Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Kaia e ‵Tau ei mo Tatou o “Tumau i te Matapula‵pula”?

Kaia e ‵Tau ei mo Tatou o “Tumau i te Matapula‵pula”?

“E se iloa ne koutou a te aso e vau ei te otou Aliki.”—MATA. 24:42.

PESE: 136129

1. Fakamatala mai se fakaakoakoga me kaia e tāua ei ke matapula‵pula ki te taimi mo mea kolā e tupu i ‵tou tafa. (Ke onoono ki te ata i te kamataga.)

LIMA, fa, tolu, lua, tasi! Kafai ko lavea ne tatou te taimi tenā i luga i te vitio, ko iloa ne tatou me ko ‵tau o saga‵saga katoa ki ‵tou nofoaga kae fakalogo‵logo ki pese fakatagi‵tagi kolā e kamata ki ei ‵tou fono. Tenei te taimi ke fakalogo‵logo faka‵lei ki pese fakatagi‵tagi o te Malo, kae ko te ‵toe mea tāua, ke fakatoka ‵tou mafau‵fau mo ‵tou loto ki lāuga kolā ka ‵soko mai. Kae e a māfai e isi ne tino ne seki ‵saga ki te faka‵pulaga tenā me e fakalave‵lave o sau‵tala mo taugasoa kae oloolo, ko fai ei me e se iloa ne latou me ko kamata te polokalame? Ko fakaasi faka‵lei mai i ei me ne seki matapula‵pula latou ki te taimi mo mea kolā e ‵tupu i olotou tafa—te takitaki fono ko tu mai te tulaga, ko ‵tagi a pese fakatagi‵tagi, mo tino fakalogo‵logo ko saga‵saga i olotou nofoaga. A te ata tenei e fakaasi mai ki a tatou me e isi se mea e lasi atu ko pili o tupu i se taimi mai mua nei. Kae se a te mea tenā?

2. Kaia ne fai atu ei a Iesu ki ana soko “ke tumau i te matapula‵pula”?

2 I te taimi ne faipati atu ei a Iesu e uiga ki te “gataga o te olaga tenei,” ne fakamalosi ne ia ana soko, penei: “Ke matapula‵pula kae mataala, me e se iloa ne koutou te taimi telā ko oti ne fuafuagina.”  Mai tua ifo, ne toe fakamalosi ne Iesu latou: “Ke tumau i te matapula‵pula.” (Mata. 24:3; faitau te Maleko 13:32-37.) E fakaasi mai foki i te tusi o Mataio a te faka‵pulaga a Iesu ki ana soko: “Ke tumau i te matapula‵pula, me e se iloa ne koutou a te aso e vau ei te otou Aliki. . . . E ‵tau foki mo koutou o toka faeloa, me i te Tama a te tagata e vau i te itula telā e seki fakamoe‵moe koutou ki ei.” Ne ‵toe fai mai a ia: “Ke tumau i te matapula‵pula, me e se iloa ne koutou te aso io me ko te itula.”—Mata. 24:42-44; 25:13.

3. Kaia e ‵tau o ‵saga malosi ki te faka‵pulaga a Iesu?

3 E pelā me ne Molimau a Ieova, e ‵saga malosi tatou ki faka‵pulaga a Iesu. E iloa ne tatou me e ola tonu tatou i te “taimi o te gataga,” ko toetoe te taimi kae ko pili ‵ki o kamata a te “fakalavelave lasi.” (Tani. 12:4, NW; Mata. 24:21) E lavea ne tatou a taua, te gasolo aka ki luga o amioga fakatauavaga sē ‵tau, amioga ma‵sei, ‵numi valevale i mea tau lotu, seai ne mea‵kai, famai, mo mafuie i te lalolagi kātoa. Kae e iloa ne tatou a te lasi o te faiga o te galuega talai o te Malo telā e fai ne tino o Ieova i so se koga. (Mata. 24:7, 11, 12, 14; Luka 21:11) E olioli tatou ki te vau o te Aliki mō tatou e pelā foki mo te fakataunuga o te fuafuaga a te Atua.—Male. 13:26, 27.

KO PILI ‵KI MAI TE TAIMI

4. (a) E iloa pefea ne tatou i a Iesu e iloa tonu ne ia te taimi e kamata ei a Amaketo? (e) E tiga eiloa e se iloa ne tatou te kamataga o te fakalavelave lasi, kae e mautinoa pefea ki a tatou me ka taunu loa a te mea tenā?

