Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Apelila 2016

 Tala Tonu

Former Nuns Become True Spiritual Sisters

Former Nuns Become True Spiritual Sisters

“SA FAIPATI mai ki a au,” ne pakalaga mai toku taina foliki ko Araceli. “Au se manako ke ‵toe fakalogologo atu ki so se mea e uiga ki tau lotu. E fai fua ne ia ke masaki au. Au e ita ki a koe!” E tiga eiloa au nei ko 91 oku tausaga, e masaua faka‵lei ne au a pati faka‵mae loto konā. Kae e ui ei, e fai mai a pati o te Failauga 7:8 penei: A te gataga o so se mea e lei atu i tena kamataga.” Kae ne tonu ‵ki a pati konā e uiga ki a matou.—Felisa.

Felisa: Au ne vau mai se kāiga lotu. Te tonuga loa, e toko 13 a tino i oku kāiga ne faifeau io me takitaki lotu i te lotu Katolika. Ne faū ne Pope John Paul II se fakatuagane o toku mātua telā se faifeau kae se faiakoga foki i te akoga Katolika. A matou se kāiga ma‵tiva. Toku tamana e galue i te faitega o mea ki fiti kae ko toku mātua e galue i te fatoaga. Au ko te ulumatua mai tama‵liki tokovalu.

I te taimi ne 12 ei toku tausaga, ne tupu se Taua i Sepania. Mai tua te o te taua tenā ne pei toku tamana ki te falepuipui. Ne sē fiafia a tino pule o te malo ki ana manatu e uiga ki te saolotoga o tino. Ne taumafai malosi toku mātua o tausi atu ki a matou, tena la ne fai atu se taugasoa ki a ia ke na ave oku taina foliki e toko 3 ko—Araceli, Lauri mo Ramoni ki se koga i Bilbao, i Sepania kolā e ‵nofo i ei a Sina. Ona me e lava loa a mea‵kai i te ‵koga tenā.

Araceli: I te taimi tenā matou ko taki 14, 12 kae 10 fua omotou tausaga kae ko te ‵nofo ma‵vae mai i motou kāiga se mea faigata ‵ki. I Bilbao a matou ne ga‵lue ki te tu ‵ma. E lua tausaga mai tua ifo, ne ave foki matou ne sina ki se fale lasi e fakanofo ei a sina i Zaragoza ke tausi ne matou a tino ma‵tua i ei. Te galuega a matou i konā ko te teuga o te umu kuka, tasi o galuega fakafita ki tamaliki talavou.

Felisa: Te taimi ne olo ei oku taina ki Zaragoza, toku mātua mo toku faka-tamana, se faifeau i konā, ne fakaiku ne lāua ke na ave foki au o fakagalue i te koga foki tenā. Ne mafaufau lāua i te ave o oku ki konā e fai ei ke fakamao au mai se tamaliki tagata i te motou fakai telā e fia fai mai ki au. Ona ko au se tamaliki lotu, ne fiafia ‵ki au ki te manatu tena ke fano au o nofo i te koga tenā e nofo i ei a sina. E fano faeloa au ki lotu i aso katoa kae ne mafaufau au ke fai pelā me se misionale e pelā mo toku fakataina telā se takitaki o te lotu Katolika i Afelika.

Fakamaui: Se fale e ‵nofo ei a sina i Zaragoza, Sepania; fakaatamai: Te ‵fuliga o te Tusi Tapu i te ‵gana Nácar-Colunga

E seai eiloa se fakamalosiga mai Sina ke atiaka ne  au se manakoga ke tavini atu au ki te Atua i nisi fenua, kae ne fai fua te koga tenā ke fai pelā me se falepuipui ki toku olaga. I te tausaga mai tua ifo, ne fakaiku aka ne au ke foki ki te fale ke tausi atu ki toku fakatamana, te faifeau. Mai tafa i aku galuega i te fale, ne akoako ne ia au i afiafi katoa ki se vaega ‵talo a te lotu Katolika. E fiafia foki au o fai a teu pula lakau i te falesa kae fakagaligali ne au a te tupua fāfine mo tupua tāgata.

