Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Iulai 2016

Fakasalalau Atu te Tala ‵Lei o te Alofa Tauanoa

Fakasalalau Atu te Tala ‵Lei o te Alofa Tauanoa

“Ke tuku atu se molimau katoatoa e uiga ki te tala ‵lei o te alofa tauanoa o te Atua.”GALU. 20:24.

PESE: 101, 84

1, 2. Ne fakaasi mai pefea ne te apositolo ko Paulo me ne loto fakafetai a ia mō te alofa tauanoa o te Atua?

NE MAFAI eiloa o fai atu te apositolo ko Paulo mo te fakamaoni, penei: “Ne seki māumāu [te] alofa tauanoa [o te Atua] telā ne fakaasi mai ki a au.” (Faitau te 1 Kolinito 15:9, 10.) Ne iloa ‵lei ne Paulo me ne seki ‵tau o maua ne ia te alofa fakamagalo o te Atua, me i a ia se tino telā ne fakasaua muamua ne ia a Kelisiano.

2 I te fakaotiotiga o tena olaga, ne tusi atu a Paulo ki a Timoteo, telā ne ga‵lue fakatasi mo ia: “Au e fakafetai atu ki a Keliso Iesu te ‵tou Aliki, telā ne tuku mai ne ia te ‵mana ki a au, me ne talitonu a ia i a au e fakamaoni o fai te galuega ne tuku mai ne ia.” (1 Timo. 1:12-14) Se a te galuega tenā? Ne fai atu ne Paulo ki toeaina o te fakapotopotoga i Efeso a mea kolā e aofia i te mea tenei, i ana muna: “E se fakatāua ne au a toku ola, kae e ‵tau o fakaoti ne au a te fakatau‵telega mo te galuega telā ne maua ne au mai te Aliki ko Iesu, ke tuku atu se molimau katoatoa e uiga ki te tala ‵lei o te alofa tauanoa o te Atua.”Galu. 20:24.

3. Se a te galuega fakapito ne tuku atu ki a Paulo? (Ke onoono ki te ata i te kamataga.)

 3 Se te “tala ‵lei” ne talai ne Paulo telā ne faka‵mafa mai i ei a te alofa tauanoa o te Atua? Ne fai atu a ia ki Kelisiano i Efeso, penei: “Ko oti eiloa ne lagona ne koutou a te galuega fakasituati o te alofa tauanoa o te Atua telā ne tuku mai ki a au mō koutou.” (Efe. 3:1, 2) Ko oti ne fakatonu atu ki a Paulo ke fakasalalau atu a te tala ‵lei ki tino kolā e se ne Iutaia ko te mea ke aofia latou i tino kolā e ‵kau fakatasi mo Keliso i te Malo faka-Mesia. (Faitau te Efeso 3:5-8.) Mai tena loto finafinau o fai tena galuega, ne tuku mai ne Paulo se fakaakoakoga ‵lei mō Kelisiano i aso nei kae fakaasi mai me ne “seki maumau” te alofa tauanoa o te Atua telā ne fakaasi atu ki a ia.

E MATA, FAKAMALOSI KOE NE TE ALOFA TAUANOA O TE ATUA?

4, 5. Kaia e mafai o fai atu tatou me i te “tala ‵lei tenei o te Malo” e ‵pau eiloa mo te tala ‵lei o te “alofa tauanoa o te Atua”?

4 I te taimi tenei o te gataga, ko oti ne fakatonu atu ki tino o Ieova ke talai atu te “tala ‵lei tenei o te Malo . . . ki te lalolagi nofoaki kātoa mo fai se molimau ki atufenua katoa.” (Mata. 24:14) A te fekau telā e fakasalalau atu ne tatou ko te “tala ‵lei o te alofa tauanoa o te Atua” me i fakamanuiaga katoa e fakamoe‵moe ke maua ne tatou mai lalo i te pulega a te Malo e auala mai i te alofa tauanoa o Ieova i a Keliso. (Efe. 1:3) E mata, e fakaakoako atu tatou taki tokotasi ki a Paulo mai te fakaasi atu o te loto fakafetai mō te alofa tauanoa o Ieova mai te kau atu mo te loto finafinau ki te galuega talai?—Faitau te Loma 1:14-16.

