Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga  |  Napa 1 2016

 MATAUPU I TE ‵KAVA | KAIA E ‵TAU EI O FAKAMAONI?

E Mata, ko se Aoga a te Fakamaoni?

E Mata, ko se Aoga a te Fakamaoni?

Ne galue a Hitoshi i se ofisa o mea tau tupe i se pisinisi lasi i Tiapani. I te taimi ne onoono fakatasi ei lāua mo tena pule ki se lipoti i mea tau tupe, ne fai atu ei ki a Hitoshi me ne ‵tau o fai ne ia se lipoti fakaloiloi. Ne fakamatala atu ne Hitoshi me e se talia ne tena loto lagona ke se fakamaoni a ia i tena galuega. A ko te ikuga, ne fakamatakutaku atu te pule o Hitoshi me ka fakatea a ia, kae ne iku atu ki te galo atu o tena galuega.

I nai masina mai tua ifo, ne loto vāivāi a Hitoshi ona ko ana fakamoemoega ke maua sena galuega. I se fakasautalaga e tasi ki se galuega, ne taku atu ne Hitoshi me e se mafai o aofia a ia i galuega sē fakamaoni. Ne tali atu a te tino fakasautala, “E fou ki a au a te auala e mafaufau ei koe!” Ne fakamalosi atu a kāiga o Hitoshi mo ana taugasoa ke tumau a ia i tena fakaikuga ke fakamaoni, kae e tiga te feitu tenā, ne kamata o fakalotolotolua a tou tagata. E pelā mo te taimi e tasi, ne fai mai tou tagata, “Ne fakalotolotolua au ki toku fakamaoni ki te mea ko iloa ne au me se mea ‵lei io me ikai.”

A te mea ne fepaki mo Hitoshi e fakamasaua mai me e se fakatāua ne tino katoa a te fakamaoni. A ko te ‵tonuga loa, e ‵kilo atu a nisi tino ki ei e pelā me se fakalavelave, maise eiloa i mea tau pisinisi. Ne fai mai se fafine galue i Afelika ki Saute, “E sikomia au ne tino sē fakamaoni, kae i nisi taimi e lasi ‵ki te fakamalosiga ke ‵lago atu au ki a latou.”

A te vaega e tasi o te sē fakamaoni telā ko salalau i te lalolagi i aso nei ko te loi. I tausaga ko ‵teka, e isi se sukesukega a se tino poto i mea tau te mafaufau ko Robert S. Feldman mai te University of Massachusetts Amherst ne talitonu a ia me e ‵tusa mo te 60 pasene o tino ma‵tua e ‵loi kāti fakatasi i se sautalaga telā e 10 minute te leva. Ne fai mai a Feldman, “Ko oko eiloa i te fakaofoofogia o te ikuga ne maua. Ne seki fakamoemoe matou me i te loi se vaega masani i olaga o tino.” E mata, e se fou ke iloa atu me tokouke a tino e takalialia māfai ko fakaloiloigina latou kae tela la e tokouke atu a tino e ‵loi?

Kaia ko fai ei a te loi, te kaisoa mo nisi vaega o te sē fakamaoni ko fai pelā me ne mea masani i aso nei? E pokotia pefea a tino kātoa i te sē fakamaoni? Kae ko te ‵toe mea tāua, e mafai pefea o ‵kalo kea‵tea tatou mai faifaiga sē fakamaoni?