4 E iloa ne tatou me i so se fono o te atufenua, e isi eiloa se taimi mautinoa e kamata i ei te polokalame. Kae e pefea te taumafai o tatou, e se mafai o iloa tonu ne tatou te taimi e kamata ei te fakalavelave lasi. I te taimi ne nofo ei a Iesu i te lalolagi, ne fai mai a ia: “E uiga ki te aso mo te itula tenā, e seai se tino e iloa ne ia, ke oko eiloa ki agelu o te lagi mo te Tama, kae na ko te Tamana fua.” (Mata. 24:36) Kae ko Keliso ko pule i luga i te lagi ke taua atu ki te lalolagi a Satani. (Fa. 19:11-16) E mautinoa eiloa me ko iloa nei ne Iesu te taimi tonu e kamata ei te taua o Amaketo. E tiga eiloa e se iloa ne tatou, e tāua ‵ki eiloa ke matapula‵pula ke oko ki te fakalavelave lasi. Kae e iloa ne tatou me e mautinoa eiloa ki a Ieova a te taimi tenā. Ko oti ne fakamautinoa mai ne ia te taimi o te gataga. Ko pilipili atu tatou ki te taimi e kamata ei te fakalavelave lasi kae “ka se tuai foki!” (Faitau te Sapakuka 2:1-3.) E mafai pefea o tali‵tonu tatou ki te mea tenei?

5. Taku mai se fakaakoakoga ke fakaasi mai me e fakataunu eiloa ne Ieova ana valoaga i te taimi tonu.

5 A valoaga a Ieova e ‵tonu faeloa kae fakataunu i te taimi tonu! Ke onoono ki te taimi tonu ne faka‵sao ne ia te kau Isalaelu mai Aikupito. I a Nisani 14, 1513 T.L.M., ne fai mai a Mose: “I te aso ne kātoa ei te 430 tausaga, ne tiaki ei ne matakaiga o Isalaelu te fenua o Aikupito.” (Eso. 12:40-42) A te “430 tausaga” ne kamata i te taimi ne fai ne Ieova te feagaiga mo Apelaamo kae ne fakataunu i te 1943 T.L.M. (Kala. 3:17, 18) I se taimi mai tua ifo, ne fai atu a Ieova ki a Apelaamo, penei: “A au fanau ka ‵nofo i se fenua fakaa‵tea; ka fai latou mo pologa i te fenua tenā, kae ka fakafi‵tagina olotou olaga e ‵tusa mo te fa selau tausaga.” (Kene. 15:13; Galu. 7:6) A te “fa selau tausaga” tenā o te puapuaga ne mautinoa eiloa me ne kamata i te 1913 T.L.M. i te taimi ne fakaitaita ne Isamaeli a Isaako i te taimi ne ‵vae ei kea‵tea a Isaako mai te u o tena mātua, kae ne gata atu ei i te taimi ne tiakina ei ne te kau Isalaelu a Aikupito i te 1513 T.L.M. (Kene. 21:8-10; Kala. 4:22-29) E tonu, e fa senitenali mai mua o ‵tupu a mea konei, ko oti ne fakamoe ne Ieova te taimi tonu ke faka‵sao ei ana tino!

6. E mafai pefea o tali‵tonu tatou me e mafai ne Ieova o faka‵sao ana tino?

 6 A Iosua se tokotasi ne sao mai Aikupito kae ne fakamasaua atu ne ia ki te kau Isalaelu: “E iloa faka‵lei ne koutou katoa i otou ‵kano loto taki tokotasi, me i te Aliki [Ieova] te otou Atua ko oti ne tuku atu ne ia ki a koutou a mea ‵lei katoa, kolā ne tauto a ia ke tuku atu. A tautoga katoa a ia ne fai, ko oti katoa ne fakataunu; e seai se mea e seki fakataunu.” (Iosu. 23:2, 14) E tali‵tonu eiloa tatou me ka taunu eiloa te tautoga a Ieova me ka faka‵sao ne ia tatou i loto i te fakalavelave lasi. Tela la, kafai e ma‵nako tatou ke ‵sao atu i te aso telā ka fakaseai atu ei te fakanofonofoga tenei, e ‵tau la mo tatou o tumau i te matapula‵pula.