Araceli: I te taimi tenei, ne tai ‵kese te olaga o matou i te koga ‵nofo. Mai tua o te faiga o taku tautoga muamua ke fai pelā me se sina, ne taumafai a sina o fakama‵vae matou. Ko Ramoni ne nofo eiloa i Zaragoza, Lauri ne ave ki Valencia kae ko au ne ave ki Madrid, kae ne toe fai foki i ei aku tautoga. A te koga ‵nofo o tino lotu Katolika i Madrid e faka‵nofo ei a tama‵liki akoga, tino ‵matua mo nisi mālō, tena la e uke ‵ki a galuega e fai i konā. Au ne galue i te ‵koga tausi tino ‵matua.

Kae ko te tonuga loa, ne fiafia au ke fai pelā me se sina, ke uke oku taimi e fakamaumau o fai‵tau kae sukesuke ki te Tusi Tapu. Kae ne fanoanoa au me seai lele eiloa se tino i konei e faipati e uiga ki te Atua mo Iesu, kae seki fakaaoga aka eiloa ne matou te Tusi Tapu. Fatoa tauloto ne au te ‵gana Latina, kae sukesuke ki olaga o te “kau tapu” kae tapuaki atu ki a Malia. Kae i te ukega o taimi ne fai ne matou a galuega ‵mafa kae faiga‵ta.

Ne kamata au o manavase kae ne sau‵tala maua mo te pule o sina. Au ne fai atu ki ei me e se aoga ke galue malosi au i konei, kae ko toku kāiga ko manako ke foki atu au. Ne ‵loka ne ia au i se potu ko te mea ke ‵fuli toku mafaufau ke sē tiakina ne au te koga ‵nofo o matou.

Fakatolu taimi ne ‵tala ne latou au ki tua, ke onoono me koi manako loa au o foki ki te fale io me ikai. Kae ona ko toku loto malosi ke foki au, ne fai mai latou ke tusi se tusi fakamaoni penei: “Au ko tiakina te koga tenei ona ko fia tavini atu au ki a Satani i lō te Atua.” Ne fakapoi ki au a te mea tenā kae tiga eiloa ne manako malosi au o tiakina te koga nofo tenā, kae ne seki mafai eiloa ne au o tusi a pati konā. Fakamuli ne fakamolemole atu au ke sau‵tala māua mo se faifeau ke fakaasi atu taku agasala kae ne fai atu ne au a mea katoa ne ‵tupu ki au. Ne fakatoka ne ia mo te pisopo ke toe fakafoki au o galue i te fale muamua ne tausi ei matou i Zaragoza. Mai tua o te fia masina ne talia ei ke fano au. E se leva ne tiaki foki ne Lauri mo Ramoni te koga ‵nofo tena.

SE “TUSI TELA NE FAKATAPU” KAE NE FAKAMAVAEVAE NE IA TE MOTOU KAIGA

Felisa

Felisa: Fakamuli, ne avaga au kae ne olo maua ki Cantabria. Koi fano faeloa au ki te lotu, kae se Aso Sa e tasi ne lagona ne au se lāuga telā ne kaitaua i ei te faifeau o te lotu. Ne pakalaga a ia kae ne fakaasi mai  ne ia te tusi, Te Munatonu Telā e Takitaki Atu ki te Ola Se-Gata-Mai. Kae ne fai mai, “Kafai e tuku atu ne se tino se tusi penei ki a koe, tuku mai ki au io me ‵pei ne koe keatea!”

Ne seki maua ne au se ‵kopi o te tusi, kae ne manako fakavave au ki ei. I nai aso mai tua ifo, ne tukituki mai i toku mataloa a Molimau e tokolua kae tuku mai ne laua te “tusi telā ne fakatapu.” I te po eiloa tenā, ne faitau ne au te tusi kae i te foki maiga a fāfine konā ne toka eiloa au o fai taku akoga faka-te-Tusi Tapu mo laua.

Te tusi telā ne “fakatapu”

Ne otia eiloa toku loto i te munatonu. A toku loto finafinau ki taku lotu mua ne ‵fuli ki te alofa malosi ki a Ieova kae loto finafinau i te galuega talai. Ne papatiso ei au i te 1973. Tiga eiloa ne seki lasi te avanoaga ne maua ne au ke talai atu te munatonu ki toku kāiga, kae ne fai eiloa ne au māfai e maua se avanoaga. E pelā loa mo aku pati i te kamataga, ne ‵teke ‵ki oku kāiga ki te munatonu, maise loa toku taina ko Araceli.

