Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Aokuso 2017

Alofa—Se Uiga Tāua

Alofa—Se Uiga Tāua

NE TUSI mai ne te apositolo ko Paulo mai lalo i te takitakiga a te agaga a uiga e iva kolā ko ikuga o te gasuesuega o te agaga tapu. (Kala. 5:22, 23) Ne fakamatala mai ne ia a uiga ‵gali konei e pelā me e aofia katoa—i “fuataga o te agaga tapu.” * E aofia i fuataga konei a “uiga ‵fou.” (Ko. 3:10) E pelā mo se lakau telā e ‵fua mai i ei a fuataga māfai e tausi faka‵lei, e penā foki te tino telā ka fakaasi atu ne ia a fuataga o te agaga māfai e galue ‵lei a te agaga tapu i tena olaga.​—Sala. 1:1-3.

A te uiga muamua o fuataga o te agaga telā ne taku mai ne Paulo ko te uiga tāua o te alofa. E pefea te tāua o te mea tenā? Ne fai mai a Paulo me e aunoa mo te alofa, ‘e seai lele eiloa sena aoga.’ (1 Koli. 13:2) Kae se a la te alofa, kae e ati aka kae fakaasi atu foki pefea ne tatou i aso katoa?

TE AUALA NE FAKAASI ATU EI TE ALOFA

E tiga eiloa e se faigofie ke fakamatala atu ne pati a te uiga o te alofa, tenei eiloa te auala e fakamatala mai i te Tusi Tapu. E pelā mo te mea e fai‵tau tatou ki ei me i te alofa “e kufaki kae kaimalie.” E fai mai foki me “e fiafia eiloa ki te munatonu,” kae e “onosai i mea katoa, e talitonu ki mea katoa, e fakamoemoe ki mea katoa, e kufaki i mea katoa.” E aofia foki i te alofa a lagonaga ‵loto kae atafai ki nisi tino mo te manavase tonu ki a latou, e pelā foki mo te alofa atafai tonu ki a latou. I te suā feitu, a te sē lava o te alofa e fakaasi atu i te loto masei, fakamaualuga, faifaiga sē ‵lei, kaimanako, mo se uiga ita fakamoemoe kae se loto fakamagalo. E se pelā mo te vaegā loto telā e seai ne uiga aoga i ei, a te alofa telā e ma‵nako tatou o ati aka “e se salasala ki mea mō tena ‵lei eiloa.”​—1 Koli. 13:4-8.

FAKAAKOAKOGA O TE ALOFA NE FAKAASI MAI NE IEOVA MO IESU

A “Atua ko te alofa.” A te ‵tonuga loa, a Ieova ko te alofa eiloa. (1 Ioa. 4:8) E molimau ana galuega mo ana faifaiga katoa ki tena alofa. A te ‵toe faifaiga sili o tena alofa ki tino ko te ugamaiga o Iesu ke logo‵mae kae mate mō tatou. Ne fai mai te apositolo ko Ioane: “Ne fakaasi mai te alofa o te Atua ki a tatou e auala i te mea tenei, ne uga mai ne te Atua a tena Tama eiloa e tokotasi ki te lalolagi ko te mea ke mafai o maua ne tatou te ola e auala i a ia. Tenei eiloa te alofa, e se ona ko tatou ne a‵lofa ki te Atua, kae ko ia tenā ne alofa mai ki a tatou kae uga mai ne ia tena Tama ke fai mo fai te taulaga mō ‵tou agasala ke faka‵lei aka ei tatou mo te Atua.” (1 Ioa. 4:9, 10) Ona ko te alofa o te Atua, e mafai o maua ne tatou te fakamagaloga, fakamoemoega, mo te ola.

Ne fakamaoni mai ne Iesu tena alofa ki tino mai te faiga mo te loto fiafia ne ia a te loto o te Atua. Ne tusi mai a Paulo: “Fai atu ei a [Iesu]: ‘Kiloke! Tenei au ko vau o fai tou loto.’ . . . Ko oti ne fakatapugina tatou e ‵tusa mo te ‘loto’ o te Atua tenei, e auala i te ofoatuga o te foitino o Iesu Keliso fakatasi mō taimi katoa.” (Epe. 10:9, 10) E seai se tino e mafai o sili atu tena alofa. Ne fai mai Iesu: “E seai se tino e sili atu tena alofa i lō te mea tenei, ko te tuku atu ne se tino a tena ola mō ana taugasoa.” (Ioa. 15:13) E mata, e mafai ne  tatou, tino sē ‵lei katoatoa o fakaakoako ki te alofa ne fakaasi mai ne Ieova mo Iesu? Ke na mafau‵fau tatou ki mea e mafai o fai.

