Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

E Mata, Koi Fulifuli Eiloa Tou Olaga ne te Tusi Tapu?

E Mata, Koi Fulifuli Eiloa Tou Olaga ne te Tusi Tapu?

“Ke ‵fuli otou mafaufau.”—LOMA 12:2.

PESE: 61, 52

1-3. (a) Ne a ‵fuliga e mafai o faigata ki a tatou ke fai mai tua o ‵tou papatisoga? (e) Kafai e foliga faigata ki a tatou a te faiga o ‵fuliga ki tou olaga i lō te mea ne fakamoemoe tatou ki ei, ne a fesili e mafai o ‵sae aka? (Ke onoono ki ata i te kamataga.)

I TE taimi ne iloa ei ne Kevin [1] ate munatonu, ne manako malosi fua a iaki se fesokotakiga pili mo Ieova. Kae i te fia o tausaga, ne aofia eiloa a ia i te kemupolo, ‵pusi, inu malosi, mo te fakaaogaga ‵se o vailakau tapu. Ko te mea ke maua te taliaga a te Atua, ne ‵tau o fakagata ne Kevin a faifaiga kolā e se ‵lago atu ki ei te Tusi Tapu. Ne fai eiloa ne ia te mea tenei mai te fakalagolago atu ki a Ieova mo te malosi o Tena Muna tusia ke ‵fuli ei a tino.—Epe. 4:12.

2 Mai tua o tena papatisoga, e mata, ne fakagata ne Kevin a te faiga o ‵fuliga ki tena olaga? Ikai, me ne ‵tau o tumau a ia i te fakamalosi aka mo te atiakaga o uiga faka-Kelisiano. (Efe. 4:31, 32) E pelā mo te ofo o tou tagata, me oko eiloa i te faigata ke pule faka‵lei atu ki tena ita vave. Ne taku ‵tonu mai a Kevin: “A te fakamasani o pule faka‵lei atu ki toku ita ne silia atu te faigata i lō te fakagataga o  aku amioga ma‵sei mua!” Ne fai ne ia a ‵fuliga e manakogina e auala i ‵talo mo sukesukega ‵loto ki te Tusi Tapu.

3 E pelā mo Kevin, e tokouke i a tatou ne fai eiloa a ‵fuliga ‵lasi a koi tuai o papatiso ko te mea ke fakafetaui aka ‵tou olaga ki mea e fakaasi mai i te Tusi Tapu. Mai tua o te papatisoga, e iloa ne tatou a te manakoga ke tumau i te faiga o fulifuliga—nisi mea ne tamā fuliga —ko te mea ke momea aka te fakaakoako atu ki te Atua mo Keliso. (Efe. 5:1, 2; 1 Pe. 2:21) E pelā me se mea e tasi, kāti e lavea ne tatou me ko kamata o ati aka ne tatou se uiga fameo, mataku ki tino, se manakoga gutu fatufatu, io me ko nisi vāivāiga. E mata, e foliga faigata atu a te ‵fuliga o uiga konei i lō te mea ne fakamoe‵moe tatou ki ei? Kafai e penā loa, e mafai o mafau‵fau koe penei, ‘I te otiga ne fai a ‵fuliga ‵lasi, kaia ko faigata katoa ei a te faiga o ‵fuliga fo‵liki? Ne a mea e ‵tau o fai ne au ke tumau i te talia o te Tusi Tapu ke fulifuli ne ia toku olaga?’

FAKATOKA A FAKAMOEMOEGA ‵LEI

4. Kaia e se mafai ei ne tatou o fakafiafia a Ieova i mea katoa e fai ne tatou?

4 A tatou kolā ko iloa kae a‵lofa ki a Ieova e ma‵nako eiloa mo ‵tou loto kātoa ke fai a mea kolā e fakafiafia atu ki a ia. Kae faitalia te lasi o ‵tou manakoga, e fai faeloa ne ‵tou tulaga sē ‵lei katoatoa ke mafau‵fau tatou me e se mafai ne tatou o fakafiafia te Atua i taimi katoa. E fai eiloa tatou e pelā mo te apositolo ko Paulo, telā ne tusi mai: “Kae e isi se manakoga i loto i a au ke fai a te mea ‵lei kae e se mafai ne au o fai.”—Loma 7:18; Iako. 3:2.

