Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Iuni 2017

Ka Fakatoka Faka‵lei ne Koe a Kinauga Kae Tausi te Filemu?

Ka Fakatoka Faka‵lei ne Koe a Kinauga Kae Tausi te Filemu?

E FAKAMALOSI atu a Ieova te Atua ki Kelisiano ke fakatāua ne latou a te filemu, kae fai a te tausiga o te filemu mo toe vaega tāua o te olaga. A te ikuga o ‵tou uiga filemu e maua ei ne tino tapuaki ‵tonu a te filemu sili. E fesoasoani atu a te mea tenei ki te faiga o te fakapotopotoga Kelisiano ke gali ki nisi tino kolā ko oko eiloa i te fia saoloto mai kinauga.

E pelā mo se tino faivailakau lauiloa i Madagascar ne lavea ne ia a te fealofani o Molimau a Ieova. Ne fai ifo a ia, ‘Kafai e fia kau atu au ki se lotu, tenei eiloa te lotu.’ E seki leva, ne fakagata ana faifaiga faivailakau, faka‵tonu faka‵lei tena tulaga avaga telā e se fetaui mo te Tusi Tapu i te fia o masina, kae ne fai mo tino tapuaki ki a Ieova, te Atua o te filemu.

E pelā mo te tagata tenā, e maua eiloa ne te fia afe o tino i tausaga katoa a te filemu telā ne ma‵nako malosi latou ki ei i te fakapotopotoga Kelisiano. Kae e fakaasi manino mai i te Tusi Tapu me kafai e isi se “loto masei mo kinauga e uke” i te fakapotopotoga, e mafai o fakamasei i ei a va fakataugasoa kae faka‵tupu foki i ei a fakalavelave. (Iako. 3:14-16) Se mea fakafiafia, me e tuku mai foki i te Tusi Tapu a fakatakitakiga aoga ki te auala ke ‵kalo keatea mai i fakalavelave konā kae fakamalosi aka te filemu. Ke fai penā, ke mafau‵fau tatou ki nisi mea ‵tonu kolā ne ‵tupu.

FAKALAVELAVE MO FAKA‵LEIGA

“Ko oko eiloa i te faigata ki a au ke fealofani mo se taina telā ne ga‵lue tasi māua. I te taimi e tasi ne fakatau paka‵laga atu ei māua, ne ulu mai a tino e tokolua kae lavea ne lāua a te mā taua.”—CHRIS.

“Ne fakagata fakavave eiloa ne se tuagane telā ne talai tasi faeloa māua a mā fakatokaga mō te galuega talai. Oti aka, ne seki toe fia faipati mai a ia ki a au. E seai eiloa saku mea e tasi e iloa.”—JANET.

“Ne fai‵pati matou mo tino e tokolua i te telefoni. Ne fakatofa mai se tino e tokotasi, kae ne mafaufau au me ko oti ne tamate tena telefoni. Ne fai atu ei ne au a pati sē ‵lei e uiga ki tou tagata ki te suā tino i te telefoni, kae ko te tino muamua e seki tamate tena telefoni.”—MICHAEL.

“I te motou fakapotopotoga, ne kamata o sē ‵lei te va o paenia e tokolua. Ne pati ‵toko ne te tino e tokotasi a te suā tino. Ne fakavāivāi atu te lā kinauga ki nisi tino.”—GARY.

Kāti e mafaufau koe me i mea konā ne tamā fakalavelave fua. Kae e pokotia masei eiloa a latou kolā ne aofia i ei i te feitu tau lagonaga mo te feitu faka-te-agaga. Ka fia‵fia eiloa koutou ke iloa atu me ne toe maua te filemu i va o taina mo tuagane konā, kolā ne fakaaoga ne latou a te Tusi Tapu e pelā me ko te lotou takitaki. Ne a fakatakitakiga i te Tusi Tapu e mafaufau  koe me ne fakagalue aka ne latou mo te manuia?