“KE TUMAU I TE SA‵SALE I TE ALOFA”

E fakamalosi mai a Paulo ki a tatou: “Ke fakaakoako koutou ki te Atua, e pelā me ne tama‵liki fagasele, kae ke tumau i te sa‵sale i te alofa, e pelā eiloa mo te alofa o Keliso ki a koutou kae tuku atu tena ola mō koutou.” (Efe. 5:1, 2) E “tumau [tatou] i te sa‵sale i te alofa” māfai e fakaasi atu ne tatou a te uiga tenei i feitu katoa o ‵tou olaga. E fakaasi atu ne tatou a te vaegā alofa penā e auala i faifaiga i lō pati fua. Ne tusi mai a Ioane: “Aku tama, e se ‵tau fua o a‵lofa tatou i ‵tou pati io me ko ‵tou gutu, kae i faiga kolā e fai mo te fakamaoni.” (1 Ioa. 3:18) E pelā me se fakaakoakoga, kafai e sa‵sale tatou i te alofa mō te Atua mo tuakoi, ka fakamalosi aka ei tatou ke fakaasi atu te “tala ‵lei tenei o te Malo” ki a latou. (Mata. 24:14; Luka 10:27) E sa‵sale foki tatou i te alofa māfai e kufaki, atafai, kae loto fakamagalo tatou. Tela la, e fakatonutonu mai te Tusi Tapu ki a tatou: “E pelā eiloa mo te fakamagaloga o koutou ne Ieova, e ‵tau foki mo koutou o fai penā.”​—Ko. 3:13.

Ke se fakatau ‵se ki te vaegā alofa tonu penā mo te alofa valea. E pelā mo te taumafai o fakagata te tagi o se tamaliki, e mafai ne se mātua alofa valea o fakataunu fakavave so se manakoga o tena tama. Kae ko te mātua telā e alofa tonu ki tena tama ka ‵mautakitaki a ia i so se taimi e manakogina. E penā foki loa, a te Atua ko te alofa, kae ‘e polopoloki ne ia a te tino telā e alofa a ia ki ei.’ (Epe. 12:6) Kafai e sa‵sale tatou i te alofa, ka tuku atu foki ne tatou a polopolokiga ‵lei māfai ko ‵tau o fai penā. (Faata. 3:11, 12) E tonu, ke fai penā, e ‵tau o masaua ne tatou me i a tatou foki e agasala kae e mafai o tosina atu ki faifaiga sē a‵lofa. Tela la, e isi eiloa ne feitu kolā e ‵tau o momea aka te ‵lei o tatou i te fakaasiatuga o te alofa. E mafai pefea o fai ne tatou te mea tenei? Ke na mafau‵fau tatou ki auala e tolu.

KE ATI AKA TE ALOFA​—E PEFEA LA?

Muamua, akai atu ki te Atua mō tena agaga, telā e fakamalosi aka ei te alofa. Ne fai mai a Iesu me e tuku atu ne Ieova “te agaga tapu ki a latou kolā e fakamolemole atu e uiga ki ei.” (Luka 11:13) Kafai e ‵talo atu tatou mō te agaga tapu kae taumafai ke “tumau i te sa‵sale i te agaga,” ka momea aka faeloa ‵tou faifaiga a‵lofa. (Kala. 5:16) E pelā mo koe, kafai koe se toeaina i te fakapotopotoga Kelisiano, e mafai o akai atu koe mō te agaga tapu ke fesoasoani mai ko te mea ke mafai o tuku atu ne koe a pati fakatonutonu mai te Tusi Tapu i se auala alofa. Io me kafai koe se mātua, e mafai o fakatagi atu ke fesoasoani atu te agaga o te Atua ki a koe i te polopolokiga o au tama‵liki, i te alofa kae e se i te kaitaua.

A te lua, mafaufau ki te auala ne fakaasi atu ne Iesu te alofa i te taimi ne fakaitaita atu ei ki a ia. (1 Pe. 2:21, 23) E mafai o mafau‵fau ki te fakaakoakoga a Keliso maise eiloa māfai ne seki fia‵fia tatou ki se mea io me fe‵paki mo faifaiga sē fakamaoni. I vaegā taimi penā, a te fesili ‵lei ke ‵sili ifo ne tatou, ‘Ne a mea ka fai ne Iesu?’ Ne iloa ne se tuagane e igoa ki a Leigh me ne fesoasoani atu a te fesili tenei ke mafaufau faka‵lei muamua a ia a koi tuai o gasuesue. Ana muna: “I se taimi e tasi, ne lafo atu ne toku soa galue se meli-iti fakamasei ki a au mo te galuega e fai ne au ki tino e ga‵lue tasi matou. Ne logo‵mae malosi au. Kae ne fesili ifo au, ‘E mafai pefea o fakaakoako atu au ki a Iesu i aku faifaiga ki te tino tenei?’ Mai tua o te mafaufau ki mea ne mafai o fai ne Iesu, ne fakaiku aka ne au ke se saga ki ei kae ke se fakalasilasi foki. Fakamuli ifo, ne iloa ne au me e pokotia toku soa galue i se masaki telā ne fakafi‵ta malosi atu ki tou fafine. Ne fakaiku aka ne au me kāti ne seki fakauiga ne ia a mea kolā ne tusi atu ne ia. A te mafaufau ki te fakaakoakoga a Iesu i te fakaasiatuga o te alofa ke oko foki ki taimi ne fakaitaita ei a ia, ne fesoasoani mai ke fakaasi atu ne au te alofa tai ‵pau ki toku soa galue.” Ao, kafai e fakaakoako atu ki a Iesu, ka gasue‵sue faeloa tatou mo te alofa.

