Fanatu ki te fakasologa

Fanatu ki te fakasologa o mataupu

Ko oi e ‵Tau o ‵Losi Atu ki ei?

Ko oi e ‵Tau o ‵Losi Atu ki ei?

Kafai e se māfua mai i te Atua a logo‵maega, ko oi e ‵tau o ‵losi ki ei mō te lasi o te fia‵kai, te mativa telā e se mafai o gata, taua fakama‵taku, masaki matagā mo fakalavelave ‵tupu o te natula? E fakaasi mai i te Muna a te Atua ko te Tusi Tapu a pogai tāua e tolu e logo‵mae i ei a tino:

  1. Kaimanako mo te Takalialia. “Ne pule ei te tagata ki te suā tagata kae logo‵mae i ei.” (Failauga 8:9) Ne logo‵mae faeloa a tino ona ko faifaiga a tino sē ‵lei katoatoa, tino kaima‵nako io me amio ma‵sei.

  2. Taimi mo Fakalavelave ‵Tupu Fakafuasei. E masani sāle o logo‵mae a tino me i “taimi o fakalavelave mo mea ‵tupu fakafuasei e ‵tupu ki tino katoa.” (Failauga 9:11) Ko tena uiga, a tino e ‵nofo atu i koga ‵se i taimi ‵se, e ‵sae i koga e ‵tupu i ei a fakalavelave, io me ko tino e fakata‵mala io me fai mea ‵se.

  3. Te Pule Masei o te Lalolagi Tenei. E fakamatala faka‵lei mai i te Tusi Tapu a te pogai tonu e logo‵mae i ei a tino. E fai mai: “Te lalolagi kātoa ko nofo mai lalo i te pule a te tino masei.” (1 Ioane 5:19) A te “tino masei” tenā ko Satani te Tiapolo, se tino faka-te-agaga masei telā se agelu muamua a te Atua kae “ne seki tumau i te munatonu.” (Ioane 8:44) Ne ‵kau atu a nisi agelu ki a Satani kae ne ‵teke atu latou ki te Atua ko te mea ke kausaki atu ki manakoga kaima‵nako, kae ne fai ei latou e pelā me ne temoni. (Kenese 6:1-5) Talu mai te ‵tekeatuga tenā, ne fakamalosi aka ne Satani mo ana temoni a mea ma‵sei i te lalolagi tenei. Ko tupu eiloa a te mea tenei i ‵tou aso nei. Nei la, ko kaitaua malosi eiloa te Tiapolo kae “takitaki ‵se ne ia te lalolagi nofoaki kātoa,” tenā ko ‘fakaalofa ei te lalolagi.’ (Fakaasiga 12:9, 12) E tonu, a Satani se tino ‵teke matagā. E fai ne ia a mea kolā e logo‵mae i ei a tino. E se ko te Atua—kae ko Satani eiloa—telā e fakamāfua ne ia a logo‵maega o tino.

MAFAUFAU KI TE MEA TENEI: Ko te tino masei fua, kae seai se loto alofa e mafai o fakamāfua aka ne ia a te logo‵mae o tino kolā e seai ne olotou mea ‵se ne fai. E ‵kese mai i ei, e fai mai te Tusi Tapu: “A te Atua ko te alofa.” (1 Ioane 4:8) Ona ko tena uiga alofa, “e seki mafaufau eiloa a te Atua tonu ke fai ne ia a faifaiga ma‵sei, ke fai ne te Atua Malosi Katoatoa a te mea ‵se!”—Iopu 34:10.

Kae tiga te feitu tenā, e mafai o mafaufau koe penei, ‘E pefea te leva ka talia ei ne te Atua Malosi Katoatoa ke tumau te pulega masei a Satani?’ E pelā mo te mea ne lavea ne tatou, e takalialia a Ieova ki amioga ma‵sei, kae e fai ne ‵tou logo‵maega ke logo‵mae malosi a ia. E se gata i ei, e fakamalosi mai tena Muna, penei: “‵Pei atu . . . otou manava‵sega katoa ki luga i a ia, me e atafai a ia ki a koutou.” (1 Petelu 5:7) A te Atua e alofa ki a tatou kae maua ne ia te malosi ke fakaseai ne ia a logo‵maega mo faifaiga sē fakamaoni katoa, e pelā mo te mea ka fakamatala mai i te suā mataupu. *

^ pala. 7 Ke maua a fakamatalaga liki‵liki e uiga ki te pogai e talia ei ne te Atua a logo‵maega, ke onoono ki te mataupu e 11 o te tusi ko te Ne a Mea e Mafai o Tauloto ne Tatou Mai te Tusi Tapu? telā ne ‵lomi ne Molimau a Ieova kae e mafai o ‵kopi mai ne tatou i te www.jw.org.