failoga ona ko te mea ne kau atu faeloa au ki lotu i Aso Sa i te tausaga kātoa.

Ko Margaret Walker (te tuagane i te tokolua telā ki te fakamaui) telā ne fesoasoani mai ke tauloto ne au te munatonu

I te taimi eiloa tenā, ne kamata o asi mai te tuakoi o matou ko Margaret Walker, se tokotasi o Molimau a Ieova, kae ne sau‵tala fakatasi mo toku mātua ki te Tusi Tapu. I te aso e tasi, ne kau atu au ki te akoga. Ne mafaufau toku mātua me ka fakalavelave ne au tena akoga, telā ne fai mai tou fafine ke fano au ki tua mo te fale. Kae ne taumafai faeloa au o fakalogologo ki te lā sau‵talaga. Mai tua o se fia o āsiga, ne fesili mai ei a Margaret ki au, “E mata, e iloa ne koe te igoa o te Atua?” Ne fai atu au, “E iloa katoa ne tino a te mea tenā—ko te Atua.” Ne fai mai tou fafine, “Puke mai tau Tusi Tapu kae ‵suke ki te Salamo 83:18.” Ne ‵suke au ki ei, kae fatoa iloa aka ei ne au me i te igoa o te Atua ko Ieova. Ne tele atu au ki tua i oku taugasoa kae fai atu ki a latou, “Kafai e ‵foki koutou ki otou fale i te po nei, ‵suke ki te Tusi Tapu i te Salamo 83:18 kae onoono aka ki te igoa o te Atua i loto i ei.” E mafai o mafaufau koe me tenā eiloa te taimi ne kamata o talai atu ei au.

 Ne kamata au o sukesuke ki te Tusi Tapu kae papatiso i te tausaga e 1941. Mai tua ifo malie, ne ‵tofi au ke takitaki ne au a te faiga o te sukesukega a te fakapotopotoga ki te tusi. Ne fakamalosi atu au ki toku mātua mo oku taina mo tuagane ke ‵kau mai, kae ne kamata eiloa o ‵kau mai katoa latou ki te sukesukega a te potukau ki te tusi telā ne takitaki ne au. Kae ko toku tamana ne seki fiafia eiloa.

‵TEKEMAIGA MAI TE KĀIGA

Ne tuku mai ki a au a tiute e uke i te fakapotopotoga, kae ne faite ne au se fatatusi e tausi ei ‵tou tusi. I te aso e tasi, ne fakasino atu toku tamana ki aku tusi kae fai mai, penei: “E lavea ne koe a tusi katoa konā? E se manako eiloa au ke tuku mai i loto i te fale tenei, e penā foki koe.” Tenā, ne tiakina ne au te fale kae fanatu o nofo i se potu ‵togi e tasi i se fa‵kai e tasi o Ohio telā e tai pili mai, ko Zanesville, kae e asi atu faeloa au ki te fale o fakamalosi aka a toku kāiga.

Ne taumafai eiloa toku tamana o taofi toku mātua mai te kau atu ki fakatasiga. I nisi taimi, kafai ko fano toku mātua ki fakatasiga, e fanatu eiloa a ia o ‵futi mai toku mātua ki loto i te fale. Kae e tele sale atu eiloa tou fafine i te suā mataloa kae fanatu ki te fakatasiga. Ne fai atu au ki toku mātua, penei: “Sa manavase. Ko pili o fi‵ta tou tagata i te ‵tele sale atu i ou tua o taofi koe.” Fakamuli loa, ne kamata o fi‵ta toku tamana i ana taumafaiga konā, kae ne kau atu faeloa tou fafine ki fakatasiga e aunoa mo se fakalavelave.

I te 1943, ne kamata Te Akoga mō Tino Talai, kae ne kamata o aofia au i te akoga. A pati fakatonutonu kolā ne maua ne au mai tua o oku tofiga i te akoga ne fesoasoani mai ke momea aka te ‵lei o toku atamai i te faipati.

TE SĒ KAU ATU KI SE FEITU I TE TAIMI O TE TAUA

I te taimi tenā, ne aofia ei a atufenua i te Taua i te Lua a te Lalolagi. I te 1944, ne ‵kami au ke kau atu ki te kautau. Ne ave au ki Fort Hayes i Columbus, Ohio, ke fai se asiga ki a au kae ke faka‵fonu aka foki aku pepa. Ne fai atu foki au ki te ofisa i konā me ka se mafai au o fai pelā me se sotia. Ne fakasaoloto ne latou au ke fano. I nāi aso mai tua ifo, ne tu mai se ofisa e tokotasi ki toku mataloa kae fai mai: “Corwin Robison, tenei tau samani, a koe ka ave o ‵loka.”