5. Ne a ‵fuliga ne fai ne tatou a koi tuai o papatiso, kae ne a vāivāiga e mafai o taua faeloa mo tatou?

5 Ko oti ne fakagata ne tatou a faifaiga agasala ko te mea ke mafai tatou o fai pelā me ne tino o te fakapotopotoga Kelisiano. (1 Koli. 6:9, 10) E tiga eiloa te feitu tenā, koi tumau tatou i te sē ‵lei katoatoa. (Ko. 3:9, 10) Tela la, e se ‵tau o fakamoe‵moe tatou me mai tua o te papatisoga— io me mai tua ifo foki eiloa o te fia o tausaga i te munatonu—ka se toe ai ne mea ‵se e fai ne tatou, toe ‵foki ki mea mua ne fai ne tatou, io me fakavāivāi ne lagonaga mo manakoga ‵se. E mafai eiloa o tumau a nisi manakoga penā i te fia o tausaga.

6, 7. (a) Se a te mea e mafai o fai ne tatou ke fakatumau te va fakataugasoa mo Ieova faitalia ‵tou tulaga sē ‵lei katoatoa? (e) Kaia e se ‵tau ei mo tatou o fakatalave ke akai atu ki a Ieova ke fakamagalo mai ne ia tatou?

6 E se ‵tau o taofi aka ne ‵tou tulaga sē ‵lei katoatoa a tatou mai te mauaga o se va fakataugasoa mo Ieova io me mai te tumau i te tavini atu ki a ia. Mafaufau ki te mea tenei: Kafai e talia ne Ieova ke maua ne tatou se fesokotakiga ‵lei mo ia, e iloa foki ne ia me ka fai ne tatou a mea ‵se i nisi taimi. (Ioa. 6:44) Ona ko te mea e iloa ne te Atua ‵tou uiga mo mea i ‵tou loto, e mautinoa eiloa me e iloa ne ia ‵tou manakoga sē ‵lei katoatoa kolā e mafai o fakavāivāi malosi mai ki a tatou. Kae e iloa ‵lei ne ia me ka fai ne tatou mea ‵se i nisi taimi. Kae e se taofi aka ne te mea tenei a te manakoga o Ieova ke fai tatou mo fai ana taugasoa.

7 Ne fakamalosi aka a te Atua ne te alofa ke tuku mai ne ia se meaalofa tāua ‵ki—te taulaga togiola a tena Tama fagasele. (Ioa. 3:16) Kafai e ‵sala atu tatou ki te fakamagaloga a Ieova telā e fakavae ki te fakatokaga tāua tenei māfai ko agasala tatou, e mafai o maua ne tatou te loto talitonu me e se mafai o fakamaseigina te ‵tou va fakataugasoa. (Loma 7:24, 25; 1 Ioane 2:1, 2) E mata, e ‵tau eiloa o fakatalave tatou ke fakaaoga a mea aoga mai te togiola ona ko te mea e se ‵ma io me agasala tatou? Ikai e se penā! E fai eiloa a te mea tenā e pelā mo te ita fitifiti ke fakaaoga a vai ke ‵fulu ‵tou lima māfai e lai‵lai. A te ‵tonuga loa, ne fakatoka a te togiola mō tino agasala kolā ko sala‵mo tonu. Fakafetai ki te ‵togiola, me ko mafai o maua ne tatou se va fakataugasoa mo Ieova faitalia ‵tou tulaga sē ‵lei katoatoa.—Faitau te 1 Timoteo 1:15.

8. Kaia e se ‵tau ei o manatu māmā tatou i ‵tou vāivāiga?

 8 E tonu, e se manatu māmā tatou ki ‵tou vāivāiga io me fai pelā me sefakamasakoga. A te atiakaga o ‵tou va fakataugasoa mo Ieova e aofia i ei a te taumafai ke fakaakoako faka‵lei atu ki te Atua mo Keliso kae ke fai mo fai ne vaegā tino kolā e ma‵nako lāua ki ei. (Sala. 15:1-5) E aofia foki i ei a te taumafai ke pule faka‵lei atu ki ‵tou manakoga sē ‵lei katoatoa, io me ko te fakagata katoatoa atu māfai e mafai. Faitalia me ne fatoa papatiso tatou io me ko leva i te munatonu, e ‵tau mo tatou o “tumau i te . . . fakatonutonu o‵tou mafaufau.”—2 Koli. 13:11.