E TĀUA KE MATAPULA‵PULA MŌ TE FAKA‵SAOGA

7, 8. (a) Se a te galuega a te tino leoleo i aso mua, kae se a te akoakoga e tauloto ne tatou mai i ei? (e) Taku mai se fakaakoakoga e uiga ki te ikuga māfai e tō te moe o te tino leoleo i tena koga galue.

7 E mafai eiloa o tauloto ne tatou se fakaakoakoga i aso mua ki te tāua ke matapula‵pula. I taimi konā, a fa‵kai lasi—e pelā mo te fa‵kai o Ielusalema—ne nikoi ne ‵pui ma‵luga. A ‵pui konā ne fai pelā me se puipuiga ki a latou mai olotou fili mo se taoa maluga ke mafai o lavea ne latou a mea e ‵tupu i olotou ‵tafa. I te ao pelā foki mo te po kātoa, e tu sale se tino ke leoleo ne ia a ‵pui mo te mataloa o te ‵pui. Kae e fakailoa mai ki tino i loto i te fa‵kai māfai ko pili mai se fakalavelave. (Isa. 62:6) E aofia i ei te ola mo te mate o se tino māfai a te tino leoleo e mataala kae fakamaoni ki tena taimi tu.—Eseki. 33:6.

8 E lipoti mai ne te tagata tusitala Iutaia ko Josephus me i te 70 T.A., ne pukemalo ne te kautau Loma a te taoa o Anitoni, me e soko atu te taoa tenā ki te ‵pui o Ielusalema, kae ne to te moe o te tino leoleo mataloa o te ‵pui! Mai konā ne olo atu fakavave a kautau Loma ki loto i te faletapu kae ‵sunu ne latou, ne fatoa tupu eiloa se fakalavelave lasi ‵ki i Ielusalema mo te malo o Iutaia.

9. Se a te mea e seiloa ne te tokoukega o tino i aso nei?

9 E uke a malo i aso nei ko fakaaoga a vitio, mea pei ata, komupiuta mo nisi mea aka ke fai pelā me se “tino leoleo”. A mea konei e fakaaoga ne latou ke puipui ei mai olotou fili kolā e aumai a fakalavelave ki olotou fenua. Kae ko mea konei kolā e fai pelā me se “tino leoleo,” e mafai fua o ‵poa ne latou a mea fakama‵taku kolā e ‵tupu i malo tāgata. E seai lele eiloa se iloa o latou e uiga ki te pulega mo galuega a te Malo o te Atua i te lagi telā ko tuku i lima o Keliso mo tena tusaga ki te fakamasinoga ko pili nei o fai ki malo tagata. (Isa. 9:6, 7; 56:10; Tani. 2:44) I te suā feitu, mai ‵tou mataala mo te matapula‵pula i te feitu faka-te-agaga, ka toka ei tatou ki te aso o te fakamasinoga.—Sala. 130:6.

FAKAETEETE I A KOE MA FAKA‵SEGINA MAI TOU MATAPULAPULA!

10, 11. (a) Se a te mea e ‵tau o fakaeteete ei tatou kae kaia? (e) E fakatalitonu ne koe pefea me e fakamalosi ne te Tiapolo a nisi tino ke se ‵saga ki valoaga faka-te-Tusi Tapu?

10 Ke mafaufau aka eiloa ki se tino leoleo e tu i te po kātoa. Ko gasolo o vāivāi kae ko tulēmoe mai mua malie fua o oti tena tūga. E pelā eiloa mo tatou, a te pili atu o tatou ki te gataga o te olaga tenei, ko te gasolo aka foki o uke a fakalavelave e fe‵paki mo tatou, ko manakogina ei te matapula‵pula. Se mea fakafanoanoa māfai e se matapula‵pula tatou! Ke na sau‵tala nei tatou ki auala e tolu kolā e fai ei ke se toka kae sē matapula‵pula māfai e se fakaeteete tatou.

