Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Oketopa 2017

Iosefa te Alimataia ko ‵Lago Atu ki ei

Iosefa te Alimataia ko ‵Lago Atu ki ei

IOSEFA TE ALIMATAIA ne seki mafaufau me ne mafai o maua ne ia te loto malosi ke fanatu ki te kovana Loma. Ne lauiloa a Ponitio Pilato e pelā me se tino uiga faigata. Kae kafai ne ‵tau o tanu a Iesu i se auala ‵malu, ne ‵tau o fanatu se tino o fakamolemole ki a Pilato ke tuku atu tena foitino. Ne iku atu i ei ki te faigofie o te fai‵patiga a lāua i lō te mea ne mafaufau a Iosefa ki ei. Mai tua o te fakamautinoaga ne ia mai i se ofisa me ko mate eiloa a Iesu, ne talia ei ne Pilato a te fakamolemole tenā. Nei la, e tiga eiloa koi fanoanoa malosi a Iosefa, ne fanatu fakavave tou tagata ki te koga tamate tino.—Male. 15:42-45.

  • Ko oi a Iosefa te Alimataia?

  • Se a te fesokotakiga ki a Iesu?

  • Kae se a te mea e aoga ei tena tala ki a koe?

 SE SUI O TE SANETULINI

Ne taku ne te Evagelia fakaosofia o Maleko a Iosefa ki “se tino fakaaloalogina o te Kaupule.” I te mataupu tenei, a te Kaupule ko te Sanetulini, ko te fono maluga a te kau Iutaia kae ko te potukau maluga foki telā e isi sena malosi ki te fenua, malo, mo te lotu. (Male. 15:1, 43) Tela la, a Iosefa se tokotasi o takitaki o ana tino, telā e maina ei tatou i te auala ne mafai o fai‵pati a ia mo te kovana Loma. E sē se mea fakapoi me ne maumea foki a Iosefa.—Mata. 27:57.

E mata, e maua ne koe te loto malosi ke taku ‵tonu atu me i a Iesu ko tou Tupu?

E pelā me se potukau, ne takalia‵lia a te kau Sanetulini ki a Iesu. Ne fai ne sui i ei olotou aofaga ke tamate a ia. Kae ko Iosefa ne taku ki se “tagata ‵lei kae amiotonu.” (Luka 23:50) E se pelā mo te ukega o ana soa ga‵lue i te Sanetulini, ne ola a ia i se olaga fakamaoni, ‵ma, kae fai te ‵toe mea e mafai o fai ke fakalogo ki fakatonuga a te Atua. Ne “nofo fakatalitali foki [a ia] ki te Malo o te Atua,” telā e mafai o iloa atu te pogai ne fai a ia mo fai se soko e tokotasi o Iesu. (Male. 15:43; Mata. 27:57) Kāti ne tosina atu a ia ki te fekau a Iesu mo te manakoga tonu ki te munatonu mo te fakamaoni.

SE SOKO ‵FUNA

E fai mai i te Ioane 19:38 me i a Iosefa “se soko foki o Iesu, kae ona ko tena mataku i tino ne seki fakaasi atu ne ia te mea tenei ki tino.” Se a te mea ne mataku a Iosefa i ei? Ne iloa ne ia te takalia‵lia o tino Iutaia ki a Iesu mo te lotou fakaikuga ke fakatea mai i te sunako so se tino e fakatuanaki ki a ia. (Ioa. 7:45-49; 9:22) A te fakatea mai te sunako e aofia i ei a te fakatauemu atu, ‵vae kea‵tea, kae fai pelā me se tino fakaatea ne tino Iutaia. Tela la, ne fakatalave te ‵taku tonu atu ne Iosefa tena fakatuanaki ki a Iesu i mua o tino. Kafai e fai a ia penā, ka galo atu ei tena tulaga mo tena ‵malu.