9. E iloa pefea ne tatou me e mafai eiloa o tumau a tatou i te pei atu ki uiga ‵fou?

9 E manakogina a taumafaiga tumau ko te mea ke “fakatonutonu o‵tou mafaufau” kae fakaasi atu a “uiga ‵fou.” Ne fakamasaua atu a Paulo ki taina tali‵tonu: “E ‵tau o tiakina ne koutou a uiga mua kolā e fetaui ‵lei mo otou amioga mua, kae kolā ko fakamaseigina nei ona ko ana manakoga faka‵se tino. Kae e ‵tau o tumau koutou i te faka‵fouga o otou mafaufau, kae e ‵tau o ‵pei koutou ki uiga ‵fou kolā ne faite e ‵tusa mo te loto o te Atua i te amiotonu mo te alofa fakamaoni.” (Efe. 4:22-24) A te tugapati “tumau koutou i te faka‵fouga” e fakaasi mai i ei me i te ‵pei ki uiga ‵fou se faifaiga tumau. E fakamalosi kae fakatalitonu mai ki a tatou me faitalia te leva ne tavini atu tatou ki a Ieova, koi mafai eiloa ne tatou o tumau i te fakamalosi aka mo te atiakaga o uiga faka-Kelisiano kolā e aofia i uiga ‵fou. Ao, e mafai eiloa o tumau te Tusi Tapu i te fulifuliga o ‵tou olaga.

KAIA E FAIGATA MALOSI EI?

10. Se a te mea e ‵tau o fai ne tatou ke tumau i te fulifuli ‵tou olaga fakatasi mo te fesoasoani o te Tusi Tapu, kae ne a fesili e mafai o ‵sae aka?

10 E ‵tau o fakaoti ‵tou mafi māfai e ma‵nako tatou ke fulifuli faeloa tatou ne te Tusi Tapu. Kae kaia e manakogina ke taumafai malosi tatou? Kafai e fakamanuia ne Ieova ‵tou taumafaiga, e a, e se ‵tau o faigofie atu a te gasolo atu ki mua i te feitu faka-te-agaga? E mata, e se mafai fua ne Ieova o ave keatea ‵tou manakoga ma‵sei ko te mea ke mafai ne tatou o fakaasi atu a uiga fakaatua e aunoa mo taumafaiga e uke?

11-13. Kaia e fakamoemoe ei a Ieova ke ga‵lue malosi tatou o manumalo i ‵tou vāivāiga?

11 Kafai e mafaufau tatou ki te iunivesi, e iloa ei ne tatou me e ma‵losi atu a te mana o Ieova. E pelā mo te faitega ne Ieova o te lā, telā e malosi ‵ki. I sekone takitasi e fulifuli ne te lā se vaega lasi o te mainaga mo te ‵vela. E tiga eiloa e lavea se vaega foliki fua i te lalolagi, e lava kae ‵toe mai te ‵vela mo te mainaga ke mafai o ola a mea i te lalolagi. (Sala. 74:16; Isa. 40:26) E fiafia eiloa a Ieova ke tuku mai a te malosi ‵tau ki ana tavini māfai e ma‵nako ki ei. (Isa. 40:29) E tonu, ne mafai fua o tuku mai ne te Atua a te malosi ke fakatakavale ne tatou so se vāivāiga e aunoa mo te taumafai malosi io me ke tauloto mai i ‵tou mea ‵se ne fai. Kaia ne seki fai ei a ia penā?

