Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga  |  Napa 2 2016

E Mata, e ‵Tau o Tapuaki Atu a Kelisiano i se Koga Fakalotu ‵Malu?

E Mata, e ‵Tau o Tapuaki Atu a Kelisiano i se Koga Fakalotu ‵Malu?

I TAUSAGA katoa, e sili atu i te ono miliona o tino e faima‵laga atu ki se togavao ‵mao ki te Shima Peninsula i Tiapani. E oko atu latou ki se Koga Fakalotu ‵Malu Lasi o Ise, telā ne tapuaki atu ei ki te atua fafine o te la o Shinto, ko Amaterasu Omikami, i se lua afe tausaga. E ‵tau muamua o ‵fulu faka‵ma ne tino tapuaki olotou lima mo gutu. Ko ‵tu atu ei i mua o te koga fakalotu ‵malu (se koga tapuaki), e tau‵tali atu latou ki se faifaiga masani telā e ifo ki lalo, patipati olotou lima, kae ‵talo atu ki te atua fafine. * E talia ne Shinto ana tino ke ‵kau atu ki nisi talitonuga, kae ko tino lotu Puta, tino kolā e mafau‵fau i a latou ne Kelisiano, mo nisi lotu e ‵lei ki a latou ke aofia i faifaiga masani o te tapuakiga ki a Shinto i te koga fakalotu ‵malu tenei.

E isi eiloa ne koga fakalotu ‵malu * i te ukega o lotu ‵lasi i te lalolagi, kae e lau i miliona o tino e asi sāle atu ki ei. I fenua kolā e fai mai i a latou ne Kelisiano, e uke olotou falesa mo koga fakalotu ‵malu ne faite mō Iesu, Malia, mo tino tapu. Ne faka‵tu a nisi fale penā i koga kolā e ne ‵tupu i ei a tala i te Tusi Tapu io me fai ei a “vavega” fakamuli io me ko koga ne tausi ei a nisi mea fakalotu kolā ne ‵toe mai. E olo atu a te tokoukega o tino ki koga fakalotu ‵malu ona ko te talitonu me kāti e lagona atu olotou ‵talo māfai e fai i se koga ‵malu. Kae ki nisi tino, a te oko atu ki se koga fakalotu ‵malu ko te fakaotiga loa o se malaga loa ‵ki ne fai ne latou ko te mea ke fakaasi atu ei te lotou ma‵losi i feitu tau lotu.

Tino Matamata ki te Koga Fakalotu ‵Malu Lasi o Ise, i Tiapani, mo te Grotto of Massabielle , Lourdes, Falani

E mata, ka sili atu te lagona kae tali mai o ‵talo mo fakatagi māfai e fai atu i se koga fakalotu ‵malu? E mata, ka fiafia a te Atua ki te tukuatuga o tino kolā e ma‵laga atu ki koga fakalotu ‵malu? E sili atu i ei, e mata, e ‵tau o tapuaki atu a Kelisiano i koga fakalotu ‵malu? A te tali ki fesili konei ka se fai mai fua i ei a te kilokiloga e ‵tau o maua ne tatou kae e fesoasoani mai foki ke malamalama tatou i te vaegā tapuakiga e fiafia tonu ki ei te Atua.

TAPUAKI ATU I “TE AGAGA MO TE MUNATONU”

Se a te uiga o pati a Iesu me e ‵tau mo tatou o tapuaki atu “i te agaga mo te munatonu”?

I se sau‵talaga ne fai ne Iesu mo se fafine Samalia, ne fakaasi mai i ei a te kilokiloga a te Atua ki te tapuaki atu i koga tapu io me ko koga fakalotu ‵malu. Ne faimalaga atu a Iesu e auala i Samalia kae ne manava malie i se vaikeli i tafa o te fa‵kai ko Sukala. Ne kamata ne ia se sau‵talaga mo se fafine ne fanatu o asu vai mai te vaikeli. I te taimi ne sau‵tala ei lāua ne fakasino atu a te fafine ki te lasi o te ‵kese i te lotu a te kau Iutaia mo te kau Samalia. “A omotou tupuga ne tapuaki i te mauga tenei; kae e fai mai koutou me ko Ielusalema te koga e ‵tau o tapuaki i ei a tino.”—Ioane 4:5-9, 20.

A te mauga ne fakasino atu ki ei a te fafine ko te Mauga o Kelisima, ne tu i se 30 maila (50 kilomita) i te feitu matū o Ielusalema. Ne fakatu ne te kau Samalia  se faletapu i ei ke fakamanatu a ‵kaiga fia‵fia e pelā mo te Paseka. Kae i lō te fakasino atu ki te kinauga tenei i te va o latou, ne fai atu a Iesu ki te fafine: “Talitonu mai ki a au, e toku fafine, Ka oko mai eiloa te itula ka se toe tapuaki ei a tino ki te Tamana i te mauga tenei io me ko Ielusalema.” (Ioane 4:21) Ko tafaga la te fakaofoofogia o pati konā, maise eiloa me ne fai mai ne se tino Iutaia! Kaia ne fakagata ei te tapuakiga i te faletapu o te Atua i Ielusalema?

Ne toe fai atu a Iesu: “Ka oko mai te itula, kae ko oko foki eiloa ki ei, ka tapuaki atu ei a tino tapuaki ‵tonu ki te Tamana i te agaga mo te munatonu, me e ‵sala eiloa te Tamana ki vaegā tino penā ke tapuaki atu ki a ia.” (Ioane 4:23) I te fia o senitenali, ne ‵kilo atu a te kau Iutaia ki te faletapu gali i Ielusalema e pelā me ko te fakavae o te lotou tapuakiga. Ne faima‵laga fakatolu atu latou i te tausaga o ofo atu a taulaga ki te lotou Atua, ko Ieova. (Esoto 23:14-17) Kae ne fai mai a Iesu me ka ‵fuli a mea katoa konei kae ka “tapuaki atu ei a tino tapuaki ‵tonu” i “te agaga mo te munatonu.”

