Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga (Lōmiga mō Sukesukega)  |  Aokuso 2017

Ke Fakapei Kae Fakatumau a Uiga ‵Fou

Ke Fakapei Kae Fakatumau a Uiga ‵Fou

“Ke fakapei ki luga i a koutou a uiga ‵fou.”​—KO. 3:10.

PESE: 126, 28

1, 2. (a) Kaia e mafai eiloa o fakapei ki luga i a tatou a uiga ‵fou? (e) Ne a uiga ‵fou ne fakamau i te Kolose 3:10-14?

“UIGA ‵fou.” E sae fakalua mai a te tugapati tenā i te New World Translation of the Holy Scriptures. (Efe. 4:24; Ko. 3:10) E fakasino atu ki se uiga telā “ne faite e ‵tusa mo te loto o te Atua.” E mafai eiloa o ati aka ne tatou a uiga ‵fou penā. Kaia? Me ne faite ne Ieova a tino ki tena fakatusa telā e mafai ne tatou o fakaasi atu ana uiga ‵gali.​—Kene. 1:26, 27; Efe. 5:1.

2 E tonu, ona ko te mea ne togi mai ne ‵tou mātua muamua a te tulaga sē ‵lei katoatoa, ko pokotia tatou i manakoga ma‵sei. E mafai foki o uke a fakamalosiga mai i te koga e ‵nofo tatou i ei. Kae fakatasi mo te fesoasoani o te alofa fakamagalo o Ieova, ko mafai ei o manumalo tatou i te fai mo fai ne tino e manako a ia ki ei. Ke fakamalosi aka ‵tou manakoga ke kausaki atu ki te fakamoemoega tenā, ka mafau‵fau tatou ki nai uiga ‵fou kolā ne fakaosofia a te apositolo ko Paulo ke tusi mai e uiga ki ei. (Faitau te Kolose 3:10-14.) Ka mafau‵fau foki tatou ki te auala e mafai o fakaasi atu ne tatou a uiga konei i te ‵tou galuega talai.

 “KOUTOU KO TASI KATOA”

3. Se a te vaega e tasi o uiga ‵fou?

3 Mai tua o te fakamalosimaiga ke fakapei ki luga i a tatou a uiga ‵fou, ne toe fakamatala mai ne Paulo a te sē fakailoga tino e pelā me se vaega tu ‵kese o uiga ‵fou. Ne fai mai a ia: “E seai se tino Eleni io me se tino Iutaia i konei, se tino pilitome io me se tino seki pilitome, se tino fakaalofa, se tino Sekutia, se pologa, se tino saoloto.” * I loto i te fakapotopotoga, kaia e se ‵tau ei o isi se fakakese‵kesega i telega, fenua, io me ko tulaga i te olaga? Me i soko ‵tonu katoa o Keliso “ko tasi katoa.”​—Ko. 3:11; Kala. 3:28.

4. (a) E ‵tau o pefea a faifaiga a tavini a Ieova ki nisi tino? (e) Se a te tulaga e mafai o fakafaigata aka ei te fealofani o Kelisiano?

4 A latou kolā e ‵pei ki uiga ‵fou e atafai faka‵lei ne latou a taina tali‵tonu mo tino mai tua, faitalia olotou tulaga i te olaga io me ko telega. (Loma 2:11) E mafai o faigata ‵ki te mea tenei i nisi koga o te lalolagi. E pelā mo Afelika ki Saute, koi ‵nofo atu eiloa a te tokoukega o Molimau i koga ne fakatoka fakapito loa mo olotou matakāiga—koga o tino mau‵mea, fa‵kai o tino uli, io me ko koga ne ‵nofo ei a tino valevale. Tela la, ke fakamalosi atu ki ‵tou taina ke ‘‵tala aka olotou loto ke ma‵tala ‵lei,’ ne talia ei ne te Potukau Pule i a Oketopa 2013 ke fai se fakatokaga fakapito ke fesoasoani atu ki taina ke momea aka te masani ‵lei o te suā tino ki te suā tino. (2 Koli. 6:13) Ne a mea ne aofia i ei?

5, 6. (a) Ke fakamalosi aka te fealofani o tino o te Atua i se fenua e tasi, ne a fakatokaga ne fai? (Onoono ki te ata i te kamataga.) (e) Ne a mea ne iku mai i ei?