12 Ko oti ne tuku mai ne Ieova a te meaalofa sē fakanafagina ko te saolotoga ke fai a filifiliga. Mai te filifili ke fai te loto o te Atua kae galue malosi ke fai penā, e fakaasi atu ei ne tatou a te ‵poko o te ‵tou a‵lofa ki a Ieova mo te ‵tou manakoga ke fakafiafia atu ki a ia. E fakaasi atu foki ne tatou a te ‵tou ‵lago malosi ki tena pulega sili. Ne ‵teke atu a Satani ki te ‵tonu o te pulega sili a Ieova, tela la, a te ‵tou loto fia‵fia mo te loto finafinau ke fakamaluga aka tena pulega, e mautinoa eiloa me e fakatāua malosi atu i se auala fakapito ne te ‵tou Tamana faka-te-lagi telā e uiga atafai kae loto fakafetai. (Iopu 2:3-5; Faata. 27:11) Kae kafai e fesoasoani mai a Ieova ke mo a ma fakaoti ‵tou mafi o taua atu ki ‵tou manakoga sē ‵lei katoatoa ko te mea ke fakafiafia atu ki a ia, ko tena uiga ka seai eiloa se aoga o ‵tou pati me e a‵lofa fakamaoni kae ‵lago atu tatou ki tena pulega sili.

 13 Tela la, e fai mai a Ieova ke “fakapalele” ‵tou “mafi” i te atiakaga o uiga fakaatua. (Faitau te 2 Petelu 1:5-7; Ko. 3:12) E fakamoemoe a ia ke ga‵lue malosi tatou o pule faka‵lei ki ‵tou mafaufauga mo lagonaga. (Loma 8:5; 12:9) A te taumafai malosi i te feitu tenei, ka momea aka ‵tou loto fia‵fia māfai e iloa ne tatou me koi fulifuli eiloa ne te Tusi Tapu ‵tou olaga.

KE FULIFULI FAELOA KOE NE TE MUNA A TE ATUA

14, 15. Ne a mea e mafai o fai ne tatou ke ati aka a uiga kolā e fia‵fia a Ieova ki ei? (Ke onoono ki te pokisi “ Te Tusi Tapu mo te ‵Talo ne ‵fuli ei Olotou Olaga.”

14 Ne a mea e mafai ne tatou o fai ke ati aka a uiga fakaatua kae fakafiafia atu ki a Ieova? E ‵tau o uke atu ‵tou mea e fai i lō te taliaga fua o se fakasologa o mea e ‵tau o ga‵lue tatou ki ei. E ‵tau o fakaoti ‵tou mafi kae tau‵tali atu ki fakatonuga a te Atua, me e fai mai te Loma 12:2: “Ke se toe fakaakoako ki te olaga masani tenei, kae ke ‵fuli otou mafaufau, ko te mea ke fakatalitonu aka ne koutou me se a te loto o te Atua telā e gali, e logomalie, kae e ‵lei katoatoa.” E auala i tena Muna mo te agaga tapu, e fesoasoani mai a Ieova ke iloa ne tatou tena loto, ke fai ne tatou, kae ke ‵fuli katoatoa ‵tou olaga ko te mea ke fetaui mo mea e manako a ia ki ei. E ‵tau o aofia i ‵tou taumafaiga konā a mea pelā mo te faitauga ki te Tusi Tapu i aso katoa, mafaufau ‵loto ki te Tusi Tapu, kae ‵talo mō te agaga tapu. (Luka 11:13; Kala. 5:22, 23) I te taimi e faka‵logo ei tatou ki te takitakiga a te agaga tapu o te Atua kae fakafetaui ‵tou mafaufauga ki te kilokiloga a Ieova i tena Muna, ka momea aka te ‵lei i ‵tou mafaufauga, pati, mo faifaiga. Kae e ‵tau foki eiloa o tumau tatou i te matapula‵pula ke mo a ma tosina atu tatou ki ‵tou vāivāiga.—Faata. 4:23.

Kāti e mafai o fesoasoani a te ‵toe faitau ki mataupu kae mafaufau ki tusi fai‵tau i ei kolā e fesoasoani atu ki ou vāivāiga. (Ke onoono ki te palakalafa e 15)

15 I tafa o te faitauga ki te Tusi Tapu i aso katoa, e ‵tau mo tatou o sukesuke ki te Muna a te Atua fakatasi mo ‵tou tusi faka-Kelisiano mo te mafaufauga ke fakaakoako atu ki uiga ‵gali o Ieova. Ko oti eiloa ne iloa aka ne nisi tino me se mea ‵lei ke toe fai‵tau ki nisi tusi fai‵tau mo mataupu i te Faleleoleo Maluga io me ko te Awake! kolā e aoga malosi ki te atiakaga o uiga faka-Kelisiano io me ke manumalo i nisi vāivāiga.

