Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga  |  Napa 3 2016

 MATAUPU I TE ‵KAVA

Kafai ko Mate se Tino Pele

Kafai ko Mate se Tino Pele

“E iloa ne te Atua te ‵toe mea ‵lei, e taku pele. . . . Sa . . . tagi . . . koe.”

Ne fai atu a pati konā ki taliga o se fafine e igoa ki a Bebe. Ne nofo atu a ia i te mate o tena tamana, telā ne mate i se fakalavelave tupu fakafuasei i te motoka.

Ne pili ‵ki te fesokotakiga o Bebe mo tena tamana. Ne fai atu eiloa a pati konā ne se taugasoa o te kāiga mo te loto ‵lei, kae ne fakalogo‵mae malosi atu ki a Bebe i lō te fakamafanafana atu. Ne fai ifo faeloa a ia: “A tena mate e se ko te ‵toe auala ‵lei.” Ne manino ‵lei, i te taimi ne toe mafaufau a Bebe ki te fakalavelave i se tusi i te fia o tausaga mai tua ifo, koi loto mafatia eiloa ia.

E pelā mo te mea ne iloa ne Bebe, e mafai o leva te taimi e loto mafatia ei se tino, maise eiloa māfai e pili ‵ki te fesokotakiga o te tino fanoanoa mo te tino mate. I te Tusi Tapu, ne fakasino tonu atu eiloa ki te mate e pelā me ko “te ‵toe fili.” (1 Kolinito 15:26) E oko sāle mai te mate telā e fakamasei i ei ‵tou olaga, i taimi kolā e se toka katoatoa tatou ki ei, e ave keatea ei se tino telā e pele ki a tatou, kae e seai eiloa se mea e mafai o taofi ne ia. E seai eiloa se tino e mafai o sao mai i ei. Tela la, e se ‵poi tatou māfai e se iloa ne tatou o fakafesagai faka‵lei atu ki te mate mo ikuga mai tua ifo i ei.

Kāti ko oti ne mafaufau koe penei: ‘E pefea te leva e ‵tau o gata atu ei toku loto mafatia? E mafai pefea o fakafesagai atu se tino ki te loto mafatia? E fakamafanafana atu au pefea ki tino loto fanoa‵noa? E mata, e isi se fakamoemoega mō ‵tou tino pele kolā ko ‵mate?’