I se lua vaiaso mai tua ifo i loto i te koga fai fono, ne fai mai te famasino ki a au, penei: “Moi ne fai fua ne au te fakaikuga, penei a koe e ‵pei loa ki tou mate. E isi ne au pati e fia fai?” Ne tali atu au: “Tou ‵Malu, e ‵tau o taku au e pelā me se tino talai. E ‵tau o talai atu ne au te tala ‵lei o te Malo ki fale katoa o tino.” Ne fai atu te famasino ki te potukau telā e fakaiku ne latou te fakamasinoga: “E se ‵tau o fakaiku aka ne koutou me e mata a te tamataene tenei se faifeau io me ikai. E ‵tau o fakaiku aka ne koutou me e mata ka fai ne ia tena tiute e pelā me se tino o te kautau io me ikai.” Kāti e se kātoa se āfa itula mai tua ifo, kae ne maua toku ikuga i te fono—au e fakasala. Ne fakasala ei au ne te famasino ki se lima tausaga i te falepuipui i Ashland, Kentucky.

NE PUIPUI AU NE IEOVA I LOTO I TE FALEPUIPUI

Ne ‵pei atu au ki te falepuipui i Columbus i vaiaso e lua, kae i te aso muamua, ne nofo atu loa au i loto i toku potu. Ne ‵talo atu au ki a Ieova, penei: “E se fia nofo atu au i te falepuipui mō se lima tausaga, kae seiloa ne au me se a taku mea ka fai.”

I te suā aso, ne ‵tala au ki tua mai toku potu ne tino tausi o te falepuipui. Ne sasale atu au ki tafa o se pagota telā e loa kae fai foitino, kae ne ‵tu atu maua i konā o ‵kilo ki tua o te famalama. Ne ‵sili  mai tou tagata, “Se a te pogai ne ‵pei mai ei koe ki loto nei?” Ne fai atu au, “Au se tokotasi o Molimau a Ieova.” Ne fai mai tou tagata, “A koe se Molimau? Kae kaia la e ‵pei ei koe ki te falepuipui?” Ne fai atu au, “A Molimau a Ieova e se ‵kau ki taua kae e se tatino foki.” Ne fai mai a ia, “E ‵pei ne latou koe ki te falepuipui me i a koe e se tatino. Kae e ‵pei foki ne latou a nisi tino ki te falepuipui me e tatino. E mata, e ‵tau o fai penā?” Ne fai atu au, “Ikai, e se ‵tau o fai penā.”

Tenā, ne fai mai ei tou tagata, “Ne nofo atu au i te suā falepuipui mō se 15 tausaga, kae ne faitau ne au a nisi tusi a koutou.” I te taimi ne lagona ne au te mea tenā, ne ‵talo atu ei au, “Ieova, fesoasoani mai ke kau mai te tagata tenei ki a au.” I konā loa, ne fai atu a Paul, te pagota tenā ki a ia: “Kafai e faitaua atu a nisi pagota ki a koe, kalaga mai fua ki a au. Ka ta ne au latou.” Tela la, ne seki ai eiloa se fakalavelave ne tupu i te vā o oku mo te toko 50 pagota i te falepuipui tenā.

Ne aofia au i Molimau kolā ne ‵pei atu ki te falepuipui i Ashland, Kentucky ona ko te sē ‵kau atu ki se feitu

I te taimi ne ave ei au ne ofisa o te falepuipui ki Ashland, ne iloa aka ne au me isi ne taina ma‵tua ‵lei e ‵nofo atu i konā. A te lotou uiga ‵kau fakatasi ne fesoasoani mai eiloa ki a au mo nisi tino ke tumau i te ma‵losi i te feitu faka-te-agaga. Ne ‵tofi aka ne latou a matou ki te faitauga i te vaiaso ki te Tusi Tapu, kae ne fakatoka ne matou a fesili mo tali mō maopoopoga kolā ne fakatoka ne taina. E isi foki se taina e onoono ki te koga e fai ei te galuega talai i te falepuipui. Ne ‵nofo atu matou i se fale ‵moe mo moega kolā e faī ki ‵pui. Ne fai mai te taina telā ne fakatoka ne ia a koga talai ki a au, penei: “Robison, e aofia i tau koga talai a te moega o te tino tenei ke oko ki te moega o te suā tino. Masaua ke talai atu koe ki a latou a koi tuai o ‵tala atu ki tua.” Tenā eiloa te auala ne fakatoka faka‵lei ei te motou galuega talai.