11 E fai ne Satani ke ‵to a moe o tino i te feitu faka-te-agaga? I te taimi ko pili ei o mate a Iesu, ne fakamasaua ne ia ki ana soko e fakatolu taimi e uiga ki te “pule o te lalolagi  tenei.” (Ioa. 12:31; 14:30; 16:11) Ne iloa ne Iesu me i te Tiapolo ka taumafai ke fakapouli ne ia a mafaufau o tino ko te mea ke se fakatāua ne latou a folafolaga a Ieova e uiga mo aso mai mua. (Sefa. 1:14) E fakapouli ne Satani a mafaufauga o tino e auala i lotu ‵se. E mata, tenā te mafaufauga o tino māfai e sautala mo koe? E mata, ‘ko oti ne fakapouli a mafaufau o tino sē tali‵tonu’ e uiga ki te pili mai o te gataga o te fakanofonofoga masei tenei, mo te meatonu ki te pule mai nei o Keliso i te Malo o te Atua? (2 Koli. 4:3-6) E mata, e lagona sāle ne koe a tino e fai mai i a latou, “E se fia‵fia ki te talaiga”? Kae ko te ukega o tino, e seai eiloa se fia‵fia māfai e fakamatala atu ki a latou me ko pili ‵ki te gataga o te olaga masei tenei.

12. Kaia e se ‵tau o talia ne tatou te Tiapolo ke faka‵se ne ia tatou?

12 Ke se talia lele eiloa ke fakavāivāi mai a te se fia ‵saga mai o tino ki a koe ko fai ei ke se matapulapula koe. E iloa ne tatou te tāua ke matapula‵pula. Ne tusi atu a Paulo ki taina tali‵tonu: “Me e iloa faka‵lei eiloa ne koutou i te aso o Ieova ka oko mai,” kae ne ‵toe fakasoko mai ne ia “e pelā me se tino kaisoa i te po.” (Faitau te 1 Tesalonia 5:1-6.) Ne fai mai ne Iesu te faka‵pulaga: “E ‵tau foki mo koutou o toka faeloa, me i te Tama a te tagata e vau i te itula telā ne seki mafau‵fau koutou ki ei.” (Luka 12:39, 40) Ko pili nei o faka‵se ne Satani a tino mai te mafau‵fau me ko maua te “filemu mo te tokagamalie.” Kae ko ‵lei foki te tulaga o te lalolagi nei. E pefea la tatou? A te aso o te fakamasinoga tenā e se ‵tau o vau “pelā me se tino kaisoa,” māfai fua e “ala faeloa tatou kae tausi ‵tou mafaufau ke ‵lei.” Tela la, e ‵tau o faitau faeloa ki te Muna tusia a te Atua kae mafau‵fau loto ki pati a Ieova e fai mai ki a tatou.

13. E pokotia pefea a tino i te agaga o te lalolagi, kae e mafai pefea o ‵kalo keatea tatou i te fakamalosiga fakamataku tenā?

13 E fakamalosi ne te agaga o te lalolagi ke ‵moe tatou i te feitu faka-te-agaga. E tokouke i aso nei e fakalavelave ‵ki i mea masani o te olaga telā ne fai ei ke se “fia‵fia a latou [o] iloa ‵lei ne latou olotou manakoga faka-te-agaga.” (Mata. 5:3) Ko oko loa i te ‵saga malosi ki te mauaga o kope faka-te-fotino mo mea fakagali‵gali o te lalolagi telā e fakamalosi aka ei a “manakoga o te foitino mo manakoga o mata.” (1 Ioa. 2:16) A pisinisi i mea fakafia‵fiaga ko oko loa i te ‘fakava‵lea  ne ia a tino ki fakafiafiaga,’ ko fai ei ke gasolo loa ki luga a fakaosoosoga i tausaga takitasi. (2 Timo. 3:4) Tenā te pogai e fai atu ne Paulo ki Kelisiano “ke mo a ma fai otou fuafuaga mō te faiga o manakoga o te foitino” telā e fai ei ke moe latou i te feitu faka-te-agaga.—Loma. 13:11-14.

14. Se a te fakapulaga e maua ne tatou mai te Luka 21:34, 35?

14 I lō te talia a fakamalosiga mai te agaga o te lalolagi, e talia ne tatou i ‵tou olaga a fakamalosiga a te agaga o te Atua e auala i te malamalama ne tuku mai ne Ieova e uiga ki ana fuafuaga mō aso mai mua mō tatou. [1] (1 Koli. 2:12) E seai se mea fakaofoofogia e fai ko te mea ke moe se tino i te feitu faka-te-agaga—ko mea masani fua o te olaga e mafai o fakalavelave mai ki ‵tou polokalame faka-te-agaga ko māfai ei koe o fai penā. (Faitau te Luka 21:34, 35.) E fakatauemu mai nisi tino ona ko tou matapula‵pula, kae e se fai ne te mea tenā ke galo i a tatou a te manakoga ke fakava‵vave te galuega. (2 Pe. 3:3-7) I lō te fai penā, e ‵tau o maopoopo faeloa mo taina Kelisiano i ‵tou fakatasiga i fakapotopotoga, ko te koga e maua ei te agaga tapu o te Atua.

