Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Fepuali 2017

Te Togiola—Se “Meaalofa ‵Lei Katoatoa” Mai te Tamana

Te Togiola—Se “Meaalofa ‵Lei Katoatoa” Mai te Tamana

“A meaalofa ‵lei katoatoa e maua katoa mai . . . te Tamana.”IAKO. 1:17.

PESE: 20, 15

1. Ne a fakamanuiaga e mafai o maua mai te fakatokaga e uiga ki te togiola?

E UKE a fakamanuiaga ne mafai o maua mai e auala i te taulaga togiola a Iesu Keliso. A te fakatokaga ki te togiola e ‵tala mai ne ia a te avanoaga ki tamaliki katoa a Atamu kolā e fia‵fia ki te amiotonu ke fai mo fai se vaegā i te kāiga o te Atua. Kae e uke atu a fakamanuiaga e maua ne tino faka‵logo e auala i te togiola a Keliso. A te loto fiafia o Iesu ke mate kae fakamaoni ki te amiotonu o Ieova e fakaata mai ei se mea tāua ki tino taki tokotasi i te iunivesi kātoa.—Epe. 1:8, 9.

2. (a) Ne a mea tāua i te iunivesi kātoa ne aofia i te ‵talo a Iesu? (Ke onoono ki te ata i te kamataga.) (e) Ne a mea ka sau‵tala tatou ki ei i te mataupu tenei?

2 I se lua tausaga mai mua o mate a Iesu kae tuku mai ei tena taulaga togiola, ne akoako ne ia ana soko ke ‵talo, penei: “Te motou Tamana telā i te lagi, ke tapu tou igoa. Ke oko mai tou Malo. Ke fai te mea e loto koe ki ei i te lalolagi nei e pelā mo te faiga i te lagi.” (Mata. 6:9, 10) Ke momea aka te lasi o ‵tou loto fakafetai  ki te togiola, ke na sau‵tala nei tatou ki te sokoga o ia ki te faka‵maluga o te igoa o te Atua, te pulega o te Malo o te Atua, mo te fakataunuga o te fuafuaga a te Atua.

“KE TAPU TOU IGOA”

3. Ne a mea e aofia i ei te igoa o Ieova, kae ne fakamasei pefea ne Satani a te igoa tapu tenā?

3 Ne aofia ne Iesu a te faka‵maluga o te igoa o te Atua e pelā me ko te fakamolemole muamua i tena ‵talo fakaakoako. A te igoa o Ieova e aofia katoatoa i ei Tena ‵lei, ‵malu mo tena tapu. I tena suā ‵talo, ne taku ne Iesu a Ieova e pelā me ko te “Tamana Tapu.” (Ioa. 17:11) Ona ko te mea e tapu a Ieova, a fakatakitakiga mo tulafono kolā ne māfua mai i a ia e tapu katoa. Kae tiga te feitu tenā, i te fatoaga o Etena, ne fakafesili ne Satani i se auala faitogafiti a te aiā o te Atua ke fakatoka ana fakatakitakiga mō tino. Mai te fai atu o pati ‵loi e uiga ki a Ieova, ne fakamasei ne Satani a te igoa tapu o te Atua.—Kene. 3:1-5.

4. Ne fesoasoani atu pefea a Iesu ki te faka‵maluga o te igoa o te Atua?

4 I te suā feitu, ne alofa tonu eiloa a Iesu ki te igoa o Ieova. (Ioa. 17:25, 26) Ne fesoasoani atu a Iesu ki te faka‵maluga o te igoa o te Atua. (Faitau te Salamo 40:8-10.) E auala i tena olaga ‵lei katoatoa i te lalolagi, ne fakamaoni atu ne Iesu me e aoga kae e amio‵tonu a fakatokaga a Ieova mō ana mea ola ne faite. E tiga eiloa ne fai ne Satani ke logo‵mae a Iesu ki te mate, ne tumau eiloa a ia i te fakamaoni katoatoa ki tena Tamana faka-te-lagi. Mai tena fakamaoni, ne fakatalitonu atu ei ne Iesu me e mafai eiloa ne se tino ‵lei katoatoa o tumau i te fakalogo ki tulaga amio‵tonu o te Atua.

