Fanatu ki te fakasologa

Fanatu ki te fakasologa o mataupu

 MATAUPU MŌ SUKESUKEGA 38

Ke Fakaaoga Faka‵lei te Vaitaimi o te Filemu

Ke Fakaaoga Faka‵lei te Vaitaimi o te Filemu

“Ona ko te filemu o te fenua kae seai ne taua e fai ki a ia i tausaga konei, me ne tuku atu ne Ieova ki ei se malōlōga.”—2 NOFO. 14:6.

PESE 60 E Tāua ‵ki Olotou Ola

FAKATOE‵TOEGA O MANATU TĀUA *

1. Ko te taimi fea e mafai o faigata ke tavini atu ki a Ieova?

KO TE taimi fea e mafaufau koe me ka faigata ‵ki ke tavini atu ki a Ieova—ko te taimi e fepaki koe mo fakalavelave faiga‵ta io me ko te taimi e filemu tou olaga? Kafai ko fe‵paki tatou mo fakalavelave, se mea vave ke fakalago‵lago tatou ki a Ieova. Kae ne a ‵tou mea e fai māfai e filemu ‵tou olaga? E mata, e mafai o se ‵saga tonu tatou ki te ‵tou taviniga ki te Atua? Ne fakamasaua atu ne Ieova ki tino Isalaelu ke fakaeteete me e mafai o tupu te mea tenei.—Teu. 6:10-12.

Ne ‵teke malosi atu te Tupu ko Asa ki tapuakiga ‵se (Ke onoono ki te palakalafa e 2) *

2. Se a te fakaakoakoga ne tuku mai ne te Tupu ko Asa?

2 A te Tupu ko Asa, se fakaakoakoga ‵lei e tasi o tāgata kolā ne ‵poto o fakalago‵lago katoatoa ki a Ieova. Ne seki tavini fua a ia ki a Ieova i taimi ma‵sei kae penā foki loa i taimi o te filemu. I te kamataga, “ne katoatoa eiloa a te loto o Asa ki a Ieova i tena olaga kātoa.” (1 Tupu 15:14.) E tasi te auala ne fakaasi mai ne Asa a tena tavini fakamaoni ki a Ieova ko te fakaseaiga ne ia a tapuakiga ‵se i Iuta. E fai mai te Tusi Tapu me “ne tapale kea‵tea ne ia a fatafaitaulaga fakaa‵tea mo koga ma‵luga, ne tuki ne ia a pou fatu tapu kae ‵kati ki lalo a pou lakau tapu.” (2 Nofo. 14:3, 5) Ne tapale foki ne ia a Maaka, tena tupuna fafine, i te fai pelā me se tupu fafine i te malo. Kaia? Me ne fakamalosi ne tou fafine a te tapuakiga ki se tupua faite.—1 Tupu 15:11-13.

3. Ne a mea ka sau‵tala tatou ki ei i te mataupu tenei?

3 E uke atu a mea ne fai ne Asa mai tafa o te fakaseaiga o tapuakiga ‵se. Ne fakamalosi aka ne ia te tapuakiga ‵ma, mai te fesoasoani ki tino i te malo o Iuta ke ‵foki ki a Ieova. Ne fakamanuia  ne Ieova a Asa mo tino Isalaelu ki se vaitaimi o te filemu. * I se sefulu tausaga i loto i te pulega a Asa, “ne seki toe ai eiloa ne taua i te fenua.” (2 Nofo. 14:1, 4, 6) I te mataupu tenei, ka sau‵tala tatou ki te auala ne fakaaoga ne Asa te vaitaimi tenā o te filemu. Ka oti ko onoono tatou ki te fakaakoakoga a Kelisiano i te senitenali muamua kolā ne fakaaoga faka‵lei ne latou se vaitaimi o te filemu e pelā mo Asa. Kae ko te ‵toe mea, ka tali ne tatou te fesili tenei: Kafai e ola koe i se fenua telā e fakasaoloto ne latou ke fai a tapuakiga, e fakaaoga faka‵lei pefea ne koe te vaitaimi tenā o te filemu?

