FAKAATAATA i tou mafaufau me sasale koe i se auala pouli kae ko leva te po. E ui eiloa ko leva ne tō te mata o te la, kae e se manavase koe i a koe ma galo, me e isi se molisulu maina i tou lima. Kafai e sulu ne koe ki lalo, e lavea faka‵lei ne koe a mea i ou mua. Kafai e sulu ne koe ki mua, e mafai o lavea ne koe a mea ‵mao i ou mua ona ko te maina o tena mainaga.

E fai a te Tusi Tapu e pelā me se molisulu maina. E pelā mo mea ne sau‵tala tatou ki ei i mataupu mai mua, e mafai o fesoasoani mai a te Muna a te Atua ke fakafesagai fakavave tatou ki fakalavelave i ‵tou mua—ko fakalavelave i aso takitasi kolā e fe‵paki mo tatou katoa i te lalolagi sē mautinoa tenei. Kae uke atu a mea e fai mai i te Tusi Tapu. E fakamaina mai foki i ei a mea ka ‵tupu i aso mai mua, ko te mea ke lavea ne tatou te auala ke sa‵sale i ei ki te fiafia tumau mo te lotomalie katoatoa. (Salamo 119:105) E pefea la?

Ke mafau‵fau nei tatou ki auala e lua e tuku mai ei ne te Tusi Tapu se fakamoemoega mō aso mai mua: 1 E fesoasoani mai ke iloa ne tatou me se a te aoga o te olaga, mo te 2 e akoako mai ei te auala ke ati aka ne tatou se va fakataugasoa tumau mo te ‵tou Mafuaga.

1 TE AOGA O TE OLAGA

E tuku mai i te Tusi Tapu a pati fakatonutonu mautinoa ke fakafesagai atu ki ‵tou fakalavelave, kae e se ko ia se tusi telā e tuku mai ei a manatu fesoasoani o tino. I lō te fakamalosi mai ki a tatou ke ‵saga ki mea e manava‵se tatou ki ei, e akoako mai te Tusi Tapu ke malamalama tatou i te tulaga o fakalavelave mo te auala ke fesoasoani atu i se auala tai lasi. Tenā ko fatoa mafai ei o lavea ne tatou te aoga o ‵tou olaga.

Ke mafaufau ki te fakatakitakiga mai te Tusi Tapu tenei: “E sili atu te fiafia o te tino telā e tuku atu ana mea i lō te maua ne ia.” (Galuega 20:35) E masaua ne koe se taimi ne fesoasoani ei koe ki se tino telā ne manakogina ne ia se fesoasoani i te feitu faka-te-foitino? Io me kāti ne fakamaumau ne koe ou taimi o fakalogologo ki se taugasoa e fakaasi mai ne ia a mea katoa i tena loto ki a koe? E a, ne maua ne koe se lagonaga lotomalie me ne mafai o fesoasoani atu koe ki se tino?

E maua ne tatou te fiafia lasi māfai e tuku atu ‵tou mea e aunoa mo te fakamoemoe ke toe taui mai a mea  konā. E fai mai se tino tusi tusi: “E tai faigata eiloa ke tuku atu ne koe au mea kae ke seai ne au mea e uke e ‵toe maua mai—seiloga ke tuku atu au mea e aunoa mo te mafaufau ke maua se taui ki ei.” Kae kafai e tuku atu ne tatou ‵tou mea—maise ki a latou kolā e se mafai o toe taui mai au mea ‵lei ne fai ki a latou—e maua eiloa ne tatou se taui. Ko aofia tatou i se ata lasi o mea kolā e ‵tupu. E tonu, e ga‵lue fakatasi tatou mo te ‵tou Mafuaga, telā e kilo atu ki faifaiga atafai konā e pelā me se kaitalafu ne fai ki a ia. (Faataoto 19:17) E fakatāua malosi eiloa ne ia ‵tou mea e fai ki tino ma‵lalo, kae e tauto mai a ia me ka toe taui mai ne ia ‵tou faifaiga, ki te ‵toe meaalofa sili telā ko te ola se-gata-mai i te lalolagi palataiso—se fakamoemoega gali eiloa mō aso mai mua!—Salamo 37:29; Luka 14:12-14. *