5 Ne fai a fakatokaga mō fakapotopotoga e lua mai ‵gana kese‵kese io me ko telega ke ‵kau fakatasi i nisi fakaotiga o vaiaso. E ‵kau fakatasi a taina mo tuagane mai fakapotopotoga konā i te galuega talai, fakatasiga, kae oti ko ‵kai fakatasi latou i fale o tino taki tokotasi. Ne aofia eiloa te fia selau o fakapotopotoga i ei, kae ne maua ne te ofisa lagolago a lipoti ‵lei e uke e uiga ki te fakatokaga tenei, ke oko foki eiloa ki tino mai tua. E pelā mo te faifeau e tokotasi ne otia tena loto kae fai mai, “Au e sē se Molimau, kae fai atu au me e fai eiloa ne koutou te galuega talai i se auala telā ne fakatoka faka‵lei, kae e fealofani eiloa a tino mai telega kese‵kese.” Ne pokotia pefea a te kau Molimau i te fakatokaga tenei?

6 Muamua la, ne fakatalave se tuagane e faipati i te ‵gana Xhosa ki te ‵kami atu o taina ‵kena mai i se fakapotopotoga palagi ki tena fale telā e se na loa ko ‵lei. Kae mai tua o te ‵kau fakatasi mo Molimau ‵kena i te galuega talai kae ‵kai i olotou fale, ne fai mai tou fafine, “A latou ne tino masani eiloa e pelā mo tatou!” Tela la, i te taimi ne oko atu ki te avanoaga ke fakatoka ne te fakapotopotoga Xhosa a mea‵kai ki te fakapotopotoga palagi, ne fakatoka ne ia ne mea‵kai kae ‵kami mai a nai tino. Ne aofia i ana mālō se toeaina ‵kena. Ne fai mai a Noma, “Ne ofo au me ne loto fiafia a ia ke sagasaga i se koga e pili ki te fola i luga i potu laupapa e kofu ki palasitiki.” Ona ko te fai faeloa o te fakatokaga tenei, ne maua ne taina mo tuagane e tokouke a taugasoa ‵fou kae fakaiku aka ke tumau te aofia o nisi tino i olotou maopoopoga.

“LAGONAGA ALOFA ATAFAI, ATAFAI”

7. Kaia e manakogina faeloa ke fakaasi atu te alofa atafai?

7 Ke oko eiloa ki te taimi e fakaseai atu ei te lalolagi a Satani, ka fe‵paki faeloa tatou mo tofotofoga faiga‵ta. E fe‵paki tatou mo te seai o se galuega ‵togi, masaki ‵lasi, fakasauaga, fakalavelave o te natula, ‵galo atu o kope ona ko amioga solitulafono, io me ko nisi tulaga faiga‵ta. Ke fakatau fesoasoani i ‵tou logo‵maega io me ko puapuaga, e ‵tau o maua ne tatou se lagonaga alofa atafai tonu. Ka fakamalosi aka tatou ne lagonaga alofa atafai ke gasue‵sue mo te atafai. (Efe. 4:32) Ka fesoasoani  mai a uiga ‵fou konei ke fakaakoako atu tatou ki te Atua kae fakamafanafana atu foki ki nisi tino.​—2 Koli. 1:3, 4.

8. Ne a ikuga ‵lei e mafai o maua māfai e fakaasi atu ne tatou a te alofa atafai mo te atafai ki tino katoa i te fakapotopotoga? Tuku mai se fakaakoakoga

8 E fakaasi atu pefea ne tatou a te momea aka o te ‵tou mafau‵fau ki tino fakaa‵lofa io me ko tino sē katoatoa i ‵tou fakapotopotoga? E ‵tau o fakamasani tatou ki tino penā kae fesoasoani atu ke iloa ne latou me i a latou ne vaega tāua o te fakapotopotoga. (1 Koli. 12:22, 25) Mafaufau ki te mea ne tupu ki a Dannykarl telā ne fanatu mai i Filipaina ki Tiapani. I tena koga galue, ne seki fai faka‵lei a ia ne tino ga‵lue. Ne kau atu a ia ki se fakatasiga a Molimau a Ieova. “Toeitiiti ko tino katoa i ei ne tino Tiapani,” ko muna a Dannykarl, “kae ne fakatalofa mai latou mo te a‵lofa, e pelā me ne masani mua matou.” Ne fakaasi atu faeloa ki a ia a faifaiga atafai, telā ne fesoasoani atu ke gasolo atu ki mua i te feitu faka-te-agaga. Ne papatiso tou tagata, kae ko tavini atu i aso nei e pelā me se toeaina. Ne ‵kilo atu ana taina toeaina ki a Dannykarl mo tena avaga, ko Jennifer, e pelā me se fakamanuiaga ki te fakapotopotoga. Ne fai mai a toeaina e uiga ki a lāua, “Ne ola lāua i se olaga faigofie ‵ki e pelā me ne paenia kae fai ne lāua te ‵toe fakaakoakoga ‵lei i te ‵sala muamua atu ki te Malo.”​—Luka 12:31.