TE AUALA NE FAKAAOGA NE ASA SE VAITAIMI O TE FILEMU

4. E pelā mo te 2 Nofoaiga Tupu 14:2, 6, 7, ne fakaaoga pefea ne Asa se vaitaimi o te filemu?

4 Faitau te 2 Nofoaiga Tupu 14:2, 6, 7. Ne fai atu a Asa ki tino me ko Ieova ne “tuku mai ne ia te filemu ki a [latou] i koga katoa.” Ne seki mafaufau a Asa i te vaitaimi tenei o te filemu se vaitaimi ke ma‵nava malie kae fia‵fia. I lō te fai penā, ne fakatoka ne ia ke faite a fakai, ‵pui, taoa, mo mataloa. Ne fai atu a ia ki tino o Iuta: “I o tatou a te fenua.” Se a te mea ne fakauiga ki ei a Asa? Ne fakauiga a ia me i tino ka mafai ne latou o oloolo i te lotou fenua ne tuku atu ne te Atua kae faite olotou mea e aunoa mo ne ‵tekemaiga mai i olotou fili. Ne fakamalosi atu a ia ki tino ke fakaaoga faka‵lei te vaitaimi tenei o te filemu.

5. Kaia ne fakamalosi aka ne Asa a tena kautau?

5 Ne fakaaoga foki ne Asa te vaitaimi o te filemu ke fakamalosi i ei tena kautau. (2 Nofo. 14:8) E mata, e fakauiga i ei me seki talitonu a ia ki a Ieova? Ikai. Ne iloa ne Asa i te mea tenā se tiute o ia e pelā me se tupu ke fakatoka a tino mō fakalavelave e mafai o fakafesagai mo latou i aso mai mua. Ne iloa ne Asa i te vaitaimi o te filemu tenei e ola fia‵fia i ei a tino o Iuta e se tumau ki te se-gata-mai, kae ne taunu eiloa te mea tenei.

 TE AUALA NE FAKAAOGA FAKA‵LEI NE KELISIANO MUA SE VAITAIMI O TE FILEMU

6. Ne fakaaoga pefea ne Kelisiano i te senitenali muamua se vaitaimi o te filemu?

6 E tiga eiloa a Kelisiano i te senitenali muamua ne fe‵paki sāle mo fakasauaga, ne maua foki ne latou ne vaitaimi o te filemu. Ne fakaaoga pefea ne soko a te avanoaga tenā? A tāgata mo fāfine fakamaoni konā ne talai ne latou te tala ‵lei e aunoa mo te ‵fiu. E fai mai te tala i te Galuega i a latou ne “sa‵sale mo te ma‵taku ki a Ieova.” Ne tumau faeloa latou i te talai atu o te tala ‵lei kae ne iku atu ki te “gasolo aka faeloa latou o tokouke.” E lavea faka‵lei atu i ei me ne fakamanuia ne Ieova te lotou loto finafinau o talai atu i te vaitaimi o te filemu.—Galu. 9:26-31.

7-8. Ne a mea ne fai ne Paulo mo nisi tino i te taimi ne maua ne latou te avanoaga? Fakamatala mai.

7 Ne fakaaoga ne soko i te senitenali muamua so se avanoaga ke fakasalalau atu te tala ‵lei. E pelā me se fakaakoakoga, i te taimi ne iloa i ei ne Paulo me ko oti ne ‵tala atu ki a ia te mataloa o galuega e uke i te nofoga i Efeso, ne fakaaoga faka‵lei ne ia te avanoaga tenā ke talai kae fai a soko i te fakai tenā.—1 Koli. 16:8, 9.

8 A te suā avanoaga ne tuku atu ki a Paulo mo nisi Kelisiano, ko te taimi ne faka‵lei i ei te fakalavelave e uiga ki te pilitome i te 49 T.A. (Galu. 15:23-29) Mai tua o te faiatuga o te ikuga ki fakapotopotoga, ne ga‵lue malosi a soko i te talaiatuga o “te tala ‵lei o te muna a Ieova.” (Galu. 15:30-35) Se a te ikuga? E fai mai te Tusi Tapu me “ne tumau kae ‵mautakitaki a te fakatuanaki o fakapotopotoga konā kae ne gasolo aka faeloa o tokouke i aso takitasi.”—Galu. 16:4, 5.

