Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Apelila 2016

E Mata, e Fakagalue ne Koe i se Auala Poto a Mea Kolā ne Fakaataata ne Koe i Tou Mafaufau?

E Mata, e Fakagalue ne Koe i se Auala Poto a Mea Kolā ne Fakaataata ne Koe i Tou Mafaufau?

SE A te mea telā e nofo fua tena ‵mafa ki se 1.4 kilo kae fai foki pelā me ko te “‵toe mea faigata telā ne fatoa iloa aka ne tatou i te ‵tou iunivesi”? Ko te faiai o te tino. E fakaofoofogia eiloa a te mea tenā. Ko te uke o mea e tauloto ne koe e uiga ki ei, ko te lasi foki o tou loto fakafetai ki galuega “‵gali” ne fai ne Ieova. (Sala. 139:14) Mafaufau la ki se tasi o vaega tāua o te mafaufau—mea kolā e fakaataata ne koe i tou mafaufau. Se a te uiga o te fakaataata ne tatou a mea i ‵tou mafaufau? E fakamatala mai se tikisionale e tasi “a te fakaaataata o mea i tou mafaufau ko te mafai ne koe o fakafoliga se mea telā e fou kae gali ki a koe, io me se mea telā e seki lavea aka eiloa ne koe.” Mai te fakaataata ne koe a mea konā i tou mafaufau, ko fakagalue ei ne koe a mea konā i aso katoa. E pelā me se fakaakoakoga, e mata, kai lagona io me faitau ne koe se tala e uiga ki se koga telā e seki oko eiloa koe ki ei? E mata, e fai ei ke kalo keatea koe mai te fakaataata aka ne koe i tou mafaufau? E tonu, i so se taimi e mafau‵fau ei tatou ki se mea telā e se mafai o lavea, lagona, tami, patele io me ‵sogi ne tatou, e fakaasi mai i ei me galue ‵tou mafaufau. E fesoasoani mai eiloa a te Tusi Tapu ke malamalama tatou me ne faite eiloa a tino ki foliga o te Atua. (Kene. 1:26, 27) E mata, e se fakaasi mai i te mea tenā me i a Ieova e isi sena atamai ke fakaataata ne ia a mea i tena mafaufau? Ona ko te mea ne faite ne ia tatou fakatasi mo te atamai tenā, e fakamoemoe eiloa a ia me ka fakagalue ne tatou a te atamai tenā ke mafai ei o malamalama i tena loto. (Fai. 3:11) E mafai la pefea o fakagalue ne tatou i se auala poto a mea kolā e fakaataata ne tatou i ‵tou mafaufau, kae ne a mafaufauga kolā e ‵tau o ‵kalo keatea tatou mai i ei?

FAKAGALUE ‵SE A MEA KOLĀ E FAKAATAATA I TOU MAFAUFAU

(1) Mafaufau i te taimi ‵se io me ki mea sē ‵lei.

A te mafaufau ki se mea e sē se mea masei. E tonu, e isi ne fakamaoniga me i te mafaufau ki se mea e mafai o aoga. Kae e fesoasoani mai a te Failauga 3:1, NW, ke malamalama tatou me e tiga eiloa a isi se “taimi tonu mō mea katoa,” e mafai eiloa o aofia tatou i nisi faifaiga i te taimi ‵se. E pelā me se fakaakoakoga, kafai e tuku ‵tou mafaufau ki mea fakaa‵tea i te fakatasiga a te fakapotopotoga io me ko sukesukega totino ki te Tusi Tapu, e mata, e fai eiloa a ‵tou mafaufauga e pelā me se fesoasoani io me fai fua pelā me se mea e fakalavelave mai? Ne tuku mai eiloa ne Iesu se faka‵pulaga tāua e uiga ki te fakamataku o te talia ke fakafiafia ‵tou mafaufau ki manatu ‵se, e pelā mo te mafau‵fau ki amioga ma‵sei. (Mata. 5:28) A nisi mea kolā e mafai o fakaataata ne tatou i te mafaufau e mafai o fakafanoanoa atu ki a Ieova. Kafai e mafaufau faeloa koe ki amioga ma‵sei, e mafai eiloa o ‵taki ne ia koe ke fai se mea masei. Tela la, ke na fakaiku aka ke mo a ma talia ne koe a mea kolā e fakaataata i tou mafaufau ke fai ei ke tapeapea kea‵tea koe mai i a Ieova!

(2) Mafaufau me i kope faka-te-foitino e mafai o maua mai ei se puipuiga tumau.