5. E mafai pefea o fesoasoani atu tatou i te faka‵maluga o te igoa o te Atua?

5 E mafai pefea o fakaasi atu ne tatou a te a‵lofa ki te igoa o Ieova? E auala i ‵tou amioga. E manako a Ieova ko tatou ke tapu. (Faitau te 1 Petelu 1:15, 16.) E fakauiga eiloa me e ‵tau fua o tapuaki tatou ki a Ieova kae faka‵logo ki a ia mo ‵tou loto kātoa. Kafai foki loa e fakasauagina tatou, e fai ne tatou te ‵toe mea e mafai o fai ke ola e ‵tusa mo ana fakatakitakiga amio‵tonu mo tulafono. Mai te fakaasi atu o faifaiga amio‵tonu, e fai ei ke maina atu ‵tou mainaga kae ke faka‵malu atu ki te igoa o Ieova. (Mata. 5:14-16) E pelā me ne tino tapu, e fakamaoni atu ne tatou mai te auala e ola ei tatou me i tulafono a Ieova e ‵lei kae ko ‵losiga a Satani e se tonu. Kafai e fai ne tatou a mea ‵se, e pelā mo te masani, e fakaasi atu ne tatou te sala‵mo tonu kae ‵fuli keatea mai faifaiga kolā e se faka‵malu ei a Ieova.—Sala. 79:9.

6. Kaia e mafai o taku ne Ieova tatou e pelā me amio‵tonu, faitalia i a tatou e se ‵lei katoatoa?

6 E auala i te fakavae o te taulaga togiola a Keliso, e fakamagalo ne Ieova a agasala a tino kolā e fakatuanaki. E talia ne ia latou e pelā me ne ana tino tapuaki kolā ne tuku atu olotou ola ki a ia. E taku ne Ieova a Kelisiano fakaekegina amio‵tonu e pelā me ne ana tama kae ko “nisi mamoe” amio‵tonu e pelā me ko ana taugasoa. (Ioa. 10:16; Loma 5:1, 2; Iako. 2:21-25) Ke oko mai nei, ne fai ne te togiola ke maua ne tatou se tulaga amiotonu i mua o ‵tou Tamana kae ke aofia foki i te faka‵maluga o tena igoa.

“KE OKO MAI TOU MALO”

7. Ne a fakamanuiaga mai lalo i te pulega a te Malo e maua e auala i te togiola?

7 I tena ‵talo fakaakoako, ne toe fakamolemole atu a Iesu ki te Atua: “Ke oko mai tou Malo.” Se a te sokoga o te togiola ki te Malo o te Atua? Ne mafai ne te togiola o fakamaopoopo mai a te toko 144,000 ke tavini atu e pelā me ne tupu mo faitaulaga lagolago fakatasi mo Keliso i te lagi. (Fa. 5:9, 10; 14:1) A Iesu mo ana pule lagolago, kolā  ka ‵kau fakatasi i te Malo o te Atua, ka fakagalue ne latou a te aoga o te togiola ki tino faka‵logo i te afe tausaga. Ka ‵fuli eiloa te lalolagi ke fai mo palataiso, ka fesoasoani atu foki ki tino fakamaoni katoa ke maua ne latou te tulaga ‵lei katoatoa, kae fakamaopoopo katoa mai ei te vaega o te kaukāiga o te Atua i te lagi mo te lalolagi. (Fa. 5:13; 20:6) Ka tuki pala ne Iesu a te ulu o te gata kae ‵solo keatea mai te iunivesi a fakalavelave katoa kolā e māfua mai i a Satani.—Kene. 3:15.

8. (a) Ne fesoasoani atu pefea a Iesu ki ana soko ke lavea ne latou te tāua o te Malo o te Atua? (e) E fakaasi atu pefea ‵tou ‵lago ki te Malo i aso nei?