E mata, e fai ne koe so se mea e mafai ne koe o fai ko te mea ke tumau koe i te matapulapula i te feitu faka-te-agaga? (Ke onoono ki palakalafa e 11-16)

15. Se a te mea ne tupu ki a Petelu, Iakopo mo Ioane, kae e mafai pefea o tupu foki ki a tatou a te mea tenā?

15 E mafai ne ‵tou foitino se ‵lei katoatoa o fakavāivai mai ki ‵tou fakaikuga ke matapula‵pula. Ne iloa ne Iesu a vāivāiga faka-te-foitino e mafai o pokotia ei a tino se ‵lei katoatoa. Ke sau‵tala tatou e uiga ki te mea ne tupu ki a Iesu i te po mai mua o tamate ei a ia. Ko te mea ke tumau tena fakamaoni, ne ‵tau o akai atu a ia ki tena Tamana faka-te-lagi ki se fakamalosiga. Ne fakamolemole atu a Iesu ki a Petelu, Iakopo mo Ioane “ke matapula‵pula” i te taimi ne ‵talo ei a ia. E ui ei te fai penā, ne seki fia ‵saga atu latou ki te mea fakamataku ko pili o tupu. I lō te matapula‵pula kae leoleo atu te olotou Faiakoga, ne ‵saga malosi latou o fakama‵lie olotou manakoga faka-te-foitino kae ne tō olotou ‵moe. E tigā eiloa ko vāivāi te foitino o Iesu, kae ne tumau eiloa a ia i te matapulapula kae ‵talo faeloa ki tena Tamana. Kae tenā eiloa te mea e ‵tau o fai ne ana soko.—Male. 14:32-41.

16. E ‵tusa mo te Luka 21:36, ne fakatonu mai pefea ne Iesu ke “tumau i te matapula‵pula”?

16 E uke atu a mea e ‵tau o fai ke “tumau i te matapula‵pula” i te feitu faka-te-agaga i lō te fai fua o te mea tonu. I nai aso mai mua o te fakalavelave i te fatoaga i Ketesemane, ne fai atu ne Iesu ki ana soko foki loa konā ke ‵talo faeloa ki a Ieova. (Faitau te Luka 21:36.) Ke tumau i te matapula‵pula i te feitu faka-te-agaga e ‵tau mo tatou o toka faeloa i te ‵talo.—1 Pe. 4:7, fakamatalaga mai lalo.

TUMAU I TE FAKAASI ATU TOU MATAPULAPULA

17. E mafai pefea o matapula‵pula tatou ki mea kolā ko pili o oko mai i aso mai mua nei?

17 Ona ko te mea ne fai mai a lesu me ka oko mai te gataga “i te itula telā e seki fakamoe‵moe [tatou] ki ei,” tela la tenei eiloa te taimi e se ‵tau o moe i te feitu faka-te-agaga, e se ‵tau foki o fakamāumāu taimi ke kausaki ki mea gali kolā e ofo mai ne Satani mo tena lalolagi kae ma‵nako malosi tatou ki ei. (Mata. 24:44) I loto i te Tusi Tapu, ko oti ne fakaasi mai ne te Atua mo Keliso a lā fakamoemoega mō tatou i aso mai mua nei mo te auala e mafai ei tatou o matapula‵pula. E ‵tau o ‵saga tonu tatou ki ‵tou feitu faka-te-agaga, tou fesokotakiga mo Ieova kae fakamuamua a mea o te Malo. E ‵tau o ‵saga faka‵lei tatou ki te taimi mo mea kolā e ‵tupu i ‵tou tafa ko te mea ke matapula‵pula tatou ki mea kolā ko pili o oko mai. (Fa. 22:20) Ko tu atu nei ‵tou ola i se tulaga fakamataku!

^ [1] (palakalafa e 14) Ke onoono ki te mataupu e 21 a te Tusi Ko Pule Mai te Malo!