KE FAKAAOGA A VAITAIMI O TE FILEMU I ASO NEI

9. Se a te fakanofonofoga i te lasiga o fenua i aso nei, kae se a te fesili e mafai o fesili ifo ki a tatou eiloa?

9 I te lasiga o fenua i aso nei, e mafai ne tatou o talai e aunoa mo fakataputapuga. E mata, e ola koe i se fenua telā e fakasaoloto ke fai te tapuakiga? Kafai e penā loa, ke fesili ifo, ‘E fakaaoga pefea ne au te saolotoga tenei?’ I taimi fakaofoofogia konei o aso fakaoti, e fakalave‵lave a te fakapotopotoga a Ieova i te talai kae akoako atu i se auala lasi telā e seki fai aka eiloa penei muamua. (Male. 13:10) E uke ‵ki a avanoaga e ma‵tala nei ki tino o Ieova.

E tokouke a tino ne maua ne latou a fakamanuiaga e uke mai te olo atu o talai i nisi fenua io me talai atu ki tino kolā e fai‵pati ki se ‵gana fakaa‵tea (Ke onoono ki te palakalafa e 10-12) *

10. Se a te mea e fakamalosi mai i te 2 Timoteo 4:2 ke fai ne tatou?

10 E fakaaoga faka‵lei pefea ne koe se vaitaimi o te filemu? (Faitau te 2 Timoteo 4:2.) Kaia e se iloilo i ei ne koe ou fakanofonofoga kae onoono aka me e mafai ne koe io me se tino i tou kāiga o fakauke aka ana mea e fai i te galuega talai, kāti mai te tavini atu e pelā me se paenia? E se tenei te taimi ke fakaputu aka ‵tou maumea io me ko ‵tou kope—ko mea kolā e se ‵sao fakatasi mo tatou i te fakalavelave lasi.—Faata. 11:4; Mata. 6:31-33; 1 Ioa. 2:15-17.

11. Se a te mea ne fai ne nisi tino ke oko atu te tala ‵lei ki tino e tokouke?

11 E tokouke a tino talai ne tauloto ki se ‵gana fou ke mafai ne latou o fakaaoga i te talai mo te akoako atu. Ne fesoasoani atu te fakapotopotoga a te Atua ki a latou mai te faitega o mataupu kolā e fakavae ki te Tusi Tapu i ‵gana e uke. E pelā mo te 2010, ne maua ‵tou tusi i ‵gana e silia atu mo te 500. I aso nei, ko silia atu mo te 1,000 te aofaki o ‵gana!

12. E aoga pefea ki tino māfai e lagona ne latou a te fekau o te Malo i olotou ‵gana totino? Taku mai se fakaakoakoga.

12 Se a te lagonaga e maua ne tino māfai e lagona ne latou te munatonu mai i te Atua i te ‵gana totino a latou? Onoono ki se tala a se tuagane telā ne aoga ki a ia a te fono i Memphis, Tennessee, U.S.A. Ne fai te fono i te ‵gana Kinyarwanda, se ‵gana telā e fai‵pati ki ei i Rwanda, Congo (Kinshasa), mo Uganda. I te otiga o te fono, ne fai mai te tuagane tenei e faipati ki te ‵gana Kinyarwanda: “Tenei te  taimi muamua ke malamalama faka‵lei au i te polokalame kātoa o se fono talu mai i te 17 tausaga ko ‵teka ne vau i ei au ki te Iunaite Sitete .” Ne otia malosi te loto o te tuagane tenei i te lagonaga ne ia a te polokalame i tena ‵gana totino. Kafai e ‵lei ki tou fakanofonofoga, e mata, e mafai ne koe o tauloto ki se suā ‵gana ke fesoasoani atu koe ki nisi tino i tou koga talai? E mata, se mea fakafiafia māfai e isi ne tino i te koga talai o tau fakapotopotoga e fia‵fia o fai‵pati ki se ‵gana fakaa‵tea? Ka aoga eiloa au taumafaiga.

13. Ne fakaaoga pefea ne ‵tou taina i Lusia se vaitaimi o te filemu?

13 E se ko ‵tou taina katoa e maua ne latou a te saolotoga ke talai atu. I nisi fenua, e fakatapu ne te malo a te faiga o te ‵tou galuega talai. E pelā mo ‵tou taina i Lusia. Ne fakasaua latou i tausaga e uke, kae i a Mati 1991, ne fakasaoloto ne te malo ke fai te lotou tapuakiga. I te taimi tenā, kāti e nofo ki se 16,000 tino talai o te Malo i Lusia. E luasefulu tausaga mai tua ifo, ne fanaka te aofaki o tino talai mai luga o te toko 160,000! E mautinoa eiloa me ne fakaaoga faka‵lei ne ‵tou taina a te avanoaga ke talai atu i te taimi ne fakasaoloto i ei. Ne seki tumau te vaitaimi o te filemu tenā. Kae faitalia ko mafuli te lotou fakanofonofoga, ne tumau eiloa te lotou loto finafinau ki te tapuakiga ‵ma. Ne tumau latou i te tavini atu ki a Ieova mai te fakaaogaga o so se auala e mafai i ei ne latou o tavini atu.