“Sa fakakinau i te ala.” (Kene. 45:24) Ne tuku atu ne Iosefa a te fakatakitakiga tenā ki ana taina kolā ko ‵foki atu ki te lotou tamana. Ko oko eiloa i te ‵poto o pati konā! Kafai e se pule faka‵lei atu se tino ki ana lagonaga kae kaitaua vave, e mafai o fai ne ia a nisi tino ke kaitaua. Ne kamata o lavea ne Chris tena vāivāiga ko te fakamatamata mo te fakatalave o talia a takitakiga. Ona ko te mea ne manako tou tagata ke ‵fuli, ne fakatoese atu a ia ki te taina telā ne kinau lāua kae ne galue malosi tou tagata ke pule faka‵lei atu ki tena uiga kaitaua. I te lavea atu o taumafaiga a Chris ke ‵fuli, ne fai foki ne te tino e ga‵lue tasi lāua a ‵fuliga. Nei la, ko tavini fakatasi atu lāua ki a Ieova.

“Kafai e se saga koe o sala ne manatu fakatonutonu, ko tena uiga e se mafai o manuia tou taumafai.” (Faata. 15:22) Ne fakaiku aka ne Janet me e ‵tau o fakatāua malosi atu ne ia a te munatonu tenā i tena loto. Ne fakaiku aka ne tou fafine ke ‘saga,’ io me faipati atu, ki te suā tuagane. I te lā sau‵talaga, ne ‵kami eiloa mo te poto ne Janet a te tuagane ke fakaasi mai te pogai o tena sē fiafia. Muamua la, ne tai ‵vela eiloa te sau‵talaga tenā kae ne gasolo o ‵lei i te taimi ne sau‵tala ei lāua ki lā fakalavelave i se auala filemu. Ne iloa aka ei ne te tuagane me ne ‵se tena malamalama i se mea telā ne seki aofia lele eiloa i ei a Janet. Ne fakatoese atu tou fafine kae ne toe kamata o tavini fakatasi atu lāua ki a Ieova.

“Tela la, kafai e avatu ne koe tau meaalofa ki te fatafaitaulaga kae masaua ne koe me e isi se mea e ita ei tou taina ki a koe, tuku la tau meaalofa i tafa o te fatafaitaulaga. Fano muamua o faka‵lei mo tou taina.” (Mata. 5:23, 24) Kāti e masaua ne koe a te fakatakitakiga tenā ne tuku mai ne Iesu i te Lāuga i luga i te Mauga. Ne ma‵sei valevale eiloa a lagonaga o Michael i te taimi ne iloa aka ei ne ia tena masei ona ko tena sē mafaufau faka‵lei mo te sē atafai. Ne fakaiku aka ne tou tagata ke taumafai a ia o fakatoka te va filemu. Ne fakatoese atu eiloa tou tagata mo te loto maulalo ki te taina ne fakalogo‵mae ne ia. Se a te mea ne iku mai i ei? E fai mai a Michael, “Ne fakamagalo tonu eiloa au ne toku taina.” Ne toe ‵lei eiloa te lā va taugasoa.

“Ke fakatau fa‵ki faeloa koutou i a koutou eiloa kae fakatau fakamagalo atu te suā tino ki te suā tino māfai e isi se pogai e fameo ei se tino ki te suā tino.” (Ko. 3:12-14) E pelā mo te avā paenia kolā ne tavini atu penā, ne fesoasoani atu se toeaina atafai ki a lāua ke mafau‵fau ki fesili penei: ‘E mata, e maua ne māua a te saolotoga ke fai a nisi tino ke fanoa‵noa ona ko te ma taua? E mata, e isi eiloa se pogai tonu ke se fakatau fa‵ki māua kae tumau i te tavini atu mo te filemu ki a Ieova?’ Ne talia ne lāua a pati fakatonutonu a te toeaina kae ne fakagalue aka ne  lāua. Nei la, ko fealofani eiloa lāua i te taimi e talai atu ei ne lāua te tala ‵lei.

A te fakagalue aka o pati fakatonutonu konā i te Tusi Tapu, e mafai eiloa o fai a te Kolose 3:12-14, mo fai se kamataga ‵lei māfai e fakalogo‵mae ne se tino a koe. Ne iloa aka ne tino e tokouke i te mea tenā, fakatasi mo te loto maulalo, me e mafai fua ne latou o fakamagalo kae fakapuli atu. Kae kafai koi manakogina eiloa a mea e uke mai tua o nai taumafaiga, e a, e mafai o fakagalue aka a te Mataio 18:15? E fakasino atu eiloa a pati fakatonutonu a Iesu ki mea e ‵tau o fai māfai ko fai ei ne se tino se agasala matagā ki te suā tino. Kae ko te akoakoga fakavae e maua i ei e mafai foki o fakasino atu ki mea e ‵tau o fai ne koe. Fanatu fua ki te taina io me ko te tuagane kae taumafai i se auala atafai kae loto maulalo ke sau‵tala ki te fakalavelave kae faka‵lei aka.