9, 10. Tuku mai ne fakaakoakoga o fakamanuiaga mai i te fakaasi atu o te alofa atafai i te galuega talai.

9 Kafai e fakaasi atu ne tatou a te fekau o te Malo ki nisi tino, e maua ne tatou se avanoaga ‵lei ke “fai a mea ‵lei mō tino katoa.” (Kala. 6:10) Ona ko te alofa atafai ki tino mai nisi fenua, e taumafai a Molimau e tokouke ke tauloto ki se ‵gana fou. (1 Koli. 9:23) Ne iku atu te mea tenei ki fakamanuiaga e uke. E pelā me se tuagane paenia i Ausetalia e igoa ki a Tiffany, ne tauloto ki te ‵gana Swahili ke fesoasoani atu ki se fakapotopotoga i te ‵gana Swahili i te fa‵kai o Brisbane. E tiga eiloa ne faigata a te tauloto ki te ‵gana ki a Tiffany, ne fakamanuiagina eiloa tena olaga. Ana muna: “Kafai e manako koe ke fiafia i te galuega talai, ke tavini atu i se fakapotopotoga i se ‵gana fakaatea. E pela eiloa mo te faimalaga atu e aunoa mo te tiaki o tou fa‵kai. E mafai o maua ne koe se lagonaga me ko aofia koe i te ‵tou kautaina i te lalolagi kātoa kae lavea atu foki i se auala fakavavega a te lotou fealofani.”

Se a te mea e fakamalosi atu ki faifeau Kelisiano ke fesoasoani atu ki tino mai nisi fenua? (Onoono ki te pakalakafa e 10)

10 Mafaufau ki te fakaakoakoga o se kāiga i Tiapani. Ne fai mai a Sakiko, te tama fafine: “I tausaga talu mai te 1990, ne masani o fetaui matou mo tino mai Pasili i te galuega talai. I te taimi ne fakaasi atu ne matou a tusi fai‵tau i te lotou Tusi Tapu Potukale, e pelā mo te Fakaasiga 21:3, 4 io me ko te Salamo 37:10, 11, 29, ne ‵saga faka‵lei mai latou kae i nisi taimi e ‵sali ifo olotou loimata.” Kae ne seki gata eiloa i konā a te alofa atafai o te kāiga. “I te taimi ne  lavea ne matou a te lotou fia‵kai i te feitu faka-te-agaga,” muna Sakiko, “ne kamata o tauloto matou ki te ‵gana Potukale e pelā me se kāiga.” Fakamuli ifo, ne fesoasoani atu te kāiga ki te fakatuakaga o te fakapotopotoga i te ‵gana Potukale. I te fia o tausaga, ne fesoasoani atu faeloa te kāiga ki tino ‵fou mai nisi fenua ke fai mo tavini a Ieova. “E uke ‵ki a mea e ‵tau o fai ke tauloto ki te ‵gana Potukale,” ne toe fai mai a Sakiko, “kae uke fakafia atu a fakamanuiaga i lō taumafaiga ne fai ki ei. E lasi eiloa te motou fakafetai ki a Ieova.”​—Faitau te Galuega 10:34, 35.

“FAKAPEI KI LUGA I A KOUTOU . . . TE LOTO MAULALO”

11, 12. (a) Kaia e tāua ‵ki ei a lagonaga ‵lei mō te fakapeiga ki luga i a tatou a uiga ‵fou? (e) Se a te mea ka fesoasoani mai ke tumau tatou i te loto maulalo?

11 E ‵tau o fakaaloalo atu ki a Ieova a ‵tou lagonaga ‵lei mō te fakapei ki luga i a tatou a uiga ‵fou, kae e se ko te fia maua o tavaega mai i tāgata. Masaua me ne agasala foki se tino faka-te-agaga ‵lei katoatoa me ne talia ne ia te uiga fakamatamata. (Fakatusa ki te Esekielu 28:17.) E pefea te faigata atu ke ‵kalo keatea a tino agasala mai i te fakamatamata sē ‵tau mo te fakamaualuga! Kae koi mafai eiloa o fakapei ki luga i a tatou a te loto maulalo. Se a te mea ka fesoasoani mai ke fai tatou penā?