5 I te mataupu mai mua, ne tauloto ne tatou a te auala e maua ei ne tatou tino agasala a mea aoga mai te alofa tauanoa o Ieova i auala e uke. Tela la, e ‵nofo kaitalafu tatou ki tino mai te fai ne tatou a te ‵toe mea e mafai ke fakailoa atu ki a latou a te auala e fakaasi mai ei ne Ieova tena alofa mo te auala e mafai o aoga ki a latou taki tokotasi. I auala fea e mafai o fesoasoani atu tatou ki nisi tino ke loto fakafetai mō te alofa tauanoa o te Atua?

FAKASALALAU ATU TE TALA ‵LEI E UIGA KI TE TAULAGA TOGIOLA

6, 7. Kafai e fakamatala atu ne tatou a te togiola ki tino, e fakasalalau atu pefea ne tatou a te tala ‵lei o te alofa tauanoa o te Atua?

6 I te lalolagi saoloto tenei, a tino ko sē ‵ma māfai e fai ne latou a agasala, tela la, e tokouke a tino e se malama‵lama i te aoga o te togiola. E se gata i ei, e tokouke a tino e mafai o lavea ne latou me i te olaga saoloto e se aumai ne ia a te fiafia tonu. I te taimi e sau‵tala ei a latou mo Molimau a Ieova, e tokouke a tino e se malamalama me se a te agasala, te auala e pokotia i ei tatou, mo mea kolā e ‵tau o fai ne tatou ke fakasaoloto ei mai te ‵nofo pologa ki te agasala. Se fakatapūga ki tino loto ‵lei ke tauloto me ne uga mai ne Ieova tena Tama ki te lalolagi nei ke ‵togi ei tatou mai te agasala mo te mate. A te mea tenā ko te fakaasiga o tena alofa sili mo tena alofa tauanoa.—1 Ioa. 4:9, 10.

7 Mai te faipati atu e uiga ki te Tama pele a Ieova, ne tusi mai a Paulo: “Ona ko te tino tenā [Iesu], ko fakasaoloto ei tatou ne te togiola e auala i tena toto, ao, ko te fakamagaloga o ‵tou agasala, e ‵tusa eiloa mo te lasi o tena alofa tauanoa.” (Efe. 1:7) A te taulaga togiola a Keliso ko te fakamaoniga sili o te alofa o te Atua mō tatou kae se fakaasiga o te lasi o Tena alofa tauanoa. Se fakatapuga ke iloa atu me kafai e fakatuanaki tatou ki te toto maligi o Iesu, ka fakamagalo eiloa ‵tou agasala kae ka faka‵magina ‵tou loto lagona! (Epe. 9:14) A te tala ‵lei tenei e ‵tau o fakailoa atu ki nisi tino!

 FESOASOANI KI TINO KE ATI AKA SE FESOKOTAKIGA MO TE ATUA

8. Kaia e ‵tau ei mo tino agasala o faka‵lei mo te Atua?

8 E maua ne tatou te tiute ke fakailoa atu ki tino katoa me e mafai o maua ne latou se fesokotakiga ‵lei mo te lotou Mafuaga. A koi tuai o fakatuanaki a tino ki te taulaga a Iesu, e kilo atu te Atua ki a latou e pelā me ne ana fili. Ne tusi mai te apositolo ko Ioane: “A ia telā e fakatuanaki ki te Tama e maua ne ia te ola se-gata-mai; a ia telā e se fakalogo ki te Tama ka se lavea ne ia te ola, kae ka tumau eiloa te kaitaua o te Atua i luga i a ia.” (Ioa. 3:36) Se mea fakafiafia, me ne fai ne te taulaga a Keliso ke mafai o faka‵lei a tino mo te Atua. Ne folafola mai a Paulo, penei: “A koutou kolā ne ‵vae keatea kae ne fai muamua mo fai ana fili ona ko koutou ne mafau‵fau faeloa ki galuega kolā e ma‵sei, kae nei la ko oti ne faka‵lei aka ne ia koutou mo ia e alatu i te foitino o te tino tenā e auala i tena mate, ko te mea ke tuku atu koutou ki a ia.”—Ko. 1:21, 22.