A Iosefa e se ko te tino tokotasi fua i te tulaga tenei. E ‵tusa mo te Ioane 12:42, “e tokouke a tino pule ne fakatuanaki ki a ia, kae ona ko te kau Falesaio ne seki mafai ei o fakaasi ‵tonu mai ne latou me e fakatuanaki latou ki a ia, ko te mea ke se faka‵tea latou mai te sunako.” A te suā tino foki penā ko Nikotemo, se sui foki o te Sanetulini.—Ioa. 3:1-10; 7:50-52.

Kae e tiga eiloa ne fai a Iosefa mo fai se soko, kae ne seki mafai ne ia o fakaasi atu ki tino. A te mea tenā se fakalavelave lasi, maise eiloa ona ko pati a Iesu: “So se tino e taku tonu atu ne ia i mua o tino i a māua e ‵kau fakatasi, ka taku tonu atu foki ne au ki mua o toku Tamana telā i te lagi i a māua e ‵kau fakatasi, a ko so se tino e fakafiti ne ia au i mua o tino e fakafiti foki ne au a ia i mua o toku Tamana telā i te lagi.” (Mata. 10:32, 33) Ne seki fakafiti katoatoa eiloa ne Iosefa a Iesu, kae ne seki maua foki ne ia te loto malosi ke taku ‵tonu atu. Kae ko koe?

Ne fai ne Iosefa se mea ‵lei, e lipoti mai i te Tusi Tapu me ne seki ‵lago atu a ia ki te aofaga ‵teke a te Sanetulini e uiga ki a Iesu. (Luka 23:51) Ne seki nofo atu a Iosefa i te  taimi ne fai ei te fono o Iesu, e pelā mo manatu o nisi tino. Faitalia me se a te pogai, ne ‵tau eiloa o fanoanoa malosi a Iosefa ki faifaiga sē fakamaoni—kae ne seki mafai ne ia o fakagata!

NE MANUMALO I TE FAKALOTOLOTOLUA

I te taimi ne mate ei a Iesu, e mautinoa eiloa me ne manumalo a Iosefa i te mataku, kae ne fakaiku aka ne ia ke ‵lago atu ki soko o Iesu. E fakaasi mai i te fakaikuga tenā i pati i te Maleko 15:43: “Ne loto toa tou tagata ke fanatu ki mua o Pilato kae fakamolemole atu ke tuku atu te foitino o Iesu.”

E foliga mai me ne nofo atu eiloa a Iosefa i te koga ne mate ei a Iesu. A te ‵tonuga loa, ne iloa muamua ne ia i a Pilato me ko mate a Iesu. Tela la, i te taimi ne fesili atu ei a Iosefa mō te foitino, “ne mafaufau a [te kovana] me ko Iesu nei ko oti ne mate.” (Male. 15:44) Moi ne molimau ne Iosefa te logo‵mae o Iesu i luga i te pou fakasaua, e a, ne seki fakamalosi aka a ia ne te tulaga tenā ke iloilo aka tena loto lagona kae fakaiku aka me e ‵tau eiloa mo ia o ‵lago atu ki te munatonu? E mafai loa o fai penā. Kae se mea ‵lei me ne fakamalosi aka a Iosefa ke gasuesue o fai se mea. Ne seki toe fai a ia mo fai se soko ‵funa.

KO TANU NE IOSEFA A IESU

Ne manakogina i te tulafono a te kau Iutaia me e ‵tau o tanu a tino kolā ne fakasala ki te mate kae koi tuai o to te mata o te la. (Teu. 21:22, 23) Kae e pelā loa mo te mea ne manava‵se ki ei a te kau Loma, ne ‵tau eiloa o tuku tiaki a foitino o tino amio solitulafono i luga i te pou ke pala io me ne ‵pei fua ki loto i se tanuga masani. Kae e se tenā loa te mea ne mafaufau ki ei a Iosefa mō Iesu. E isi  se tanuga fou a Iosefa ne fatoa ‵kati i se koga e pili ki te koga tamate a tino. Ne seki fakaaoga eiloa te koga tenā, telā e fakaasi mai i ei me ne fatoa fanatu a Iosefa mai i Alimataia * ki Ielusalema kae ne fakamoemoe a ia ke fakaaoga te koga tenei e pelā me se tanuga mō tena kāiga. (Luka 23:53; Ioa. 19:41) A te ‵tanuga o Iesu i te tānuga eiloa a Iosefa mō aso mai mua se fakaasiga o te uiga kaimalie o Iosefa kae fakataunu ei te valoaga me ka tanu a te Mesia fakatasi “mo tino mau‵mea.”—Isa. 53:5, 8, 9.