8 I tena nofoga i te lalolagi, ne fesoasoani atu a Iesu ki ana soko ke lavea ne latou te tāua o te Malo o te Atua. Mai tua malie fua o tena papatisoga, ne folafola atu ne Iesu te “tala ‵lei o te Malo o te Atua” ki nisi fa‵kai ‵mao. (Luka 4:43) I ana toe pati ki ana soko mai mua o fanaka a ia ki te lagi, ne fakatonu atu a Iesu ki a latou ke molimau atu e uiga ki a ia “ke oko eiloa ki toe koga ‵mao o te lalolagi.” (Galu. 1:6-8) E auala i te galuega talai o te Malo, ne mafai o maua ne tino i te lalolagi kātoa a te avanoaga ke tauloto e uiga ki te togiola kae fai pelā me ne tino e ‵nofo mai lalo i te Malo o te Atua. I aso nei, e fakaasi atu ‵tou ‵lago ki te Malo mai te fesoasoani atu ki taina o Keliso i te lalolagi nei kolā e talai atu te tala ‵lei o te Malo ki te lalolagi kātoa.—Mata. 24:14; 25:40.

“KE FAI TE MEA E LOTO KOE KI EI”

9. Kaia e mafai o tali‵tonu tatou me ka fakataunu eiloa ne Ieova tena fuafuaga mō tino?

9 Se a te mea ne fakauiga a Iesu ki ei i tena toe faiatuga: “Ke fai te mea e loto koe ki ei”? A Ieova ko te Mafuaga. So se pati e tō mai i tena gutu, ka fakataunu eiloa. (Isa. 55:11) Ka se talia ne ia a ‵tekemaiga a Satani ke taofi aka ei Tena fuafuaga mō tino katoa. Mai te kamataga, ko te loto eiloa o Ieova ke faka‵fonu te lalolagi ki tama‵liki ‵lei katoatoa a Atamu mo Eva. (Kene. 1:28) Moi ne fai ne ‵mate atu a Atamu mo Eva e aunoa mo ne tama‵liki, penei ko se taunu a te fuafuaga a te Atua ke faka‵fonu te lalolagi ki lā tama‵liki. Tela la, mai tua o te taimi ne agasala ei a Atamu mo Eva, ne talia ne Ieova ke fai lā tama‵liki. E auala i te togiola, e tuku mai ei ne te Atua ki tino fakatuanaki katoa a te avanoaga ke oko atu ki te tulaga ‵lei katoatoa kae ke ola ki te se-gata-mai. A Ieova e alofa ki tino, kae ko tena loto eiloa ko tino faka‵logo ke ola i te auala telā ne manako a ia ki ei i te kamataga.

10. E aoga pefea a te togiola ki tino kolā ko oti ne ‵mate?

10 Kae pefea te fia piliona o tino kolā ko ‵mate e aunoa mo se avanoaga ke iloa kae tavini atu ki a Ieova? Ko te togiola ne mafai ei o toe faka‵tu mai a tino ‵mate. Ka toe faka‵foki mai ne te ‵tou Tamana faka-te-lagi a latou ki te ola kae tuku atu ki a latou te avanoaga ke tauloto ki ana fuafuaga kae ke maua te ola se-gata-mai. (Galu. 24:15) E manako a Ieova ko tino ke ola, kae sē ‵mate. E pelā me ko te Pogai o te ola, e fai a ia pelā me ko te Tamana o tino katoa kolā ka toe faka‵tu aka. (Sala. 36:9) Tela la, se mea ‵tau eiloa ke akoako ne Iesu tatou ke ‵talo atu penei: “Te motou Tamana telā i te lagi.” (Mata. 6:9) Ne tuku atu ne Ieova ki a Iesu se tusaga tāua i te faka‵tuakaga o tino ‵mate. (Ioa. 6:40, 44) I te palataiso, ka fakataunu eiloa ne Iesu tena tiute e pelā me ko te “toetu mo te ola.”—Ioa. 11:25.