E sili atu i ei, e akoako mai te Tusi Tapu me mafai eiloa o aoga tonu te olaga ki a tatou māfai e tapuaki atu tatou ki te Atua tonu, ko Ieova. E fakamalosi mai tena Muna ke avatu ne tatou a vikiga, te fakaaloalo, mo te fakalogo telā e ‵tau o maua ne ia. (Failauga 12:13; Fakaasiga 4:11) Kafai e fai tatou penā, ko fakataunu ne tatou se mea telā e faigata o malamalama i ei: Ko oti ne fai ne tatou se mea ‵lei mō te ‵tou Mafuaga. E tonu, e fakamalosi mai a ia: “Ke poto koe . . . Kae fai toku loto ke fiafia.” (Faataoto 27:11) Mafaufau ki te mea tenei—kafai e fai ne tatou a fakaikuga kolā e fakavae ki fakatakitakiga i te Tusi Tapu, e fakafiafia i ei ne tatou te loto o te ‵tou Tamana i te lagi. Kaia? Me e atafai mai a ia ki a tatou kae manako a ia ke maua ne tatou a mea aoga ona ko te tau‵tali i tena takitakiga. (Isaia 48:17, 18) Tela la, se a foki la te suā mea e sili atu tena aoga i tafa o te tapuaki atu ki te Pule Sili o te iunivesi kae ola i te auala telā e fiafia a ia ki ei?

2 TE FAI TAUGASOA MO TE ‵TOU MAFUAGA

E akoako mai foki te Tusi Tapu ke ati aka ne tatou se va fakataugasoa mo te ‵tou Mafuaga. E fai mai te Tusi Tapu, “Fakapilipili atu ki te Atua, kae ka fakapilipili mai a ia ki a koutou.” (Iakopo 4:8) I nisi taimi, kāti e fakalotolotolua tatou me e mata, e mafai eiloa o fai taugasoa tatou mo te Mafuaga malosi katoatoa. Kae fakatalitonu mai te Tusi Tapu me kafai tatou e ‘‵sala ki te Atua ka maua eiloa ne tatou a ia, me i a ia e se ‵mao mai i a tatou taki tokotasi.’ (Galuega 17:27) A pati fakatonutonu mai te Tusi Tapu ki te fai taugasoa mo te Atua e aoga malosi eiloa ki a tatou i aso mai mua. I te auala fea?

Mafaufau ki te mea tenei: Faitalia ‵tou taumafaiga, e seai se tino i a tatou e mafai o sao i te ‵toe fili matagā—ko te mate. (1 Kolinito 15:26) Kae ko te Atua e ola ki te se-gata-mai. Ka se mate eiloa a ia, kae e manako foki a ia ke ola ana taugasoa ki te se-gata-mai. E fakamatala mai i te Tusi Tapu a te mea e manako a Ieova ke maua ne tino kolā e ‵sala ki a ia, i tugapati faigofie kae ‵gali: “Ke fiafia eiloa koe ki te olaga ki te se-gata-mai.”—Salamo 22:26.

E mafai pefea o ati aka ne tatou se va fakataugasoa tumau mo te Atua? Tumau i te tauloto e uiga ki a ia e auala i tena Muna, ko te Tusi Tapu. (Ioane 17:3; 2 Timoteo 3:16) Ko te mea ke malamalama koe i te Tusi Tapu, ‵sala ki tena fesoasoani. E fakatalitonu mai te Tusi Tapu ki a tatou me kafai e “fakamolemole atu faeloa” ki te Atua mo te loto fakamaoni ke maua te poto, ka tuku mai eiloa ne ia ki a tatou. * (Iakopo 1:5) A te ‵toe mea, taumafai malosi o fakagalue au mea ne tauloto, kae ke fai a te Muna a te Atua mo fai “se moli ki [ou] vae” mo “se mainaga ki [tou] auala”—i te taimi nei ke oko eiloa ki te se-gata-mai.—Salamo 119:105.

^ pala. 8 Ke maua nisi fakamatalaga e uiga ki te folafolaga a te Atua ki te ola se-gata-mai i te Palataiso, onoono ki te mataupu e 3 o te tusi ko te Ne a Mea e Mafai o Tauloto ne Tatou Mai te Tusi Tapu? telā ne ‵lomi ne Molimau a Ieova.

^ pala. 13 E fai ne Molimau a Ieova a akoga faka-te-Tusi Tapu sē ‵togi kolā ka fesoasoani atu ke gasolo o lasi tou malamalama i te Tusi Tapu. Ke iloa ne koe te faiga o akoga konei, fakamolemole onoono ki te vitio ko te Ne a Mea e Fai i se Akoga Faka-te-Tusi Tapu? E mafai o maua ne koe māfai e fano koe ki te jw.org, fano ki te ‵Sala, ko taipa ei te igoa o te vitio.

A te Atua e ola ki te se-gata-mai, kae manako foki a ia ke ola ana taugasoa ki te se-gata-mai