9, 10. (a) Se a te tiute ne tuku atu ne Keliso ki ana taina fakaekegina? (e) E fesoasoani atu pefea a “nisi mamoe” ki olotou taina fakaekegina?

9 Ne tuku mai ne Keliso ki ana taina fakaekegina i te lalolagi nei a te mea telā me taku ne Paulo ki te “galuega o te faka‵leiga.” Ke fakamatala atu a te mea tenei, ne tusi atu a Paulo ki Kelisiano fakaekegina i te senitenali muamua, penei: “Kae ko mea katoa ne maua mai i te Atua telā ne faka‵lei ne ia te ‵tou fesokotakiga mo ia e auala i a Keliso kae tuku mai ne ia ki a matou te galuega o te faka‵leiga tenā. Ko te faka‵leiga ne te Atua a te lalolagi ki a ia e auala i a Keliso. E se fakamau ne ia olotou agasala, kae ne tuku mai ne ia ki a matou a te galuega o te faka‵leiga tenā. Tela la, a matou ko sui kolā e sui ei ne matou a Keliso, e pelā eiloa me e fakatagi atu te Atua e auala i a matou. E pelā me ne sui o Keliso e fakatagi atu matou penei: ‘Ke faka‵lei aka koutou mo te Atua.’”—2 Koli. 5:18-20.

10 Se tauliaga eiloa mō “nisi mamoe” ke fesoasoani atu ki olotou taina fakaekegina i te galuega talai. (Ioa. 10:16) Mai te tavini atu e pelā me ne sui o Keliso, e aofia latou i te galuega ko te akoakoatuga o tino ki muna‵tonu faka-te-agaga kae fesoasoani atu ki a latou ke ati aka se fesokotaki ‵pili mo Ieova. A te mea tenei se vaega tāua o te molimau katoatoa atu a te tala ‵lei o te alofa tauanoa o te Atua.

FAKAILOA ATU TE TALA ‵LEI ME E LAGONA NE TE ATUA A ‵TALO

11, 12. Kaia e fai ei e pelā me se tala ‵lei ki tino ke iloa ne latou me e mafai o ‵talo atu latou ki a Ieova?

11 E tokouke a tino e ‵talo atu ona me se mea gali ki a latou, kae e se tali‵tonu eiloa latou me e lagona ne te Atua a olotou ‵talo. E ma‵nako ke iloa ne latou a Ieova e pelā me ko te “Tino e lagona ne ia a ‵talo.” Ne tusi mai te faisalamo ko Tavita, penei: “Te Tino e Lagona ne ia ‵talo, ka ‵mai ki a koe a vaegā tino valevale katoa. Aku mea ‵se ko fai ei au ke manava‵se malosi, kae e fakamagalo ne koe motou amioga solitulafono.”—Sala. 65:2, 3NW.

12 Ne fai atu penei a Iesu ki ana soko: “Kafai e fakamolemole atu koutou ki so se mea i toku igoa, ka fai eiloa ne au te mea tenā.” (Ioa. 14:14) E manino ‵lei, me e fakauiga a te pati “so se mea” ki mea kolā e fetaui ‵lei mo te loto o Ieova. E fakatalionu mai a Ioane ki a tatou, penei: “Tenei eiloa te mea e tali‵tonu ei tatou ki a ia, me kafai e fakatagi atu tatou ki se mea e ‵tusa mo tena loto, ka fakalogologo mai eiloa a ia ki a tatou.” (1 Ioa. 5:14 )  Se mea gali ke akoako ne tatou a nisi tino ke malamalama me i te ‵talo se mea telā e sili atu i se mea telā e fai ne ia koe ke fiafia, kae se auala ‵lei ke fakapilipili atu koe ki te “nofogaaliki o te alofa tauanoa” o Ieova! (Epe.  4:16) Mai te akoako atu o latou ke ‵talo i te auala tonu, ki te Tino tonu, e pelā foki mō mea kolā e ‵tau eiloa o maua, ko mafai ei o fesoasoani atu tatou ki a latou ke fakapili‵pili ki a Ieova kae ‵sala atu ki tena fakamafanafanaga i taimi o puapuaga.—Sala. 4:1; 145:18.