A te tolu, ati aka te uiga ko te alofa sē fakapito, telā ko te fakailoga o Kelisiano ‵tonu. (Ioa. 13:34, 35) E fakamalosi mai te Tusi Tapu ki a tatou i te feitu tenei ke ati aka te “mafaufau” tai ‵pau mo Iesu. I te taimi ne tiaki ne ia te lagi, “ne tiaki ne ia tena tulaga mua” mō tatou ke oko ki  “te mate.” (Fili. 2:5-8) I te fakaakoako atu o tatou ki tena alofa sē fakapito, ka momea aka ei te fai o ‵tou mafaufauga mo lagonaga e pelā mo Keliso, kae ka fakamalosi aka tatou ke fakamuamua a manakoga o nisi tino i lō tatou. Ne a nisi mea aoga e maua mai i te atiakaga o te alofa?

MEA AOGA MAI TE FAKAASIATUGA O TE ALOFA

Kafai e fakaasi atu ne tatou te alofa, ka uke eiloa a mea aoga e maua mai i ei. Mafaufau ki mea e lua konei:

E maua pefea ne tatou a mea aoga mai te fakaasiatuga o te alofa?

  • SE KAUTAINA I TE LALOLAGI KĀTOA: Ona ko te ‵tou fakatau a‵lofa, e iloa ne tatou me faitalia me se a te fakapotopotoga e asi atu tatou ki ei i te lalolagi kātoa, ka talia eiloa tatou mo te fia‵fia ne taina mo tuagane. Ma‵faga o fakamanuiaga ke alofagina tatou ne ‵tou “taina i te lalolagi kātoa”! (1 Pe. 5:9) Tefea foki te koga i tafa o tino o te Atua e mafai o maua i ei se vaegā alofa penā?

  • FILEMU: A te “fakatau fa‵ki i otou mea ‵se i te alofa” e mafai ei o maua ne tatou a “te agaga telā ko te fusi o te filemu.” (Efe. 4:2, 3) E lavea foki eiloa ne tatou a te filemu tenei i fakatasiga a ‵tou fakapotopotoga, tamā fono, mo fono ‵lasi. E a, e se lotomalie koe me e tu ‵kese eiloa te filemu tenā i te lalolagi mavae‵vae i aso nei? (Sala. 119:165; Isa. 54:13) Mai te tausiga o te filemu mo nisi tino, e fakaasi atu ei ne tatou te ‵poko o te ‵tou a‵lofa ki a latou, telā e fakafiafia atu ki te ‵tou Tamana faka-te-lagi.​—Sala. 133:1-3; Mata. 5:9.

‘E ATI AKA NE TE ALOFA TE TINO’

Ne tusi mai a Paulo: “Te alofa e ati aka ne ia te tino.” (1 Koli. 8:1) E fai pefea ne te alofa te mea tenei? I te mataupu e 13 o te tusi muamua a Paulo ki te kau Kolinito—telā ne taku ki te “Salamo o te Alofa”—ne fakamatala mai ne te apositolo a te auala e ati aka ei te alofa. E tasi mai i ei, e ‵sala atu ki mea e ‵lei ei te suā tino. (1 Koli. 10:24; 13:5) I tafa i ei, ona ko te alofa e mafaufau ki nisi tino, mafaufau faka‵lei, kufaki, atafai, e ati aka io me fakamaoni aka ne ia a kāiga mo fakapotopotoga fealofani.​—Ko. 3:14.

A te ‵tou a‵lofa ki te Atua ko te ‵toe alofa tafasili eiloa i te tāua kae fakamalosi loto. E fai ne te vaegā alofa tenā ke fealofani a tino mai kāiga, telega, mo ‵gana katoa i te ‵kau fakatasi mo te fia‵fia o tavini atu ki a Ieova “tuauma ki tuauma.” (Sefa. 3:9) Ke na fakaiku aka ne tatou ke fakaasi atu te vaega tāua tenei o te fuataga o te agaga tapu o te Atua i aso katoa.

^ pala. 2 Tenei te mataupu muamua o mataupu e iva kolā ka fakamatala mai i ei a uiga takitasi, io me ko feitu kese‵kese o fuataga o te agaga.