Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Aokuso 2017

 MAI ‵TOU FALE TUSI

“Ka Toe Fai Māfea te Fono a Tatou?”

“Ka Toe Fai Māfea te Fono a Tatou?”

KO TE fakaotiotiga o Novema 1932 i te Fa‵kai o Mekisiko. I se vaiaso fua mai mua atu i ei, ne lavea atu a mōli muamua eiloa o auala i te fa‵kai tenei e nofo ki te miliona tupu o tino i ei. Kae nei la, ko gasolo o matafitafi atu a te tala tenā ki mōli o auala. Ko faka‵saga atu a te kau fai tala o te fa‵kai ki te suā mea e fai i te vaiaso tenei. Ne toka latou mo mea pei ata vitio, e ‵nofo atu latou i koga faka‵tu tuleini, kae fakatalitali ki te oko mai o se malo fakapito—Joseph F. Rutherford, ko te pelesitene o te Watch Tower Society. Ne ‵nofo atu foki a Molimau mai i konā mo te loto fia talimalo atu ki te Taina ko Rutherford, telā ne fanatu o kau atu ki te lotou fono i aso e tolu i konā.

“E seai se fakalotolotolua,” ne fai mai The Golden Age, “me ka fai eiloa te fono tenei mo fai te ‵toe mea tāua ne tupu i tala mua i te gasolo atu ki mua o te Munatonu i te malo o Mekisiko.” Kae se a te mea ne fakaofoofogia ei a te fono tenei, telā ne ‵kau atu fua ki ei a tino e toko 150?

Mai mua atu i ei, ne mu‵tana fua a fuataga o te Malo i Mekisiko. Talu mai te 1919, ne fai a tamā fono, kae ne gasolo ifo faeloa ki lalo te aofaki o fakapotopotoga i tausaga katoa. A te ‵talaga o te ofisa lagolago i te Fa‵kai o Mekisiko i te 1929 ne foliga ‵lei mai eiloa. Kae e isi ne mea ne fakalavelave atu. I te taimi ne fakatonu atu ke fakagata te palu tasi o faifaiga fakapisinisi mo te galuega talai, ne taofi aka ne se tino talai kaitaua tena kau atu kae fakatu aka eiloa ne ia tena potukau sukesuke ki te Tusi Tapu. E seki leva, kae ne aofia a te ovasia o te ofisa lagolago i se amioga sē Kelisiano kae ne ‵tau o sui a ia. Ne manakogina ne Molimau fakamaoni i Mekisiko a fakamalosiga i te feitu faka-te-agaga.

I te taimi o tena asiga, ne tuku atu ne te Taina ko Rutherford a fakamalosiga e uke ki tino fakamaoni konei, mai te faiatuga o lāuga fakamalosi loto e lua mo lāuga tāua e lima i letio. Mō te taimi muamua, ne fakasalalau atu ei ne letio i Mekisiko a te tala ‵lei i te fenua kātoa. Mai tua o te fono, ne fakatoka ne se ovasia fou telā ne ‵tofi ne te ofisa lagolago a te galuega, kae ne olo atu ei a Molimau loto finafinau kolā ne toe faka‵fou aka olotou malosi fakatasi mo te fakamanuiaga a Ieova.

Te fono i te 1941, i te Fa‵kai o Mekisiko

I te tausaga mai tua ifo, ne fai ei a fono e lua i te fenua, e tasi i te fa‵kai o te taulaga i Veracruz kae e tasi i te Fa‵kai o Mekisiko. Ne kamata eiloa o ‵sae mai a ikuga ‵lei mai i galuega e uke ne fai i te galuega talai. I te 1931 e toko 82 a tino talai. I se sefulu tausaga mai tua ifo, ne sili atu i te sefulu taimi te tokouke! Ne olo atu ki te Fa‵kai o Mekisiko a tino e nofo ki te toko 1,000 mō te Fono Faka-te-Atua i te 1941.

“NE ‵FONU A AUALA I TINO E TOKOUKE”

I te 1943, ne fakatoka ne Molimau a fakailoga laupapa e lua ke fakasalalau atu ei te Fono Faka-te-Atua “sē ‵Togi i te Fenua” telā ka fai i fa‵kai e 12 o Mekisiko. *  E fakatau‵tau a laupapa e lua i tuauma, e tasi i mua kae e tasi mai tua, se auala fakasalalau ne fakaaoga ne te kau Molimau talu mai te 1936.