TE ALOFA TAUANOA I TE FAKANOFONOFOGA FOU

13, 14. (a) Ne a tauliga ‵gali ka maua ne te kau fakaekegina i aso mai mua? (e) Se a te galuega gali ka fai ne te kau fakaekegina mō tino katoa?

13 Ko pili o fakaasi mai ne Ieova tena alofa tauanoa i te gataga o te lalolagi tenei. I te fakasino atu ki te tauliaga sili telā ne tuku atu ne te Atua ki te toko 144,000, kolā ne kalagagina ke pule fakatasi mo Keliso i tena Malo faka-te-lagi, ne tusi mai a Paulo: “A ko te Atua e lasi tena alofa fakamagalo, kae ona ko te lasi o tena alofa ki a tatou, ne fai ei ne ia ke ola fakatasi tatou mo Keliso, e ui eiloa ko ‵mate tatou i ‵tou agasala—e auala i tena alofa tauanoa ko ‵sao ei koutou. E se gata i ei, ne fai ne ia ke ola tatou kae fakasaga‵saga fakatasi ne ia tatou i te lagi i te ‵tou ‵kau fakatasi mo Keliso Iesu, ko te mea ke fakaasi atu i te olaga fou telā ka oko mai a te maumea sē fuafuagina o tena alofa tauanoa mo tena aga‵lei ki a tatou i te ‵tou ‵kau fakatasi mo Keliso Iesu.”—Efe. 2:4-7.

14 Se mea faigata ke fakaataata ne tatou a mea ‵gali kolā ne tausi ne Ieova mō Kelisiano fakaekegina māfai ko saga‵saga latou i olotou nofogaaliki o pule fakatasi mo Keliso i te lagi. (Luka 22:28-30; Fili. 3:20, 21; 1 Ioa. 3:2) E uiga ki a latou, ka fakaasi mai ne Ieova “a te maumea sē fuafuagina o tena alofa tauanoa.” Ka fakatu aka ne latou a te “Ielusalema fou,” te avaga a Keliso. (Faka. 3:12; 17:14; 21:2, 9, 10) Ka ga‵lue fakatasi latou mo Iesu o “faka‵lei a ma‵saki o atufenua,” mai te takitaki atu o tino faka‵logo ki te auala ke fakasaoloto ei latou mai te ‵mafa o te agasala mo te mate kae gasolo atu ki te tulaga ‵lei katoatoa.—Faitau te Fakaasiga 22:1, 2, 17.

15, 16. Ka fakaasi mai pefea ne Ieova a tena alofa tauanoa ki “nisi mamoe” i aso mai mua?

15 I te Efeso 2:7, e fai‵tau tatou e uiga ki te fakaasiga o te alofa tauanoa o te Atua telā ko pili o lavea atu “i taimi mai mua.” E seai se fakalotolotolua me ka fai a te lalolagi fou a Ieova e pelā me se molimau o te “maumea sē fuafuagina o tena alofa tauanoa.” (Luka 18:29, 30) A te fakaasiga sili e tasi o te alofa tauanoa o Ieova ki tino i te lalolagi nei ko te faka‵tuakaga o tino mai “lalolagi o tino ‵mate.” (Iopu 14:13-15; Ioa. 5:28, 29) A tagata mo fafine fakamaoni kolā ne ‵mate mai mua o te mate o Keliso e pelā me se taulaga, e pelā foki mo “nisi mamoe” fakamaoni katoa kolā e ‵mate atu i aso fakaoti, ka toe faka‵tu aka katoa ki te ola ke tavini atu ki a Ieova.

