Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Fepuali 2017

Fesili Mai Tino Fai‵tau

Fesili Mai Tino Fai‵tau

Ne tusi ne te apositolo ko Paulo e uiga ki a Ieova telā “e se mafai o talia ne ia ke tofotofogina koutou ke silia atu i te mea telā e mafai o fa‵ki ne koutou.” (1 Koli. 10:13) Ko tena uiga e iloa mai mua ne Ieova a mea kolā e mafai o fa‵ki ne tatou kae ko oti ne filifili ne ia a tofotofoga ka fakafesagai mo tatou?

Ke mafaufau ki se vaega kilokiloga penei. Se taina ne fano fakamate tena tama tagata kae ne fai tena fesili: ‘E mata, e iloa ne Ieova mai mua me ne mafai ne māua mo taku avaga o fa‵ki ki te fakalavelave ne ‵tupu ki mā tama? E mata, ne ‵tupu te mea tenā ona me fakatalitonu mai ne te Atua me mafai a māua o fa‵ki?’ E mata, e isi se pogai ‵tonu ke talitonu me e mafai a Ieova o ‵fuli a mea e ‵tupu i ‵tou olaga i se auala fakaofoofogina?

A te mafau‵fau faka‵lei ki pati a Paulo kolā ne tusi ki lalo i te 1 Kolinito 10:13 e maua mai ei a te ‵tali: E talitonu tatou me e seai se akoakoga mai te Tusi Tapu i a Ieova e iloa mai mua ne ia a mea kolā e mafai o fa‵ki ne tatou, kae fakavae mai te iloaga tenā me ko oti ne filifili ne ia a tofotofoga kolā ka fakafesagai mo tatou. Ke mafau‵fau i pogai e fa e ‵tau o fai penā.

A te mea muamua, e tuku mai ne Ieova ki tāgata te saolotoga ke fai olotou filifiliga. E manako a ia ke filifili loa tatou e uiga ki ‵tou olaga. (Teu. 30:19, 20; Iosu. 24:15) Kāfai e filifili ne tatou te auala tonu, e mafai o ‵kilo atu tatou ki a Ieova ke takitaki mai tatou i ‵tou auala. (Faata. 16:9) Kae kafai e ‵se ‵tou filifiliga, e panaki loa mo tatou a ikuga o ‵tou filifiliga. (Kala. 6:7) Moi ne filifili loa ne Ieova a fakalavelave e fe‵paki mo tatou, ko tena uiga, ko fakaseaoga loa ne ia te saolotoga ke fai ‵tou filifiliga?

Te lua, e se puipui ne Ieova a tatou “i taimi o fakalavelave mo mea ‵tupu fakafuasei.” (Fai. 9:11, NW) A fakalavelave ‵tupu fakafuasei—maise ki fakalavelave ‵lasi—e ‵tupu māfai e ‵nofo atu tatou i koga ‵se mo taimi ‵se. Ne faipati a Iesu e uiga ki te fakalavelave ne ‵tupu ki te toko sefuluvalu kolā ne siga ki luga i ei te taoa i Siloama, kae ne fakaasi mai ne ia me e se ko te loto o te Atua ke ‵tupu te mea tenā. (Luka 13:1-5) E se se mea ‵lei ke mafau‵fau me ko iloa mai mua ne Ieova a mea ka ‵tupu ki olaga o tino io me ko te ikuga ne mate ei se tino?

Te tolu, tino taki tokotasi e aofia i se kinauga e uiga ki te fakamaoni. Ke mafaufau ki a Satani telā ne tofotofo ne ia te fakamaoni o tino kolā e tavini ki a Ieova, mai te ‵losi atu me ka se fakamaoni a latou māfai ko fakafesagai atu ki fakalavelave. (Iopu 1:9-11; 2:4; Fa. 12:10) Kāfai e puipui ne Ieova tatou mai fakalavelave me mafaufau a ia me ko tō lasi ko se mafai ne tatou  fa‵ki, e mata ka se fakamalosigina a te mea tenā a te lo‵siga ‵se a Satani i a tatou e tavini atu ki te Atua ona me mafau‵fau fua tatou kia tatou eiloa?

Te fa, e se fia iloa ne Ieova a mea kātoa e seki ‵tupu i ‵tou olaga ki a tatou. Kae te manatu e uiga ki te filifili ne te Atua a fakalavelave koituai o tupu ki a tatou e fakaasi mai ei e ‵tau o iloa ne ia a mea katoa kolā e seki ‵tupu. Kae te kilo‵kiloga tenā e se fakavae mai te Tusi Tapu. E mafai eiloa o iloa ne te Atua a mea kātoa kolā ne seki ‵tupu e uiga ki aso mai mua. (Isa. 46:10) Kae e fakaasi mai i te Tusi Tapu me e filifili eiloa ne ia a mea e fia iloa ne ia e uiga ki aso mai mua. (Kene. 18:20, 21; 22:12) E fakapaleni ne ia tena malosi e uiga te iloa ne ia a mea e ‵tupu i aso mai mua ona me āva ki a ia ki ‵tou saolotoga ke fai a filifiliga. E mata, e se tenā eiloa te mea e fakamoemoe tatou ki te Atua e fakatāua ne ia ‵tou saolotoga kae fakagalue ne ia ana uiga ‵gali i te auala katoatoa kae paleni ‵lei?—Teu. 32:4; 2 Koli. 3:17.