A kope faka-te-foitino e aoga kae manakogina. Kae ui i ei, se mea fakafanoanoa māfai ko kamata o fakaataata i ‵tou mafaufau me e maua ne tatou se puipuiga tonu io me ko te fiafia tonu mai i ei. Ne tusi mai te tagata poto ko Solomona, penei: “A tino mau‵mea e mafaufau pelā i a latou e puipui ne olotou koloa, e pelā me se ‵pui maluga kae malosi telā e puipui ne ia  te fa‵kai.” (Faata. 18:11) E pelā me se fakaakoakoga, i a Setema 2009, e silia atu mo te 80 pasene o kogā koga o Manila, i Filipaina ne lofia i vaiua ‵lotu kolā ne ‵to. E mata, ne mafai o faka‵sao a kope a tino mau‵mea i te taimi tenā? Ne fai mai se tagata maumea telā ne uke ana mea ne ‵galo: “Ne pokotia a tino katoa i te lofiaga kae ne māfua mai i ei a logo‵maega mo tulaga faiga‵ta ki tino mau‵mea mo tino ma‵tiva.” E faigofie ke fakaataata aka i ‵tou mafaufau me e fai eiloa a kope faka-te-foitino e pelā me se puipuiga tonu. A ko te tonuga loa, e se fai eiloa penā.

(3) Te manavase valea e uiga ki mea kolā e se mafai o ‵tupu.

Ne polopoloki mai Iesu ke mo a tatou e tō “manava‵se.” (Mata. 6:34) A te tino telā e manavase faeloa ki mea e manakogina ke fakaataata i tena mafaufau a mea ‵lei. E mafai o fakamāumāu ne tatou a ‵tou malosi ke manava‵se ki fakalavelave kolā e fakaataata fua ne tatou i ‵tou mafaufau, e pelā mo fakalavelave kolā e seki tupu io me e seki ‵sae aka eiloa. E fakaasi mai i te Tusi Tapu me e mafai o iku atu a te vaegā manavase tenā ki te loto vāivāi mo te loto mafatia. (Faata. 12:25) Tela la, se mea tāua ke fakagalue aka ne tatou a pati polopoloki a Iesu ke mo a e tō manava‵se kae ke manava‵se fua ki mea kolā e manakogina i aso takitasi.

FAKAGALUE AKA I SE AUALA POTO A MEA KOLĀ E MAFAU‵FAU KI EI

(1) Ke lavea ‵mao a tulaga fakatama‵taku kae ‵kalo keatea mai i ei.

E fakamalosi mai te Tusi Tapu ke ‵poto tatou kae ke lavea ‵mao ne tatou a mea. (Faata. 22:3) Mai te fakaaogaga o o mea kolā e fakaataata i ‵tou mafaufau, e mafai o lavea ‵mao ne tatou a ikuga o ‵tou fakaikuga kolā e fai. E pelā me se fakaakoakoga, kafai e ‵kami koe ki se faigāmea, e mafai pefea o fesoasoani atu ou mafaufauga ke fai ne koe se fakaikuga poto me e mata, ka kau atu koe ki ei io me ikai? Kafai ko oti ne mafau‵fau ki manatu me ko oi e aofia i ei, te aofaki o tino ka ‵kau atu, te koga mo te taimi ka fai i ei, ke fesili ifo penei: Ne a mea e fai i te koga tenā? E mata, e mafai o mafaufau faka‵lei koe ki te maopoopoga telā e fai kae fetaui ‵lei mo fakatakitakiga mai te Tusi Tapu? A te faiga tenei ka fesoasoani atu ke mafai ne koe o fakaataata aka i tou mafaufau a mea kolā ka fai i konā. A te fakagaluegaga o mea e fakaataata i tou mafaufau i te faiga o fakaikuga ‵poto, ka fesoasoani atu ke ‵kalo keatea koe mai tulaga kolā e fakama‵taku i te feitu faka-te-agaga.

(2) A te mafaufau ki auala kese‵kese e mafai o faka‵lei aka ei te fakalavelave faiga‵ta.

A te fakaataata o se mea i te mafaufau e aofia i ei te “atamai ke fakafesagai kae saga faka‵lei atu ki se fakalavelave.” Mafaufau la māfai e isi se kinauga i te va o koe mo se tino i te fakapotopotoga. Ka fakafesagai atu pefea koe ki te taina io me ko te tuagane tenā ke faka‵lei aka koulua i se auala filemu? E uke ‵ki auala e mafai o mafaufau koe ki ei. E pefea te auala e fesokotaki atu ei a ia ki tino? Ko te taimi fea e ‵lei ke  faipati koulua ki te fakalavelave? Ne a pati mo te vaegā ‵leo e ‵lei ke fakaaoga ne au? Mai te fakagalue aka ne koe a ou mafaufauga, ko mafai ei ne koe o ‵sala aka a auala kolā e mafai o faka‵lei ei te fakalavelave kae filifili ne koe te ‵toe auala ‵lei telā e mafaufau koe ke fakaaoga. (Faata. 15:28) A te ‵toe auala ‵lei tenā ke faka‵lei aka ei a te fakalavelave faiga‵ta ka fesoasoani mai ke fakamalosi aka ne tatou te filemu i te fakapotopotoga. E mautinoa eiloa me ne fakagalue i se auala ‵lei a mea e fakaataata i ‵tou mafaufau.