16 A te fia miliona o tino, kolā ne ‵mate e aunoa mo te iloa ne latou a te Atua, ka toe faka‵tu aka foki. Ka tuku atu ki a latou se avanoaga ke faka‵logo ki te pulega sili a Ieova. Ne tusi mai a Ioane: “Ne matea atu ne au a tino ‵mate, ko tino ma‵luga mo tino ma‵lalo, ne ‵tu i mua o te nofogaaliki, kae ne ‵tala mai i ei a pelugā tusi. Ne ‵tala mai foki te suā pelugā tusi; ko te pelugā tusi o te ola. Kae ne fakamasinogina a tino ‵mate i mea kolā e tusi i pelugā tusi konā e ‵tusa eiloa mo olotou amioga. Kae ne tuku mai ne te tai a tino ‵mate kolā e ‵nofo i ei, kae ne tuku mai foki ne te mate mo te Tanuga a tino ‵mate kolā e ‵nofo i ei, kae ne fakamasino a latou taki tokotasi e ‵tusa eiloa mo olotou amioga.” (Faka. 20:12, 13) E tonu, a latou kolā ka faka‵tu aka ka manakogina ke tauloto ki te auala ke fakagalue ne latou a fakatakitakiga mai te Atua kolā e maua i loto i te Tusi Tapu. E se gata i ei, ka tau‵tali latou ki fakatonuga ‵fou kae aoga kolā e fakaasi mai i “peluga tusi” kolā e fakaasi mai i ei a fakatonuga a Ieova e uiga ki te olaga i te lalolagi fou. A te fakaasimaiga o mea i loto i pelugā  tusi konā se fakaasiga o te alofa tauanoa o Ieova.

KE TUMAU O FAKASALALAU ATU TE TALA ‵LEI

17. Se a te mea e ‵tau o masaua ne tatou i te taimi e fai ei ne tatou te galuega talai?

17 Kae sili atu i mea katoa, a te ‵tou galuega e ‵tau o fai i te taimi tenei ko pili mai ei te gataga, ko te talaiatuga o te tala ‵lei o te Malo! (Male. 13:10) E mautinoa eiloa me e faka‵mafa mai i te tala ‵lei tenei a te alofa tauanoa o Ieova. E ‵tau o masaua ne tatou a te mea tenei i te taimi e fai ei ‵tou galuega talai. A te pogai tāua e talai ei tatou, ko te faka‵maluga o Ieova. E mafai o fai ne tatou a te mea tenei mai te fakaasi atu ki tino me i fakamanuiaga katoa i te lalolagi fou ne fakaasiga o te alofa atafai o Ieova.

Ke tavini atu mo te loto finafinau e pelā me ne  “situati ‵lei o te alofa tauanoa o te Atua.” 1 Pe. 4:10 (Ke onoono ki te palakalafa e 17-19)

18, 19. I te auala fea e faka‵malu ei ne tatou a te alofa tauanoa o Ieova?

18 Kafai e talai atu tatou ki nisi tino, e mafai o fakamatala atu ne tatou a mai lalo i te pulega a te Malo o Keliso, ka maua eiloa ne tino a mea aoga mai te fakagaluegaga o te taulaga togiola kae ka gasolo malielie atu a tino ki te tulaga ‵lei katoatoa. E fai mai te Tusi Tapu, penei: “Ka toe fakasaoloto a mea ne faite mai te pologa ki te masei ke maua ne latou a te saolotoga ‵malu, ko te fai mo fai a fanau a te Atua.” (Loma 8:21) Ka mafai eiloa o fai a te mea tenei e auala fua i te alofa tauanoa a Ieova.

19 E maua ne tatou a te tauliaga ke fakailoa atu ki tino katoa kolā e faka‵logo a te folafolaga fakafiafia telā e fakaasi mai i te Fakaasiga 21:4, 5: “Ka ‵solo keatea ne [te Atua] a loimata katoa mai i olotou mata, kae ka se toe ai se mate, kae ka se toe ai foki se fanoanoa, se tagi io me se ‵mae. Ko palele atu a mea mua.” Kae ne fai mai pefea a Ieova, te tino telā e sagasaga i te nofogaaliki, penei: “Kiloke! Ko faka‵fou ne au a mea katoa.” Ne toe fai mai a ia: “Tusi a pati konei ki lalo, me e fakamaoni kae ‵tonu a pati konei.” Kafai e talai atu ne tatou a te tala ‵lei mo te loto finafinau ki nisi tino, ko faka‵malu tonu eiloa ne tatou a te alofa tauanoa o Ieova!