16. Kaia e se ‵tau ei o loto vāi‵vai tatou māfai e se mafai o fai fakavave a fu‵liga i ‵tou olaga?

16 Kafai e tuai tou gasolo atu ki mua i te feitu faka-te-agaga, masaua me e manakogina se taimi leva. A te atiakaga o uiga faka-te-agaga se faifaiga tumau. E ‵tau o kufaki tatou i te taimi e fakamalosi aka ei tatou ne te Tusi Tapu ke fai a ‵fuliga ‵lei i ‵tou olaga. Muamua la, e ‵tau o fakatonutonu ne tatou a tatou eiloa ke fai a mea kolā e ‵lei e ‵tusa mo te Tusi Tapu. E se leva kae ka kamata o faigofie ke mafau‵fau kae gasue‵sue i se auala fakaatua ona ko te mea e gasolo aka o fetaui ‵lei mo tulaga o Ieova te Atua.—Sala. 37:31; Faata. 23:12; Kala. 5:16, 17.

 MASAUA ‵TOU FAKAMOEMOEGA SILI

17. Kafai e a‵lofa tumau tatou ki a Ieova, se a te fakamoemoega gali e mafai o olioli tatou ki ei?

17 Ka maua fakamuli ne tino tapuaki a‵lofa tumau a Ieova a te tauliaga ke tavini atu ki a ia ki te se-gata-mai i te tulaga ‵lei katoatoa. I te taimi tenā, a te fakaasiatuga o uiga fakaatua ka se toe fai mo fai se mea faigata, kae ka fakafiafia faeloa. I te vaitaimi tenei, e fakafetai tatou ki te ‵togiola, me e mafai ei o tapuaki atu tatou ki te ‵tou Atua alofa. E mafai foki o fai tatou penā i ‵tou tulag sē ‵lei katoatoa māfai e taumafai malosi ke talia a te ‵mana ‵fuli tino o tena Muna.

18, 19. E mautinoa pefea i a tatou me e maua ne te Tusi Tapu a te ‵mana ke fulifuli faeloa ‵tou olaga?

18 A Kevin, telā ne taku atu muamua, ne taumafai malosi ke mafai ne ia o pule faka‵lei atu ki tena uiga ita. Ne mafaufau ‵loto kae fakagalue ne ia a akoakoga fakavae i te Tusi Tapu, kae ne talia ne ia a te fesoasoani mo pati fakatonutonu mai taina Kelisiano. Mai tua o nai tausaga, ne fai ne Kevin a ‵fuliga fakaofoofogia ‵lei. Fakamuli ifo, ne fetaui ‵lei a ia ke fai mo fai se tavini fesoasoani, kae ko oti ne tavini atu a ia e pelā me se toeaina i se fakapotopotoga mō te 20 tausaga ko ‵teka atu. Kae ke oko mai foki eiloa nei, koi lavea ne ia a te manakoga ke tumau i te matapulapula ki so se mea telā e mafai o fakavāivāi mai i te feitu faka-te-agaga.

19 A te tala o Kevin e fakaasi mai i ei me e fesoasoani atu a te Tusi Tapu ki tino o te Atua ke tumau i te faiga o ‵fuliga ‵lei i olotou olaga. Tela la, ke mo a ma ‵fiu vave tatou i te taliaga o te Muna a te Atua ke tumau i te fulifuli ne ia o tatou kae fai foki ke maua ne tatou se fesokotakiga pili mo Ieova. (Sala. 25:14) I te taimi e lavea ne tatou a te fakamanuiaga a Ieova ki ‵tou taumafaiga, ka maua ne tatou se fakamaoniga manino me e mafai eiloa o fulifuli faeloa ne te Tusi Tapu ‵tou olaga.—Sala. 34:8.

^ [1] (palakalafa 1) Ko oti ne ‵fuli a te igoa.