E tonu, e tuku mai i te Tusi Tapu a nisi manatu fesoasoani aoga. E mafai o faka‵lei aka a fakalavelave konā māfai e fakaasi atu ne tatou “a fuataga o te agaga . . . te alofa, te fiafia, te filemu, te kufaki, te atafai, te aga‵lei, te fakatuanaki, te agamalu, te loto pulea.” (Kala. 5:22, 23) E pelā eiloa mo te oela telā e fai ei ke galue ‵lei se masini, e mafai ne uiga fakaatua konā o fai ke fanofano ‵lei a te tausiga o te filemu.

E FAKAGALIGALI NE TINO UIGA KESE‵KESE A TE FAKAPOTOPOTOGA

Uiga—a te kese‵kese o uiga o tatou taki tokotasi telā e fai ei ke ‵kese te suā tino mai te suā tino—e mafai o fai ei ke ‵gali a va fakataugasoa. A te kese‵kese i uiga e mafai foki o iku atu ki kinauga. Ne tuku mai ne se toeaina atamai a te fakaakoakoga tenei: “A tino mata ma e mafai o faigata ke nofo atu i tafa o se tino tapitapi. E mafai o foliga sē tāua mai a te mea tenā; kae e mafai o iku atu ki fakalavelave ‵lasi.” Kae e mata, e mafaufau koe me ka isi ne fakalavelave o tino kolā e ‵kese ‵ki eiloa olotou uiga? Ia, mafaufau ki te avā apositolo. E pefea a uiga o Petelu? E mafai o mafaufau koe ki a ia e pelā me se tino tapitapi kae pati ‵pole. Kae ko Ioane? E mafai o mafau‵fau tatou ki a ia e pelā me se tino alofa kae e lavea atu faeloa te uiga tenā i ana pati mo faifaiga. Kāti e isi eiloa ne pogai fakavae mō vaegā manatu penā e uiga ki apositolo e tokolua. E foliga  mai me e ‵kese eiloa lāua i lā uiga. Kae koi mafai eiloa o ga‵lue tasi lāua faka‵lei. (Galu. 8:14; Kala. 2:9) E penā foki loa, e mafai eiloa ne Kelisiano mo uiga tai ‵kese o ga‵lue fakatasi i aso nei.

Kāti e isi se taina i tau fakapotopotoga telā e fakaitaita atu faeloa ana pati mo faifaiga ki a koe. Kae e iloa ‵lei ne koe me ne mate a Keliso mō te tino tenā kae e ‵tau o fakaasi atu ne koe te alofa. (Ioa. 13:34, 35; Loma 5:6-8) Tela la, i lō te fakagata atu o so se va fakataugasoa mo te tino tenā io me ‵kalo keatea mai i a ia, fesili ifo: ‘E mata, e fai ne se taina se mea telā e ‵teke tonu atu ki te Tusi Tapu? E mata, e taumafai eiloa a ia mo te iloa tonu i se auala matagā ke ma‵sei oku lagonaga? Io me e kese‵kese fua ma uiga?’ E tāua foki te fesili tenei: ‘Ne a ana uiga ‵lei e mafai o aoga ki a au?’

E tāua ‵ki eiloa te ‵toe fesili tenā. Kafai e gutu faipati a te tino tenā kae ko koe e uiga filemu, mafaufau ki te faigofie ki a ia ke kamata a sau‵talaga i te galuega talai. E mafai o fakatoka ne koe ke ga‵lue koulua mo te tino tenā i te galuega talai kae onoono aka me ne a mea e mafai o tauloto ne koe mai i a ia. Kafai ne fakaasi atu faeloa ne ia a te uiga kaimalie ki nisi tino, kae ko au e tai uiga kaiu, kaia e se kilo atu ei koe ki te fiafia e maua mai te tuku atu o mea ki tino ma‵tua, tino ma‵saki, io me ko tino ma‵tiva? A te manatu tāua, faitalia te kese‵kese o lua uiga, e mafai eiloa o pili tou va mo tou taina māfai e ‵saga tonu atu ki uiga ‵lei. E mafai o se iku atu ki te fai o koulua mo taugasoa ‵pili, kae e mafai o fesoasoani atu ke ‵lei te lua va kae momea aka foki i ei te filemu—o koe mo te fakapotopotoga kātoa.