TE MEA TELĀ NE MAUA AKA NE AU I TUA O TE FALEPUIPUI

Ne oti atu te Taua i te Lua a te lalolagi i te 1945, kae ne nofo atu eiloa au i te falepuipui i se taimi mai tua o te tausaga tenā. Ne manavase au ki toku kāiga me iloa ne au me ko oti ne fai mai toku tamana ki a au penei, “Kafai ne mafai o ‵tuli ne au a koe, e mafai foki o ‵tuli ne au a nisi tino.” I te taimi ne ‵tala ei au ki tua, ne lagona ne au se tala fakafiafia. Faitalia eiloa a ‵tekemaiga mai toku tamana, e tokofitu a tino mai te motou kāiga ne ‵kau atu faeloa ki fakatasiga kae e tokotasi toku tuagane ko oti ne papatiso.

Olo atu i te galuega talai mo Demetrius Papageorge, se taina fakaekegina telā ne kamata o tavini atu ki a Ieova i te 1913

I te taimi ne kamata ei te Taua i Korea i te 1950, ne toe maua ne au se ‵kamiga ke kau atu ki te kautau i Fort Hayes. I te otiga o se sukega tofotofo, ne fai mai se ofisa ki a au, penei, “A koe se tokotasi telā e ma‵luga ou kai i te otou potukau.” Ne  fai atu au, “E sē se mea e fai i ei, kae ko au e se kau atu eiloa ki te taua.” Ne siki atu ne au ki ei a te 2 Timoteo 2:3 kae fai atu, “Ko oti ne fai au mo sotia a Keliso.” E se leva, me ko toe fai mai tou tagata: “Ko mafai koe o fano.”

Mai tua ifo malie, ne kau atu au ki te fono a te Peteli i se fono o te atufenua i Cincinnati, i Ohio. Ne fai mai te taina ko Milton Henschel me kafai e isi se taina e manako o galue malosi mō te Malo, e mafai o fakaaoga ne te fakapotopotoga a ia i te Peteli. Ne tusi atu taku tusi ke galue i te Peteli, kae ne talia ei au ke fanatu o galue i te Peteli i Brooklyn i a Aokuso i te tausaga e 1954. Tenā eiloa toku taimi muamua ki te Peteli.

Ne uke ‵ki eiloa aku galuega ne fai i te Peteli. Mō se fia o tausaga, ne fakagalue ne au a masini ‵lasi pelā mo boilers i fale ‵lomi tusi mo ofisa, galue pelā me se tino faite motoka mo ‵loka. Ne galue foki au i Assembly Halls i Niu Ioki.

Tausi atu ki masini e pelā mo boilers i te ofisa i te Peteli i Brooklyn

Ne kamata o fiafia malosi au ki te olaga i loto i te Peteli, e aofia i ei a te kau atu ki tapuakiga i taeao mo te Sukesukega ki Te Faleleoleo Maluga e pelā foki mo te kau atu ki te galuega talai fakatasi mo te fakapotopotoga. Kafai e mafaufau koe ki ei, e ‵tau o fai faeloa ne so se kāiga Molimau a Ieova a fakatokaga konā. I te taimi e suke‵suke fakatasi ei a mātua mo tama‵liki ki te tusi siki mō te aso, fai faeloa a Tapuakiga a Kāiga, kae ke fai foki a tusaga i fakatasiga a te fakapotopotoga mo te talaiatuga o te tala ‵lei, ka maua eiloa ne tino katoa i te kāiga a te malosi fou i te feitu faka-te-agaga.

E tokouke oku taugasoa i te Peteli mo te fakapotopotoga. A nisi ne tino fakaekegina kae ko oti foki ne maua te lotou taui faka-te-lagi. A ko oku nisi taugasoa e se ne tino fakaekegina. Kae ko tavini katoa a Ieova, e aofia i ei a latou kolā e ga‵lue i te Peteli, ne tino sē ‵lei katoatoa. Kafai e isi se kinauga i te va o oku mo se suā taina, e taumafai faeloa au o ‵sala atu ki te filemu. E mafaufau eiloa au ki te Mataio 5:23, 24 mo te auala e fakamoe‵moe ei tatou ke faka‵lei aka ‵tou va mo nisi tino. E sē se mea faigofie ke fakatoese, kae ko te ukega o kinauga e faka‵lei aka eiloa i te auala tenei.