A TE VAITAIMI O TE FILEMU KA SE TUMAU

I te otiga ne ‵talo a Asa mo tena loto kātoa, ne fai ne Ieova ke manumalo a Iuta i se kautau malosi (Ke onoono ki te palakalafa e 14-15)

14-15. Ne fakaaoga pefea ne Ieova a tena malosi ke fesoasoani ki a Asa?

14 I aso o Asa, a te vaitaimi o te filemu ne gata fakamuli ifo. E isi se kautau malosi—e silia atu i te tasi miliona—ne au‵mai mai Aitiope. Ne mautinoa i te lotou takitaki ko Tila, me ka fakatakavale ne ia mo tena kautau a Iuta. Kae ko te Tupu ko Asa, ne talitonu ki a Ieova tena Atua kae e se ki te aofaki lasi o te kautau.  Ne ‵talo atu a Asa: “Ieova te motou Atua, fesoasoani mai ki a matou, i a matou e fakalago‵lago eiloa ki a koe, kae e auala i tou igoa e taua atu ei matou ki te vaitino tenei.”—2 Nofo. 14:11.

15 E tiga eiloa te kautau Aitiope e toeitiiti ko tapolo ne ia te aofaki o sotia a Asa, ne fakaasi atu ne Asa a tena talitonu ki te malosi mo te mafai ne Ieova o fesoasoani ki Ana tino. Kae ne fesoasoani eiloa a Ieova ki ana tino; ne takavale masei te kautau Aitiope.—2 Nofo. 14:8-13.

16. E iloa pefea ne tatou i te vaitaimi o te filemu ka gata?

16 E tiga eiloa e se iloa ne tatou a mea ka ‵tupu ki a tatou taki tokotasi i aso mai mua, kae e iloa ne tatou me i so se vaitaimi o te filemu e maua ne tino o Ieova i te taimi nei e se tumau. Masaua, ne ‵valo mai ne Iesu a mea ka ‵tupu ki ana soko i aso fakaoti me “ka takalia‵lia a atufenua katoa ki a koutou.” (Mata. 24:9) Ne fai mai foki penā te apositolo ko Paulo me i “tino katoa kolā e ma‵nako o ola kae tapuaki fakamaoni atu ki te Atua i te ‵kau fakatasi mo Keliso Iesu ka fakasauagina foki.” (2 Timo. 3:12) A Satani “ko oko eiloa i te kaitaua,” tela la, se mea valea māfai e mafau‵fau tatou me e mafai o ‵sao tatou i pokotiaga o tena kaitaua.—Faka. 12:12.

17. I auala fea e mafai o tofotofo aka i ei te ‵tou fakatuanaki?

17 I aso pili mai mua nei, a tatou katoa ka tofotofogina ‵tou fakamaoni. Ko pili nei o fe‵paki te lalolagi mo “te ‵toe fakalavelave lasi telā ne seki tupu aka eiloa talu mai te kamataga o te lalolagi ke oko mai ki te taimi nei.” (Mata. 24:21) I te taimi tenā, ka ita mai ki a tatou a tino o ‵tou kāiga kae mafai foki o fakatapu te ‵tou galuega. (Mata. 10:35, 36) E mata, ka fai tatou pelā mo Asa, o tali‵tonu me ka fesoasoani kae puipui ne Ieova a tatou?

18. E pelā mo te Epelu 10:38, 39, ne a mea ka fesoasoani mai ke fakatoka tatou mō te gataga o te vaitaimi o te filemu?

18 E fakatoka ne Ieova a tatou i te taimi nei ke malosi te ‵tou fakatuanaki mō mea kolā ka ‵tupu i aso mai mua. E takitaki ne ia “te tavini fakamaoni kae poto” ke tuku mai a mea‵kai faka-te-agaga “i te taimi tonu” ke fesoasoani mai ke tumau tatou i te fakamaoni i te ‵tou tapuakiga. (Mata. 24:45) Kae e ‵tau mo tatou o fai ‵tou tusaga kae fakamalosi ‵tou fakatuanaki ki a Ieova ke ‵mautakitaki.—Faitau te Epelu 10:38, 39.

