Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Ko paenia ko George Rollston mo Arthur Willis e ‵tu o utu te radiator o te la motoka.—Koga talai i te feitu ki Matū, 1933

 MAI ‵TOU FALETUSI

“E Seai se Auala e Tō Loa io me Tō Faigata”

“E Seai se Auala e Tō Loa io me Tō Faigata”

I A MATI 26, 1937, ne fakatele atu ne se tokolua tāgata te lā motoka e ‵fonu i ‵pefu ki Sydney i Ausetalia. Talu mai te taimi ne tiakina ei ne laua te fa‵kai i se tausaga mai mua, ne faima‵laga atu laua i se 12,000 maila (19,300 km) ki nisi fa‵kai ‵mao kae fatufatua o Ausetalia. A tāgata konei e se ne tino kolā e fai‵malaga ki koga e uke o fai olotou sukesukega i ei. A Arthur Willis mo Bill Newlands ne paenia loto finafinau kolā ne fakaiku aka ke olo atu o talai te tala ‵lei o te Malo o te Atua ki nisi fa‵kai ‵mao o Ausetalia.

Ke oko atu ki te fakaotiotiga o te 1920 tupu, ne mafai ne se aofaki foliki fua o Tino A‵koga ki te Tusi Tapu * i Ausetalia o talai atu i fa‵kai ‵lasi e ‵tu ‵pili ki tafatai mo nisi fa‵kai fo‵liki. A te kogāloto o te fenua telā e se ola ‵lei ei a lakau e silia atu tena lasi i te āfa o te fenua o te Iunaite Sitete. Kae ne iloa ‵lei ne taina konei me ne ‵tau mo soko o Iesu o molimau atu e uiga ki a ia ki “toe koga ‵mao i te lalolagi,” e aofia ei a fa‵kai ‵mao o Ausetalia. (Galu. 1:8) Kae ne mafai pefea o fakataunu te lotou galuega lasi tenei? Mai te fakatuanaki katoatoa me ka fakamanuia ne Ieova olotou taumafaiga, ne fakaiku aka ke fai ne latou te ‵toe mea ‵lei e mafai o fai.

NE FAKATOKA NE PAENIA TE GALUEGA TALAI

I te 1929, ne fakatoka ne fakapotopoga i Queensland mo feitu o Ausetalia ki te togala a motoka ke aveave ei olotou kope katoa ki te kogāloto o te fenua. Ne fakateletele eiloa a motoka ne paenia ma‵losi kolā ne mafai o fakatele atu i koga faiga‵ta kae e mafai foki o faite ne latou a motoka māfai ko ma‵sei. Ne asi atu a paenia konei ki koga e uke kolā ne seki oko aka loa ki ei te talaiga.

A paenia kolā e seai ne olotou motoka e olo atu i olotou pasika-ta-ki-vae. E pelā me se fakaakoakoga, i te 1932, ne faimalaga atu a Bennett Brickel telā ko 23 ana tausaga mai Rockhampton i Queensland, i se malaga talai mō se lima masina ki fa‵kai ‵mao i te feitu ki matū o Ausetalia. Ne ave ne ia i luga i tena pasika ta-ki-vae ne pulagiketi, gatu, mea‵kai, mo tusi e uke. Kafai ko ma‵lu a teka o tena pasika, e tele loa a ia, mo te loto talitonu me ka takitaki ne Ieova a ia. Ne takitaki atu  tena pasika ta-ki-vae i se 200 maila (320 km) i koga kolā ne ‵mate ei a tino mai te fia inu. I se 30 tupu tausaga mai tua, ne faimalaga atu te taina ko Brickell i se fia afe o maila i Ausetalia kātoa i pasika ta-ki-vae, pasikaiti mo motoka. Ne ‵tala atu ne ia te galuega talai ki tino Aborigines kae fesoasoani atu ke faka‵tu aka a fakapotopotoga ‵fou, ne lauiloa kae āva atu a tino i fa‵kai ‵mao konā ki a ia.