Se vaega mai i te mekesini i te 1944 telā e fakaasi atu a te māti atu mo fakailoga i te Fa‵kai o Mekisiko

Ne fai mai te mekesini ko te La Nación e uiga ki te iku manuia o te māti atu mo fakailoga i te Fa‵kai o Mekisiko: “I te aso muamua o te [fono], ne fai atu ki te [kau Molimau] ke ‵kami mai a tino e tokouke atu. I te aso mai tua ifo, ne ‵fonu maligiligi eiloa te koga ne fai ei te fono.” Ne seki fakafiafia atu a te faiga o māti konei ki te Lotu Katolika, telā ne takitaki ne latou se galuega o ‵teke atu ki te kau Molimau. Faitalia a ‵tekemaiga, ne tumau eiloa a taina mo tuagane e aunoa mo te ma‵taku i auala. Ne lipoti mai foki te La Nación: “Ne lavea ne te fa‵kai kātoa a latou . . . tāgata—mo fāfine—ne ‵fuli ki fakailoga fakasalalau.’” E maua atu i te mataupu tenā se ata o taina i auala o te Fa‵kai o Mekisiko. Mai lalo o te ata, ko te fakamatalaga o te ata: “Ne ‵Fonu a Auala i Tino e Tokouke.”

“NE MALŪ‵LU KAE MAFANAFANA ATU A MOEGA I LŌ TE FOLA SAMENI”

I tausaga konā, ne talia ne te tokoukega o Molimau a mea faiga‵ta ko te mea ke ‵kau atu latou ki nai fono i Mekisiko. Ne olo atu a sui e tokouke ki te fono mai i fa‵kai ‵mao, kolā e seai ne tuleini e oko ki ei io me ne auala. Ne tusi mai te fakapotopotoga e tasi, “A te mea fua e tasi e fakatele atu i te koga tenei ko te laina aveave fekau.” Tela la, ne ‵tau o ‵tele atu a sui i luga i asini io me sa‵sale atu i nai aso ke oko atu ki se koga e maua atu se tuleini telā e mafai o olo atu ei latou ki te fono i te fa‵kai.

Ne ma‵tiva a te tokoukega o Molimau, toeitiiti ko se mafai o ‵togi a te auala fua e tasi ki te fono. I te taimi ne oko atu ei, ne ‵nofo a tino e tokouke mo Molimau i te fa‵kai, kolā ne ‵tala atu olotou fale mo te a‵lofa ki olotou taina. Ne ‵moe a nisi tino i Fale Tapuaki. I te taimi e tasi, kāti e nofo ki te 90 o sui ne ‵nofo i te ofisa lagolago, telā ne “fakatoka a pokisi tusi e 20 mo fai olotou moega.” Ne fai mai te tala i te Yearbook me ne mafau‵fau a mālō loto fakafetai konei me “ne malū‵lu kae mafanafana atu a moega i te fola sameni.”

E seai se fakalotolotolua me ne mafau‵fau a Molimau loto fakafetai konei me ne aoga eiloa a mea faiga‵ta katoa ne talia ne latou ona ko te maopoopoga fakafiafia i fono faka-Kelisiano. I aso nei, i te taimi e gasolo aka eiloa ki te tasi miliona a te aofaki o tino talai, koi tumau eiloa te loto fiafia tenā. * Ne fai mai se lipoti o te ofisa lagolago mai Mekisiko e uiga ki taina: “Ne seki fakavāivāi ne taimi faiga‵ta te lotou loto fiafia Faka-te-Atua me ne fai eiloa mo fai te mataupu tāua ne sau‵tala ki ei i fono takitasi mō se taimi leva mai tua o te fono tenā kae ne fesili atu faeloa a taina Kelisiano, Ka Toe Fai Māfea te Fono a Tatou?” E ‵pau eiloa a mea kolā e fakaasi mai i te lipoti tenā mo aso nei.​—Mai ‵Tou Fale Tusi i Amelika ki te Kogaloto.

^ pala. 9 E ‵tusa mo te 1944 Yearbook, ne fai ne te fono tenei “ke lauiloa a molimau a Ieova i Mekisiko”

^ pala. 14 I Mekisiko, ne ‵kau atu a tino e toko 2,262,646 ki te Fakamanatuga i te 2016.