(3) Ke gasolo ki mua i tau faitauga ki te Tusi Tapu mo au sukesukega.

A te faitau ki te Tusi Tapu i aso katoa e tāua ‵ki eiloa. Kae e uke atu a mea e ‵tau o fai i lō te faitau fua ki ei i aso katoa. E ‵tau o malamalama tatou i akoakoga aoga e maua ne tatou mai te Tusi Tapu kae fakamalosigina ke fakagalue ne tatou i ‵tou olaga. A te ‵tou loto fakafetai ki auala o Ieova e manakogina ke tai faka‵lei aka e auala i te ‵tou faitauga ki te Tusi Tapu. A te fakagalue aka o mea kolā e fakaataata ne tatou e mafai o fesoasoani mai ke fai ne tatou te mea tenā. E pefea la? Mafaufau ki te tusi ko te Imitate Their Faith. A te faitau ki tala i te tusi tenei e mafai o fakamalosi aka ne ia ‵tou mafaufauga mai te fesoasoani mai ke fakaataata ne tatou a te koga mo te auala ne ‵tupu aka ei a tino taki tokotasi kolā e fakamatala mai i te Tusi Tapu. A mea konā e fesoasoani mai ke fakaataata i ‵tou mafaufau a mea kolā e lavea ne tatou, leo kolā e lagona ne tatou, mea manogi ‵gali kolā e ‵sogi ne tatou, kae ke malamalama foki i lagonaga o latou kolā e aofia i ei. Ka mafai eiloa o fakaataata ne tatou a akoakoaga tāua mo mafaufauga fakamalosi loto mai tala i te Tusi Tapu kolā ko oti ne mafau‵fau tatou ki ei. A te fakaaogaga o te atamai tenā i taimi e fai ei ‵tou faitauga mo ‵tou sukesukega ki te Tusi Tapu ka fesoasoani mai ke maua ne tatou a mea aoga e uke mai i ei.

(4) Fakamalosi kae fakaasi atu a te loto alofa.

A te loto alofa ko te fakaasi atu o lagonaga a‵lofa ki se tino telā e logo‵mae. Ona ko te mea ne fakaasi atu ne Ieova mo Iesu a te loto alofa, e ‵tau foki mo tatou o fakaakoako atu ki a laua. (Eso. 3:7; Sala. 72:13) E mafai pefea o ati aka ne tatou a te uiga tenei? A te ‵toe auala ‵lei ke ati aka ne tatou a te loto alofa e aofia i ei a mea kolā e fakaataata ne tatou i te mafaufau. E mafai o seiloa ne tatou a mea kolā e fakafesagai mo ‵tou taina mo tuagane Kelisiano. Kae e mafai o ‵sili ifo koe ki a koe eiloa, penei: ‘Kafai e tu atu au i te tulaga tenā, e pefea la oku lagonaga? Se a te mea e manako au ki ei? A te fakagalue aka o mea kolā e fakaataata ne tatou i ‵tou mafaufau ke tali aka a fesili konei, ka fesoasoani mai ke maua ne tatou te uiga ko te loto alofa. E tonu, ka maua eiloa ne tatou a mea aoga i ‵tou olaga faka-Kelisiano māfai e fakaasi atu ne tatou te loto alofa, e aofia i ei te ‵tou galuega talai mo ‵tou fesokotakiga mo nisi Kelisiano.

(5) Fakaataata ne tatou a te olaga i te lalolagi fou.

E ‵fonu eiloa te Tusi Tapu i fakamatalaga liki‵liki e uiga ki te lalolagi fou a te Atua. (Isa. 35:5-7; 65:21-25; Fa. 21:3, 4) E aofia i ‵tou tusi a fakamatalaga konei fakatasi mo te fia o ata ‵gali i ei. Kaia e fai ei penā? E mafai o fakamalosi mai a ata ‵gali ke fakagalue aka ne tatou a ‵tou mafaufau ke fakaatata foki ne tatou a tatou eiloa e fia‵fia ki fakamanuiaga ‵gali kolā ne folafola mai. A Ieova, telā ne tuku mai ne ia te atamai tenā, e iloa ‵lei ne ia a te aoga o te atamai tenā ki so se tino. A te fakaataata ne tatou ana folafolaga i ‵tou mafaufau ka fai ei ke tali‵tonu tatou ki te lotou fakataunuga, kae fesoasoani mai ke tumau tatou i te fakamaoni i te taimi foki loa tenei koi kufaki atu tatou i fakalavelave faiga‵ta o te olaga tenei.

Ne tuku mai eiloa ne Ieova mo te alofa a te atamai fakaofoofogia tenei ke fakaataata a mea i ‵tou mafaufau. E mafai eiloa o fesoasoani mai ke tavini faka‵lei atu tatou ki a ia i aso katoa. Tela la, ke na fakaasi atu ‵tou loto fakafetai ki te Tino telā ne tuku mai ne ia te meaalofa tenei mai te fakagalue aka ne tatou i se auala poto i aso katoa.