12 Ke tumau i te loto maulalo, e ‵tau o fakaavanoa ne tatou a taimi ke mafaufau ‵loto i aso katoa ki mea e faitau ne tatou i te Muna a te Atua. (Teu. 17:18-20) Kae maise eiloa te tāua ke mafau‵fau ki akoakoga a Iesu mo tena fakaakoakoga gali i te tavini atu mo te loto maulalo. (Mata. 20:28) Ne ‵fulu foki ne Iesu a vae o ana apositolo. (Ioa. 13:12-17) E ‵talo faeloa foki tatou mō te agaga o te Atua ke fesoasoani mai ki a tatou ke ‵teke atu ki so se manakoga fia maluga atu i nisi tino.​—Kala. 6:3, 4; Fili. 2:3.

13. Ne a taui e maua mai i te tumau i te loto maulalo?

13 Faitau te Faataoto 22:4. E manakogina ke maua ne tino tapuaki ‵tonu katoa a te loto maulalo kae maua i ei a taui tafasili i te ‵gali. Ka fesoasoani mai a te tumau i te loto maulalo ke fakamalosi aka ei a te filemu mo te fealofani i te fakapotopotoga. A te atiakaga mo te fakamalosiakaga o te loto maulalo ka mafai ei o fakaasi mai ki a tatou a te alofa tauanoa o te Atua. Ne fai mai te apositolo ko Petelu: “Ke fakapei ki luga i a koutou katoa te loto maulalo i otou faifaiga te suā tino ki te suā tino, me e ‵teke ne te Atua a tino fakamata‵mata, kae e tuku atu ne ia te alofa tauanoa ki tino loto mau‵lalo.”​—1 Pe. 5:5.

“FAKAPEI KI LUGA I A KOUTOU . . . TE AGAMALU . . . MO TE KUFAKI”

14. I ai te ‵toe fakaakoakoga ‵lei i te fakaasimaiga o te agamalu mo te kufaki?

14 I te lalolagi i aso nei, e masani o ‵kilo atu ki tino agamalu kae kufaki e pelā me ne tino ‵seva. Ko oko eiloa i te ‵se o te vaegā fakamatalaga tenā mai i te munatonu! Ne maua eiloa a uiga ‵gali konei mai te ‵toe Tino malosi eiloa i te iunivesi. A Ieova te Atua ko te ‵toe fakaakoakoga ‵lei i te fakaasiatuga o te agamalu mo te kufaki. (2 Pe. 3:9) Mafaufau ki te auala ne saga atu ei a ia e auala i se agelu telā ne sui atu ne ia a ia i te taimi ne fai atu ei a fesili a Apelaamo mo Lota ki a ia. (Kene. 18:22-33; 19:18-21) E nofo foki ki se 1,500 tupu tausaga ne kufaki ei a Ieova i te fenua faigata o Isalaelu.​—Eseki. 33:11.

15. Se a te fakaakoakoga ne tuku mai ne Iesu i te fakaasiatuga o te agamalu mo te kufaki?

15 A Iesu e uiga “filemu.” (Mata. 11:29) Ne fakaasi atu ne ia te kufaki lasi mai te fa‵ki i vāivāiga o ana soko. I tena galuega kātoa i te lalolagi, ne kufaki a Iesu i fakamaseiga sē ‵lei mai i tino lotu ‵teke. Kae ne fakaasi atu ne ia te agamalu mo te kufaki ke oko foki loa ki tena tamatega i se auala sē tonu. E tiga eiloa ne tigaina malosi a ia i tena mate fakalogo‵mae i luga i te pou fakasaua, ne ‵talo atu a Iesu ki tena Tamana ke fakamagalo atu a tino kolā ne tamate ne latou a ia, me e pelā mo ana pati, “e se iloa  ne latou te lotou mea tenei e fai.” (Luka 23:34) Ko oko eiloa i te fakaofoofogia o te fakaakoakoga tenā o te agamalu mo te kufaki mai lalo i fakanofonofoga fakalogo‵mae kae fakafanoanoa!​—Faitau te 1 Petelu 2:21-23.

16. Se a te auala aoga e mafai o fakaasi atu ne tatou a te agamalu mo te kufaki?

16 E fakaasi atu pefea ne tatou a te agamalu mo te kufaki? Ne taku mai ne Paulo se auala e tasi i te taimi ne tusi atu ei a ia ki ana taina tali‵tonu: “Ke fakatau fa‵ki faeloa koutou i a koutou eiloa kae fakatau fakamagalo atu te suā tino ki te suā tino māfai e isi se pogai e fameo ei se tino ki te suā tino. E pelā eiloa mo te fakamagaloga o koutou ne Ieova, e ‵tau foki mo koutou o fai penā.” (Ko. 3:13) A te ‵tonuga loa, e manakogina a te agamalu mo te kufaki ke faka‵logo ki te fakatonuga tenei. Kae mai i te loto fakamagalo, e fakamalosi kae fakatumau ne tatou a te fealofani i te fakapotopotoga.