E mafai pefea o malamalama tatou ki pati a Paulo: “Te Atua . . . e se mafai o talia ne ia ke tofotofogina koutou ke silia atu i te mea telā e mafai o fa‵ki ne koutou”? E se fakauiga a fakamatalaga a Paulo ki mea e fai ne Ieova kolā seki tupu, kae ki taimi e fe‵paki ei mo fakalavelave. * Ne fakamalosi mai te apositolo ko Paulo me faitalia te ‵lasi o fakalavelave i ‵tou olaga, me ka fesoasoani mai a ia ki a tatou. (Sala. 55:22) E fakavae a pati fakamafanafana a Paulo ki akoakoga fakavae e lua o te munatonu.

Te mea muamua, a fakalavelave e fe‵paki mo tatou “e masani ei a tino.” Tela la a ‵tou fakalavelave i te taimi tenā, e masani o fakafesagai ki ei a tino. Ne fakalavelave kolā e mafai o fa‵ki ne tatou—māfai e fakalagolago tatou ki te Atua. (1 Pe. 5:8, 9) I te tusi faitau i te 1 Kolinito 10:13, ne fakauiga a Paulo ki fakalavelave ne fe‵paki mo te kau Isalaelu i te ‵koga lavaki. (1 Koli. 10:6-11) A tofotofoga ne fe‵paki mo te kau Isalaelu fakamaoni ne fakalavelave e masani i ei a tino kae ne mafai foki eiloa latou o fa‵ki a mea konā. E fakafa taimi ne fai mai a Paulo “e pelā mo nisi tino i a latou” kolā ne seki faka‵logo. Se mea fakafanoanoa, e pelā mo nisi Isalaelu ne fai ne latou a amioga ma‵sei me e se mana‵ko ke fakalagolago ki te Atua.

Te lua, “Te Atua e fakamaoni.” A tala fakasolopito e uiga ki faifaiga a te Atua ki ana tino se fakaasiga me tuku ne ia tena alofa fakamaoni ki “tino e alofa ki a ia, kae tausi ki ana fakatonuga.” (Teu. 7:9) E fai mai foki a te Atua e tausi ki ana tautoga. (Iosu. 23:14) E uiga ki ana tala fakasolopito o te fakamaoni, a latou kolā e a‵lofa kae faka‵logo ki a ia e talitonu me e tausi ne ia a tautoga tāua e lua konei māfai e fe‵paki mo fakalavelave: (1)  e se mafai o talia ne ia ke tofotofogina latou ke silia atu i te mea telā e mafai o fa‵ki ne koutou (2) “e tuku mai foki ne ia a te auala e ‵sao ei” latou.

A Ieova e “fakamafanafana mai a ia ki a tatou i ‵tou puapuaga katoa”

E tuku mai pefea ne ia a te auala e ‵sao ei latou kolā e fakalagolago ki a ia i te taimi e fe‵paki ei mo fakalavelave? E tonu eiloa, kāfai ko tena loto, e faigofie ki ei ke ave keatea a fakalavelave konā. Kae masaua a pati a Paulo: “E tuku mai foki ne [Ieova] a te auala e ‵sao ei koutou, ko te mea ke mafai ne koutou o kufaki i ei.” Tela la, e, “uke a auala” e tuku mai ne ia telā e manakogina ke mafai o fa‵ki kae manumalo i ‵tou fakalavelave. Mafaufau ki nisi auala ke manumalo ei tatou i ‵tou fakalavelave:

  • E “fakamafanafana mai a ia ki a tatou i ‵tou puapuaga katoa.” (2 Koli. 1:3, 4) E fakamafanafana mai ne Ieova ‵tou mafaufau, ‵tou loto, mo ‵tou lagonaga i auala tena Muna, tena agaga tapu mo meakai faka-te-agaga telā e fakasoa mai i te tavini fakamaoni.—Mata. 24:45; Ioa. 14:16, Loma 15:4.

  • E takitaki mai ne ia tatou auala tena agaga tapu. (Ioa. 14:26) Kāfai e ‵tupu a fakalavelave, tena agaga tapu e fakamasaua mai ki a tatou a tala faka-te Tusi Tapu mo fakatakitakiga fakavae telā e mafai o takitaki ei tatou ke fai a filifiliga poto.

  • E mafai o fakaaoga ne ia a agelu mō tatou.—Epe. 1:14.

  • E mafai foki o fesoasoani mai i auala i ‵pati mo faiga a ‵tou taina tapuaki “se fakamafanafanaga lasi ‵ki” ki a tatou.—Ko. 4:11.

Tela la, se a te uiga a pati o Paulo i te 1 Kolinito 10:13? A Ieova e se fai io me filifili ne ia a fakalavelave e fe‵paki mo tatou. Kae kāfai e ‵tupu se fakalavelave, e mautinoa i a tatou: Kafai e tali‵tonu katoatoa tatou ki a Ieova, ka se mafai o talia ne ia ke tofotofogina tatou ke silia atu i te mea telā e mafai o fa‵ki ne tatou; e tuku mai foki ne ia a te auala e ‵sao ei ko te mea ke mafai ne tatou o kufaki i ei. Se fakamafanafanaga ‵lasi! ‵ki!

^ pala. 2 Te pati Eleni ko te “fakaosoosoga” e mafai foki o fakauiga ki “tofotofoga, fakalavelave.”