E mafai o kese‵kese a faifaiga io me ko uiga o Evotia mo Sunetui. Kae ne fakamalosi atu te apositolo ko Paulo ki a lāua “ke tasi lā mafaufau i te Aliki.” (Fili. 4:2) E mata, ka taumafai malosi foki koe penā ki te fakamoemoega tenā mo fakamoemoega tai ‵pau ke maua te filemu?

SA TALIA KE TUMAU A KINAUGA

E pelā mo mouku ola vale i se fatoaga o pulalakau, e mafai o gasolo aka o ma‵sei a lagonaga sē ‵lei ki nisi tino vagana ke taumafai tatou o unu keatea. Kafai ko malosi eiloa te uiga ita i te loto o se tino, e mafai o pokotia i ei a te  fakapotopotoga. Kafai e a‵lofa tatou ki a Ieova mo ‵tou taina, ka mafai ei o fai ne tatou a mea katoa ke mo a ma fakamakosu io me fakamasei atu ‵tou fakalavelave totino ki te filemu o tino o te Atua.

Kafai e fakamaulalo koe kae taumafai o tausi te filemu, ka maua eiloa ne koe a toe ikuga ‵lei

Kafai e taumafai tatou o faka‵lei a kinauga io me ko mea e se fia‵fia ki ei tatou mo te fakamoemoega ke maua te filemu, e mafai o ofo tatou i ikuga tafasili i te ‵lei e maua mai i ei. Mafaufau ki te tala o se Molimau e tokotasi: “Ne mafaufau au me ne fai eiloa au ne se tuagane e pelā me se tamā tamaliki. Ne seki fiafia eiloa au ki ei. I te taimi ne gasolo aka ei toku sē fiafia, ne kamata o se āva au ki tou fafine. Ne mafaufau ifo au, ‘E se āva mai a ia ki a au, kae ka se fakaasi atu foki ne au te āva ki a ia.’”

Ne kamata ei o toe mafaufau faka‵lei a te Molimau tenei ki ana faifaiga. “Ne kamata o lavea ne au oku vāivāiga totino kae ne seki fiafia malosi au ki a au eiloa. Ne iloa aka ne au me ne ‵tau o ‵fuli oku mafaufauga. Mai tua o te ‵talo atu ki a Ieova e uiga ki ei, ne ‵togi ne au se tamā meaalofa mō te tuagane kae ne tusi mai ne ia se tamā tusi kae fakatoese mai mō ana uiga ma‵sei. Ne fakatau ‵sai māua kae ne lotomalie a ia ke fakapuli atu te mea ne tupu. Ne seki toe ai eiloa se fakalavelave i te va o māua.”

E ma‵nako malosi eiloa a tino ki te filemu. Kae kafai e isi se mea fakamataku ki te lotou tulaga mo te lotou uiga fakamatamata, e mafai o gasue‵sue a tino e tokouke i se auala telā e se fakamalosi aka ei te filemu. Tenā eiloa te ‵tonuga ki tino e tokouke kolā e se tapuaki ki a Ieova, kae e ‵tau o tumau te filemu mo te fealofani i va o tino tapuaki kolā e fakaigoa ki tena igoa. Ne fakaosofia ne ia a Paulo ke tusi mai: “E fakatagi atu au . . . ke sa‵sale koutou i te auala telā e fetaui mo te kalagaga telā ne kalagagina ei koutou, mo te loto maulalo i taimi katoa, i te agamalu, mo te kufaki, kae ke fakatau fa‵ki koutou i otou mea ‵se i te alofa, i te otou taumafai malosi ke fakatumau ne koutou te tasi o te agaga telā ko te fusi o te filemu.” (Efe. 4:1-3) E tāua ‵ki eiloa a te “agaga [tenā] telā ko te fusi o te filemu.” Ke na fakamalosi kae fakaiku aka ke faka‵lei so se fakalavelave telā e mafai o sae aka i va o tatou.