17. Kaia e tāua ei a te agamalu mo kufaki?

17 A te fakapei ki luga i a tatou a te agamalu mo te kufaki se mea loa e ‵tau o fai ne se Kelisiano. E aoga ‵ki ki te ‵tou fakaolataga. (Mata. 5:5; Iako. 1:21) E sili atu i ei, e auala i uiga konei, e fakaaloalo atu ei tatou ki a Ieova kae fesoasoani atu ki nisi tino ke faka‵logo ki pati fakatonutonu i te Tusi Tapu.​—Kala. 6:1; 2 Timo. 2:24, 25.

“FAKAPEI KI LUGA I A KOUTOU A TE ALOFA”

18. Se a te sokoga i te va o te alofa mo te sē fakailoga tino?

18 A uiga katoa konei ne sau‵tala tatou ki ei e isi eiloa se lotou sokoga pili mo te alofa. E pelā mo te soko ko Iakopo, ne ‵tau o polopoloki ne ia ana taina mō te fai faka‵lei ki tino mau‵mea i lō tino ma‵tiva. Ne fakaasi atu ne ia me i vaegā amioga penā e ‵teke atu ki te tulafono fakatupu: “E ‵tau mo koe o alofa ki tou tuakoi e pelā mo koe ki a koe eiloa.” Kae ne toe fai mai a ia: “Kae kafai e tumau koutou i te fakailoga tino, ko agasala ei koutou.” (Iako. 2:8, 9) E ‵kese mai i ei, ka fakamalosi aka tatou ne te alofa ke ‵kalo keatea mai i so se fakakese‵kesega o tino telā e fakavae ki mea tau akoakoga, telega, io me ko tulaga i te olaga. A te ‵tonuga loa, e ‵tau eiloa o fakaasi ‵tonu atu a te sē fakailoga tino. E ‵tau eiloa o fai mo fai se vaega tonu o ‵tou uiga.

19. Kaia e tāua ei ke fakapei ki luga i a tatou a te alofa?

19 A alofa foki “e kufaki kae kaimalie” kae “e se ‵fonu i te fakamatamata.” (1 Koli. 13:4) E manakogina tonu eiloa a te kufaki, atafai, mo te loto maulalo ke tumau i te fakaasi atu ne tatou a te fekau o te Malo ki ‵tou tuakoi. (Mata. 28:19) E fai ne uiga konei ke momea aka te faigofie ke ‵nofo fealofani mo taina mo tuagane katoa i te fakapotopotoga. Se a te taui o te fakaasi atu o te vaegā alofa tenā? E ati aka ei a fakapotopotoga fealofani kolā e fakaata faka‵lei atu i ei a Ieova kae fai a tino fia‵fia ‵fou ke tosina atu ki ei. Se mea ‵lei me ne fakaoti te fakamatalaga a te Tusi Tapu ki uiga ‵fou ki te munatonu tāua tenei: “Kae i tafa o mea katoa konei, ke fakapei ki luga i a koutou a te alofa, me tenā eiloa te fusi ‵lei katoatoa telā e fai ei ke ‵kau fakatasi a tino.”​—Ko. 3:14.

“TUMAU KOUTOU I TE FAKA‵FOUGA”

20. (a) Ne a fesili e ‵tau o ‵sili ifo ne tatou, kae kaia? (e) Se a te taimi e olioli eiloa tatou ki ei?

20 E ‵tau mo tatou taki tokotasi o fesili ifo, ‘Ne a nisi mea e mafai o fai ne au ke tapale kae ‵pei keatea oku uiga mua?’ E ‵tau o ‵talo malosi atu faeloa ki te fesoasoani o te Atua kae taumafai malosi ke manumalo i so se uiga io me se faifaiga telā ka puipui ei tatou mai i te ulu atu ki te Malo o te Atua. (Kala. 5:19-21) E ‵tau foki o fesili ifo tatou, ‘E mata, ka tumau eiloa au i te fakafouga o toku mafaufau?’ (Efe. 4:23, 24) A te fakapeiga mo te fakatumauga o uiga ‵fou se faifaiga telā e ‵tau o fai faeloa ne Kelisiano katoa ke oko ki te taimi ko mafai ei o katoatoa te faiga tenā. Mafaufau la ki te gali o te olaga māfai ko ‵lei katoatoa a te fakapeiga ne tino katoa kolā e iloa ne tatou a uiga ‵fou!

^ pala. 3 I taimi o te Tusi Tapu, ne ‵kilo fatauva atu ki tino Sekutia e pelā me ne tino masani.