MANUMALO I MEA FAIGA‵TA

A Ausetalia se tasi o fenua e se lasi te aofaki o tino e ‵nofo i fa‵kai ‵mao māfai e faka‵pau ki te lalolagi. Kae ne fakaasi atu ne tino o Ieova te loto ma‵losi o ‵sala atu a tino i koga ‵mao o te fenua.

Ne fakaasi atu ne paenia ko Stuart Keltie mo William Torrington te vaegā loto finafinau tenā. I te 1933, ne olo atu laua i loto i te toafa o Simpson, se koga lavaki lasi, ko te mea ke talai atu i fa‵kai fo‵liki o Ausetalia. I te taimi ne tiakina ei ne laua te la motoka me ko masei, ne tumau eiloa a te taina ko Keltie telā e vae faite—i tena malaga talai, kae nei la ko fakaaoga ne ia te kamela! Ne ‵fua mai eiloa a taumafaiga a paenia konei i te taimi ne fetaui ei laua mo Charles Bernhardt te menetia o se fale talimalo i William Creek, se auala e ‵tu i ei a tuleini. Fakamuli ifo, ne talia ne te menetia o te fale talimalo a te munatonu, ‵togi ki tua tena fale talimalo, kae paenia tokotasi mō se 15 tauasaga i nisi fa‵kai ‵mao mo toafa i Ausetalia.

Ko Arthur Willis ko fakatoka o fanatu i se malaga talai i fa‵kai ‵mao o Ausetalia.—Perth, feitu ki te togala o Ausetalia, 1936

E mautinoa eiloa me ne ma‵nako a paenia konei ke loto ma‵losi kae loto mau ko te mea ke manumalo latou i mea faiga‵ta e fe‵paki mo latou. I se taimi o te malaga talai a laua ki fa‵kai ‵mao o Ausetalia, a Arthur Willis mo Bill Newlands, kolā ne faka‵sae mai i te kamataga, ne tigaina mō se lua vaiaso ne faima‵laga ei i se 20 maila (32 km) ona ko te ‵fonu o te toafa i pela ona ko vaiua ‵to ‵lotu. I nisi taimi, ne tau‵ta kae fakaoti la mafi i te la ‵vela ke usu te la motoka i faka‵tuga one kae olo atu foki i koga fatufatua mo tafatafa o vaitafe kolā e oneonea. I taimi e uke ne masei ei te la motoka, ne sa‵sale io me ‵tele atu laua i pasika ta-ki-vae i se fia o aso ki se fa‵kai tai pili mai kae faka‵tali mō ne vaiaso ke oko mai a mea mo faite te motoka. Faitalia a fakalavelave faiga‵ta, ne tumau eiloa laua i te loto ma‵losi. Ne toe fakafoki mai ne Arthur Willis a pati kolā ne ‵sae mai i te mekesini ko The Golden Age, penei: “E seai se auala e tō loa io me tō faigata ki Ana Molimau.”

Ne fakamatala mai ne te paenia ko Charles Harris me ne fai ne fakalavelave faiga‵ta o te ga‵lue i fa‵kai ‵mao ke pili malosi atu a ia ki a Ieova. Ne toe fai mai a ia: “E sili atu te ola e aunoa mo ne kope. Kafai ne loto fiafia a Iesu o moe e aunoa mo se fale, e ‵tau foki mo tatou o fia‵fia ke fai penā.” Kae tenā loa te mea ne fai ne paenia e tokouke. Fakafetai ki te lotou ga‵lue malosi, ko salalau atu te tala ‵lei i Ausetalia kātoa, mai te fesoasoani atu ki tino e tokouke ke ‵lago atu ki te Malo o te Atua.

^ pala. 4 Ne ‵fuli te igoa o Tino A‵koga ki te Tusi Tapu ki Molimau a Ieova i te tausaga 1931.Isa. 43:10.