A te faletapu i Iutaia se fale malosi ‵ki i se koga tonu. Kae ko te agaga mo te munatonu e se ne mea faka-te-foitino, kae e se fakasino atu fua ki so se koga faka-te-foitino. Tela la, ne fakamatala atu ne Iesu me i Kelisiano ‵tonu e se fakavae io me fakalagolago ki so se fale ne faite io me se koga tonu, me ko te Mauga o Kelisima, te faletapu i Ielusalema, io me ko so se koga tapu.

I te sautalaga mo te fafine Samalia, ne taku atu foki ne Iesu me “ka oko mai” eiloa a “te itula” tenā mō te ‵fuliga i te tapuakiga ki te Atua. Ko te taimi fea? Ne oko mai te itula e auala i tena mate pelā me se taulaga, kae ne gata atu ei a fakanofonofoga faka-Iutaia kolā ne fakavae ki te Tulafono a Mose. (Loma 10:4) “Te itula . . . ko oko foki eiloa ki ei.” Kaia? Me e pelā me ko te Mesia, ko oti ne kamata o fakamaopoopo ne ia a soko kolā ka faka‵logo ki te fakatonuga telā ne taku mai ne ia mai tua ifo: “A te Atua se agaga, kae ko tino kolā e tapuaki ki a ia e ‵tau o tapuaki atu i te agaga mo te munatonu.” (Ioane 4:24) Se a te la te uiga o te tapuaki atu i te agaga mo te munatonu?

I te taimi ne taku atu ei ne Iesu a te tapuaki atu i te agaga, ne seki fakauiga a ia ki se agaga telā e safe te matagi i se vaegā tapuakiga. I lō te fai penā, ne faipati atu a ia e uiga ki te takitaki ne te agaga tapu o te Atua, telā e aofia i ei a te takitakiga o te ‵tou malamalama i te Tusi Tapu. (1 Kolinito 2:9-12) Kae ko te munatonu telā ne fakasino atu ki ei a Iesu ko te malamalama tonu i akoakoga i te Tusi Tapu. Tela la, i lō  te fakasino atu ki se koga fakapito, ka talia ‵tou tapuakiga ki te Atua māfai e fakafetaui aka ki mea e akoako mai i te Tusi Tapu kae e takitakigina ne te agaga tapu.

TE KILOKILOGA A KELISIANO KI KOGA FAKALOTU ‵MALU

E ‵tau la o pefea te kilokiloga a Kelisiano ki te malaga atu kae tapuaki atu i koga fakalotu ‵malu? A te mafaufau ki te fakatonuga a Iesu me e tapuaki atu a tino tapuaki ‵tonu ki te Atua i te agaga mo te munatonu, e manino ‵lei me e seai lele eiloa se aoga o te tapuaki atu i so se koga fakalotu ‵malu io me se koga tapu ki te ‵tou Tamana faka-te-lagi. E se gata i ei, e fakaasi mai i te Tusi Tapu a te kilokiloga a te Atua ki te fakaaogaga o tupua i te tapuakiga. E fai mai i ei: “‵Tele keatea mai te ifo ki tupua” mo te “ke puipui koutou mai tupua.” (1 Kolinito 10:14; 1 Ioane 5:21) Tela la, e se tapuaki atu se Kelisiano i so se koga telā e ‵kilo atu ki ei me e tapu io me e fakamalosi aka ei te tapuaki atu ki tupua. Kae ona ko te pogai tonu o koga fakalotu ‵malu, e faka‵mao a Kelisiano mai te tapuaki atu i ei.

Kae e se fakauiga i ei me e fakatapu ne te Muna a te Atua a te fakaaogaga o se koga mō ‵talo, sukesukega io me ko te mafaufau ‵loto ki ei. A te koga fai fakatasiga telā e ‵lei kae ‵malu e fakaaoga fua ki te tauloto mo te sautala ki mea faka-te-agaga. E se masei foki ke fai se fatu fakamanatu mō se tino ko mate. Kāti se fakaasiga fua ke fakamasausau io me ko te alofa ki te tino mate. Kae ko te ‵kilo atu ki ei e pelā me se koga tapu io me e tapuaki atu ei ki tupua io me ko nisi mea penā, e ‵teke katoatoa atu i ei ki muna a Iesu.

Tela la, e se ‵tau o fanatu koe ki se koga fakalotu ‵malu mo te mafaufauga me ka sili atu te lagona ne te Atua au ‵talo i konā. Ka se fiafia foki te Atua ki a koe io me tuku atu se fakamanuiaga fakapito mō te faiga o se malaga penā ki se koga fakalotu ‵malu. E fai mai te Tusi Tapu me i a Ieova te Atua, te “Aliki o te lagi mo te lalolagi, e se nofo i loto i faletapu ne faite ne tino ki olotou lima.” Kae e se fai ne te mea tenei ke ‵mao te Atua mai i a tatou. E mafai o ‵talo atu tatou ki a ia kae e lagona ne ia tatou i so se koga “me i a ia e se ‵mao mai i a tatou taki tokotasi.”—Galuega 17:24-27.

^ pala. 2 E mafai o kese‵kese a faifaiga masani i koga fakalotu ‵malu o Shinto.

^ pala. 3 Ke onoono ki te pokisi “Se a te Koga Fakalotu ‵Malu?”