IKUGA ‵GALI NE MAUA NE AU I TAKU GALUEGA TALAI

Ona ko toku tulaga matua, ko oko eiloa i te faigata ki a au ke fanatu mai fale ki fale, kae e seki ‵fiu eiloa au. Ne tauloto ne au te ‵gana Saina ko te Mandarin kae ne fiafia eiloa au o talai atu ki tino Saina i te auala. I nisi taeao, e ofo atu ne au se aofaki o mekesini e 30 io me 40 ki tino fia‵fia.

Talai atu ki tino Saina i Brooklyn, i Niu Ioki

 Ne fai foki ne au se toe asiga i te ‵gana Saina! I te aso e tasi, ne fakaseke atu au i tafa o se tamaliki fafine e ‵togi ana fuagalakau. Ne fakamisikata atu au ki ei kae ofo atu Te Faleleoleo Maluga mo te Awake! i te ‵gana Saina. Ne puke ne ia a mekesini konā kae fai mai i tena igoa ko Katie. Mai tua ifo, kafai e lavea ne ia au, ne vau eiloa a Katie o faipati mai ki a au. Ne akoako ne au tou fafine ki nisi igoa o fuagalakau mo vesiapolo i te ‵gana palagi, kae ne toe fakafokifoki mai ne ia a igoa takitasi o fuagalakau konā. Ne fakamatala atu foki ne au a fuaiupu mai te Tusi Tapu ki a ia, kae ne puke ne ia te tusi ko te Akoakoga a te Tusi Tapu. Kae i nāi vaiaso mai tua ifo, ko sē matea ne au tou fafine i te koga tenā.

I masina fakamuli ifo, ne talia foki ne te suā tamaliki fafine telā ne tu atu foki o ‵togi ana fuagalakau a mekesini kolā ne ofo atu ne au. I te vaiaso mai tua, ne tuku mai ne ia tena selefoni, kae fai mai, “Faipati atu ki te tino tenei mai Saina.” Ne fai atu au, “E seai se tino e iloa ne au i Saina.” Kae ne fakamolemole mai eiloa a ia, telā ne puke ei ne au te selefoni, kae fai atu, “Talofa, ko Robison tenei.” Kae faipati mai te tino tenā, penei, “Robby, ko Katie tenei. Au tenei ko nofo i Saina.” Ne fai atu au, “Saina?” Ne tali mai a Katie, “Ao. Robby, e iloa ne koe te tamaliki fafine tenā ne tuku atu ne ia te selefoni? A iako toku taina. Ne akoako ne koe au ki mea ‵gali e uke. Fakamolemole, akoako ne koe tou fafine e pelā mo te auala ne akoako ne koe au.” Ne fai atu au, “Katie, ka fai eiloa ne au te ‵toe mea e mafai ne au o fai. Fakafetai mo te fakailoa mai ne koe a te koga ko nofo nei koe i ei.” I te otiga, ne faipati atu au ki te taina o Katie. Faitalia te koga e ‵nofo i ei a tamaliki fafine konei, e fakamoemoe au me ka tauloto laua ki mea e uke atu e uiga ki a Ieova.

Ne galue eiloa au i te taviniga tapu ki a Ieova mō se 73 tausaga. E fiafia eiloa au me ne fesoasoani mai a Ieova ke tumau au i te sē kau atu ki se feitu kae ke fakamaoni eiloa ki a ia i loto i te falepuipui. Ne fai mai foki oku taina mo tuagane me ne loto ma‵losi eiloa latou ona ko te mea ne seki ‵fiu vave au i te fakafesagai atu ki ‵tekemaiga mai toku tamana. Ne papatiso eiloa toku mātua fakatasi mo oku taina mo tuagane. Ke oko foki loa ki toku tamana, ne kamata o ‵fuli, kae kau atu ki nisi fakatasiga a koi tuai o mate atu.

Kafai ko te loto eiloa o te Atua, ka mafai eiloa o toe faka‵tu aka ki te lalolagi fou a oku kāiga mo taugasoa kolā ko oti ne ‵mate atu. Mafaufau la ki te fia‵fia e maua ne tatou i te taimi e tapuaki atu ei ki a Ieova fakatasi mo latou kolā e a‵lofa tatou ki ei. *

^ pala. 32 A koi fakatoka a te mataupu tenei ke ‵lomi, kae ko galo atu a te taina fakamaoni tenei ko Corwin Robison.