11. Se a te loto o te Atua mō te “vaitino tokouke”?

11 A te uiga kaimalie o Ieova e se fakatapulā fua ki nai tino fua, me e fai mai a Iesu: “So se tino e fai ne ia te loto o te Atua, ko ia eiloa tenā toku taina mo toku tuagane mo toku mātua.” (Male. 3:35) Ko te loto eiloa  o te Atua ke fai a te “vaitino tokouke” kolā e se mafai o lau mai fenua, matakāiga mo ‵gana katoa mo fai ana tino tapuaki. A latou kolā e fakatuanaki ki te togiola a Keliso kae fai te loto o te Atua e mafai o aofia i a latou kolā e ka‵laga atu, penei: “Ne maua ne matou te motou fakaolataga mai i te ‵tou Atua, telā e sagasaga i te nofogaaliki, e penā foki loa mo te Tamā Mamoe.”—Fa. 7:9, 10.

12. I te auala fea ne fakaasi mai ei te fuafuaga a Ieova mō tino i te ‵talo fakaakoako?

12 A te fuafuaga a Ieova mō tino faka‵logo ne fakaasi mai i fakamolemole kolā e maua i te ‵talo fakaakoako a Iesu. E ‵tusa mo te ‵talo tenei, e ma‵nako tatou o fai te ‵toe mea e mafai o fai ke faka‵malu, io me fakatapu ne tatou te igoa o Ieova. (Isa. 8:13) A te igoa o Iesu e fakauiga loa ki a “Ieova ko te Fakaolataga,” kae ko te ‵tou fakaolataga e auala i te togiola e faka‵malu kae avatu i ei a vikiga ki te igoa o Ieova. Ka fakaaoga eiloa te Malo o te Atua ke fakagalue aka ei a mea aoga mai te togiola ki tino faka‵logo katoa. E tonu, e fakatalitonu mai i te ‵talo fakaakoako me e seai se mea e mafai o taofi ne ia te faiga o te loto o te Atua.—Sala. 135:6; Isa. 46:9, 10.

FAKAASI ATU TOU LOTO FAKAFETAI MŌ TE TOGIOLA

13. Se a te mea e fakaasi atu ne tatou i ‵tou papatisoga?

13 A te auala e tasi ke fakaasi atu te ‵tou loto fakafetai mō te togiola ko te tuku atu o ‵tou ola ki a Ieova e auala i ‵tou fakatuanaki ki te togiola kae papatiso. E fakaasi atu i ‵tou papatisoga me i a “tatou ko tino o Ieova.” (Loma 14:8) Kafai e papatiso tatou, e fakamolemole atu eiloa tatou ki te Atua ke maua se loto lagona ‵lei. (1 Pe. 3:21) E saga mai te Atua ki te fakamolemole tenā, e fakagalue ne ia te toto ‵ma o te taulaga a Keliso mō tatou. E tali‵tonu katoatoa tatou me ka tuku mai ne ia a mea katoa kolā ne tauto a ia ki ei.—Loma 8:32.

I auala fea e fakaasi atu ei ne tatou a te loto fakafetai ki te togiola? (Ke onoono ki palakalafa e 13, 14)

14. Kaia e fakatonu mai ei ke a‵lofa tatou ki ‵tou tuakoi?

 14 Se a te suā auala ke fakaasi atu ‵tou loto fakafetai mō te togiola? Ona ko mea katoa a Ieova ne faite e fakaasi mai ei tena alofa, e manako eiloa a ia ke fakaasi atu foki ne ana tino tapuaki a te alofa e pelā me se uiga tāua. (1 Ioa. 4:8-11) E fakamaoni atu ne tatou a te ‵tou manakoga ke fai mo “tama a te [‵tou] Tamana i te lagi” mai te a‵lofa ki ‵tou tuakoi. (Mata. 5:43-48) A te tulafono ke a‵lofa ki ‵tou tuakoi e tulaga lua ki te tulafono ke a‵lofa ki a Ieova. (Mata. 22:37-40) A te auala e tasi e fakaasi atu ne tatou te vaegā alofa tenā ki ‵tou tuakoi, ko te faka‵logo ki te fakatonuga ke talai atu te tala ‵lei o te Malo o te Atua. Kafai e fakaasi atu ne tatou te alofa ki tino, ko fakaasi atu i ei ne tatou te ‵malu o te Atua. A te ‵tonuga loa, a te alofa ki te Atua e “katoatoa” i loto i a tatou māfai e faka‵logo tatou ki te tulafono ke a‵lofa ki nisi tino, maise eiloa ki ‵tou taina.—1 Ioa. 4:12, 20.