E mata, e isi aka foki se mea e fakatāua atu ne koe i lō tou fesokotakiga mo Ieova?

Ne fakamau ne Evagelia katoa e fa a te mea tenā mai tua o te tapalega o te foitino o Iesu mai te pou, ne kofukofu ne Iosefa ki laugatu lino kae fakatako i tena tanuga loa. (Mata. 27:59-61; Male. 15:46, 47; Luka 23:53, 55; Ioa. 19:38-40) A te tino e tokotasi fua ne taku mai me ne fesoasoani ki a Iosefa ko Nikotemo, telā ne avatu ne ia a mea fakama‵nogi mō te tanuga. Ona ko te mea ne lauiloa lāua, kāti ne fakagasue eiloa ne lāua te foitino. Kāti ne fakaaoga ne lāua a tavini ke sau kae tanu ne latou. Kafai foki loa ne fakaaoga ne lāua a tavini, a te galuega ne fai ne tāgata e tokolua konei e sē se tamā mea fua. So se tino e patele ki se foitino mate e fai ei ke se ‵ma a ia i feitu fakatapuakiga mō aso e fitu, kae penā foki a mea katoa ne pa‵tele lāua ki ei. (Nume. 19:11; Haka. 2: 13) I se vaegā tulaga penā, e manakogina ei ke ‵vae keatea lāua i te vaiaso o te Paseka kae ke se ‵kau atu ki ‵kaiga fakamanatu mo fakamanatuga katoa. (Nume. 9:6) Mai te fakatokaga o te tanuga o Iesu, ne mafai foki o fakatauemu atu ana soa ga‵lue ki a Iosefa. Kae i te taimi tenei, ne loto fiafia a ia ke talia a ikuga o te ‵tanuga o Iesu i se auala ‵malu kae taku ‵tonu atu i a ia se soko e tokotasi o Keliso.

TE FAKAOTIGA O TE TALA O IOSEFA

I tafa o tala i tusi Evagelia e uiga ki te ‵tanuga o Iesu, ne seki toe ai eiloa se mea ne taku mai e uiga ki a Iosefa te Alimatia i te Tusi Tapu, telā e iku atu ki te fesili tenei: Se a te mea ne tupu ki a ia? A te ‵tonuga loa, e se iloa ne tatou. Kae e ‵tusa mo mea ko oti ne fakamatala mai, e isi se fakamaoniga tonu me kāti ne taku ‵tonu atu ne ia i a ia se Kelisiano. I tafa o mea katoa, i te taimi tenei o tofotofoga mo mea faiga‵ta, ne gasolo aka loa o malosi tena fakatuanaki mo te loto toa i lō te vāivāi. A te mea tenā se fakailoga ‵lei.

E fakasae aka ne te tala tenei se fesili e ‵tau mo tatou katoa o mafau‵fau ki ei: E mata, e isi aka foki ne fakamatalaga—ki tena tulaga, galuega, kope, alofa ki kāiga, io me ko te ‵tou saolotoga—kolā e mafai o fakatāua atu ne tatou i lō ‵tou fesokotakiga mo Ieova?

^ pala. 18 E fai pelā me i Alimataia ko Lama, ko Rentis (Rantis) i aso nei. Ko te fa‵kai o te pelofeta ko Samuelu, telā ne tu i se 22 maila (35 km) i te feitu ki matū togala o Ielusalema.—1 Samu. 1:19, 20.