Araceli: Ona ko te masei te koga ne tausi ei matou, ne pokotia ei toku olaga kae ne maua ne au te loto kaitaua. Kae ui ei ne tumau eiloa au o fano ki lotu i Aso Sa katoa kae fai faeloa aku talo mai te fakaaoga o malele fakatusa o Malia. Ne maua eiloa ne au te manakoga ke sukesuke au ki te Tusi Tapu, kae fakamolemole au ki te Atua ke fesoasoani mai ki au. Kae i te taimi ne faipati mai a Felisa ki au e uiga ki tena talitonuga fou, ne lavea ne au tena loto talitonu kae ne mafaufauau me ko fakavalevale a ia. Ne gasolo au o sē fia talitonu ki a ia.

Araceli

I nai tausaga mai tua, ne foki au ki Madrid o galue kae ne avaga foki i konā. Mai tua o se fia tausaga, ne kamata au o fakalotolotolua. Ne lavea ne au a tino kolā e olo faeloa ki te lotu, ne seki fakagalue ne latou i olotou olaga a akoakoga a Iesu. Ne fakagata i konā toku fia fano salē ki lotu. Ko sē toe talitonu au ki “tino tapu”, ko se fia fakaasi atu taku agasala ki faifeau, io me talitonu ki te afi i seoli. Ne ‵pei keatea foki ne au a tupua katoa fakalotu. E se mautinoa i a au me tonu io me sē tonu taku mea e fai. Au ne fanoanoa ‵ki, kae ne ‵talo faeloa au ki te Atua: “E manako au o iloa koe. Fakamolemole, fesoasoani mai ki au!” Ne masaua ne au a taimi e uke ne au‵mai ei ki toku fale a Molimau a Ieova kae ne seki ‵tala ne au te mataloa ki a latou. Ko se talitonu au ki so se lotu.

 Talu mai i te 1980, oku taina ko Lauri mo Ramoni kolā e nofo i Sepania ne kamata o sukesuke ki te Tusi Tapu mo Molimau a Ieova. Ne talitonu au me ne takitakisegina a lāua e pelā eiloa mo Felisa. Fakamuli ne fetaui au mo se tuakoi o oku ko Angelines, kae ne taugasoa ‵ki māua. Kae ko ia foki se Molimau a Ieova. E uke a taimi e fesili sāle mai a Angelines mo tena avaga ke sukesuke matou ki te Tusi Tapu. Ne iloa ne lāua me e tiga eiloa ne fai atu au me ko se talitonu au ki so se lotu, kae e fia inu malosi au ki te iloaga tonu mai te Tusi Tapu. Fakamuli ne talia ne au ke sukesuke ki te Tusi Tapu. “E talia fua ne au māfai e fakaaoga taku Tusi Tapu,” kae ne fakauiga au ki te fuliga ko te Nácar-Colunga.

NE TOE FAKATASI MATOU NE TE TUSI TAPU

Felisa: I te taimi ne papatiso ei au i te 1973, ne nofo ki se 70 o Molimau i te fakai lasi ko Santander—ko te laumua o Cantabria, Sepania. E lasi ‵ki te koga talai o matou kae olo sāle matou i pasi kae fakamuli ko ‵sopo sale matou i motoka ke talai i kogā koga konā. Ne talai atu mai fakai ki fakai ke oko ki fakai katoa e uke i te kogā koga tenā.

I tausaga e uke, ne uke a tino ne sukesuke fakatasi mo au ki te Tusi Tapu kae toko 11 ne papatiso. Te tokoukega o latou ne tino lotu Katolika. Ona ko au se tino ne talitonu malosi ki te lotu tenā, ne iloa ne au o kufaki kae malamalama i a latou. Ne iloa ne au me ‵tau o tuku atu se avanoaga ki a latou ke ave keatea mai olotou mafaufau a mea ne talitonu muamua latou ki ei, kae talia te Tusi Tapu mo te agaga tapu o Ieova ke galue i olotou loto ke fesoasoani atu ke maua ne latou te munatonu. (Epe. 4:12) Taku avaga ko Bienvenido, se pulisimani, ne papatiso i te 1979, kae ko toku matua ne kamata o sukesuke ki te Tusi Tapu mai mua malie fua o mate.