KA AUMAI NE TE TOGIOLA “TE MALOSI FOU” MAI I A IEOVA

15. (a) Ne a fakamanuiaga e maua nei ne tatou mai i a Ieova? (e) Ne a fakamanuiaga e faka‵tali mai ki a tatou?

15 A te mataloa ke katoatoa te loto fakamagalo e ‵tala mai ki a tatou māfai e fakatuanaki tatou ki te togiola. E fakatalitonu mai te Muna a te Atua me i ‵tou agasala e mafai o “‵solo keatea.” (Faitau te Galuega 3:19-21.) E pelā mo te mea ne sau‵tala ki ei muamua, e auala i te fakavae o te togiola, e puke ne Ieova ana tavini fakaekegina e pelā me ne ana tama. (Loma 8:15-17) Kae ko tatou kolā e aofia i “nisi mamoe,” e pelā eiloa me faite ne Ieova se setifiketi ke puke ne ia tatou. Kafai ko oko atu tatou ki te tulaga ‵lei katoatoa kae ‵sao atu i te ‵toe tofotofoga, ka fiafia eiloa a Ieova o saina te setifiketi tenā ke puke ne ia tatou e pelā me ne ana tama fagasele i te lalolagi nei. (Loma 8:20, 21; Fa. 20:7-9) A te alofa o Ieova mō ana tama‵liki e seai se gatamaiga. A mea aoga kolā e maua mai i te togiola e tumau ki te se-gata-mai. (Epe. 9:12) Ka se mafai eiloa o galo atu te tāua o te meaalofa tenei. E seai se tino io me se malosi e mafai o ave keatea ne ia te mea tenei mai i a tatou.

16. Ne mafai pefea ne te togiola o fakasaoloto katoatoa tatou?

16 E seai se mea e mafai ne te Tiapolo o fai ke taofi aka ei a tino katoa kolā e sala‵mo tonu kae fai fakamuli mo tino i te kaukāiga o Ieova. Ne vau a Iesu ki te lalolagi nei ke mate “fakatasi fua mō taimi katoa.” Tela la, ka tumau eiloa te aoga o te togiola. (Epe. 9:24-26) E fakaseai katoatoa ne ia a te agasala telā ne togi mai ne Atamu. Fakafetai ki te taulaga a Keliso, ko saoloto nei tatou mai te ‵nofo pologa ki te lalolagi tenei e pule ne Satani, kae ka se ma‵taku foki tatou ki te mate.—Epe. 2:14, 15.

17. E pefea te tāua o te alofa o Ieova ki a koe?

17 A tautoga a te Atua e fakatuagagina eiloa. E pelā eiloa mo ana tulafono e uiga ki te faitega o mea, ka se mafai lele eiloa o se taunu a tautoga a Ieova. E se mafuli a ia. (Mala. 3:6) E uke atu a mea ne tuku mai ne Ieova i tafa o te meaalofa ko te ola. Ne tuku mai ne ia tena alofa. “Ko oti eiloa ne iloa ne tatou kae tali‵tonu foki ki te alofa o te Atua mō tatou. A te Atua ko te alofa eiloa.” (1 Ioa. 4:16) Ka fai te lalolagi kātoa mo fai se palataiso telā e maua i ei te fiafia sili, kae ka fakaasi mai ne tino katoa i te lalolagi a te alofa o te Atua. Ke na ka‵laga fakatasi atu tatou mo tino faka-te-agaga fakamaoni a te Atua mai te fai atu: “Ke i luga i te ‵tou Atua te manuia, te ‵malu, te poto, te fakafetai, te fakaaloalo, te ‵mana, mo te malosi ki te se-gata-mai, ki te se-gata-mai eiloa. Amene.”—Fa. 7:12.