19-20. I te 1 Nofoaiga Tupu 28:9, ne a fesili e ‵tau o fesili ki a tatou eiloa, kae kaia e ‵tau i ei o fesili ne tatou a fesili konā?

 19 E pelā mo Asa, e ‵tau mo tatou o “‵sala ki a Ieova.” (2 Nofo. 14:4; 15:1, 2) E ‵sala tatou ki a Ieova mai te fai ke iloa ne tatou a Ieova kae papatiso. Ke fakaaoga ne tatou so se avanoaga ke fakamalosi ‵tou a‵lofa ki a Ieova. Ke tofotofo aka tatou i te feitu tenei, e mafai o fesili ifo ki a tatou eiloa, ‘E mata, e kau faeloa au ki fakatasiga a te fakapotopotoga?’ Kafai e ‵kau tatou ki fakatasiga e fakatoka ne te fakapotopotoga a Ieova, e maua ne tatou a fakamalosiga faka-te-agaga ‵tonu fakatasi mo te fakamalosiga mai te kautaina. (Mata. 11:28) E mafai foki o fesili ifo ki a tatou eiloa, ‘E mata, e fai faeloa aku sukesukega totino ki te Tusi Tapu?’ Kafai e ‵nofo fakatasi koe mo tou kāiga, e mata, e fakaavanoa ne koe se taimi i vaiaso katoa mō tapuakiga a kāiga? Io me kafai koe e nofo tokotasi, e mata, e tumau koe i te fakaavanoa se taimi e pelā eiloa me ‵nofo fakatasi koe mo se kāiga? E se gata i ei, e mata e kau katoatoa koe ki te galuega talai mo te faiga o soko?

20 Kaia e ‵tau o fesili ifo ne tatou a fesili konei? E fai mai te Tusi Tapu i a Ieova e sukesuke ne ia ‵tou mafaufauga mo mea i ‵tou loto, tela la, e ‵tau foki o fai tatou penā. (Faitau te 1 Nofoaiga Tupu 28:9.) Kafai e lavea ne tatou me e ‵tau o fai ne fakama‵fuliga ki ‵tou fakamoemoega, ‵tou faifaiga, io me ko ‵tou mafaufauga, e ‵tau o akai tatou ki a Ieova ke fesoasoani mai ke fai ne tatou a fakama‵fuliga konā. Tenei eiloa te taimi ke fakatoka tatou mō mea ka ‵tupu i aso mai mua. Ke mo a e talia ne tatou so se mea ke taofi ne ia tatou mai te fakaaoga faka‵lei se vaitaimi o te filemu!

PESE 62 Te Pese Fou

^ pala. 5 E mata, e ola koe i se fenua telā e saoloto māfai e tapuaki koe ki a Ieova? Kafai e penā loa, e fakaaoga pefea ne koe te vaitaimi o te filemu tenā? Ka fesoasoani mai te mataupu tenei ke mafai ne koe o fakaakoako ki te Tupu o Iuta ko Asa mo Kelisiano i te senitenali muamua. Ne fakaaoga faka‵lei ne latou te taimi telā e seai ne mea ne fakalavelave ki a latou.

^ pala. 3 FAKAMATALAGA O TE PATI: A te pati “filemu” e se fakauiga fua ki te seai ne taua. A te pati Epelu e fakauiga foki ki te ola ‵lei, saogalemu, kae fiafia.

^ pala. 57 FAKAMATALAGA O ATA: Ko te Tupu ko Asa e tapale ne ia tena tupuna fafine mai tena tulaga ona me fakamalosi ne ia te tapuakiga ‵se. Ko tino fakamaoni kolā e ‵lago ki te takitakiga a Asa e tau‵tali i a ia kae fakama‵sei ne latou a tupua.

^ pala. 59 FAKAMATALAGA O ATA: Se tauavaga loto finafinau e fakafaigofie ne lāua te lā olaga ko te mea ke mafai ne lāua o tavini atu i se koga telā e manakogina malosi i ei a tino talai.