Araceli: Koi fakalotolotolua eiloa au i te taimi ne kamata au o sukesuke ki te Tusi Tapu mo Molimau a Ieova. Mai tua o nai vaiaso, ne lagona ne au me ko galo atu te loto kaitaua i au. Te mea ne fakafiafia malosi, me ne lavea atu ne au a te kau Molimau e fakagalue eiloa ne latou a mea e talai ne latou. A te fakalotolotolua i a au ne sui ne te fakatuanaki, kae ne maua ne au te fiafia lasi ‵ki. Nisi tuakoi o oku ne fai mai ki au: “Araceli, tumau eiloa o sasale i te auala telā ne filifili ne koe!”

Ne masaua ne au taku ‵talo: “ Fakafetai Ieova, ki te sē fiu o koe i au mo te tuku mai ne koe a avanoaga e uke ke maua ne au te mea telā ne ‵sala ne au—ko te iloaga tonu mai te Tusi Tapu.” Ne ‵talo foki au e uiga ki toku taina ke fakamagalo ne ia au ona ko pati fakalogomae ne fai atu sale ne au ki ei. Ne sui a kinauga e fai sale ne māua ki sautalaga faka-te-Tusi Tapu fakamalosi loto. Ne papatiso au i te 1989 kae ko 61 oku tausaga.

Felisa: I te taimi tenei ko 91 ei oku tausaga, ko mate atu taku avaga kae ko sē maua ne au te malosi e pelā mo te taimi muamua. Kae e faitau faeloa au ki te Tusi Tapu i aso katoa, kau atu ki fakatasiga māfai au e se fakamasakisaki, kae fiafia o kau atu ki te galuega talai.

Araceli: Ona ko au se sina muamua, e manako eiloa au o talai atu ki faifeau mo sina kolā e fetaui mo au i te galuega talai. E uke a tusi e tuku atu sale ne au ki a latou kae ne maua foki ne au ne tino fia‵fia ke sau‵tala fakatasi mo latou. Ne masaua ne au a pati a se faifeau telā e asi sale au ki ei, penei: “Araceli, au e ‵lago katoatoa ki ou manatu, kae e mafai pefea au o ‵fuli ona ko au ko matua? Ne a pati ka fai mai ne tino o te motou lotu penā foki mo oku kāiga?” Ne tali au, penei: “Kae ne a pati a Atua ka fai atu?” Ne lūlū tena ulu mo te fanoanoa, kae ne seki maua ne ia te loto malosi ke tumau i te ‵sala atu ki te munatonu.

E masaua ne au te ‵toe taimi fakafiafia i toku olaga. Ko te taimi ne fai mai ei taku avaga i a ia ko manako o olo fakatasi mo au ki te fakatasiga. E tiga eiloa ko 80 tupu ana tausaga i te taimi tenā, ne seki galo eiloa a ia i se fakatasiga. Ne sukesuke a ia ki te Tusi Tapu kae fai pelā me se tino talai seki papatiso. Ne masausau faeloa au ki taimi kolā ne olo fakatasi maua i te galuega talai. Ne mate atu a ia i se lua masina mai mua o te aso telā ka papatiso ei a ia.

Felisa: E tasi o mea fakamalie loto i toku olaga ko te kilo atu ki oku taina fo‵liki e tokotolu kolā ne ‵teke muamua mai ki au, ko fai nei mo tuagane faka-te-agaga. Ko oko eiloa i te motou fia‵fia ke ‵kau fakatasi kae sau‵tala e uiga ki te Atua ko Ieova mo tena Muna! Nei la, ko ‵kau fakatasi katoa matou mo oku taina i te feitu faka-te-agaga. *

^ pala. 29 A Araceli, Felisa mo Ramoni—kolā ko 87, 91 kae 83 olotou tausaga—koi tumau eiloa i te lotou taviniga ki a Ieova mo te loto finafinau ke oko mai loa ki aso nei. Ne galo atu a Lauri telā ne tavini fakamaoni atu ki a Ieova i te tausaga e 1990.